Hapi for Savve Abaotem Jehovah
“Hapi nao olketa wea herem word bilong God and followim!”—LUKE 11:28.
1. Wanem taem nao Jehovah start for story witim olketa man?
JEHOVAH lovem olketa man and interest tumas for olketa garem gud living. So, iumi no sapraes hao hem story witim olketa. Disfala wei for story hem start long garden bilong Eden. Genesis 3:8 hem sei long wantaem, “long taem bilong day wea wind hem blow,” Adam and Eve “herem voice bilong Jehovah God.” Samfala sei diswan minim hem samting wea Jehovah savve duim evritaem for story witim Adam, maet long evriday. Nomata wanem, Bible showimaot klia hao God hem iusim taem no for givim instruction nomoa long first man bat for teachim hem tu long samting wea hem needim for duim olketa responsibility bilong hem.—Genesis 1:28-30.
2. Hao nao first man and woman separatem tufala seleva from instruction bilong Jehovah, and wanem nao kamaot from datwan?
2 Jehovah givim laef long Adam and Eve, and paoa ovarem olketa animal and ovarem full earth. Wanfala samting nomoa hem tambuim—tufala mas no kaikai from tree bilong savve bilong gud and nogud samting. From Satan affectim tufala, Adam and Eve no obeyim komand bilong God. (Genesis 2:16, 17; 3:1-6) Tufala chus for independent, for tufala seleva disaedem samting wea stret and no stret. Taem tufala duim olsem, tufala krangge for separatem tufala seleva from instruction bilong loving Creator. Samting wea kamaot from diswan barava nogud for tufala and pikinini bilong tufala. Gogo Adam and Eve kamap olo and dae witim no eni hope for resurrect. Olketa pikinini bilong tufala born witim sin and samting wea kamaot from datwan, dae.—Romans 5:12.
3. Why nao Jehovah story long Cain, and hao nao Cain hem ansa?
3 Nomata bighed fasin kamap long Eden, Jehovah go ahed for story witim olketa man wea hem creatim. Cain, firstborn son bilong Adam and Eve, hem insaed long danger for sin winim hem. Jehovah warnim hem hao hem gogo for trabol and advaesem hem for “change for duim gudfala samting.” Cain rejectim disfala loving kaonsel and killim dae brata bilong hem. (Genesis 4:3-8) So, first thrifala man long earth rejectim kliafala instruction bilong datwan wea givim olketa laef, God, wea givim instruction long pipol bilong hem mekem olketa kasem gudfala samting. (Isaiah 48:17) Diswan hem mekem Jehovah feel sorre tumas!
Jehovah Showim Hemseleva Long Olketa Man Bifor
4. Saed long olketa pikinini bilong Adam, Jehovah sure long wanem samting, and wanem message bilong hope nao hem talem taem hem tingim datwan?
4 Nomata fitim for hem no story moa witim olketa man, Jehovah no duim datwan. Hem sure samfala pikinini bilong Adam bae wise for followim instruction bilong hem. Olsem example, taem hem judgem Adam and Eve, Jehovah talemaot wanfala “seed” bae againstim datfala Snek, Satan datfala Devil. Gogo Satan bae dae from nogud garekil long hed. (Genesis 3:15) Disfala profesi hem wanfala hapi message bilong hope for “olketa wea herem word bilong God and followim.”—Luke 11:28.
5, 6. Wanem nao olketa wei wea Jehovah story witim pipol bilong hem bifor long first century C.E., and hao nao diswan helpem olketa?
5 Jehovah talemaot will bilong hem long olketa hed bilong famili laen bifor wea faithful, olsem Noah, Abraham, Isaac, Jacob, and Job. (Genesis 6:13; Exodus 33:1; Job 38:1-3) Bihaen, thru long Moses hem givim olketa law for nation bilong Israel. Law bilong Moses helpem olketa long planti wei. Taem olketa obeyim datwan, Israel stap separate from evri narafala nation olsem spesol pipol bilong God. God promisim olketa Israelite hao sapos olketa obeyim Law, hem bae blessim olketa no long physical wei nomoa bat long spiritual wei tu, mekem olketa kamap wanfala kingdom bilong olketa priest, wanfala holy nation. Law givim tu olketa law saed long kaikai and wei for stap klin wea mekem olketa healthy. Bat, Jehovah warnim olketa tu long barava nogud samting wea bae happen sapos olketa no obey.—Exodus 19:5, 6; Deuteronomy 28:1-68.
