‘Solomon Hem No Luk Naes Olsem Wanfala Long Olketa Hia’

OLKETA wild flaoa olsem iumi lukim hia hem staka tumas long saed road long south part bilong Africa. Olketa kolem diswan cosmos and olketa kam from hot area long America. Olketa naesfala flaoa olsem savve mekem iumi tingim wanfala leson wea Jesus teachim. Planti wea lisin long hem olketa poor, and wari abaotem physical need bilong olketa, kaikai and kaleko.

“Long saed bilong kaleko,” Jesus hem ask, “why nao iufala wari? Lanem leson from olketa lily bilong field, wei wea olketa grow; olketa no hard waka, or wakem kaleko; bat mi talem iufala, nomata Solomon witim bigfala glory bilong hem no luk naes tumas olsem wanfala long olketa hia.”—Matthew 6:28, 29.

Pipol talem difren kaen idea abaotem wanem kaen wild flaoa nao Jesus tingim. Bat Jesus markem diswan witim evrikaen plant, taem hem sei: “So sapos God savve givim kaleko for olketa plant long field, wea stap tuday nomoa and tumoro olketa torowem long fire, waswe, bae hem no givim kaleko long iufala, iufala wea garem lelebet faith?”—Matthew 6:30.

Nomata cosmos hem no flaoa bilong Israel, olketa saportim datfala leson wea Jesus teachim. Nomata iumi lukim from farawe or lukluk klosap long hem, olketa barava luk naes and olketa man for tek piksa and artist laekem tumas. Tru nao, Jesus no ova tumas taem hem sei, “nomata Solomon witim bigfala glory bilong hem no luk naes tumas olsem wanfala long olketa hia.”

Wanem nao leson for iumi distaem? Olketa wea servem God savve sure hao hem bae helpem olketa for kasem main need bilong olketa nomata long hard taem. Jesus explainim: “Go ahed for luk aotem kingdom bilong [God] evritaem, and iufala bae kasem olketa samting hia [olsem kaikai and kaleko wea iumi needim] tu.” (Luke 12:31) Tru nao, man savve kasem gud samting from wei for luk aotem Kingdom bilong God. Bat, waswe, iu savve wanem nao Kingdom bilong God and wanem nao hem bae duim for olketa man? Olketa Jehovah’s Witness hapi tumas for helpem iu faendem ansa from Bible.