Dadi Bilong Iumi Long Heven Hem Wanem Kaen Man?

STAKA pipol savve baeheartim Lord’s Prea wea Jesus lanem olketa disaepol bilong hem. (Matthew 6:​9-​13) Taem olketa talem datfala prea long God, olketa sei “Our Father.” Bat waswe, staka long olketa savve gud long hem?

Waswe long iu, iu savve gud long God? Waswe, iu fren gud witim hem and storyim long hem olketa samting wea mekem iu hapi and olketa samting wea mekem iu sorre? Sapos iumi laek savve gud long God, wanem nao iumi mas duim?

“Jehovah Nao Nem Bilong Hem”

Wanfala smol pikinini no savve long nem bilong dadi bilong hem bat bae hem kolem hem Dadi nomoa. Bat gogo taem hem big lelebet, bae hem savve long nem bilong dadi bilong hem and wanem kaen man nao hem. Waswe long Dadi bilong iumi long heven, iu savve long nem bilong hem and wanem nao datfala nem hem minim?

Nomata staka pipol talem evritaem datfala toktok “Hallowed be thy name” taem olketa talem Lord’s Prea, maet olketa no savve wanem nao datfala nem. (King James Version) Taem iumi lukim olketa star, olketa maunten, and olketa reef long sea wea luk naes tumas, olketa showimaot God hem stap. Bat olketa no talem iumi wanem nao nem bilong God. Iumi mas lukluk long Bible nao for savve long datfala nem. Bible hem sei: “Jehovah nao nem bilong hem.”​—Exodus 15:3.

God laekem iumi for savve long nem bilong hem, wea hem nao Jehovah. Why nao olsem? Bikos nem bilong hem showimaot wanem kaen man nao hem. Nem bilong hem minim “Hem Mekem Kamap.” So hem bae duim eni samting wea hem laekem for mekem plan bilong hem kamap tru. Tingim waka bilong wanfala dadi. For lukaftarem famili bilong hem, hem mas waka for kasem selen, givim advaes, disaedem olketa samting, stretem olketa problem, protectim famili, and lanem olketa. Hem semsem tu witim Jehovah. Nem bilong hem minim hem fit for duim wanem hem laekem, nomata wanem hem happen. Diswan bae givim gud samting long olketa wea worshipim hem.

Distaem bae iumi storyim olketa difren waka wea God hem duim fitim wanem nem bilong hem hem minim. Diswan bae helpem iu luksavve wanem kaen God nao Jehovah, and wanem nao iu mas duim for fren gud witim hem.

“God wea Garem Love and Peace”

Aposol Paul hem talem man wea wakem iumi hem “God wea garem love and peace.” (2 Corinthians 13:11) Hao nao olsem? Jesus Christ hem talem: “God lovem pipol long world tumas dastawe hem givim kam spesol Son bilong hem, mekem evriwan wea showimaot faith long hem bae no dae bat bae kasem laef olowe.” (John 3:​16) From God barava lovem iumi man, hem givim kam Son bilong hem mekem olketa wea showimaot faith long hem savve kasem laef olowe and no safa moa. Dastawe Paul talem tu: “Pei bilong sin nao hem dae, bat present wea God givim hem laef olowe thru long Lord bilong iumi, Christ Jesus.” (Romans 6:​23) From God duim olsem, datwan mekem iumi lovem hem and laek fren gud witim hem!

God showimaot love long pipol bat hem showimaot datwan tu long olketa man wanwan wea faithful long hem. Moses sei olsem long olketa Israelite wea no obeyim God staka taem: “Why nao iufala gohed duim olsem long Jehovah? Iufala krangge and no garem gudfala tingting! Hem nao Dadi bilong iufala wea wakem iufala and mekem iufala stap gud!” (Deuteronomy 32:6) Tingim datfala toktok. Nomata Jehovah savve pipol bilong hem olketa sin, hem tingim olketa. And hem givim long olketa evri samting wea olketa needim.

