Tingting Bilong God Abaotem Pipol wea Dae Finis

DAE bilong wan wea iu lovem savve mekem man sorre tumas. Iu savve barava feel lonely, garem emti feeling, and feelim hao iu lusim samwan. For lusim samwan long dae savve mekem man feel olsem hem no wei nao, from no eniwan long earth savve mekem man wea dae finis for laef bak nomata hem rich or garem paoa.

Bat, Creator bilong iumi hem tingim diswan long difren wei. From hem nao creatim firstfala man from dust bilong graon, hem fit tu for wakem moa wanfala man wea dae finis. From diswan, God hem ting long olketa wea dae finis olsem olketa still laef. Jesus hem sei olsem abaotem olketa faithful servant bilong God bifor wea dae finis: “Olketa laef long tingting bilong [God].”—Luke 20:38, footnote.

Taem Jesus stap long earth, hem kasem paoa for resurrectim olketa wea dae. (John 5:21) So, hem garem sem tingting olsem Father bilong hem abaotem olketa wea faithful go kasem dae. Olsem example, taem fren bilong hem Lazarus hem dae, Jesus talem olketa disaepol bilong hem: “Mi go long there . . . for wekapem hem from sleep.” (John 11:11) Long tingting bilong man, Lazarus hem dae finis, bat long Jehovah and Jesus, Lazarus sleep.

Anda long Kingdom rul bilong Jesus, “wanfala resurrection bae kamap for olketa wea raeteous and olketa wea no raeteous.” (Acts 24:15) Gogo, olketa wea resurrect bae kasem education from God and garem chance for laef olowe long earth.—John 5:28, 29.

Tru nao, dae bilong wan wea iumi lovem savve mekem iumi feel pain and sorre, wea savve go ahed for staka year. Nomata olsem, wei for luksavve long tingting bilong God abaotem olketa wea dae finis savve mekem iumi kasem bigfala comfort and hope.—2 Corinthians 1:3, 4.