Hao and Why Jesus Born
“HARD for hem tru!” Datwan nao maet toktok bilong planti pipol wea no Christian taem olketa herem story abaotem taem Jesus hem born. Olketa sei wei for biliv hao wanfala virgin girl garem pikinini nomata hem no duim sex witim eni man hem samting wea no fitim science. Wanem nao tingting bilong iu?
Long 1984, The Times bilong London hem pablisim wanfala leta abaotem diswan, wea sei: “Hem no fitim stretfala tingting for iusim science olsem pruv for wei wea olketa mirakol no savve happen. Wei for biliv hao olketa mirakol no savve happen hem sem olsem wei for garem faith hao olketa savve happen.” Fotin-fala professor bilong science long olketa university bilong Britain nao saenem datfala leta. Olketa sei: “Mifala acceptim wei wea pikinini hia born from wanfala virgin girl, olketa Gospel mirakol, and resurrection bilong Christ olsem olketa samting wea really happen long history.”
Nomata olsem, hem isi for minim hao firstaem, samfala maet faendem hem hard for minim story abaotem wei wea Jesus hem born from wanfala virgin girl. Nomata mami bilong Jesus seleva tu faendem hem hard for minim diswan taem angel bilong God hem sei: “Lukim! iu bae garem pikinini insaed long bele bilong iu and bornem wanfala son, and iu mas kolem nem bilong hem Jesus.” Mary ask olsem: “Hao nao diswan bae kamap tru, from mi no duim sex witim eni man?” Then datfala angel hem explainim hao God bae duim disfala mirakol thru long holy spirit, and hem sei moa: “Bikos long God no eni toktok hem bae hard.” (Luke 1:31, 34-37) For sure, Datwan wea creatim wei for garem pikinini savve mekem Jesus born from wanfala virgin girl wea garem klin fasin. Sapos God creatim universe and olketa stretfala law wea hem followim, hem no hard for hem iusim wanfala egg cell bilong Mary for mekem wanfala perfect human Son.
Why Diswan Mas Olsem
Joseph, wea hem man for obeyim God engage finis long Mary taem hem kamap babule. Insaed wanfala dream, angel bilong God explainim long Joseph nambawan reason why disfala girl wea tufala engage hem babule. Datfala angel sei: “Joseph, son bilong David, iu no fraet for tekem Mary, waef bilong iu long haos bilong iu, from samting wea insaed long hem kam from holy spirit. Hem bae bornem wanfala son, and iu mas kolem nem bilong hem Jesus, from hem bae sevem pipol bilong hem from sin bilong olketa.” (Matthew 1:20, 21) Long languis bilong Hebrew datfala nem Jesus hem minim “Jehovah Hem Salvation.” Diswan mekem iumi tingim need for kasem salvation from sin and dae and for datfala arrangement bilong Jehovah God for salvation thru long Jesus.
From first man Adam hem sin, evri pikinini bilong hem born kam witim sin, and witim fasin for brekem olketa law bilong God. (Romans 5:12) Wanem nao savve sevem olketa pikinini bilong Adam from sin and mekem olketa kamap perfect? For stretem diswan saed long justice, wanfala perfect laef wea semsem olsem datwan wea Adam garem mas dae. Dastawe God hem mekem Jesus born long mirakol wei olsem wanfala perfect man, and dastawe Jesus letem olketa enemy bilong hem for killim hem dae. (John 10:17, 18; 1 Timothy 2:5, 6) Bihaen Jesus resurrect and kasem laef long heven, hem barava fit for sei: “Mi dae bifor, bat, lukim! Mi laef for olowe and olowe, and mi garem olketa key bilong dae and bilong Hades [grev bilong olketa man].”—Revelation 1:18.
Jesus iusim olketa tokpiksa key bilong dae and Hades for openem wei for olketa man wea sin for kasem bak samting wea Adam lusim. Jesus explainim olsem: “Mi nao resurrection and laef. Man wea showimaot faith long mi, nomata hem dae, bae hem laef bak moa; and evriwan wea laef and showimaot faith long mi bae nating dae.” (John 11:25, 26) Datwan hem wanfala nambawan promis! Bat, narafala reason wea moa important hem stap abaotem why Jesus hem mas born.
Main Important Reason
Laef bilong Jesus hem no just start long taem wea hem start for grow insaed bele bilong Mary. Hem tok klia olsem: “Mi kam daon from heven.” (John 6:38) Jesus hem stap long heven olsem spirit witim Dadi bilong hem from taem creation hem start. Tru nao, Bible storyim hem olsem “start bilong creation bilong God.” (Revelation 3:14) From heven, Jesus lukim wei wea datfala wicked angel wea bighed hem tanem first man and woman for againstim rul bilong God. Diswan mekem Jesus garem barava important reason for willing for born olsem perfect human Son Bilong God. Wanem nao diswan?
Hem nao wei for pruvim hao Dadi bilong hem long heven hem garem raet for rulim universe. From hem stap faithful from taem hem born go kasem taem hem dae long earth, Jesus showimaot hao hem willing for stap anda long wei bilong Jehovah for rulim olketa creature bilong Hem. Bifor olketa enemy bilong God killim hem dae, Jesus talem klia reason why hem willing for givim laef bilong hem olsem sakrifaes. Hem sei hem for mekem world savve hem lovem Father. (John 14:31) Sapos first man and woman, Adam and Eve, mekem grow kaen love olsem, tufala savve faithful taem olketa kasem test bilong olketa wea hem no hard olsem test wea Jesus kasem.—Genesis 2:15-17.
Faithful fasin bilong Jesus showimaot tu hao datfala wicked angel Satan hem man for laea. Satan laea againstim God and man taem hem tok olsem front long olketa angel long heven: “Evri samting wea man garem hem bae givim go for laef bilong hem.” (Job 2:1, 4, Tanakh—The Holy Scriptures) Satan laea for sei no eni man bae obeyim God sapos diswan bae putim laef bilong olketa long danger.
Olketa samting hia challengem sapos rul bilong God hem raeteous. For stretem diswan, Jesus willing for born olsem man and stap faithful go kasem taem hem dae.
So, olsem Jesus seleva hem talem, main reason why hem born long earth hem for hem “mas witness abaotem truth.” (John 18:37) Hem duim datwan taem hem showimaot long toktok and samting hem duim hao rul bilong God hem barava raeteous and hao man wea stap anda long hem bae kasem hapi for olowe. Jesus explainim tu hao hem kam long world for givim laef bilong hem olsem “wanfala ransom for baem bak planti pipol,” wea openem wei for olketa man wea sin for kamap perfect and kasem laef olowe. (Mark 10:45) For olketa man minim gud olketa samting hia, olketa needim wanfala record bilong taem wea Jesus hem born. And tu, olsem next article hem bae showim iumi, man savve lanem olketa nara important leson from olketa samting wea happen wea join witim wei wea Jesus born.
[Olketa Piksa long page 4]
Hao nao olketa pikinini bilong Adam savve sev from sin?