Taem Hem Wise for Ranawe

WEI for man act olsem hem strong and no fraet, raf fasin, temptation, evri samting hia hem fasin bilong world distaem. Planti taem pipol ting long man wea ranawe from samting olsem hem wik or hem fraet. Olketa maet mekfani long hem tu.

Bat, Bible talem klia hao samfala taem, for ranawe hem wise samting and hem wei for no fraet. For showim hao diswan hem tru, Jesus Christ talem olketa disaepol bilong hem bifor hem sendem olketa go aot long ministry: “Taem olketa persecutim iufala long wanfala taon, ranawe go long narawan.” (Matthew 10:23) Tru nao, olketa disaepol bilong Jesus mas trae for ranawe from pipol wea persecutim olketa. Olketa mas no duim eni samting olsem war bilong religion, and trae for forcem nara pipol for kamap disaepol. Olketa karem wanfala message bilong peace. (Matthew 10:11-14; Acts 10:34-37) So winim wei for kros, olketa Christian mas ranawe and go farawe from samting wea mekem kros kamap. Long disfala wei, olketa keepim gudfala conscience and spesol wei for fren witim Jehovah.—2 Corinthians 4:1, 2.

Wanfala example wea showimaot difren saed long diswan hem stap long Bible buk bilong Proverbs. Hem story abaotem wanfala young man wea, winim wei for ranawe from temptation, hem go bihaenem wanfala jury woman “olsem wanfala buluka wea kam for olketa busarem.” Wanem nao kamaot from diswan? Bigfala trabol bikos hem foldaon long temptation wea laef bilong hem insaed diswan.—Proverbs 7:5-8, 21-23.

Waswe sapos iu feisim temptation for duim dirty fasin or samfala nara danger samting? Olsem Word bilong God talem, stretfala samting for duim hem maet for ranawe, for go from datfala samting stretawe.—Proverbs 4:14, 15; 1 Corinthians 6:18; 2 Timothy 2:22.