Pipol Bilong Jehovah wea Kamap Gud Moa Praisem Hem Evriwea Long Earth
“Mi bae givim long olketa pipol wanfala change go long klinfala languis, for mekem evriwan singaot long nem bilong Jehovah.”—ZEPHANIAH 3:9.
1. Why nao olketa message bilong judgment fulfill long Judah and olketa nara nation?
FULAP witim paoa nao olketa judgment message wea Jehovah muvim Zephaniah for talem! Olketa judgment message hia hem againstim Judah and kapitol bilong hem, Jerusalem, bikos olketa leader and pipol olsem wanfala sekson no duim will bilong Jehovah. Olketa nation wea stap klosap, olsem Philistia, Moab, and Ammon, bae kasem tu kros bilong God. Why nao olsem? Bikos for planti handred year olketa strong for againstim pipol bilong Jehovah. For datfala sem reason, world paoa bilong Assyria bae distroe, and nating start bak moa.
2. Hu nao Zephaniah 3:8 story abaot?
2 Nomata olsem, samfala wea garem fasin wea stret stap long Judah long dat taem. Olketa hia luk forward long judgment bilong God againstim wicked pipol and hem luk olsem disfala toktok story abaotem olketa: “‘Iufala go ahed long wei for lukluk for mi evritaem,’ hem nao toktok bilong Jehovah, ‘go kasem taem day bilong mi kam for pei bak, from judicial disison bilong mi hem for hipimap olketa nation, for mi bae hipimap olketa kingdom, mekem mi kapsaetem kros bilong mi antap long olketa, evri hotfala kros bilong mi; from strong wea olsem fire bilong mi bae kaikaim full earth.’”—Zephaniah 3:8.
“Wanfala Klinfala Languis” for Hu?
3. Wanem message bilong hope nao God muvim Zephaniah for talemaot?
3 Tru nao, Zephaniah talemaot olketa message bilong wei for distroe from Jehovah. Bat God muvim profet hia for talem tu wanfala nambawan message bilong hope—wea givim comfort long pipol wea go ahed for faithful long Jehovah. Long Zephaniah 3:9, Jehovah God sei olsem: “Then mi bae givim long olketa pipol wanfala change go long klinfala languis, for mekem evriwan singaot long nem bilong Jehovah, wea mekem olketa for servem hem olsem wanfala team.”
4, 5. (a) Wanem nao bae happen long pipol wea no raeteous? (b) Hu nao bae kasem gud samting from diswan, and why nao olsem?
4 Bat samfala pipol bae no kasem datfala klinfala languis. Profesi story abaotem olketa taem hem sei: “Mi bae aotem from midolwan long iu olketa wea praod.” (Zephaniah 3:11) So olketa praod pipol wea lukdaonem olketa law bilong God and wea go ahed for duim samting wea no raeteous bae hem aotem. And hu nao bae kasem gudfala samting from diswan? Zephaniah 3:12, 13 sei: “Mi [Jehovah] bae letem stap midolwan long iu wanfala pipol wea hambol and garem kwaet fasin, and olketa bae stap sef insaed long nem bilong Jehovah. And saed long olketa bilong Israel wea stap yet, olketa bae no followim wei wea no raeteous, or talem laea samting, and mouth bilong olketa bae no garem giaman toktok; from olketa bae kaikai and sleep gud, and no eniwan bae mekem olketa fraet.”
5 Wanfala faithful remnant long Judah bifor bae kasem gudfala samting. Why nao olsem? Bikos olketa followim disfala toktok: “Lukaotem Jehovah, iufala evriwan wea garem kwaet fasin long earth, wea duim olketa law bilong Hem. Lukaotem raeteous fasin, lukaotem kwaet fasin. Maet iufala savve haed long day bilong kros bilong Jehovah.”—Zephaniah 2:3.
