Wei for Luksavve Long Wild Animal and Mark Bilong Hem

WASWE, iu savve laek faendaot long wanfala samting wea mining bilong hem haed? For kasem ansa, iu bae trae for savve long samfala samting wea bae leadim iu go long ansa. Insaed Word bilong hem, God provaedem staka savve wea iumi needim for savve long mining bilong namba 666​—⁠datfala nem, or mark, bilong wild animal bilong Revelation chapter 13.

Long disfala article, iumi bae lukluk long fofala important point wea bae leadim iumi go long mining bilong mark bilong datfala animal. Iumi bae lukluk long (1) hao olketa chusim samfala Bible nem, (2) wanem nao datfala wild animal, (3) mining bilong wei wea 666 hem “namba bilong man,” and (4) mining bilong namba 6 and why olketa raetem thrifala taem, hem nao, 600 plus 60 plus 6, or 666.​—⁠Revelation 13:⁠18.

Olketa Nem Insaed Bible —⁠No Nem Nating

Planti taem olketa nem insaed Bible garem mining, especially olketa wea God givim. Olsem example, from Abram bae kamap dadi bilong olketa nation, God changem nem bilong datfala laen dadi for kamap Abraham, wea minim “Dadi bilong Staka.” (Genesis 17:​5, footnote) God talem Joseph and Mary for nemem pikinini wea Mary bae bonem Jesus, wea minim “Jehovah Hem Salvation.” (Matthew 1:​21, footnote; Luke 1:​31) For fitim mining bilong datfala nem, Jehovah mekem wei for iumi kasem salvation thru long ministry and dae bilong Jesus olsem sakrifaes.​—⁠John 3:​16.

So, disfala nem 666 wea God givim mas piksarem olketa fasin wea God lukim long datfala animal. For savve long olketa fasin hia, iumi need for savve hu nao datfala animal and olketa samting hem duim.

Datfala Animal Showaot

Bible buk bilong Daniel givim staka information abaotem mining bilong samfala tokpiksa animal. Chapter 7 storyim klia “fofala maeti animal”​—⁠wanfala lion, wanfala bear, wanfala leopard, and wanfala animal wea mekem man fraet wea garem bigfala iron teeth. (Daniel 7:​2-7) Daniel sei olketa animal hia piksarem olketa “king,” or olketa kingdom bilong politik, wea narawan rul finis then narawan rul moa ovarem staka kantri.​—⁠Daniel 7:​17, 23.

Abaotem datfala animal bilong Revelation 13:​1, 2, The Interpreter’s Dictionary of the Bible sei datfala animal “garem evri fasin bilong fofala animal bilong vision bilong Daniel . . . So, datfala firstfala animal [bilong Revelation] hem piksarem evri rul bilong politik long world wea againstim God.” Revelation 13:7 agree witim diswan taem hem sei olsem abaotem datfala animal: “Hem kasem paoa ovarem evri tribe and pipol and languis and nation.”a

Why nao Bible iusim olketa animal for piksarem rul bilong man? Samfala reason stap bat iumi bae storyim tufala nomoa. First wan, bikos killkill wea olketa gavman duim insaed staka handred year hem olsem wei bilong olketa animal. Pipol for raetem history, Will and Ariel Durant, sei: “War hem wanfala samting wea happen insaed full history, and hem nating katdaon nomata pipol kasem moa savve or freedom.” Tru nao, “man hem bossim man and spoelem hem”! (Ecclesiastes 8:⁠9) Mek-tu reason hem from “dragon [Satan] givim long disfala animal strong bilong hem and throne bilong hem and bigfala paoa.” (Revelation 12:9; 13:⁠2) Tru nao, rul bilong man hem samting Devil startim, so hem showimaot semkaen fasin bilong Satan or dragon.​—⁠John 8:​44; Ephesians 6:​12.

Bat diswan no minim Satan barava kontrolem evri ruler. Long wan wei, olketa gavman serve olsem “minister bilong God,” wea organizem ples pipol stap long hem. Sapos olketa no stap bae pipol olobaot. And samfala leader protectim olketa main right bilong olketa man, olsem right for followim trufala worship​—⁠samting wea Satan no laekem. (Romans 13:​3, 4; Ezra 7:​11-​27; Acts 13:⁠7) Bat, paoa bilong Devil mekem no eni man or organization fit for bringim peace and sef living for olowe.b​—⁠John 12:⁠31.