6 Gogo, olketa nara buk wea kam from God stap insaed long Bible. Story bilong history showimaot wei wea Jehovah deal witim olketa nation and pipol. Olketa poetry buk storyim olketa fasin bilong hem long barava naes wei. Olketa buk bilong profesi talemaot hao will bilong God bae happen long future. Olketa faithful man bilong bifor studyim gud and followim olketa raeting hia wea kam from God. Wanfala hem raet olsem: “Word bilong iu hem wanfala lamp for leg bilong mi, and laet for road bilong mi.” (Psalm 119:105) Jehovah provaedem education and savve for olketa wea willing for lisin.
Laet Hem Kamap Moa Braet
7. Nomata Jesus duim olketa mirakol, pipol savve long hem olsem man wea duim wanem, and why nao olsem?
7 Kasem first century, olketa grup bilong Jew religion joinim go olketa kastom bilong man long datfala Law. Olketa followim Law long rong wei, and winim wei for hem kamap samting wea helpem man, hem kamap hevi bikos long olketa kastom hia. (Matthew 23:2-4) Nomata olsem, long 29 C.E., Jesus kamap Messiah. Assignment bilong hem no for givim laef bilong hem nomoa for olketa man, bat tu for “witness abaotem truth.” Nomata hem duim olketa mirakol, pipol savve long hem olsem “Teacher.” Teaching bilong hem olsem wanfala laet wea shaen thru long spiritual darkness wea kavarem mind bilong pipol. Jesus seleva talem tru samting olsem: “Mi nao laet bilong world.”—John 8:12; 11:28; 18:37.
8. Wanem nao olketa buk wea spirit muvim olketa for raetem long first century C.E., and hao nao olketa hia helpem olketa first Christian?
8 Then olketa raetem fofala Gospel, fofala story abaotem laef bilong Jesus, and buk bilong Acts, story abaotem history bilong Christian Wei bihaen Jesus hem dae. And tu olketa leta wea spirit muvim olketa disaepol bilong Jesus for raetem, and profesi buk bilong Revelation. Olketa raeting hia, witim olketa Hebrew Scripture, kamap full Bible. Witim help bilong disfala library wea kam from God, olketa Christian savve “fit for minim witim olketa holy wan wanem nao waed and long and hae and deep” bilong truth. (Ephesians 3:14-18) Olketa savve garem “mind bilong Christ.” (1 Corinthians 2:16) Nomata olsem, olketa first Christian hia no minim evribit evri part long olketa purpose bilong Jehovah. Aposol Paul raet olsem long olketa narawan wea biliv: “Distaem iumi lukim samting wea no klia tumas insaed long wanfala metal mirror.” (1 Corinthians 13:12) Kaen mirror olsem showimaot sheip bat no evri part. Wei for minim Word bilong God long bigfala wei moa bae kam bihaen.
9. Wanem savve nao kamap insaed long “olketa last day”?
9 Distaem, iumi stap long wanfala taem wea garem nem “olketa last day,” wanfala “nogud taem wea hard for deal witim.” (2 Timothy 3:1) Profet Daniel sei hao long taem hia “trufala savve bae kamap staka.” (Daniel 12:4) So, Jehovah, Nambawan Man for Story, hem helpem pipol wea garem honest heart for kasem mining long Word bilong hem. Planti pipol distaem minim hao Christ Jesus rul olsem King long heven wea iumi no lukim long 1914. Olketa savve tu hao klosap nao bae hem finisim evri wicked pipol and changem disfala earth for kamap paradaes evriwea long world. Distaem olketa preachim datfala important part bilong Kingdom gud nius long full earth.—Matthew 24:14.
10. Insaed olketa year wea go pas, wanem nao pipol duim taem olketa kasem kaonsel bilong Jehovah?
10 Tru nao, insaed long history Jehovah talemaot will and purpose bilong hem long pipol long earth. Bible story abaotem planti pipol wea lisin, followim wisdom bilong God, and kasem blessing from diswan. Hem storyim olketa narawan wea rejectim loving kaonsel bilong God, followim nogud gogo bilong Adam and Eve. Jesus showimaot diswan taem hem story abaotem tufala tokpiksa road. Wanfala lead go long dae. From hem big tumas and waed, planti wea rejectim Word bilong God nao followim. Narafala road lead go long laef olowe. Nomata hem smol, hem road bilong tu-thri wea acceptim Bible olsem Word bilong God, and live followim datwan.—Matthew 7:13, 14.