6. Wanem nao happen long firstaem wea profesi bilong Zephaniah hem fulfill?
6 Long firstaem wea profesi bilong Zephaniah hem fulfill, God panisim Judah wea no faithful taem hem letem World Paoa Bilong Babylon for tekem hem prisoner long 607 B.C.E. Samfala, witim profet Jeremiah and narawan tu, olketa laef, and olketa narawan go ahed for faithful long Jehovah taem olketa stap prisoner. Long 539 B.C.E., anda long rul bilong King Cyrus, Media and Persia winim Babylon. Klosap tufala year bihaen, Cyrus mekem wanfala law wea letem wanfala remnant bilong olketa Jew for go bak long homland bilong olketa. Gogo, olketa buildim moa temple bilong Jerusalem, and Jehovah putim bak moa olketa priest for teachim pipol abaotem Law. (Malachi 2:7) So Jehovah blessim datfala remnant wea kamap gud moa—sapos olketa go ahed for faithful.
7, 8. Hu nao profesi toktok long Zephaniah 3:14-17 hem fitim, and why nao iu ansa olsem?
7 Zephaniah talem profesi abaotem olketa wea bae enjoyim datfala wei for kamap gud moa: “Singaot witim hapi, O dota bilong Zion! Shout big witim hapi, O Israel! Hapi and jamp ap from full heart, O dota bilong Jerusalem! Jehovah hem aotem finis olketa judgment againstim iu. Hem raosem finis enemy bilong iu. King bilong Israel, Jehovah, hem stap midolwan long iu. Iu bae no fraetem eni trabol. Long datfala day bae olketa sei long Jerusalem: ‘No fraet, O Zion. Letem hand bilong iu no wikdaon. Jehovah God bilong iu hem stap midolwan long iu. Olsem wanfala maeti Wan, hem bae sevem iu. Long saed bilong iu hem bae tinghae witim hapi. Hem bae stap kwaet from love bilong hem. Hem bae hapi long iu witim hapi singaot.’”—Zephaniah 3:14-17.
8 Toktok hia hem abaotem remnant wea kamaot from Babylon and go bak long land bilong olketa laen dadi bilong olketa. Diswan hem showaot klia long Zephaniah 3:18-20, wea sei: “‘Olketa wea sorre tumas from olketa no kam long festival bilong iu bae mi [Jehovah] hipimap tugeta; wea bifor olketa no kam long iu, bikos long trabol wea olketa mas karem. Mi bae duim samting againstim evriwan wea mek trabol for iu, long datfala taem; and mi bae sevem hem wea no wakabaot gud, and hem wea go farawe mi bae hipimap tugeta. And mi bae mekem olketa kamap olsem praise and garem nem long land bilong shame bilong olketa. Long datfala taem mi bae tekem kam iufala pipol insaed, long taem wea mi hipimap iufala tugeta. Mi bae mekem iufala pipol for kamap wanfala nem and praise midolwan long evri pipol bilong earth, taem mi tekem kam bak olketa bilong iufala wea stap prisoner front long eye bilong iufala,’ Jehovah hem sei.”
9. Hao nao Jehovah mekem nem bilong hem kamap barava hae saed bilong Judah?
9 Tingim sapraes and seke bilong olketa nation wea stap klosap and enemy long pipol bilong God! Maeti Babylon hem tekem finis Judah olsem prisoner, witim no eni hope for kam bak. And tu, land bilong olketa stap emti. From paoa bilong God, olketa kam bak long homland bilong olketa bihaen 70 year, bat olketa enemy nation gogo for finis nao. Jehovah mekem nem bilong hem kamap barava hae taem hem tekem kam bak datfala faithful remnant! Hem mekem olketa for kamap “wanfala nem and praise midolwan long evri pipol.” Datfala wei for kamap gud moa hem givim praise long Jehovah and olketa wea karem nem bilong hem!
Worship Bilong Jehovah Kamap Hae
10, 11. Wanem taem nao profesi bilong Zephaniah abaotem wei for kamap gud moa hem fulfill long bigfala wei, and hao nao iumi savve long diswan?
