“Go Ahed for Lukaot”

“So go ahed for lukaot, bikos iufala no savve long wanem day nao Lord bilong iufala bae kam.”—MATTHEW 24:42.

1. Hao nao feeling bilong olketa wea faithful for servem Jehovah for planti year finis? Talem wanfala example.

PLANTI wea servem Jehovah for longtaem finis lanem truth taem olketa young man and woman yet. Olsem datfala bisnisman wea lukim wanfala pearl wea kost tumas and hem sellim evri samting bilong hem for hem savve baem, olketa willing Bible student hia lusim will bilong olketa and dedicatem laef bilong olketa long Jehovah. (Matthew 13:45, 46; Mark 8:34) Hao nao feeling bilong olketa from olketa mas weit for longtaem winim wanem olketa expectim mekem olketa savve lukim olketa purpose bilong God for earth hem fulfill? Olketa nating sorre! Olketa agree witim Brata A. H. Macmillan, wea tok olsem bihaen 60 year wea hem faithful for servem God: “Mi disaed moa strong winim enitaem bifor for stap strong long faith bilong mi. Hem mekem laef bilong mi garem mining. Hem go ahed yet for helpem mi no fraet for feisim future.”

2. (a) Wanem kaonsel wea barava fitim nao Jesus talem long olketa wea followim hem? (b) Wanem nao olketa kwestin wea iumi bae storyim long disfala article?

² Waswe long iu? Nomata iu young or olo, tingim toktok bilong Jesus: “So go ahed for lukaot, bikos iufala no savve long wanem day nao Lord bilong iufala bae kam.” (Matthew 24:42) Datfala simpol toktok garem wanfala important truth. Iumi no savve long wanem day nao Lord bae kam for givim judgment long disfala wicked system, and iumi no need for savve. Bat iumi need for iusim laef bilong iumi long wei wea bae mekem iumi no sorre taem hem kam. Long saed bilong diswan, wanem nao samfala example long Bible wea bae helpem iumi for go ahed for lukaot? Wanem example nao Jesus iusim for showimaot disfala need? And wanem pruv nao iumi garem distaem wea showimaot iumi stap insaed olketa last day bilong disfala world wea no followim God?

Wanfala Warning Example

3. Hao nao planti pipol distaem olsem pipol long taem bilong Noah?

³ Long planti wei, pipol distaem olsem olketa man and woman wea stap long taem bilong Noah. Long datfala taem, earth hem fulap long raf fasin, and tingting long heart bilong man hem “nogud evritaem.” (Genesis 6:5) Planti busy long samting bilong evriday living. Bat, bifor Jehovah hem mekem bigfala Flood kam, hem givim pipol chance for repent. Hem komandim Noah for preach, and Noah hem obey—olsem “man wea preach abaotem raeteous fasin” maet for 40 or 50 year or winim. (2 Peter 2:5) Bat, olketa pipol nating obeyim warning message bilong Noah. Olketa nating lukaot. Dastawe long end, Noah and famili bilong hem nomoa stap laef taem Jehovah givim judgment bilong hem.—Matthew 24:37-39.

4. Long wanem wei nao ministry bilong Noah hem win, and hao nao diswan hem sem witim preaching waka bilong iu?

⁴ Waswe, ministry bilong Noah hem win? No judge followim smol namba wea obey. For tok stret, preaching bilong Noah kasem purpose bilong hem nomata planti pipol no obey. Why nao olsem? Bikos preaching bilong hem givim pipol chance for chus sapos olketa bae servem Jehovah or nomoa. Waswe long territory wea iu preach? Nomata sapos samfala pipol nomoa acceptim, iu go ahed for win long bigfala wei. Why nao olsem? Bikos taem iu preach, iu talemaot warning bilong God, and long disfala wei iu duim waka wea Jesus givim long olketa wea followim hem.—Matthew 24:14; 28:19, 20.