Tinghae Long Samting wea Iumi Garem
11. Savve and biliv bilong iumi long Bible hem pruvim wanem samting?
11 Waswe, iu stap midolwan long olketa wea chusim road for laef? Sapos olsem, bae iu laek for stap long datfala road. Hao nao iu savve duim olsem? Tingim evritaem and witim wei for tinghae olketa blessing wea iu kasem bikos long olketa Bible truth wea iu savve long hem. Wei wea iu acceptim gud nius hem pruv bilong blessing wea iu kasem from God. Jesus showimaot diswan taem hem prea long Dadi bilong hem olsem: “Mi praisem iu long pablik, Father, Lord bilong heven and earth, bikos iu haedem evri samting hia from olketa man wea garem bigfala savve, and iu showim long olketa baby.” (Matthew 11:25) Olketa fisherman and man for kolektem tax minim teaching bilong Jesus, bat olketa leader bilong religion wea garem big education olketa no minim. Jesus sei moa: “No eni man savve kam long mi sapos Father, wea sendem mi, no pullim hem.” (John 6:44) Sapos iu savve long Bible and iu bilivim and followim olketa teaching bilong hem, diswan pruvim Jehovah pullim iu kam. Hem samting for hapi long hem.
12. Wanem nao olketa wei wea Bible givim iumi savve?
12 Word bilong God garem olketa truth wea mekem man free and givim hem savve. Olketa wea live followim savve bilong Bible kamap free from kastom biliv, giaman religion, and wei for no garem savve wea bossim living bilong planti million pipol. Olsem example, wei for savve long truth abaotem soul hem mekem iumi kamap free from eni wei for fraetem olketa wea dae, nogud olketa spoelem iumi or olketa wea iumi lovem wea dae finis safa or nomoa. (Ezekiel 18:4) Wei for savve long truth abaotem olketa wicked angel hem helpem iumi for stap klia long olketa danger bilong spiritism. Teaching bilong resurrection hem comfortim olketa wea lusim samwan wea olketa lovem long dae. (John 11:25) Olketa Bible profesi showimaot iumi stap klosap long end and givim iumi trust long olketa promis bilong God for future. Olketa strongim tu hope bilong iumi for laef olowe.
13. Hao nao wei for followim Word bilong God hem helpem iumi long physical wei?
13 Olketa principle bilong God insaed Bible teachim iumi for garem living wea iumi kasem planti gud samting long physical wei. Olsem example, iumi lane for stap klia long olketa samting wea spoelem body bilong iumi, olsem wei for iusim tobacco and narafala drug. Iumi stap klia long wei for iusim alcohol long rong wei. (2 Corinthians 7:1) Wei for followim olketa law bilong God saed long fasin hem olsem wanfala protection againstim olketa sik wea kamaot from dirty fasin. (1 Corinthians 6:18) Taem iumi followim kaonsel bilong God for stap klia long wei for lovem selen, iumi no spoelem peace long mind, olsem planti duim taem olketa aftarem riches. (1 Timothy 6:10) Wanem nao olketa wei wea iu kasem gudfala samting bikos iu followim Word bilong God long living?
14. Hao nao holy spirit affectim laef bilong iumi?
14 Sapos iumi live followim Word bilong God, iumi kasem holy spirit bilong Jehovah. Iumi mekem grow fasin olsem Christ, wea showaot long olketa naes fasin olsem mercy and fasin for kea long pipol. (Ephesians 4:24, 32) Spirit bilong God mekem grow insaed long iumi olketa frut bilong hem tu—love, hapi, peace, patient for safa, kaenfala fasin, gudfala fasin, faith, kwaet fasin, fasin for kontrolem seleva. (Galatians 5:22, 23) Olketa fasin hia mekem iumi hapi and garem gudfala wei for fren witim nara pipol, insaed diswan olketa famili member. Iumi kasem strong wea helpem iumi for no fraet for feisim hardfala taem. Waswe, iu luksavve hao holy spirit hem affectim laef bilong iu long gudfala wei?
