Word Bilong Jehovah Hem Laef
Olketa Main Point From Buk Bilong Joshua
TAEM olketa Israelite camp long Flat Ples Bilong Moab long 1473 B.C.E., olketa mas barava hapi taem olketa herem disfala toktok: “Iufala mas mek redi for go, bikos bihaen thrifala day iufala bae akrosim disfala Jordan for go and tekem datfala land wea God bilong iufala Jehovah hem givim for iufala.” (Joshua 1:11) Klosap nao wei wea olketa wakabaot long wilderness for 40 year bae finis.
Winim 20 year bihaen datfala taem, datfala leader Joshua hem standap midol long land bilong Canaan and tok olsem long olketa man wea lead insaed Israel: “Lukim, Jehovah hem divaedem olketa nation wea stap yet for olketa tribe bilong iufala, and evri nation wea mi finisim start from Jordan go kasem Great Sea long ples wea sun go daon. And God bilong iufala Jehovah nao gohed for pushim olketa aot from front long iufala, and hem aotem olketa for iufala, and iufala tekem land bilong olketa, olsem God bilong iufala Jehovah hem promisim finis.”—Joshua 23:4, 5.
Disfala buk, wea Joshua nao raetem long 1450 B.C.E., hem wanfala barava interesting story abaotem olketa samting wea happen insaed 22 year. Iumi distaem stap redi for go insaed niu world wea God promisim. Iumi olsem olketa Israelite wea redi for go tekem datfala Promis Land. So, witim wei for barava interest, iumi laek for lukluk gud insaed disfala buk bilong Joshua.—Hebrews 4:12.
GO LONG “FLAT DRAE PLES BILONG JERICHO”
Jehovah talem Joshua for duim wanfala barava important waka taem hem sei olsem: “Servant bilong mi Moses hem dae nao, so iu and evri pipol hia, standap, akrosim disfala Jordan, and go insaed long datfala land wea mi givim long olketa son bilong Israel”! (Joshua 1:2) Waka wea Joshua kasem hem for leadim planti million pipol bilong disfala nation for go insaed long Promis Land. Taem hem mek redi for tekem datfala land, hem sendem go tufala man for spaem taon bilong Jericho. Diswan nao bae firstfala taon wea olketa bae distroem. Wanfala jury woman wea nem bilong hem Rahab hem stap long datfala taon. Hem herem finis story abaotem olketa samting wea Jehovah duim for pipol bilong hem wea showimaot hem garem bigfala paoa. Rahab haedem and helpem tufala spae hia and from datwan tufala promis for sevem hem.
Taem tufala spae hia kam bak, Joshua and olketa pipol redi nao for go and akrosim Jordan. Wata hem ran big tumas. Bat diswan nating stopem olketa for akrosim datfala river. Jehovah satem wata antap long river and diswan mekem river hem drae from evri wata ran go long Dead Sea. Bihaen olketa akrosim Jordan, olketa Israelite camp long Gilgal, klosap long Jericho. Fofala day bihaen, long evening bilong mek-14 day long month bilong Abib, olketa celebratem Passover long flat drae ples bilong Jericho. (Joshua 5:10) Next day, olketa start for kaikaim kaikai wea grow long datfala land, and Jehovah hem finis for givim manna. Long datfala taem tu, Joshua circumcisem evri man wea born insaed wilderness.
Ansa for Olketa Bible Kwestin:
2:4, 5—Why nao Rahab trikim olketa man wea waka for king wea kam for luk aotem tufala spae? Rahab savve lusim laef bilong hem from wei wea hem haedem tufala spae hia. Nomata olsem hem duim diswan bikos hem garem faith long Jehovah. From olketa man hia laek for spoelem pipol bilong God, hem olraet nomoa for Rahab no talem wea nao olketa spae hia stap. (Matthew 7:6; 21:23-27; John 7:3-10) Tru nao, Bible kolem Rahab “raeteous” from olketa samting wea hem duim, olsem wei wea hem trikim olketa man wea waka for king.—James 2:24-26.
