Lanem and Teachim Christian Fasin
“Bat, iu wea teachim narafala man, waswe, iu no teachim iuseleva?”—ROMANS 2:21.
1, 2. Wanem nao olketa reason why iu laek for studyim Bible?
IU GAREM planti reason for studyim Word bilong God. Maet iu laek for savve tru samting wea hem storyim—abaotem pipol, samting wea happen, olketa ples, and samfala nara samting. Iu laek for savve long trufala teaching wea difren evribit from rong teaching bilong religion, olsem Trinity or hellfire. (John 8:32) And tu, iu shud want for savve gud long Jehovah, mekem iu trae for kamap olsem hem and wakabaot front long hem long stretfala wei.—1 Kings 15:4, 5.
2 Nara important reason for studyim Word bilong God hem for mekem iuseleva fit for teachim nara pipol—olketa wea iu lovem, olketa fren, and tu, pipol wea iu no meetim yet. Hem samting wea olketa tru Christian mas duim. Jesus talem olketa disaepol bilong hem: “So go and mek-disaepol long pipol bilong evri nation, . . . teachim olketa for duim evri samting wea mi komandim long iufala.”—Matthew 28:19, 20.
3, 4. Why nao hem gud samting for iu teach olsem Jesus komandim?
3 Sapos iu studyim Bible bikos iu laek for teachim nara pipol, hem gud samting and hem savve mekem man barava satisfae. From bifor kam pipol tinghae long waka for teach. Encarta Encyclopedia hem sei: “Midolwan long olketa Jew, planti full-grown pipol ting long olketa teacher olsem olketa wea showim wei bilong salvation and encouragem olketa pikinini for honorim olketa teacher winim parents.” Hem barava gud tumas for olketa Christian for studyim Bible for teachim olketa seleva and then teachim nara pipol.
4 “Moa pipol waka olsem teacher winim eni nara waka. Samting olsem 48 million man and woman raonem world olketa teacher.” (The World Book Encyclopedia) Wanfala teacher garem responsibility for teachim olketa young pipol and savve affectim olketa for planti year bihaen. Diswan hem moa tru taem iu obeyim komand bilong Jesus for teachim nara pipol; samting wea iu teachim savve affectim olketa for olowe. Aposol Paul strongim diswan taem hem encouragem Timothy: “Lukluk gud evritaem long iuseleva and teaching bilong iu. Followim olketa samting hia, sapos iu duim olsem iu bae sevem iuseleva and olketa wea lisin long iu.” (1 Timothy 4:16) Tru nao, teaching bilong iu hem join witim salvation.
5. Why nao teaching waka bilong wanfala Christian hem hae winim eni narawan?
5 Instruction and direction for teachim iuseleva and nara pipol hem kam from Wan wea barava hae, Sovereign bilong universe. Datwan minim disfala wei for teach hem moa hae winim eni nara wan, nomata wei for teachim olketa skul subject, savve saed long waka, or spesol medical savve. Insaed teaching waka wea wanfala Christian duim hem wei for helpem student lane for followim Son bilong God, Christ Jesus, and for teachim nara pipol for duim sem samting.—John 15:10.
Why Teachim Iuseleva?
6, 7. (a) Why nao iumi mas firstaem teachim iumiseleva? (b) Long wanem wei nao olketa Jew long first-century fail olsem olketa teacher?
6 Why nao iumi mas firstaem teachim iumiseleva? Hem bikos, iumi no savve teachim narawan long stretfala wei sapos iumi no teachim iumiseleva firstaem. Paul strongim diswan insaed interesting toktok wea hem talem for olketa Jew long datfala taem, bat wea important for olketa Christian distaem. Paul hem ask olsem: “Bat, iu wea teachim narafala man, waswe, iu no teachim iuseleva? Sapos iu talemaot ‘No steal,’ waswe, iu savve steal? Iu, wea sei ‘No duim adultery,’ waswe, iu duim adultery? Iu, wea sei iu heitim olketa idol, waswe, iu steal long olketa temple? Iu, wea tinghae long law, waswe, iu fail for honorim God from wei wea iu brekem Law?”—Romans 2:21-23.
