Olketa Mirakol wea Iu Lukim Finis!

MEK-TU mining bilong datfala word “mirakol” hem “wanfala samting wea happen or wea samwan duim wea barava spesol.” Iumi evriwan lukim kaen mirakol olsem, wea hem no samting wea kam from God.

From olketa man kasem moa savve saed long olketa physical law bilong nature, olketa savve duim samting wea bifor olketa ting hem barava hard. Olsem example, wan handred year bifor, staka pipol tingse hem hard tumas for duim samting wea olketa computer, television, science saed long spes, and narakaen samting savve duim, wea distaem hem olsem normal samting nomoa.

From samfala scientist luksavve olketa garem lelebet savve nomoa saed long creation bilong God, distaem olketa no savve sei samting hem hard for happen. Olketa willing for talem nomoa hao samting maet no happen. Long wei olsem, olketa luksavve hao kaen samting olsem wea pipol sei hem ‘mirakol,’ maet savve happen long future.

Nomata sapos iumi story abaotem main mining bilong datfala word “mirakol” wea hem nao olketa samting “wea kam from spirit world,” iumi fit for sei hao each wan long iumi lukim olketa mirakol finis. Example nao, iumi lukim sun, moon, and olketa star—evriting “wea kam from spirit world,” hem nao from Man wea creatim evri samting. And tu, no eniwan savve barava explainim wei wea body bilong man waka, wei wea brain hem waka, and wei wea baby grow insaed bele. Wanfala buk, The Body Machine hem sei: “Samting wea kontrolem body bilong man hem central nervous system. Body bilong man savve feelim, herem, smelem, lukim, and tasim samting, hem olsem wanfala engine wea gohed waka seleva and savve muv, wea brain bilong hem olsem wanfala computer wea waka and no savve stop. Hem nambawan creation wea mekem man sapraes tu.” God wea creatim “body bilong man” barava duim wanfala mirakol, wea still mekem iumi sapraes kam kasem distaem. For sure iu lukim olketa nara mirakol tu, nomata maet iu no luksavve long olketa.

Waswe, Fitim for Iumi Sei Buk Hem Wanfala Mirakol?

Bible nomoa buk wea olketa printim and transleitim long staka languis and hem kasem staka ples winim eni narafala buk. Waswe, iu ting diswan hem wanfala mirakol? Waswe, fitim iumi for ting wei wea hem stap kam kasem distaem hem bikos wanfala “samting from spirit world” nao bihaenem? Hem tru, Bible hem wanfala buk wea olketa man nao raetem, bat olketa sei olketa raetem tingting bilong God, no bilong olketa seleva. (2 Samuel 23:1, 2; 2 Peter 1:20, 21) Tingim datwan. Samting olsem 40 man wea stap insaed 1,600 year nao raetem. Olketa man hia olketa shepherd, fisherman, doctor, priest, king, and samfala waka long gavman or army. Nomata olsem, message bilong olketa hem join gud tugeta and hem tru and stretfala.

From Olketa Jehovah’s Witness studyim gud Bible, olketa acceptim datwan “no olsem word bilong man, bat, olsem trufala word bilong God,” olsem aposol Paul talem. (1 Thessalonians 2:13) Kam kasem distaem, olketa pablikeson bilong olketa explainim mining bilong olketa toktok wea pipol sei hem no agree witim main message bilong Bible. Wei wea full Bible wan mind hem pruvim hem kam from God.a

Winim eni nara buk, staka pipol barava trae hard for distroem Bible. Nomata olsem, full Bible or samfala part bilong hem still stap distaem insaed winim 2,000 languis. From hem stap kam kasem distaem and tu message insaed hem no change, diswan showimaot God nao bihaenem. Tru tumas, Bible hem wanfala mirakol!

Wanfala Mirakol wea “Laef and Garem Paoa”

Olketa mirakol from taem bifor kam olsem healing and wei wea man wea dae laef bak moa, no happen distaem. Bat iumi garem gudfala reason for sure olketa mirakol olsem bae happen moa insaed niu world bilong God wea bae kam. And bae olketa happen long full world. Olketa man bae kasem gudfala samting winim eniting wea iumi savve tingim.

Bible, wea iumi kasem olsem mirakol, hem savve duim mirakol tu taem hem muvim pipol for changem fasin bilong olketa for kamap moabeta. (Lukim wanfala example long box “Paoa wea Word Bilong God Garem,” long page 8.) Hebrews 4:12 hem sei: “Word bilong God hem laef and garem paoa for duim samting and hem sharp winim eni tu-saed sword and hem savve kat go for divaedem soul and spirit, and olketa join and bon, and hem fit for luksavve long tingting and samting wea heart want for duim.” Tru tumas, Bible nao hem samting wea changem laef bilong winim six million pipol raonem world, mekem laef bilong olketa garem mining and givim olketa nambawan hope for future.