“Namba Bilong Man”

Mek-thri information for kasem mining bilong 666 hem long wei wea Bible sei hem “namba bilong man.” Disfala toktok kanduit minim wanfala man bikos Satan nao garem paoa ovarem datfala animal​—⁠no man. (Luke 4:​5, 6; 1 John 5:​19; Revelation 13:​2, 18) Long narasaed, wei wea datfala animal garem namba, or mark, “bilong man,” showimaot hem olsem man, no spirit samting or demon, and from diswan hem showimaot samfala wei bilong man. Wanem nao samfala wei hia? Bible sei: “Evriwan sin and no kasem glory bilong God.” (Romans 3:​23) So wei wea datfala animal garem “namba bilong man” hem minim olketa gavman garem mark bilong sin and wei for no perfect.

History pruvim diswan. Secretary of State bifor long U.S., Henry Kissinger, hem sei: “Evrikaen wei for rul wea kamap insaed history gogo for finis nomoa. History hem wanfala story abaotem wei wea pipol fail long stragol bilong olketa, no fulfillim hope bilong olketa . . . So, olsem man for raetem history, man mas acceptim wei wea hem hard for missim wei for fail.” Honest tingting bilong Kissinger pruvim disfala tru toktok from Bible: “Wei bilong man hem no bilong hem. Hem no bilong man wea wakabaot for disaedem gogo bilong hem.”​—⁠Jeremiah 10:⁠23.

From iumi savve hu nao datfala animal and tingting bilong God abaotem datwan, iumi fit for kasem mining nao bilong datfala namba six and why nao olketa raetem thrifala taem​—⁠hem nao, 666, or 600 plus 60 plus 6.

Six, Thrifala Taem​—⁠Why?

Long Bible, samfala namba garem mining. Olsem example, namba seven staka taem minim samting wea hem evribit, or perfect, long eye bilong God. Olsem example, God creatim evriting long wanfala week wea garem sevenfala “day,” or sekson bilong taem, wea insaed long hem God finisim evribit evri samting hem laek duim saed long creation bilong earth. (Genesis 1:3–​2:⁠3) “Toktok” bilong God hem olsem silver wea olketa “klinim sevenfala taem,” so hem kamap klin evribit. (Psalm 12:6; Proverbs 30:​5, 6) Elisha talem Naaman wea garem leprosy for swim sevenfala taem long Jordan River, wea mekem hem kamap gud evribit.​—⁠2 Kings 5:​10, 14.

Six hem wan ples bihaenem seven. Hem barava fit for piksarem samting wea no perfect, or wea nogud, long eye bilong God! (1 Chronicles 20:​6, 7) Wei for raetem six thrifala taem, olsem 666, hem barava strongim wei wea datwan hem no perfect. Wei wea Bible sei 666 hem “namba bilong man,” olsem iumi storyim finis, hem strongim wei wea diswan hem stretfala mining. So ansa hem klia. History bilong datfala animal, datfala namba 666, and wei wea hem “namba bilong man” showimaot hem barava no fit and hem fail front long Jehovah.

Wei wea Bible storyim hao datfala animal hem no fit mekem iumi tingim wanem Bible talem abaotem King Belshazzar bilong Babylon bifor. Thru long Daniel, Jehovah sei long datfala ruler: “Olketa scalem iu finis and faendem iu no fit.” Datfala sem naet olketa killim dae Belshazzar, and datfala maeti Rul Bilong Babylon foldaon. (Daniel 5:​27, 30) Olsem tu, wei wea God givim judgment long datfala animal bilong politik and long pipol wea garem mark bilong hem minim dae bilong hem and olketa wea sapotim. Long datfala taem, God bae distroem evribit no just wanfala system bilong politik bat evri rul bilong man. (Daniel 2:​44; Revelation 19:​19, 20) So, hem barava important for iumi stap klia from mark bilong datfala animal!

Mark Hem Showaot

Stretawe bihaen hem storyim namba 666, Revelation storyim 144,000 pipol wea followim Lamb, Jesus Christ, wea olketa garem nem bilong hem and Dadi bilong hem, Jehovah, long forhed bilong olketa. Olketa nem hia markem pipol hia olsem pipol bilong Jehovah and Son bilong hem, wea olketa witness abaotem. Olsem tu, olketa wea garem mark bilong datfala animal showimaot klia wei wea olketa servem datfala animal. So, datfala mark, nomata hem long raet hand or long forhed, hem tokpiksa. Hem showaot man wea garem mark hia hem man wea barava sapotim olketa system bilong politik bilong disfala world wea garem fasin olsem olketa animal. Olketa wea garem datfala mark givim long “Caesar” samting wea really bilong God. (Luke 20:25; Revelation 13:​4, 8; 14:⁠1) Hao nao olketa duim diswan? Long wei for givim bigfala honor olsem worship long gavman, olketa saen bilong hem, and long army bilong hem, and putim hope and salvation long hem. Worship wea olketa givim long trufala God hem toktok nomoa.