10 Narafala taem for kamap gud moa hem happen long first century taem Jesus Christ hipimap wanfala remnant bilong Israel for tru worship. Datwan hem smol piksa bilong wanem bae happen, bikos bigfala wei wea diswan bae fulfill hem long future yet. Micah talem profesi olsem: “Hem mas happen long lastfala part bilong olketa day hao maunten bilong haos bilong Jehovah bae showaot strong winim top bilong olketa maunten, and diswan bae kamap hae winim olketa hill; and planti pipol mas go long diswan.”—Micah 4:1.
11 Wanem taem nao diswan bae happen? Olsem profesi talem, “long lastfala part bilong olketa day”—yes, long “olketa last day.” (2 Timothy 3:1) Diswan bae happen bifor end bilong disfala system taem olketa nation worshipim yet olketa giaman god. Micah 4:5 hem sei: “Evri pipol, for saed bilong olketa, bae wakabaot long nem bilong god bilong olketa.” And waswe long olketa tru worshiper? Profesi bilong Micah ansa olsem: “Bat iumi, for saed bilong iumi, bae wakabaot long nem bilong Jehovah, God bilong iumi go kasem longfala taem, yes for olowe.”
12. Hao nao tru worship hem kamap hae long olketa last day distaem?
12 So, long olketa last day distaem, “maunten bilong haos bilong Jehovah [hem] showaot strong winim top bilong olketa maunten.” Olsem maunten wea hae winim eniwan, tru worship bilong Jehovah wea hae hem kamap moa hae winim eni narakaen religion. And, olsem profesi bilong Micah hem talem, “planti pipol mas go long diswan.” Olketa wea go ahed for followim tru religion bae “wakabaot long nem bilong Jehovah, God bilong [olketa] go kasem longfala taem, yes for olowe.”
13, 14. Wanem taem nao disfala world go insaed long “lastfala part bilong olketa day,” and wanem nao happen start long dat taem long saed bilong tru worship?
13 Olketa samting wea happen wea fulfillim Bible profesi showimaot disfala world hem go insaed “lastfala part bilong olketa day”—olketa last day bilong hem—long year 1914. (Mark 13:4-10) History showimaot hao long datfala taem Jehovah start for hipimap moa long tru worship wanfala faithful remnant bilong olketa anointed wan, wea garem hope for go long heven. Bihaen diswan hem wei for hipimap “wanfala big crowd . . . wea kamaot from evri nation and tribe and pipol and languis”—wea garem hope for laef olowe long earth.—Revelation 7:9.
14 Start long World War I kam kasem distaem, pipol wea karem nem bilong Jehovah and worshipim hem muv ahed long bigfala wei anda long gaedens bilong hem. Start from tu-thri thousand bihaen World War I, sekson wea worshipim Jehovah distaem kasem samting olsem six million, wea hipap insaed samting olsem 91,000 kongregeson long 235 kantri. Evri year, olketa hia wea talemaot Kingdom givim winim wan billion hour for praisem God long pablik. Hem klia hao olketa Witness bilong Jehovah nao fulfillim disfala profesi toktok bilong Jesus: “Olketa bae talemaot disfala gud nius bilong kingdom evriwea long earth for givim witness long evri nation; and then end bae kam.”—Matthew 24:14.
15. Hao nao Zephaniah 2:3 hem fulfill distaem?
15 Zephaniah 3:17 sei: “Jehovah God bilong iu hem stap midolwan long iu. Olsem wanfala maeti Wan, hem bae sevem iu.” Spiritual blessing wea olketa servant bilong Jehovah enjoyim long olketa last day distaem kamaot nomoa from wei wea hem ‘stap midolwan long olketa’ olsem barava strongfala God bilong olketa. Hem nao samting wea happen long taem wea Judah kamap gud moa, long 537 B.C.E., and hem tru long distaem tu. So iumi savve lukim hao Zephaniah 2:3 kasem main wei for fulfill long taem bilong iumi, taem hem sei: “Lukaotem Jehovah, iufala evriwan wea garem kwaet fasin long earth.” Long 537 B.C.E., “evriwan” nao remnant bilong olketa Jew wea go bak from Babylon. Bat long distaem hem minim evriwan wea garem kwaet fasin from evri nation long earth, wea acceptim preaching waka evriwea long world and go long “maunten bilong haos bilong Jehovah.”