5:14, 15—Hu nao “prince bilong army bilong Jehovah”? Luk olsem datfala prince wea kam for strongim Joshua taem olketa start for tekovarem Promis Land, hem nao datfala “Word.” Diswan hem Jesus Christ bifor hem kamap wanfala man. (John 1:1; Daniel 10:13) Tru nao, iumi savve kasem strong taem iumi savve hao Jesus Christ wea kasem glory finis hem stap witim pipol bilong God taem olketa faet insaed spiritual war distaem!
Olketa Leson for Iumi:
1:7-9. Wei for evriday readim, ting raonem, and followim Bible hem important samting for helpem iumi win saed long olketa spiritual samting.
1:11. Joshua askem olketa pipol for mas mek redi and no weit for God provaed for olketa. Nomata Jesus sei man mas no wari abaotem samting hem needim, and nomata hem promis man bae “kasem olketa narafala samting” wea hem needim, diswan no minim iumi bae stap nating and no duim waka for sapotim iumiseleva.—Matthew 6:25, 33.
2:4-13. Bihaen Rahab herem olketa story abaotem olketa nambawan samting wea Jehovah duim, hem luksavve hao wanfala barava important samting bae happen. So hem disaed for joinim olketa wea worshipim Jehovah. Sapos iu studyim Bible for lelebet longtaem finis and iu luksavve hao iumi stap insaed “olketa last day,” hem bae gud tumas sapos iu disaed for followim God.—2 Timothy 3:1.
3:15. From nius bilong tufala spae wea gogo long Jericho hem gud, Joshua kwiktaem duim samting. Hem no weit for wata long river bilong Jordan for go daon. Saed long samting wea part long tru worship, iumi mas duim samting witim fasin for no fraet and no hol bak kasem taem wea fitim iumiseleva.
4:4-8, 20-24. Olketa putim 12-fala ston wea olketa tekem from Jordan River for stap olsem wanfala samting for mekem olketa bilong Israel ting bak long datfala taem. Olketa samting wea Jehovah duim distaem for sevem pipol bilong hem from olketa enemy bilong hem, hem tu olsem samting for mekem olketa no forgetim hao hem stap witim olketa.
GOHED FOR TEKOVA
Datfala taon Jericho hem “sat evribit . . . , no eniwan go aot and no eniwan go insaed.” (Joshua 6:1) Hao nao bae olketa distroem datfala taon? Jehovah talem Joshua wanem for duim. No longtaem bihaen, olketa wall foldaon and datfala taon distroe. Rahab and famili bilong hem nomoa sev.
Next taon wea olketa go faetem nao, Ai, taon bilong king. Olketa spae wea go lukluk long datfala taon kam bak and talem hao no staka pipol nomoa stap, so no need for staka man go faet. Bat 3,000 soldia wea go for faet, olketa ranawe from army bilong Ai. Why nao olsem? Jehovah hem no sapotim olketa Israelite. Achan wea kam from tribe bilong Judah hem sin taem olketa distroem Jericho. Bihaen Joshua stretem datfala problem olketa go moa for faetem Ai. From king bilong Ai winim olketa Israelite last taem, hem barava tingse hem bae win moa. Bat Joshua iusim wanfala plan wea mekius long wei wea Army bilong Ai tingse olketa bae win. Olketa Israelite go faet and winim datfala taon.
Gibeon hem ‘wanfala taon wea big winim Ai, and olketa mamaeti man nao stap long there.’ (Joshua 10:2) Bat taem olketa long Gibeon herem hao Israel winim Jericho and Ai, olketa trikim Joshua and mekem hem promis for no faetem olketa. Olketa nara nation wea stap raonem olketa tingse wanem Gibeon duim hem bae spoelem olketa. Faevfala king from olketa nation hia join tugeta and faetem Gibeon. Israel helpem olketa bilong Gibeon and winim disfala sekson wea attakim Gibeon. Joshua leadim Israel tu for winim olketa nara taon long south and west. And tu, olketa winim olketa king long north wea join tugeta for faetem olketa. Olketa faetem and winim 31 king wea stap long west saed long Jordan.