Long wei wea difren, Bible encouragem iumi olsem: “No putim trust bilong iufala long olketa bigman, or son bilong man long earth, wea no savve givim salvation. Spirit bilong hem go aot, hem go bak long graon; long datfala day tingting bilong hem finis evribit.” (Psalm 146:​3, 4) Olketa wea followim datfala wise kaonsel no lus hope taem olketa gavman fail for fulfillim olketa promis wea olketa talem and lusim hae position bilong olketa.​—⁠Proverbs 1:​33.

Diswan no minim olketa tru Christian no duim eniting for helpem pipol. Nomoa, olketa busy for talem pipol hao wanfala gavman nomoa bae stretem evri problem bilong olketa man​—⁠Kingdom bilong God wea olketa stand for hem.​—⁠Matthew 24:⁠14.

Kingdom Bilong God​—⁠Only Hope for Olketa Man

Taem hem long earth, Jesus mekem Kingdom bilong God hem main theme bilong preaching bilong hem. (Luke 4:​43) Long example prea bilong hem, wea samfala taem pipol kolem Lord’s Prea, Jesus teachim olketa follower bilong hem for prea for datfala Kingdom for kam and for will bilong God kamap long earth. (Matthew 6:​9, 10) Datfala Kingdom hem wanfala gavman wea bae rul ovarem full earth from heven and no from wanfala kantri long earth. Dastawe, Jesus kolem datwan “kingdom bilong heven.”​—⁠Matthew 11:⁠12.

Waswe, eniwan moa fit for King long datfala Kingdom winim Jesus Christ, wea bin dae for pipol wea hem bae rul ovarem long earth long future? (Isaiah 9:​6, 7; John 3:​16) Klosap nao disfala perfect Ruler, wea distaem hem wanfala maeti spirit person, bae torowem datfala animal, olketa king bilong hem, and olketa army bilong hem go insaed “lake bilong fire wea bone witim sulfur,” wea piksarem wei for distroe evribit. Bat hem no diswan nomoa. Jesus bae aotem Satan tu, samting no eni man savve duim.​—⁠Revelation 11:15; 19:​16, 19-​21; 20:​2, 10.

Kingdom bilong God bae bringim peace long evriwan wea stap anda long hem. (Psalm 37:​11, 29; 46:​8, 9) Nomata sorre, pain, and dae bae nomoa. Nambawan hope stap front long olketa wea stap free from mark bilong datfala animal!​—⁠Revelation 21:​3, 4.

[Olketa Footnote]

[Box long page 5]

Olketa Information for Kasem Mining Bilong 666

1. Olketa nem insaed Bible staka taem showimaot fasin or laef bilong man wea garem datfala nem, olsem Abraham, Jesus, and staka narawan. Olsem tu, datfala nem or namba bilong animal hem showimaot fasin bilong hem.

2. Long Bible buk bilong Daniel, olketa difren animal piksarem olketa kingdom or empire wea narawan rul finis then narawan. Datfala animal bilong Revelation 13:​1, 2 hem piksarem system bilong politik bilong full world, wea Satan kontrolem.

3. Wei wea datfala animal garem “namba bilong man,” showimaot hem olsem man, no demon. So, hem garem semkaen wik point olsem olketa man, wea kamaot from sin and wei for no perfect.

4. Long eye bilong God, datfala namba six hem piksarem wei for no perfect, from hem wan ples bihaenem namba seven wea insaed long Bible hem piksarem samting wea perfect. Datfala mark 666 strongim wei wea hem barava short taem hem raetem datfala namba thrifala taem.

[Olketa Piksa long page 6]

History pruvim wei wea rul bilong man hem fail, wea barava fitim mining bilong namba 666

[Credit Line]

Starving child: UNITED NATIONS/Photo by F. GRIFFING

[Olketa Piksa long page 7]

Jesus Christ bae rul long perfect wei ovarem earth