Wan Mind Evriwea Long World Distaem!

Wanfala spesol profesi insaed Bible buk bilong Zephaniah storyim wei wea pipol from difren kaen living hipap tugeta. Hem sei: “Then mi [Jehovah God] bae givim long olketa pipol wanfala change go long wanfala klinfala languis, for mekem evriwan singaot long nem bilong Jehovah, wea mekem olketa for servem hem olsem wanfala team.” (Zephaniah 3:9) Diswan hem naesfala wei for storyim pipol wea change and servem God witim wan mind!

For mekem pipol bilong hem garem wan mind, Jehovah givim long olketa wanfala klin languis. Insaed niu languis hia hem stretfala wei for minim truth bilong Bible abaotem God and olketa purpose bilong hem. For tok long klin languis hem minim tu wei for bilivim truth, teachim long narafala pipol, and live followim olketa law and principle bilong God. Hem needim wei for barava stap klia from politik wea divaedem pipol and aotem from heart bilong iumi olketa selfish tingting, olsem wei for heitim man from difren ples and wei for mekhae long kantri, wea hem fasin bilong disfala world. (John 17:14; Acts 10:34, 35) Evriwan wea garem honest heart and wea lovem truth savve lanem disfala languis. Tingim hao faevfala pipol wea iumi storyim long firstfala article—wea bifor olketa separate saed long religion—distaem garem wan mind long worship bilong tru God, Jehovah.