15. Taem iumi mekem laef bilong iumi fitim will bilong God, wanem gud samting nao iumi kasem?
15 Taem iumi go ahed for mekem laef bilong iumi fitim will bilong God, iumi strongim wei wea iumi fren witim Jehovah. Iumi barava moa sure hao hem minim and lovem iumi. From samting wea iumi experiencem, iumi savve hem saportim iumi long olketa hard taem. (Psalm 18:18) Iumi luksavve hem barava lisin long olketa prea bilong iumi. (Psalm 65:2) Iumi barava depend long kaonsel bilong hem, and sure datwan bae helpem iumi. And iumi garem nambawan hope hao long barava taem, God bae mekem olketa wea faithful for kamap perfect and givim long olketa present bilong laef olowe. (Romans 6:23) Disaepol James hem raet olsem: “Kam klosap long God, and hem bae kam klosap long iufala.” (James 4:8) Waswe, iu feelim hao wei wea iu fren witim Jehovah hem kamap moa strong taem iu kam moa klos long hem?
Barava Spesol Samting
16. Wanem nao olketa change wea samfala Christian long first century duim?
16 Paul talem moa long olketa Christian long first century wea spirit anointim hao long bifor, samfala long olketa duim fornication, adultery, homosexual fasin, savve steal, greedy, drunk, tok againstim nara man, or savve laea for pullim selen. (1 Corinthians 6:9-11) Truth bilong Bible hem mekem olketa change long bigfala wei, olketa “kamap klin.” Trae for tingim hao nao bae laef bilong iu sapos iu no savve long olketa truth from Bible wea mekem iu kamap free. Tru nao, truth hem barava spesol samting. Iumi hapi tumas from Jehovah story witim iumi!
17. Long wanem wei nao Olketa Jehovah’s Witness kasem spiritual kaikai long olketa Christian meeting?
17 And tu, tingim blessing wea iumi garem long sekson bilong olketa brata from evriwea long world. Datfala “faithful and wise slave” givim spiritual kaikai long barava taem, insaed diswan olketa Bible, magasin, and nara buk insaed long planti languis. (Matthew 24:45-47) Long olketa kongregeson meeting long year 2000, Olketa Jehovah’s Witness long planti kantri reviewim olketa main point from eitfala buk bilong olketa Hebrew Scripture. Olketa studyim wan-quarter bilong Nambawan Man Wea Winim Evri Otherfela Man buk and klosap full buk bilong Tingting Strong Long Profesi Bilong Daniel! Olketa studyim thirti-six article insaed Wastaoa magasin and tu 52 study article. And tu, pipol bilong Jehovah kasem strong from 12-fala issue bilong Kingdom Ministry Bilong Iumi and wanfala pablik tok evri week long olketa difren Bible point. Hem barava staka spiritual savve wea iumi kasem!
18. Wanem nao olketa wei wea iumi kasem help insaed long Christian kongregeson?
18 Long world, winim 91,000 kongregeson givim saport and encouragement thru long olketa meeting and wei for kaban. Iumi kasem tu saport bilong olketa mature Christian wea willing for helpem iumi long spiritual wei. (Ephesians 4:11-13) Tru nao, iumi kasem barava gudfala samting taem iumi kasem savve long truth. Hem hapi samting for savve long Jehovah and servem hem. Toktok bilong man for raetem psalm hem barava tru: “Hapi nao olketa pipol wea God bilong olketa hem Jehovah!”—Psalm 144:15.
Waswe, Iu Remember?
• Hu nao Jehovah story witim long taem bifor olketa Christian?
• Hao nao spiritual laet kamap moa braet long first century? Long distaem?
• Wanem nao olketa blessing wea iumi kasem from wei for live followim savve bilong Jehovah?
• Why nao iumi hapi long savve bilong iumi abaotem God?
[Olketa Piksa long page 8]
Jehovah talemaot will bilong hem long Moses, Noah, and Abraham
[Piksa long page 9]
Long taem bilong iumi, Jehovah helpem iumi for minim Word bilong hem
[Olketa Piksa long page 10]
Tingim blessing wea iumi garem long sekson bilong olketa brata from evriwea long world!