Hao Dae Affectim Pipol
“GELE WEA SIX YEAR HEM SUISAED.” Disfala niuspepa heding wea mekem man seke hem abaotem dae bilong wanfala smol gele wea nem bilong hem Jackie. Mami bilong hem just dae from bigfala sik. Bifor Jackie hem jamp front long wanfala train for killim hemseleva dae, hem talem olketa brata and sista bilong hem hao hem laek for ‘kamap wanfala angel and stap witim mami bilong hem.’
Ian hem 18 year taem hem barava askem priest for explainim why nao dadi bilong hem dae from cancer. Datfala priest sei dadi bilong Ian hem gudfala man so God laekem hem for stap long heven. Bihaen hem herem datwan, Ian garem tingting hao hem no laek savve long datkaen God wea no showimaot feeling. From Ian hem ting laef no garem eni mining, hem disaed for aftarem laef wea bae mekem hem hapi. From hem aftarem nomoa hapitaem, hem iusim alcohol, drug, and duim dirty fasin. Evri samting hia kontrolem laef bilong hem.
“Olketa wea Laef Savve Olketa Bae Dae”
Tufala story hia wea mekem man feel sorre showimaot wei wea dae savve barava affectim laef bilong pipol, especially sapos man no expectim. Disfala tru toktok from Bible talem samting wea evriwan savve long hem: “Olketa wea laef savve olketa bae dae.” (Ecclesiastes 9:5) Bat staka pipol no laek for tingim datwan. Waswe long iu? From laef hem busy tumas, and maet iumi tingse bae iumi no dae for longtaem yet, iumi no laek for tingim dae.
The World Book Encyclopedia hem sei: “Staka pipol fraet long dae and trae for no tingim datwan.” Bat, wanfala big accident or sik maet seknomoa mekem iumi for mas feisim dae. Or maet funeral bilong wanfala fren or relative mekem iumi tingim moa disfala samting wea kasem evri man.
Nomata olsem, long olketa funeral staka taem pipol savve sei: “Iumi wea laef mas gohed.” And datwan nao samting wea happen. For tok stret, seke nomoa iumi olo and feisim olketa problem wea kasem olketa olo. Long datfala taem nao iumi tingim hao dae hem samting wea iumi mas feisim. Iumi start for attendim staka funeral, and deal witim wei wea olketa fren wea iumi savve for longtaem, olketa dae. Staka wea olo start for garem tingting olsem: “Ating taem bilong mi for dae klosap tu.”
Wanfala Big Kwestin
Nomata evriwan savve iumi man bae dae, samting wea happen long man bihaen hem dae hem olsem samting wea hard for minim. Staka difren kaen idea wea pipol talem abaotem diswan maet mekem pipol wea garem fasin for daot for ting long diswan olsem iusles samting for raoa abaotem. Man wea garem fasin for acceptim really samting wea happen long laef maet sei from “wantaem nomoa iu laef,” iu shud enjoyim olketa gud samting long laef.
Long narasaed, samfala pipol no laek for bilivim hao dae hem end bilong evri samting. Nomata olsem, olketa no really sure wanem nao happen bihaen man dae. Samfala moa sei laef bae gohed olowe long ples wea pipol bae hapi for olowe, and olketa narawan sei maet olketa bae laef moa olsem difren person long future.
Olketa relative bilong samwan wea dae evritaem askem olketa seleva: “Olketa wea dae finis go long wea?” Tu-thri year go finis, wanfala soccer team gogo insaed wanfala bas for plei long difren ples taem seknomoa wanfala trak hem bangam olketa, and bas hia kapsaet long saed road. Faevfala insaed long datfala team nao dae. Start long day wea son bilong wanfala woman hem dae insaed datfala accident, woman hia faendem hard tumas for duim olketa samting wea hem savve duim evriday. Hem laekem tumas for savve ples wea son bilong hem stap. Hem evritaem visitim grev bilong hem and story long hem for longtaem. Tingting bilong hem olsem: “Hem hard for mi biliv man finis evribit taem hem dae, bat mi no really sure long datwan.”
Tru nao, hao iumi ting long dae savve barava affectim laef bilong iumi distaem. From iumi lukim wei wea dae hem affectim pipol, samfala kwestin kamap. Tingim ansa bilong iu for olketa kwestin olsem: Waswe, iumi shud forget abaotem dae and ting strong long laef? From iumi savve iumi maet dae enitaem, waswe, iumi bae letem datwan spoelem laef bilong iumi? Waswe, olketa relative bae no enitaem savve wea nao datwan wea olketa lovem wea dae finis hem stap? Waswe, dae bae hem samting wea man hard for minim for olowe?