Iumi evriwan kasem hard taem and samfala taem iumi savve feel wikdaon. Long taem olsem, iumi laekem samwan for helpem iumi for garem gudfala tingting. Hu nao savve helpem iumi? Taem iumi readim Bible, iumi luksavve Jehovah nao givim advaes long iumi and lukaftarem iumi. Bible storyim why nao iumi safa distaem and wanem nao bae helpem iumi long taem olsem. Jehovah showimaot hem barava lovem iumi taem hem givim samting wea iumi needim. Tru tumas, Jehovah hem barava fit for helpem olketa wea biliv long hem and hem laek tumas for duim olsem.​—Isaiah 59:1.

God showimaot hem lovem iumi tu from hem nao “Man wea herem prea.” (Psalm 65:2) Hao nao datwan showimaot hem lovem iumi? Aposol Paul hem sei: “Iufala mas no wari long eni samting, bat evritaem iufala prea long God and story long hem from heart bilong iufala and thankiu long hem and talem hem wanem iufala needim. Taem iufala duim olsem, disfala peace bilong God wea winim evri tingting bilong iumi bae protectim heart and tingting bilong iufala thru long Christ Jesus.” (Philippians 4:​6, 7) Taem iumi prea long God and followim toktok bilong hem long Bible, iumi tu savve kasem “peace bilong God wea winim evri tingting bilong iumi.”

“God wea Savve Long Evri Samting”

Bible talem hao Jehovah God hem “savve long evri samting.” Hem savve gud long iumi man winim eni nara man and hem savve wanem nao iumi needim. (Job 36:4; 1 Samuel 2:3) Hem mekem Moses luksavve “samting wea mekem man laef nao, hem no bred nomoa, bat hem evri toktok wea kamaot from mouth bilong Jehovah.” (Deuteronomy 8:3; Matthew 4:4) So hem no olketa material samting nomoa wea savve mekem iumi hapi, bat iumi needim nara samting tu.

God givim Bible for helpem iumi. Taem iumi studyim Bible and followim samting wea hem talem, iumi kasem gud samting from “evri toktok wea kamaot from mouth bilong Jehovah.” Tingim wanfala Christian woman Zuzanna. Hem sei olsem: “Samting wea strongim marit bilong mifala nao hem taem mifala readim Bible tugeta, go long olketa Christian meeting tugeta, and storyim biliv bilong mifala long nara pipol. From God nao leadim mifala, datwan mekem mitufala garem olketa sem goal and fren gud tugeta.”

Wanem nao iu savve duim for kasem gud samting from olketa toktok bilong God? Taem iu studyim Bible evritaem and followim datwan, iu savve kasem staka gud samting from God.​—⁠Hebrews 12:9.

‘God wea Sevem’ Olketa Man

Staka nogud samting gohed long world distaem. Pipol no savve wanem nao bae happen tumoro. Sapos iu stap long kantri wea garem war, bae iu laek tumas for garem peace. Long staka kantri, pipol fraet bikos staka criminal stap, pipol raf tumas, selen hem hard, and olketa terrorist killim dae eniwan nomoa. Hu nao bae sevem iumi from evri nogud samting hia? Iumi needim samwan for protectim iumi and sevem iumi.

Bible hem sei: “Nem bilong Jehovah hem wanfala strong taoa wea olketa gudfala pipol ran go for haed long hem.” (Proverbs 18:10) Taem iumi savve long nem bilong God and trustim datwan, iumi bae tingim olketa samting wea God duim finis and wanem hem bae duim for sevem olketa wea biliv long hem distaem. Jehovah God showimaot finis hem savve sevem pipol bilong hem. Tingim taem wea hem killim dae Pharaoh witim army bilong hem bat hem sevem olketa Israelite. Jehovah hem showimaot hem nao God wea faithful. Hem no forgetim pipol wea kasem hard taem bat hem laek for sevem olketa.​—Exodus 15:1-4.