Ansa for Olketa Bible Kwestin:
10:13—Hao nao mirakol olsem fit for happen? “Waswe, eni samting hard tumas for Jehovah,” Creator bilong skae and earth? (Genesis 18:14) Sapos hem chus for duim, Jehovah savve kontrolem wei wea earth spin raon mekem man long earth tingse sun and moon luk olsem no muv. Or hem savve letem earth and moon stap long sem ples nomoa bat hem bendim laet from sun and moon mekem laet from tufala samting hia hem gohed for shaen. Nomata wanem wei nao hem iusim, “no eni nara day hem olsem datwan” long full history bilong olketa man.—Joshua 10:14.
10:13—Wanem nao datfala buk wea olketa kolem Jashar? Second Samuel 1:18 tu tok abaotem datfala buk taem hem storyim datfala poem wea olketa kolem “Datfala Bow”—wea hem wanfala sorre singsing abaotem King Saul bilong Israel and son bilong hem Jonathan. Luk olsem datfala buk garem olketa song and poem abaotem olketa samting wea happen bifor, wea olketa Jew savve gud abaotem.
Olketa Leson for Iumi:
6:26; 9:22, 23. Bihaen 500 year, curse wea Joshua talem taem Jericho distroe hem kamap tru. (1 Kings 16:34) Curse wea Noah talem for granpikinini bilong hem, Canaan, hem kamap tru taem olketa bilong Gibeon kamap pipol wea labor for Israel. (Genesis 9:25, 26) Toktok bilong Jehovah hem kamap tru evritaem.
7:20-25. Samfala maet ting wei wea Achan hem steal hem smol samting nomoa from diswan no spoelem eniwan. Maet olketa ting olsem tu abaotem wei for stealim samting wea olketa ting hem no important and for brekem law bilong Bible saed long olketa smol samting. Bat iumi shud olsem Joshua and no letem eni samting pullim iumi for brekem law or duim dirty fasin.
9:15, 26, 27. Iumi mas strong for followim samting iumi agree long hem and mas duim samting iumi promis for duim.
LAST BIGFALA WAKA WEA JOSHUA DUIM
Nomata Joshua klosap kasem 90 year, hem start for divaedem datfala land. Tru nao, datwan wanfala bigfala waka! Olketa tribe bilong Reuben and Gad and haf long tribe bilong Manasseh kasem finis land bilong olketa long east saed bilong Jordan. Olketa tribe wea stap yet kasem land bilong olketa long west saed bilong Jordan thru long wei wea Jehovah nao divaedem land.
Olketa putim tabernacle long Shiloh wea hem insaed land bilong Ephraim. Caleb tekem taon bilong Hebron, and Joshua tekem taon bilong Timnath-serah. Joshua givim olketa Levite 48-fala taon, insaed diswan hem 6-fala taon for protectim man wea mistek for killim dae narawan. Taem olketa soldia from tribe bilong Reuben, Gad, and haf long tribe bilong Manasseh olketa gogo bak long land bilong olketa long east saed long Jordan, olketa wakem wanfala altar “wea barava big tumas.” (Joshua 22:10) Olketa tribe long west saed bilong Jordan tingse wanem olketa duim hem againstim Jehovah, and olketa redi for go faetem olketa, bat from olketa story gud tugeta olketa no faet.
Bihaen Joshua stap longtaem long Timnath-serah, hem hipimap olketa leader, olketa wea hed, olketa judge, and olketa wea lukaftarem army bilong Israel and encouragem olketa for garem fasin for no fraet and for faithful long Jehovah. Bihaen, Joshua hipimap evri tribe bilong Israel long Shechem. Hem storyim bak long olketa evriting wea Jehovah duim start kam from taem bilong Abraham, and hem talem moa for olketa “fraet long Jehovah and servem hem long stretfala fasin and long truth.” Datwan muvim evri pipol for sei olsem: “God bilong mifala Jehovah nao mifala bae servem, and voice bilong hem nao mifala bae herem!” (Joshua 24:14, 15, 24) Bihaen, Joshua hem dae taem hem 110 year.