Tru Worship Kamap Big
16. Wanem nao olketa enemy bilong iumi tingim taem olketa lukim olketa servant bilong Jehovah distaem go ahed gud?
16 Bihaen 537 B.C.E., planti long olketa nation wea stap klosap sapraes tumas long wei wea olketa servant bilong God go bak long homland bilong olketa and long tru worship. Bat datfala wei for kamap gud moa hem smol nomoa. Waswe, iu savve tingim wanem samfala, nomata olketa enemy long pipol bilong God, talem taem olketa lukim bigfala wei for grow, gudfala living, and wei wea olketa servant bilong Jehovah distaem muv ahed? Luk olsem samfala enemy hia feel olsem olketa Pharisee taem olketa lukim hao staka pipol go long Jesus. Olketa sei: “Lukim! World hem followim hem nao.”—John 12:19.
17. Wanem nao wanfala man for raet hem talem abaotem Olketa Jehovah’s Witness, and wanem wei for grow nao olketa kasem?
17 Insaed buk bilong hem These Also Believe, Professor Charles S. Braden sei olsem: ‘Olketa Jehovah’s Witness kavarem finis full earth witim witness waka bilong olketa. Iumi fit for sei no eni grup bilong religion long world hem showimaot moa strong and wei for no givap for spreadim gud nius bilong Kingdom winim Olketa Jehovah’s Witness. Luk olsem disfala sekson bae kamap moa strong.’ Hem barava tok tru! Taem hem raetem datfala toktok, samting olsem 300,000 Witness nomoa preach raonem world. Wanem nao bae hem talem distaem, taem namba bilong olketa wea preachim gud nius hem samting olsem 20 taem moa big—samting olsem six million?
18. Wanem nao datfala klinfala languis, and God givim long hu nao?
18 Thru long profet bilong hem, God promis olsem: “Mi bae givim long olketa pipol wanfala change go long klinfala languis, for mekem evriwan singaot long nem bilong Jehovah, wea mekem olketa for servem hem olsem wanfala team.” (Zephaniah 3:9) Long olketa last day distaem, Olketa Jehovah’s Witness nao singaot long nem bilong Jehovah, wea wan mind for servem hem witim love wea no savve brek—yes, “olsem wanfala team.” Olketa nao sekson wea Jehovah givim datfala klinfala languis. Datfala klinfala languis hem minim for garem stretfala savve and wei for tinghae long truth abaotem God and olketa purpose bilong hem. Jehovah nomoa savve provaedem diswan, and hem duim diswan thru long holy spirit bilong hem. (1 Corinthians 2:10) Jehovah givim holy spirit bilong hem long hu nao? Only long “olketa wea obeyim hem olsem ruler.” (Acts 5:32) Olketa Jehovah’s Witness nomoa willing for obeyim God olsem Ruler long evri samting. Dastawe olketa kasem spirit bilong God and toktok long datfala klinfala languis, hem nao truth abaotem Jehovah and olketa nambawan purpose bilong hem. Olketa iusim datfala klinfala languis for praisem Jehovah evriwea long earth long bigfala wei wea go ahed yet for grow.