Olketa No Obeyim Olketa Profet Bilong God

5. (a) Wanem kaen fasin nao big tumas long Judah long taem bilong Habakkuk, and hao nao pipol ting long profesi message bilong hem? (b) Hao nao pipol bilong Judah showimaot olketa heitim olketa profet bilong Jehovah?

⁵ Long planti handred year bihaen Flood, living long kingdom bilong Judah hem kamap nogud tumas. Wei for worshipim idol, no followim justice, hardfala living, and wei for killim pipol dae tu hem big tumas. Jehovah sendem Habakkuk for warnim pipol hao sapos olketa no repent, olketa bae kasem bigfala trabol from pipol bilong Chaldea, or Babylon. (Habakkuk 1:5-7) Bat olketa pipol les for lisin. Maet olketa ting olsem, ‘Winim wan handred year bifor, profet Isaiah talem semkaen warning, bat no eni samting happen yet!’ (Isaiah 39:6, 7) Planti bigman long Judah no just ting nating long datfala message bat olketa heitim tu olketa wea talemaot. Wantaem, olketa trae for killim dae profet Jeremiah, and maet olketa duim sapos Ahikam no stopem olketa. From King Jehoiakim kros long nara profesi message, hem killim dae profet Urijah.—Jeremiah 26:21-24.

6. Hao nao Jehovah strongim Habakkuk?

⁶ Message bilong Habakkuk hem strong, and pipol no laekem olsem bilong Jeremiah tu, wea kasem profesi from God for talemaot wei wea Judah bae stap emti for 70 year. (Jeremiah 25:8-11) Dastawe, iumi savve minim wari bilong Habakkuk taem hem singaot olsem: “Hao long nao, O Jehovah, mi mas singaot for help, and iu no herem? Hao long nao mi mas askem iu for help from raf fasin, and iu no sevem mi?” (Habakkuk 1:2) Long kaenfala wei Jehovah ansarem Habakkuk witim toktok hia wea strongim faith bilong hem: “Vision hem stap yet for taem wea set finis, and hem hariap for kasem end, and hem bae no laea. Nomata sapos hem delay, go ahed for expectim; from hem bae no fail for kamap tru. Hem bae no leit.” (Habakkuk 2:3) So Jehovah garem “taem wea set finis” for aotem fasin wea no followim justice and hardfala living. Sapos hem luk olsem bae hem delay, Habakkuk mas no wikdaon, or isisi. Bat, hem mas “go ahed for expectim,” garem feeling for hariap evriday. Day bilong Jehovah bae no leit!

7. Why nao Jerusalem kasem judgment moa for finis evribit long first century C.E.?

⁷ Long samting olsem 20 year bihaen Jehovah story long Habakkuk, kapitol taon bilong Judah, Jerusalem, hem finis. Bihaen, olketa buildim moa and olketa stretem planti nogud samting wea mekem Habakkuk wari tumas bifor. Bat, long first century C.E., datfala taon kasem judgment moa for finis evribit bikos pipol bilong hem no faithful. Long wei bilong mercy, Jehovah arrangem wei for pipol wea garem honest heart for sev. Long datfala taem, hem iusim nambawan profet Jesus Christ for talemaot message. Long 33 C.E., Jesus talem olketa wea followim hem: “Taem iufala lukim olketa army camp raonem Jerusalem, then iufala mas savve end bilong hem klosap for kam nao. Then letem olketa long Judea start for ranawe go long olketa maunten.”—Luke 21:20, 21.

8. (a) Wanem nao maet happen long samfala Christian taem samfala year go pas bihaen Jesus hem dae? (b) Hao nao profesi bilong Jesus abaotem Jerusalem hem fulfill?

