Kwestin From Reader

Psalm 102:26 sei earth and skae “bae finis.” Waswe, datfala toktok hem minim earth bae finis evribit?

Man wea raetem disfala psalm hem prea long Jehovah and sei: “Longfala taem bifor iu wakem faondeson bilong earth, and iu wakem skae witim hand bilong iu. Olketa bae finis, bat iu bae gohed for stap olowe; and bae olketa evriwan kamap nogud olsem old kaleko. Olsem kaleko bae iu changem olketa, and taem bilong olketa finis nao.” (Psalm 102:25, 26) Olketa nara verse long disfala chapter hem showimaot hao olketa verse hia story abaotem wei wea God hem stap for olowe, and hem no abaotem wei wea earth bae finis evribit. Hem showimaot tu why disfala important truth hem comfortim olketa servant bilong God.

Nomata earth and skae stap for longtaem, hem no semsem witim wei wea Jehovah hem stap olowe. Man wea raetem disfala psalm sei moa: “Olketa [earth and skae] bae finis, bat iu bae gohed for stap olowe.” (Psalm 102:26) Earth and skae savve distroe. Bat long olketa nara scripture long Bible, Jehovah sei olketa bae stap olowe. (Psalm 119:90; Ecclesiastes 1:4) Nomata olsem, earth and skae savve finis evribit sapos datwan hem plan bilong God. Bat for God, hem kanduit dae. Only samting wea mekem olketa creation wea iumi savve lukim “stap olowe,” hem bikos God keepim olketa. (Psalm 148:6) Sapos Jehovah hem finis for mekem olketa creation hia kamap niu evritaem, then “bae olketa evriwan kamap nogud olsem old kaleko.” (Psalm 102:26) Jehovah savve stap longtaem winim creation bilong hem—sapos hem chus for duim datwan, olsem wanfala man laef longtaem winim kaleko bilong hem. Bat, iumi savve hao olketa nara scripture sei datwan hem no will bilong hem. Word bilong God promisim hao Jehovah hem disaedem finis disfala earth and skae bae stap olowe.—Psalm 104:5.