Kwestin From Reader

Sapos wanfala Christian herem olketa voice bat hem no lukim eniwan, waswe datwan evritaem minim olketa demon nao attakim hem?

Nomoa. Nomata iumi herem hao olketa demon savve duim olsem, samfala wea herem olketa voice or kasem samfala kaen feeling wea olketa no savve hao for explainim faendaot bihaen dat olketa garem problem saed long health.

Nomata long first century, pipol luksavve dat samting wea kamaot from olketa attak bilong demon and problem saed long health samfala taem hem luk semsem. Long Matthew 17:14-18 iumi read abaotem wanfala young boy wea Jesus healim. Nomata young boy hia kasem olketa saen wea showimaot klia sik epilepsy, wei wea hem safa hem really kam from wanfala demon. Wanfala taem bifor, staka pipol wea safa kam for Jesus healim olketa, insaed grup hia hem samfala “pipol wea garem demon and wea epileptic.” (Matthew 4:24) Luk olsem, samfala epileptic olketa no garem demon. Problem bilong olketa hem saed long body nomoa.

Report showimaot dat samfala wea safa from schizophrenia, wanfala sik wea man fit for kasem treatment for hem, olketa tu herem olketa voice or kasem samfala samting wea maet luk olsem hem kam from olketa demon.a Samfala sik long body savve kosim mind for konfius, diswan savve mekem samfala for tingse demon nao kosim diswan. Dastawe, taem wanfala man sei hem herem olketa voice or hem garem samfala kaen feeling and hem bilivim hao demon attakim hem, hem shud kasem encouragement for faendaot sapos wanfala health problem nao kosim diswan.

[Footnote]