Bible Buk Namba 24​—Jeremiah

Man wea Raetem: Jeremiah

Ples Hem Raetem: Judah and Egypt

Taem Hem Finis Raetem: 580 B.C.E.

Taem Hem Storyim: 647–580 B.C.E.

PROFET Jeremiah stap long taem wea danger and raf tumas. Jehovah givim hem waka long year 647 B.C.E., long mek-13 year bilong rul bilong King Josiah wea worshipim Jehovah long Judah. Taem waka for fixim haos bilong Jehovah go ahed, olketa faendem buk bilong Law bilong Jehovah and readim long king. Hem waka hard for mekem pipol followim datwan, bat samting hem win for duim nomoa hem for stopem wei for worshipim idol for lelebet taem nomoa. Grandadi bilong Josiah, Manasseh, wea rul for 55 year finis, and dadi bilong hem Amon, wea olketa killim dae bihaen hem rul for 2-fala year nomoa, tufala duim barava wicked samting. From tufala encouragem pipol for duim wild party wea mekhae long barava dirty fasin and nogud ceremony, pipol getius for offerim incense long “queen bilong heven” and mekem sakrifaes long olketa demon god. Manasseh fulimap Jerusalem witim blood bilong pipol wea no garem blame.—Jer. 1:2; 44:19; 2 Ki. 21:6, 16, 19-23; 23:26, 27.

² Waka bilong Jeremiah no isi. Hem mas waka olsem profet bilong Jehovah for talemaot wei wea Judah and Jerusalem bae stap emti, nambawan temple bilong Jehovah bae bone, and pipol bilong hem bae kamap prisoner—olketa bigfala trabol wea man maet hard for bilivim! Hem mas go ahed for talemaot profesi long Jerusalem for 40 year, taem olketa nogud King rul, olsem Jehoahaz, Jehoiakim, Jehoiachin (Coniah), and Zedekiah. (Jer. 1:2, 3) Bihaen, long Egypt, hem mas talemaot profesi abaotem wei for worshipim idol wea olketa Jew refugee duim long there. Hem finis raetem buk bilong hem long 580 B.C.E. Jeremiah storyim planti samting wea happen insaed 67 year.—52:31.

³ Long Hebrew languis, nem bilong disfala profet and buk bilong hem Yir·meyahʹ or Yir·meyaʹhu, wea maet minim, “Jehovah Mekhae; or, Jehovah Aotem [maet from basket bilong pikinini insaed woman].” Disfala buk stap long evri list bilong olketa Hebrew Scripture, and planti pipol acceptim olsem part bilong Bible. Wei wea samfala profesi fulfill long nambawan wei long taem bilong Jeremiah barava pruvim buk hia hem tru evribit. And tu, nem bilong Jeremiah kamap samfala taem insaed Christian Greek Scripture. (Matt. 2:17, 18; 16:14; 27:9) Iumi sure Jesus studyim buk bilong Jeremiah, wea showaot klia taem hem joinim toktok bilong Jeremiah 7:11 and Isaiah 56:7 taem hem klinim aot temple. (Mark 11:17; Luke 19:46) From Jesus garem strong and fasin for no fraet, samfala pipol tingse hem nao Jeremiah. (Matt. 16:13, 14) Long Hebrews 8:8-12 and 10:16, 17, Paul tok abaotem niu covenant wea Jeremiah talem profesi abaotem. (Jer. 31:31-34) Paul talem toktok bilong Jeremiah 9:24 olsem: “Man wea tok praod mas tok praod abaotem Jehovah.” (1 Cor. 1:31) Long Revelation 18:21 narafala strong mining bilong tokpiksa bilong Jeremiah hem stap (Jer. 51:63, 64) abaotem wei wea Babylon foldaon.

⁴ Wei for studyim oldfala samting saportim tu record long Jeremiah. Olsem example, wanfala record bilong samting wea happen from Babylon storyim taem wea Nebuchadnezzar (Nebuchadrezzar) tekovarem Jerusalem long 617 B.C.E., taem hem kasholem king (Jehoiachin) and appointim wan wea hemseleva chusim (Zedekiah).—24:1; 29:1, 2; 37:1.a

⁵ Next long Moses, iumi garem full story abaotem laef bilong Jeremiah winim olketa nara profet bifor. Jeremiah storyim planti samting abaotem hemseleva, feeling and tingting bilong hem, wea showaot hem no fraet and garem strong, wea join witim hambol fasin and kaenfala heart. Hem no profet nomoa bat priest tu, man for raetem Scripture, and man for talem trufala history. Hem son bilong priest Hilkiah bilong Anathoth, wanfala taon bilong olketa priest wea stap north long Jerusalem, “long land bilong Benjamin.” (1:1) Raeting bilong Jeremiah hem klia, tok stret, and isi for minim. Olketa tokpiksa bilong hem staka tumas, and disfala buk garem toktok wea pipol iusim evriday and poetry toktok.

