Duim Or No Duim Long Narawan?
DATFALA Chinese teacher and savveman Confucius wea staka savve long hem, talem disfala toktok saed long fasin: “Wanem iu no laekem narawan for duim long iu, no duim long hem.” Distaem, bihaen samting olsem 2,500 year, planti pipol still biliv hao hem inaf sapos man hol bak from wei for spoelem narawan.
Iumi barava sure, disfala principle bilong Confucius saed long fasin garem samfala barava important point. Bat, Bible showimaot nara part long saed long fasin bilong man and hao for deal witim each other. Witim sin wea man duim againstim nara man, Bible storyim tu sin bilong wei for min for no duim samting. Christian disaepol James raet olsem: “Sapos man savve hao for duim stretfala samting bat hem no duim, datwan hem wanfala sin for hem.” (James 4:17) Winim wei for talem nomoa olketa Christian for no duim nogud samting long each other, Jesus Christ givim disfala kaonsel: “Evri samting wea iufala laekem olketa man for duim long iufala, iufala tu mas duim olsem long olketa.”—Matthew 7:12.
Tingting bilong God firstaem abaotem evri man hem for deal witim each other olsem olketa laekem narawan for duim long olketa. Hem showim barava nambawan example long wei for showimaot kea for olketa narawan long wei wea hem creatim olketa man: “God hem creatim man long image bilong hemseleva, long image bilong God nao hem creatim hem; hem creatim tufala olsem man and woman.” (Genesis 1:27) Diswan minim long loving wei God creatim olketa man witim wanfala conscience, wea sapos olketa trainim gud bae hem leadim olketa for deal witim narawan long sem wei wea olketa laekem narawan for duim for olketa seleva.
Planti pipol long taem bilong iumi safa from planti nogud samting wea pipol wea selfish and no tingim narawan duim. Hem klia tumas, winim wei for no duim nogud samting and no spoelem narawan, iumi mas duim gud samting and helpem olketa. From diswan, Olketa Jehovah’s Witness willing for volunteer for duim diswan long wei wea bae helpem narawan for lanem nambawan hope long Word bilong God. Taem olketa visitim olketa neiba bilong olketa witim gud nius from Bible, olketa duim witim love, and duim wanem olketa laekem narawan for duim long olketa seleva.