Sapos iumi laek laef olowe, iumi mas bilivim Jehovah God nao bae sevem iumi. King David biliv olsem long Jehovah. Nomata hem kasem staka hard taem, hem sei olsem abaotem Jehovah: “Iu nao God bilong mi wea sevem mi.” (Psalm 25:5) Aposol Peter hem sei: “Jehovah savve hao for sevem pipol wea lovem hem from hard taem.”​—2 Peter 2:9.

God promis olsem long man wea trustim hem: “Mi bae protectim hem bikos hem savve long nem bilong mi.” (Psalm 91:14) Olketa wea worshipim God distaem kasem disfala help from God. Henryk wea stap long Poland, hem faithful long Jehovah for 70 year nomata hem kasem barava hard taem. Taem hem 16 year nomoa, police putim dadi bilong hem long Auschwitz raf prison. Olketa putim Henryk witim brata bilong hem long narafala prison wea olketa young pipol nomoa stap. Bihaen, olketa tekem hem go stap long olketa didifren raf prison. Henryk story olsem: “Nomata wanem hard taem kasem mi, Jehovah nating lusim mi. Hem helpem mi evritaem for gohed faithful, nomata samfala taem mi klosap dae.” Tru tumas, Jehovah savve strongim pipol bilong hem for gohed faithful and for no givap.

Klosap nao God bae sevem evri man wea biliv long hem and trustim hem. Hem sei: “Mi nao Jehovah, and no eniwan moa savve sevem iufala.” (Isaiah 43:11) Taem “war bilong bigfala day bilong God Olmaeti” hem kam, hem bae killim dae evri nogud man bat hem bae sevem gudfala pipol. (Revelation 16:14, 16; Proverbs 2:​21, 22) Jehovah promis olsem: “God bae givim earth long olketa wea hambol, and olketa bae hapi fogud bikos olketa stap gud.”​—Psalm 37:11.

Olketa Bae Kamap “Pikinini Bilong God”

Long taem bilong profet Malachi, olketa Israelite sei Jehovah nao Dadi bilong olketa. Bat olketa nating mekhae long hem bikos olketa givim nomoa bred wea nogud and olketa animal wea blind and no savve wakabaot olsem sakrifaes. Dastawe Jehovah tok olsem long olketa: “Sapos mi nao dadi bilong iufala, hao nao iufala no mekhae long mi?”​—Malachi 1:6.

No duim sem samting wea olketa Israelite hia duim. Bat hem gud for iu lane abaotem Jehovah God and fren gud witim hem. Disaepol James hem sei: “Fren gud witim God and hem bae fren gud witim iu.”​—James 4:8.

Sapos iumi sei Jehovah nao Dadi bilong iumi, iumi mas duim samfala samting for hem. Sapos iu waka hard for followim olketa wei bilong God long laef bilong iu, hem bae nating forgetim datwan. Hem bae helpem iu for duim stret samting wea bae mekem iu stap long niu world wea hem promisim finis. Long there, “no eniwan bae dae moa, and no eniwan bae sorre or krae or feel pain moa.” (Revelation 21:4) Long datfala taem, evriwan wea obeyim God “bae kamap free from sin and olketa bae kamap olketa pikinini bilong God. Olketa bae kamap free.”​—Romans 8:​21.

[Blurb long page 5]

God laekem iumi for savve long nem bilong hem, Jehovah, wea minim “Hem Mekem Kamap”

[Blurb long page 6]

“Nomata wanem hard taem kasem mi, Jehovah nating lusim mi.”​—HENRYK

[Blurb long page 7]

“Samting wea strongim marit bilong mifala nao hem taem mifala readim Bible tugeta, go long olketa Christian meeting tugeta, and storyim biliv bilong mifala long nara pipol.”​—ZUZANNA