19. Wanem nao insaed long wei for toktok long datfala klinfala languis?
19 Wei for toktok long datfala klinfala languis hem no minim for bilivim truth and teachim long nara pipol nomoa, bat for garem fasin wea followim olketa law and principle bilong God tu. Olketa anointed Christian nao lead long wei for lukaotem Jehovah and toktok long klinfala languis. Tingim samting wea olketa duim! Nomata namba bilong olketa anointed wan go daon for kasem samting olsem 8,700, klosap six million pipol followim faith bilong sekson hia for lukaotem Jehovah and toktok long datfala klinfala languis. Olketa nao datfala big crowd wea go ahed for grow from planti nation wea showimaot faith long ransom sakrifaes bilong Jesus, givim holy service long courtyard bilong spiritual temple bilong God long earth, and bae winim “datfala big trabol” wea klosap for kasem disfala world wea no raeteous.—Revelation 7:9, 14, 15.
20. Wanem nao stap long front for olketa faithful anointed wan and for olketa wea insaed long datfala big crowd?
20 Datfala big crowd bae go insaed long raeteous niu world bilong God. (2 Peter 3:13) Jesus Christ and 144,000 anointed wan wea resurrect for laef long heven for serve olsem king and priest witim hem bae insaed long niu sekson wea rulim earth. (Romans 8:16, 17; Revelation 7:4; 20:6) Olketa wea winim datfala big trabol bae waka for mekem earth wanfala paradaes and bae go ahed for toktok long datfala klinfala languis wea God givim. Disfala toktok hem fitim olketa tu: “Olketa son bilong iu [and olketa dota tu] bae kamap pipol wea Jehovah teachim, and peace bilong olketa son bilong iu bae kamap big. Iu bae barava stand strong long raeteous fasin.”—Isaiah 54:13, 14.
Teaching Waka wea Winim Eni Nara Taem Long History
21, 22. (a) Olsem Acts 24:15 hem talem, hu nao need for lanem datfala klinfala languis? (b) Wanem teaching waka wea winim eni nara taem nao bae go ahed long earth anda long Kingdom rul?
21 Nara bigfala sekson wea bae garem chance for lanem datfala klinfala languis long niu world nao Acts 24:15 storyim, wea sei: “Wanfala resurrection bae kamap for olketa wea raeteous and wea no raeteous.” Long bifor, planti billion pipol laef and dae bifor olketa kasem stretfala savve abaotem Jehovah. Long wei wea followim order, hem bae mekem olketa laef bak moa. Olketa hia bae need for lanem datfala klinfala languis.
22 Hem bae nambawan privilege for share long datfala bigfala teaching waka! Hem bae wanfala teaching waka wea winim enitaem bifor long history bilong olketa man. Evri samting hia bae kamap anda long Kingdom rul bilong Christ Jesus wea kaen tumas. Gogo, olketa man bae lukim taem wea Isaiah 11:9 hem fulfill, wea sei: “Earth bae fulap witim savve bilong Jehovah olsem wata hem kavarem sea.”
23. Why nao iu savve sei iumi garem bigfala privilege olsem pipol bilong Jehovah?
23 Iumi kasem nambawan privilege long olketa last day distaem for mek redy for nambawan taem wea savve bilong Jehovah bae really fulimap earth! And iumi kasem bigfala privilege distaem for olsem pipol bilong God, for experiencem bigfala wei wea toktok bilong Zephaniah 3:20 hem fulfill! Long there Jehovah hem sei: “Mi bae mekem iufala pipol for kamap wanfala nem and praise midolwan long evri pipol bilong earth.”
Hao Nao Bae Iu Ansa?
• Profesi bilong Zephaniah abaotem wei for kamap gud moa hem fulfill long wanem wei?
• Hao nao tru worship hem grow insaed olketa last day distaem?
• Wanem nao bigfala teaching waka wea bae kamap insaed long niu world?
[Piksa long page 25]
Pipol bilong Jehovah go bak long homland bilong olketa for startim bak klin worship. Waswe, iu savve long mining bilong diswan distaem?
[Olketa Piksa long page 26]
Taem olketa toktok long “klinfala languis,” Olketa Jehovah’s Witness talem pipol message bilong Bible wea givim comfort