⁸ Taem olketa year go pas, samfala Christian long Jerusalem maet tingting wanem taem nao profesi bilong Jesus bae fulfill. Tru nao, tingim olketa sakrifaes wea samfala long olketa mekem finis. Maet olketa rejectim finis gudfala chance for startim olketa bisnis wea savve win bikos olketa disaed strong for go ahed for lukaot. Taem samfala year go pas, waswe, olketa start for taed? Waswe, olketa tingse olketa westem taem nomoa, from olketa tingse toktok bilong Jesus hem for wanfala genereson long future, no for olketa? Long 66 C.E., profesi bilong Jesus start for fulfill taem olketa army bilong Rome raonem Jerusalem. Olketa wea go ahed for lukaot nao luksavve long datfala saen, lusim taon, and stap sef taem Jerusalem hem finis.

Showimaot Need for Lukaot Gud

9, 10. (a) Talem shortfala story abaotem tokpiksa bilong Jesus abaotem olketa slave wea weitim masta for kam bak bihaen hem marit. (b) Why nao maet hem hard for olketa slave for weitim masta bilong olketa? (c) Why nao hem gud for olketa slave mas patient?

⁹ For strongim datfala need for lukaot gud, Jesus markem olketa disaepol bilong hem olsem olketa slave wea weitim masta bilong olketa for kam bak bihaen hem marit. Olketa savve hem bae kam bak long wanfala naet—bat long wanem hour? Long first security bilong naet? Long mek-tu? Long mek-thri? Olketa no savve. Jesus hem sei: “Sapos [masta] hem kam long taem bilong mek-tu security, or long mek-thri, and hem lukim olketa [lukaot gud] olsem, olketa bae hapi!” (Luke 12:35-38) Tingim bigfala feeling bilong olketa slave hia. Eni noise, eni shadow bae mekem olketa barava hope olsem: ‘Waswe, maet hem nao masta bilong iumi?’

¹⁰ Waswe sapos masta kam long mek-tu security bilong naet, wea start from samting olsem naen klok go kasem midolnaet? Waswe, evri slave, witim olketa wea waka hard start long early morning, bae redy for welkamim hem, or bae samfala sleep? Waswe sapos masta kam bak long mek-thri security bilong naet—wea start long midolnaet go kasem thri klok long morning? Waswe, bae samfala slave wikdaon, and no hapi tu from luk olsem masta hem delay?a Only olketa wea lukaot gud taem masta kam bak bae hapi. Toktok long Proverbs 13:12 barava fitim olketa: “Taem samting wea man expectim hem delay hem mekem heart sik, bat samting wea man laekem hem wanfala tree bilong laef taem hem kam.”

11. Hao nao prea savve helpem iumi go ahed for lukaot?

¹¹ Long taem wea luk olsem hem delay, wanem nao bae helpem olketa wea followim Jesus for go ahed for lukaot? Taem hem stap long garden bilong Gethsemane bifor olketa kasholem hem, Jesus talem thrifala aposol bilong hem: “Go ahed for lukaot and prea evritaem, mekem iufala no kasem test.” (Matthew 26:41) Long samfala year bihaen, Peter, wea stap long datfala taem tu, givim semkaen kaonsel long olketa Christian. Hem raet olsem: “End bilong evri samting hem kam klosap nao. Dastawe, garem gudfala tingting, and redy evritaem for prea.” (1 Peter 4:7) Hem klia, barava strongfala prea mas part long Christian schedule bilong iumi. Tru tumas, iumi need for evritaem barava askem Jehovah for helpem iumi go ahed for lukaot.—Romans 12:12; 1 Thessalonians 5:17.

12. Hao nao wei for trae guessim wanfala taem and wei for expectim tufala difren?

¹² Lukim hao Peter talem tu: “End bilong evri samting hem kam klosap nao.” Hem hao klos? Man no savve talem barava day and hour. (Matthew 24:36) Bat wei for trae guessim wanfala taem, wea hem samting Bible no encouragem, hem difren from wei for go ahed for expectim end, wea hem samting Bible encouragem. (Markem 2 Timothy 4:3, 4; Titus 3:9.) Wanem nao wanfala wei wea iumi savve go ahed for expectim end? Hem nao for lukluk gud long pruv wea showimaot end hem klosap. Hem gud for iumi reviewim sixfala pruv wea showimaot iumi stap insaed olketa last day bilong disfala world wea no followim God.

