Kwestin From Reader
Waswe, toktok bilong God wea stap long Jeremiah 7:16 minim olketa Christian bae no prea abaotem samwan wea olketa aotem from Christian kongregeson from hem no repent?
Bihaen hem talemaot judgment bilong hem againstim Judah from hem no faithful, Jehovah sei long Jeremiah: “And long saed bilong iu, no prea for saed bilong pipol hia, and no singaot for askem eni samting or prea for saed bilong olketa and no begim mi, from mi bae no lisin long iu.”—Jeremiah 7:16.
Why nao Jehovah stopem Jeremiah for prea for olketa Israelite? Hem klia tumas, hem from wei wea olketa barava brekem law bilong hem. Olketa nating shame taem olketa go ahed for “steal, killim man dae, duim adultery and tok laea and mekem smoke bilong sakrifaes long Baal and wakabaot followim olketa nara god.” From diswan, Jehovah talem olketa Jew hia wea no garem faith: “Bae mi torowem iufala from front long feis bilong mi, barava olsem hao mi torowem evri brata bilong iufala, evri pikinini bilong Ephraim.” Tru nao, hem no stret for Jeremiah, or eni narawan, for prea long Jehovah for tanem bak judgment bilong hem.—Jeremiah 7:9, 15.
For fitim diswan, aposol John hem raet abaotem stretfala wei for prea long God. Firstaem, hem promisim olketa Christian: “Nomata wanem samting iumi askem wea fitim will bilong hem, hem herem iumi.” (1 John 5:14) Then, abaotem wei for prea for saed bilong narawan, John go ahed for sei: “Sapos eniwan lukim brata bilong hem duim wanfala sin wea panis bilong hem no dae, hem bae ask, and hem bae givim laef long hem, yes, long olketa wea no sin for mekem olketa no kasem panis for dae. Wanfala sin hem stap wea panis bilong hem nao dae. Long saed bilong datfala sin nao mi no talem hem for askem samting.” (1 John 5:16) Jesus story tu abaotem sin wea “bae no kasem forgiveness,” datwan nao, sin againstim holy spirit.—Matthew 12:31, 32.
Waswe, diswan minim evriwan wea disfellowship from Christian kongregeson from olketa no repent from sin olketa duim, duim sin wea “kasem panis for dae” and from diswan man mas no prea abaotem olketa? Diswan no olsem evritaem from samfala taem olketa kaen sin olsem hem no sin wea bae kasem panis for dae. For tok stret, hem hard for luksavve sapos hem olsem. Wanfala example nao King Manasseh bilong Judah. Hem wakem olketa altar for olketa false god, offerim olketa son bilong hem olsem sakrifaes, duim spiritism, and putim image wea olketa karvem insaed temple bilong Jehovah. Tru nao, Bible sei Manasseh and olketa pipol duim “samting wea worse winim olketa nation wea Jehovah finisim evribit front long olketa son bilong Israel.” From evri samting hia, Jehovah panisim Manasseh taem hem sendem hem olsem wanfala prisoner go long Babylon.—2 Kings 21:1-9; 2 Chronicles 33:1-11.
Waswe, olketa sin bilong Manasseh, nomata barava nogud tumas, olketa datkaen wea fit for kasem panis for dae? Luk olsem nomoa, from story go ahed for sei abaotem hem: “And taem diswan mekem hem feel barava sorre tumas, hem mekem feis bilong Jehovah God bilong hem soft and hem go ahed for mekem hemseleva barava hambol bikos long God bilong laen dadi bilong hem. And hem go ahed for prea long Hem, and from diswan Hem letem hemseleva for lisin long hem and Hem herem wanem hem askem and Hem givim hem bak Jerusalem and rul bilong hem; and Manasseh luksavve hao Jehovah nao trufala God.”—2 Chronicles 33:12, 13.
Dastawe, iumi shud no judgem man kwiktaem for sei hem guilty long wanfala sin wea fit for kasem panis for dae from olketa aotem hem from kongregeson. Hem maet tek-taem for luksavve long barava tru feeling long heart bilong datfala man. Tru nao, planti taem olketa talem hao wanfala reason for man disfellowship hem for mekem datfala sinner luksavve long samting wea hem duim and for repent and tan raon.
From datfala man no stap moa insaed kongregeson, sapos heart or wei for tingting bilong hem change olketa first wan for lukim nao olketa wea klos long hem, olsem marit partner or famili member bilong hem. Olketa hia wea lukim kaen change olsem maet ting hao datwan wea duim rong no duim sin wea fit for kasem panis for dae. Maet diswan muvim olketa for prea for hem kasem strong from Word bilong God and for Jehovah duim samting for datfala sinner long wei wea followim will bilong hem.—Psalm 44:21; Ecclesiastes 12:14.
Nomata samfala maet fit for lukim pruv wea showimaot hao datfala sinner hem repent, diswan maet no olsem witim olketa insaed kongregeson. Olketa maet konfius, wari, or maet stambol sapos olketa herem samwan prea long pablik abaotem datfala man wea disfellowship. From disfala reason nao, olketa wea laek for prea abaotem datwan wea sin shud duim diswan seleva nomoa, and letem olketa elder long kongregeson nao lukaftarem eni nara samting.
[Piksa long page 31]
Olketa barava nogud sin bilong Manasseh kasem forgiveness taem hem mekem hemseleva kamap hambol front long Jehovah
[Piksa Credit Line long page 30]
Reproduced from Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s