Ansa for Olketa Bible Kwestin:
13:1—Waswe, diswan hem no againstim toktok long Joshua 11:23? Nomoa, from wei wea olketa tekovarem Promis Land hem garem tufala part: first part, hem wei wea olketa winim 31 king bilong Canaan wea mekem olketa bilong Canaan no strong for faet. Mek-tu part, hem wei wea olketa tribe and Israelite wanwan tekem datfala land. (Joshua 17:14-18; 18:3) Nomata olketa Israelite no aotem olketa bilong Canaan evribit, olketa wea stap no fit for spoelem olketa Israelite. (Joshua 16:10; 17:12) Joshua 21:44 sei: “Jehovah letem olketa for rest.”
24:2—Waswe Terah, dadi bilong Abraham, hem worshipim olketa idol? Firstaem, Terah hem no worshipim Jehovah God. Luk olsem hem worshipim datfala moon-god Sin, wea staka long Ur worshipim. Olketa Jew sei Terah maet man for wakem olketa idol. Bat, taem God komandim Abraham for lusim Ur, Terah hem go witim hem long Haran.—Genesis 11:31.
Olketa Leson for Iumi:
14:10-13. Nomata hem 85 year, Caleb hem ask for duim datfala barava big waka for aotem olketa pipol from area bilong Hebron. Olketa Anakim wea big winim normal pipol nao stap long datfala area. From Jehovah helpem hem, Caleb wea hem wanfala soldia for longfala taem hem win, and Hebron hem kamap wanfala taon for protectim man wea mistek for killim dae man. (Joshua 15:13-19; 21:11-13) Example bilong Caleb encouragem iumi for no missim eni waka wea organization askem iumi for duim nomata luk olsem hem hard.
22:9-12, 21-33. Iumi mas careful for no minim rong samting wea muvim narawan for duim samting.
‘No Eni Toktok Hem Fail’
Taem hem olo, Joshua talem olketa man long Israel wea lead: “No eni toktok long evri gudfala toktok wea God bilong iufala Jehovah talem long iufala hem fail. Evriwan kamap tru for iufala.” (Joshua 23:14) Tru nao, disfala buk bilong Joshua hem barava showimaot diswan!
Aposol Paul raet olsem: “Evri samting olketa raetem bifor hem for teachim iumi, mekem iumi savve garem hope thru long wei wea iumi stand strong and thru long comfort from olketa Scripture.” (Romans 15:4) Iumi fit for feel sure hope bilong iumi long olketa promis bilong God hem barava tru. No eni promis bilong hem bae fail; evriwan bae kamap tru.
[Map long page 10]
(For formatted text, lukim pablikeson)
Land wea olketa tekem taem Joshua leadim olketa Israelite
BASHAN
GILEAD
ARABAH
NEGEB
Jordan River
Salt Sea
T.V. of Jabbok
T.V. of Arnon
Hazor
Madon
Lassharon
Shimron
Jokneam
Dor
Megiddo
Kedesh
Taanach
Hepher
Tirzah
Aphek
Tappuah
Bethel
Ai
Gilgal
Jericho
Gezer
Jerusalem
Makkedah
Jarmuth
Adullam
Libnah
Lachish
Eglon
Hebron
Debir
Arad
[Piksa long page 9]
Waswe, iu savve why Bible kolem Rahab datfala jury woman raeteous?
[Piksa long page 10]
Joshua encouragem Israel for “fraet long Jehovah and servem hem”
[Piksa long page 12]
Wei wea Achan steal hem no smol samting—olketa nogud samting nao kamap from datwan
[Piksa long page 12]
“Thru long faith olketa wall bilong Jericho foldaon.”—Hebrews 11:30