Sixfala Strong Pruv

13. Hao nao profesi bilong Paul long 2 Timothy chapter 3 helpem iu luksavve iumi stap insaed “olketa last day”?

¹³ First wan, iumi lukim klia profesi bilong aposol Paul abaotem “olketa last day” hem fulfill. Paul raet olsem: “Insaed long olketa last day nogud taem wea hard for deal witim bae stap. From olketa man bae lovem seleva, lovem selen, mekhae long seleva, bighed, tokspoelem narawan, no obeyim dadi and mami, no savve sei thankiu, no loyal, no garem love, no willing for agree, tok laea againstim narawan, no savve bossim seleva, raf tumas, no lovem gudfala fasin, brekem trust, followim mind bilong seleva, fulap long praod fasin, lovem hapitaem winim wei for lovem God, garem kaen wei for lovem God bat olketa no followim paoa bilong diswan; and from olketa man hia tanawe. Bat olketa wicked man and man for giaman bae kamap moa worse, giamanim narafala pipol and olketa seleva tu.” (2 Timothy 3:1-5, 13) Waswe, iumi no lukim disfala profesi fulfill long taem bilong iumi? Only olketa wea no laek for luksavve long pruv savve denyim diswan!b

14. Hao nao toktok bilong Revelation 12:9 abaotem Devil hem fulfill distaem, and wanem nao bae klosap happen long hem?

¹⁴ Mek-tu, iumi lukim wanem hem happen bihaen olketa aotem Satan and olketa demon bilong hem from heven, wea fulfillim Revelation 12:9. Hem read olsem: “Olketa torowem go daon datfala bigfala dragon, snek bilong firstaem, dat wan wea olketa kolem Devil and Satan, wea giamanim olketa man long earth; olketa torowem hem kamdaon long earth, and olketa torowem olketa angel bilong hem go daon witim hem.” Diswan lead go long bigfala trabol for earth. Tru tumas, planti trabol kasem man, especially start kam long 1914. Bat profesi long Revelation talem tu hao taem olketa torowem Devil kamdaon long earth, hem savve “hem garem shortfala taem nomoa.” (Revelation 12:12) Insaed long taem hia, Satan hem faet againstim olketa anointed wan wea followim Christ. (Revelation 12:17) Iumi barava lukim olketa samting wea kamaot from attak bilong hem long taem bilong iumi.c Bat, klosap nao olketa bae putim Satan insaed long hol wea deep tumas mekem “hem no savve giamanim olketa nation moa.”—Revelation 20:1-3.

15. Hao nao Revelation 17:9-11 givim pruv wea showimaot iumi stap insaed taem bilong end?

¹⁵ Mek-thri, iumi stap insaed taem bilong mek-eit and lastfala “king” wea profesi long Revelation 17:9-11 hem storyim. Long hia aposol John storyim sevenfala king, wea piksarem sevenfala world paoa—Egypt, Assyria, Babylon, Medo-Persia, Greece, Rome, and England-America world paoa. Hem lukim tu “mek-eit king” wea “kamaot from olketa sevenfala.” Disfala mek-eit king—last wan wea John lukim long vision—hem distaem piksarem United Nations. John hem sei disfala mek-eit king “go for finis evribit,” and bihaen diswan hem no storyim eni king moa long earth.d

16. Hao nao olketa samting wea fulfillim image insaed dream bilong Nebuchadnezzar showimaot iumi stap insaed olketa last day?

