Tingting Bilong Bible
Waswe, Eni Sin Bae No Kasem Forgiveness?
WASWE, eni panis stap wea worse winim dae? Yes, for dae and no garem hope for resurrect bikos man duim wanfala sin wea bae no kasem forgiveness. Jesus sei hao wanfala kaen sin stap wea “bae no kasem forgiveness.”—Matthew 12:31.
Bible talem hao God savve forgive. Nomata iumi olketa man savve tingim tumas olketa rong bilong narawan and no savve forgive, God hem “forgive long bigfala wei.” (Isaiah 55:7-9) Tru nao, nomata hem bigfala sakrifaes for hem, God sendem Son bilong hem wea hem lovem for kam long earth for kamap wanfala sakrifaes wea barava garem hae price for aotem evribit sin bilong iumi.—John 3:16, 17; Acts 3:19; 1 John 2:1, 2.
Long taem wea hem markem God bae resurrectim planti wea bin duim olketa nogud sin bat bae olketa no kasem judgment for olketa samting wea olketa duim bifor. (Acts 24:15; Romans 6:23) Tru nao, Jesus sei, “evri kaen sin and wei for againstim God bae kasem forgiveness,” bat only wanfala sin nomoa bae no kasem forgiveness. (Matthew 12:31) So iu maet ask, ‘Wanem kaen samting nao barava nogud tumas dastawe God bae no forgivim?’
Taem Man No Savve Repent Nao
Warning bilong Jesus hem point go long wei for min for “againstim spirit.” No eni wei stap for kamap free from diskaen sin. Hem sei: “No insaed long disfala system or datwan wea bae kam.” (Matthew 12:31, 32) Olketa wea duim kaen sin olsem bae no kasem resurrection.
Wanem nao wei for againstim spirit? Hem samting wea kam from heart, wea showimaot man fulap witim heit and min for spoelem narawan. Wei wea hem min for againstim holy spirit bilong God hem mekem disfala sin moa serious. Olsem example: Long samfala ples long world, wei wea law bae judgem man wea killim dae nara man hem depend long wei wea datfala man wea killkill hem duim datwan, and only olketa wea min for killim dae narawan bae kasem panis for dae.
Aposol Paul hem wanfala man for againstim God bifor bat hem sei: “Mi kasem mercy, from mi no savve.” (1 Timothy 1:13) For sin againstim holy spirit hem wei for min for againstim. Diswan minim man garem wicked heart wea gogo hem bae no tan bak nao.
Luk olsem Paul hem story abaotem diskaen sin taem hem raet olsem: “No eni wei stap nao for olketa wea kasem laet finis and acceptim finis free present bilong heven and kamap olketa wea kasem holy spirit, and acceptim nambawan toktok bilong God and paoa long datfala system wea bae kam, bat olketa tanawe, so no eni wei stap moa for tanem olketa for repent.” (Hebrews 6:4-6) Aposol hia hem sei tu: “Sapos iumi min for go ahed for sin nomata iumi kasem finis stretfala savve bilong truth, no eni sakrifaes for sin hem stap moa.”—Hebrews 10:26.
Fasin bilong samfala bigman bilong religion long taem bilong Jesus muvim hem for talem disfala warning abaotem kaen sin wea bae no kasem forgiveness. Bat olketa no lisin long warning bilong hem. For tok stret, olketa killim hem dae. Bihaen, olketa herem pruv wea olketa no fit for denyim hao holy spirit duim wanfala mirakol. Olketa herem hao Jesus hem resurrect from dae! Hem barava showaot klia hao Jesus nao hem datfala Christ! Nomata olsem, olketa duim wicked samting againstim holy spirit taem olketa peim olketa Roman soldia for laea abaotem resurrection bilong Jesus.—Matthew 28:11-15.
Warning for Olketa Tru Christian
Why nao olketa tru Christian mas tinghevi long datfala warning abaotem sin wea bae no kasem forgiveness? Bikos nomata iumi garem stretfala savve abaotem God and abaotem waka bilong spirit bilong hem, heart bilong iumi savve kamap wicked. (Hebrews 3:12) Iumi shud careful for no tingse bae diswan no savve kasem iumi. Tingim Judas Iscariot. Bifor hem wanfala faithful follower bilong Jesus. Jesus chusim hem for kamap wanfala long olketa 12-fala aposol, so hem mas garem olketa gudfala fasin. Bat gogo hem letem olketa wicked tingting and feeling for grow, and gogo olketa winim hem. Insaed long semtaem hem lukim Jesus duim olketa nambawan mirakol, hem go ahed for stealim selen. Then, from hem laek kasem selen, hem givim Jesus go long olketa enemy nomata hem savve Jesus hem Son bilong God.
Samfala pipol wea bifor olketa faithful Christian olketa min for go awe from God, maet from olketa kros, garem praod fasin, or greedy fasin, and distaem olketa kamap apostate wea faet againstim spirit bilong God. Olketa min for againstim olketa samting wea showaot klia spirit hem go ahed for duim. Waswe, olketa hia duim sin wea bae no kasem forgiveness? Jehovah nao bae Judge.—Romans 14:12.
Winim wei for judgem narawan, hem gud for iumi wanwan protectim iumiseleva againstim wei for duim olketa secret sin wea bae gogo mekem heart bilong iumi no soft. (Ephesians 4:30) And iumi kasem comfort from iumi savve hao sapos iumi repent, Jehovah bae forgivim iumi long bigfala wei, nomata sapos iumi duim bigfala sin.—Isaiah 1:18, 19.
[Piksa long page 30, 31]
Samfala Pharisee duim sin wea bae no kasem forgiveness