Bae iu kasem gud samting sapos iu letem Bible mekem mirakol olsem kamap insaed laef bilong iu!

[Footnote]

[Box/Picture long page 7]

HEM DAE FINIS OR LAEF YET?

Long John 19:33, 34 hem sei Jesus dae finis taem “wanfala soldia spiarim hem long saed, and semtaem blood and wata ran kamaot.” Bat Matthew 27:49, 50 sei Jesus hem laef yet taem diswan happen. Why nao tufala scripture hia talem difren samting?

Law bilong Moses hem tambuim wei for letem wanfala criminal for hange full naet long post for dae. (Deuteronomy 21:22, 23) So, long taem bilong Jesus, sapos wanfala criminal hem laef yet taem hem gogo for evening, olketa savve brekem leg bilong hem mekem hem savve dae kwiktaem. Bae hem no fit nao for apem body bilong hem mekem hem brith gud. Olketa soldia tingse Jesus dae finis, dastawe olketa brekem nomoa leg bilong tufala criminal wea hange saed long hem. Luk olsem soldia wea spiarim hem duim olsem for mek sure hem dae and bihaen no eniwan fit for laea for sei hem laef bak.

Scripture long Matthew 27:49, 50 talem story long difren wei. Hem sei: “Narafala man holem spia and spiarim saed bilong hem and blood and wata ran kamaot. Jesus hem singaot moa witim laodfala voice, and givim go spirit bilong hem.” Nomata olsem, no evri Bible manuscript bifor garem disfala sentence wea raeting hem lei wansaed. Planti man tingse olketa tekem disfala sentence from Gospel bilong John bat putim long rong ples. Dastawe, staka transleison putim disfala sentence insaed bracket, or garem wanfala footnote for explainim, or no putim datfala sentence insaed transleison bilong olketa.

Greek New Testament bilong Westcott and Hort, wea hem nao main reference bilong New World Translation, hem putim disfala sentence insaed tufala bracket. Hem sei “luk olsem olketa scribe nao addim go” datfala sentence.

So staka pruv showimaot hao John 19:33, 34 hem tru and Jesus hem dae finis taem datfala soldia bilong Rome spiarim hem.

[Box/Picture long page 8]

PAOA WEA WORD BILONG GOD GAREM

Detlef hem wanfala teenager wea kam from famili wea mami and dadi divorce. From datwan, hem join insaed sekson wea iusim drug, drinkim alcohol, and lisin long heavy metal music.b Hem kat bolhed and from raf fasin bilong hem, olketa police aftarem hem.

Long 1992, insaed wanfala ples for kaikai and drinkim alcohol long northeast Germany, 60-fala insaed sekson wea kat bolhed olketa faet witim 35-fala insaed raf sekson wea laekem tumas rock music. Thomas wea hem insaed long mek-tu sekson hia hem garekil nogud gogo hem dae. Samfala leader bilong sekson wea kat bolhed olketa go long prison bihaen datfala kot case wea hem kamap olowe long nius.

No longtaem bihaen Detlef hem kamaot from prison, Olketa Jehovah’s Witness givim wanfala pepa long hem. Datfala pepa garem title “Why Nao Laef Fulap Witim Planti Problem?” Stretawe Detlef luksavve samting wea pepa hia talem hem tru, and hem start for studyim Bible witim olketa Witness. Diswan barava changem full laef bilong hem. Start kam long 1996, hem wanfala strong Witness bilong Jehovah.

Siegfried, wea bifor hem insaed sekson wea laekem rock music, hem gudfala fren bilong Thomas, datfala young man wea dae. Bihaen, hem tu kamap wanfala Witness and distaem hem elder long kongregeson. Taem Siegfried visitim kongregeson bilong Detlef for givim wanfala Bible tok (interesting samting, mami bilong Thomas savve attendim olketa meeting long there samfala taem), Detlef invaetem hem for kaikai long haos. Sapos ten year bifor, tufala bae barava heitim each other. Distaem, hem klia tumas hao tufala barava lovem each other.

Detlef and Siegfried luk forward for welkamim Thomas taem hem bae laef bak moa insaed paradaes long earth. Detlef sei olsem: “Taem mi tingim datwan, wata kam long eye bilong mi. Mi sorre tumas long samting wea mi duim.” Samting wea Detlef and Siegfried laek for duim nao hem for helpem Thomas long datfala taem, olsem tufala helpem nara pipol distaem, for savve long Jehovah and garem hapi hope wea Bible givim.

Tru nao, Word bilong God hem garem barava strongfala paoa!

[Footnote]

[Picture long page 6]

Body bilong man hem nambawan creation

[Credit Line]

Anatomy Improved and Illustrated, London, 1723, Bernardino Genga