WEI WEA HEM HELPEM IUMI

³⁶ Disfala profesi from God hem buildimap and helpem man. Lukim strongfala example bilong profet hia. Hem no fraet for talemaot message wea pipol wea no lovem God les for herem. Hem les for kaban witim wicked pipol. Hem luksavve hem mas hariap for talemaot message bilong Jehovah, and hem duim waka bilong Jehovah witim full heart and nating givap. Word bilong God hem olsem fire insaed bon bilong hem, and datwan nao mekem heart bilong hem hapi. (Jer. 15:16-20; 20:8-13) Iumi tu mas garem strong olsem for word bilong Jehovah! Iumi tu mas loyal for saportim olketa servant bilong God, olsem Baruch hem saportim Jeremiah. Wei wea olketa Rechabite barava obey hem nambawan example tu for iumi, and tu wei wea Ebed-melech showim kaenfala fasin long datfala profet wea kasem persecution.—36:8-19, 32; 35:1-19; 38:7-13; 39:15-18.

³⁷ Toktok wea Jeremiah kasem from Jehovah hem fulfill evribit. Diswan barava strongim faith long paoa bilong Jehovah for talem profesi. Olsem example, tingim olketa profesi wea Jeremiah lukim hem fulfill, olsem taem olketa kasholem Zedekiah and distroem Jerusalem (21:3-10; 39:6-9), aotem King Shallum (Jehoahaz) from throne and hem dae taem hem prisoner (Jer. 22:11, 12; 2 Ki. 23:30-34; 2 Chron. 36:1-4), tekem King Coniah (Jehoiachin) olsem prisoner go long Babylon (Jer. 22:24-27; 2 Ki. 24:15, 16), and wei wea false profet Hananiah dae insaed wanfala year nomoa (Jer. 28:16, 17). Evri profesi hia, and planti moa, fulfill olsem Jehovah talem finis. Olketa nara profet and servant bilong Jehovah wea kam bihaen lukim tu wei wea profesi bilong Jeremiah hem stret evribit and helpem man. Olsem example, Daniel luksavve from raeting bilong Jeremiah hao Jerusalem mas stap emti for 70 year, and Ezra tok abaotem wei wea toktok bilong Jeremiah fulfill long end bilong 70 year.—Dan. 9:2; 2 Chron. 36:20, 21; Ezra 1:1; Jer. 25:11, 12; 29:10.

³⁸ Taem Jesus startim celebration bilong Evening Kaikai Bilong Lord witim olketa disaepol, hem sei profesi bilong Jeremiah abaotem niu covenant hem fulfill nao. So, hem tok abaotem “niu covenant wea kamap from blood bilong mi,” wea minim Jehovah forgivim sin bilong olketa and hipimap olketa olsem spiritual nation bilong hem. (Luke 22:20; Jer. 31:31-34) Olketa hia wea born long spirit wea go insaed niu covenant olketa nao Christ mekem covenant witim olketa for Kingdom, for rul witim hem long heven. (Luke 22:29; Rev. 5:9, 10; 20:6) Profesi bilong Jeremiah tok abaotem disfala Kingdom samfala taem. Midolwan long evri judgment hia againstim Jerusalem wea no garem faith, Jeremiah talemaot disfala hope: “‘Lukim! Olketa day bae kam,’ Jehovah hem talem, ‘and mi bae mekem kamap for David wanfala raeteous shoot. And wanfala king bae rul and duim samting witim gudfala tingting and givimaot justice and raeteous fasin long land.’” Yes, wanfala king bae garem nem “Jehovah Hem Raeteous Fasin Bilong Mifala.”—Jer. 23:5, 6.

³⁹ Jeremiah story moa abaotem wei for kamap gud moa: “And olketa bae servem Jehovah God bilong olketa and David king bilong olketa, wea mi bae mekem kamap for olketa.” (30:9) Last samting, hem talem gud samting wea Jehovah talem abaotem Israel and Judah, mekem “long olketa day hia and long datfala taem, [Jehovah bae] mekem wanfala raeteous shoot hem grow for David,” for mekem seed bilong hem kamap planti and mekem ‘wanfala son rul olsem king long throne bilong hem.’ (33:15, 21) Olsem hem sure hao wanfala smol sekson kam bak from Babylon, Kingdom bilong disfala raeteous “shoot” tu bae givimaot justice and raeteous fasin long full earth.—Luke 1:32.

[Footnote]