Waswe, Enitaem Poor Living Bae Finis?
WISE King Solomon bilong Israel bifor hem sei: “Lukim! wata long eye bilong olketa wea kasem hevi, bat olketa no garem man for givim comfort, and pipol wea putim hevi long olketa garem paoa, mekem olketa no garem man for givim comfort.” (Ecclesiastes 4:1) For sure, planti long olketa wea kasem hevi wea King Solomon tingim hem olketa wea poor tu.
Hem no fitim for markem poor living saed long selen nomoa. Olsem information wea World Bank provaedem long June 2002, “long 1998, samting olsem 1.2 billion pipol evriwea long world stap laef long selen wea no kasem $1 for wanfala day . . . and nara 2.8 billion pipol spendem selen wea no kasem $2 for wanfala day.” Nomata namba bilong pipol long tufala difren sekson hia hem no hae olsem olketa tingim firstaem, “hem hae tumas taem iu tingim diswan hem pipol wea safa.”
Waswe, enitaem poor living bae finis? Jesus Christ talem olketa disaepol: “Iufala bae olowe garem poor pipol witim iufala.” (John 12:8) Bat, waswe, diswan minim poor living and olketa nogud samting wea kamaot from hem bae go ahed for olowe? Nomoa, from nomata Jesus no promisim evri follower bilong hem bae kamap rich long material wei, iumi shud no tingse toktok hia minim no eni hope stap nao for olketa wea poor.
Nomata pipol trae hard, and olketa promis for finisim poor living planti taem hem fail, Word bilong God, Bible, promisim iumi hao klosap nao bae no eni pipol wea garem poor living bae stap. For tok stret, Jesus talemaot “gud nius long poor pipol.” (Luke 4:18) Insaed disfala gud nius hem promis hao poor living bae finis evribit. Diswan bae happen taem Kingdom bilong God startim raeteous living long earth.
Bae world difren fogud! Datfala King Jesus Christ long heven “bae feel sorre for man nating and poor man, and hem bae sevem soul bilong olketa poor man.” Tru tumas, “from hardfala living and raf fasin hem bae baem bak soul bilong olketa.”—Psalm 72:13, 14.
Abaotem datfala taem, Micah 4:4 sei: “Olketa bae sidaon, each wan anda long vine bilong hemseleva and anda long fig tree bilong hemseleva, and no eniwan bae mekem olketa seksek; from barava mouth bilong Jehovah bilong olketa army hem talem finis.” Kingdom bilong God bae stretem evri problem wea mekem olketa man safa, and finisim evribit sik and dae. God “bae finisim dae for olowe, and Sovereign Lord Jehovah bae aotem krae from evri feis.”—Isaiah 25:8.
Iu fit for trustim olketa promis hia bikos olketa kam from God seleva. Mifala encouragem iu for chekim gud pruv wea showimaot iu fit for trustim olketa profesi long Bible evribit.
[Picture Credit Line on page 32]
FAO photo/M. Marzot