¹⁶ Mek-foa, iumi stap insaed taem wea feet bilong image insaed dream bilong Nebuchadnezzar hem piksarem. Profet Daniel talemaot mining bilong disfala secret dream abaotem wanfala maeti image wea luk olsem man. (Daniel 2:36-43) Fofala metal part long datfala image hem piksarem olketa difren world paoa, start long hed (Rul Bilong Babylon) and kamdaon kasem feet and olketa toe (olketa gavman wea rul distaem). Evri world paoa wea datfala image piksarem olketa kamap finis. Iumi stap insaed taem wea feet bilong image hem piksarem. Bible no storyim eni world paoa moa wea bae kam bihaen.e

17. Hao nao Kingdom-preaching waka bilong iumi hem nara pruv wea showimaot iumi stap insaed taem bilong end?

¹⁷ Mek-faev, iumi lukim preaching waka kasem evriwea long world, wea Jesus sei diswan bae kamap just bifor end bilong disfala system. Jesus hem sei: “Olketa bae talemaot disfala gud nius bilong kingdom evriwea long earth for givim witness long evri nation; and then end bae kam.” (Matthew 24:14) Distaem, datfala profesi hem go ahed for fulfill long barava bigfala wei. Hem tru, samfala niu territory stap yet, and maet long taem wea Jehovah markem finis, bigfala door wea lead go for moa waka bae open. (1 Corinthians 16:9) Nomata olsem, Bible no sei Jehovah bae weit go kasem taem evri man wanwan long earth kasem witness. Bat, olketa mas preachim gud nius go kasem taem Jehovah sei hem inaf. Then end bae kam.—Markem Matthew 10:23.

18. Luk olsem, wanem nao bae happen long samfala anointed wan taem great tribulation hem start, and hao nao iumi luksavve long diswan?

¹⁸ Mek-six, namba bilong olketa trufala anointed disaepol bilong Christ hem katdaon, bat hem luk olsem samfala bae stap yet long earth taem great tribulation hem start. Planti long olketa wea stap yet olketa olo distaem, and long olketa year wea go pas namba bilong olketa trufala anointed wan hem katdaon. Bat, taem Jesus tok abaotem great tribulation, hem sei: “Sapos olketa day hia no kat short, no eni body bae sev; bat bikos long olketa wan wea God chusim, olketa day hia bae kat short.” (Matthew 24:21, 22) So, luk olsem samfala bilong Christ “wea God chusim” bae stap yet long earth taem great tribulation hem start.f

Wanem Nao Stap Long Front?

19, 20. Why nao hem moa important for iumi distaem winim enitaem bifor for stap wekap and go ahed for lukaot?

¹⁹ Wanem nao bae happen long future bilong iumi? Barava spesol taem stap front long iumi. Paul givim warning hao “day bilong Jehovah bae kam olsem man for steal long naet.” Taem hem tok abaotem olketa man wea luk olsem olketa garem bigfala savve, hem sei: “Long taem wea olketa sei: ‘Peace and sef living!’ then seknomoa, taem for finis evribit bae kasem olketa kwiktaem.” Dastawe, Paul encouragem olketa wea readim toktok bilong hem: “Letem iumi no sleep olsem olketa narawan, bat letem iumi stap wekap and keepim gudfala tingting.” (1 Thessalonians 5:2, 3, 6) Tru tumas, olketa wea depend long organization bilong man for mekem peace and sef living no laek for luksavve long really samting. Olketa man olsem nao barava deep sleep!

²⁰ End bilong disfala system bae seknomoa kam. So, go ahed for expectim day bilong Jehovah. God hem talem Habakkuk: “Hem bae no leit”! Tru nao, no enitaem bifor hem moa important olsem distaem for iumi go ahed for lukaot.

[Olketa Footnote]

Waswe, Iu Remember?

• Wanem nao samfala example from Bible wea savve helpem iumi for go ahed for lukaot?

• Wanem example nao Jesus iusim for showimaot need for lukaot gud?

• Wanem nao sixfala pruv wea showimaot iumi stap insaed olketa last day?

[Piksa long page 9]

A. H. Macmillan faithful for servem Jehovah for klosap sixti year

[Piksa long page 10]

Jesus markem olketa disaepol bilong hem olsem olketa slave wea go ahed for lukaot