7 Taem hem askem samfala kwestin for ting raonem, Paul storyim tufala rong samting wea Ten Komandment storyim stret: No steal and no duim adultery. (Exodus 20:14, 15) Samfala Jew long taem bilong Paul hapi tumas from olketa garem Law bilong God. ‘Samwan nao teachim olketa from Law and olketa tingse olketa nao man for leadim olketa wea blind and laet for olketa wea stap long darkness, olketa teacher bilong olketa baby.’ (Romans 2:17-20) Bat, samfala hypocrite bikos olketa duim haed adultery or wei for steal. Datwan nating honorim Law and Man long heven wea Givim. Iu savve lukim hao olketa nating fit for teachim nara pipol; olketa nating teachim olketa seleva tu.
8. Long wanem wei nao maet samfala Jew long taem bilong Paul ‘steal long olketa temple’?
8 Paul storyim hao samfala steal from olketa temple. Waswe, samfala Jew really duim datwan? Wanem nao Paul minim? For tok stret, from disfala scripture no givim staka information, iumi hard for barava savve hao nao samfala Jew ‘steal long olketa temple.’ Bifor, man for keepim record long taon bilong Ephesus sei hao olketa fren bilong Paul no ‘olketa man for steal long olketa temple,’ wea showimaot samfala pipol tingse olketa Jew guilty long datwan. (Acts 19:29-37) Waswe, olketa iusim or sellim samfala spesol samting wea kam from olketa heathen temple bihaen olketa war or wea samfala bilong religion stealim? Olsem Law bilong God talem, olketa mas distroem olketa gold and silver idol, no tekem for iusim seleva. (Deuteronomy 7:25)a So maet Paul story abaotem olketa Jew wea ting nating long komand bilong God and iusim and kasem selen from olketa samting wea kam from olketa heathen temple.
9. Wanem nao olketa rong samting pipol duim saed long temple long Jerusalem, wea olsem olketa steal long temple?
9 Long narasaed, Josephus storyim wanfala problem long Rome wea kamap from fofala Jew and leader bilong olketa wea wanfala teacher bilong Law. Fofala hia trikim wanfala woman bilong Rome, wea hem Jew proselyte, for givim olketa gold and nara riches bilong hem long olketa, olsem contribution long temple long Jerusalem. Taem olketa kasem olketa riches hia, olketa iusim for olketa seleva—and long wei olsem olketa steal from temple.b Olketa narawan steal long temple bilong God long wei wea olketa offerim olketa nogud sakrifaes and from olketa duim bisnis long greedy wei long area bilong temple, wea mekem hem kamap “cave bilong olketa man for steal.”—Matthew 21:12, 13; Malachi 1:12-14; 3:8, 9.
Teachim Christian Fasin
10. Wanem nao point bilong toktok bilong Paul long Romans 2:21-23 wea iumi shud no missim?
10 Nomata wanem kaen samting long first-century wea join witim fasin for steal, adultery, and for steal long olketa temple wea Paul storyim, iumi mas no missim point bilong samting wea hem talem. Hem ask olsem: “Bat, iu wea teachim narafala man, waswe, iu no teachim iuseleva?” Hem important hao olketa example wea Paul storyim join witim fasin. Long hia, datfala aposol no mekhae long olketa Bible teaching or history. Disfala wei for teachim seleva and nara pipol wea Paul storyim hem join witim Christian fasin.
11. Why nao iu shud ting strong long Christian fasin taem iu studyim Word bilong God?
11 For followim leson bilong Romans 2:21-23 hem minim iumi mas lanem Christian fasin from Word bilong God, live followim, and then teachim nara pipol for duim sem samting. So, taem iu studyim Bible, luksavve long samting wea showimaot olketa standard bilong Jehovah, wea hem nao faondeson bilong trufala Christian fasin. Ting raonem kaonsel and olketa leson wea iu lukim insaed long Bible. Then no hol bak for followim samting wea iu lanem. And for duim olsem hem barava needim fasin for no fraet and for no givap. Hem isi for olketa man wea no perfect for mekem olketa excuse, or faendem reason for no followim Christian fasin samfala taem. Maet olketa Jew wea Paul story abaotem savve tumas for iusim kleva tingting olsem for mekem excuse or giamanim nara pipol. Bat, toktok bilong Paul showimaot hao Christian fasin hem no samting wea iumi savve disaed for leavim or for ting smol long hem.
12. Hao nao gudfala fasin and nogud fasin affectim tingting bilong pipol abaotem Jehovah God, and why nao hem gud for tingim diswan evritaem?
12 Datfala aposol hem mekhae long wanfala main reason for lanem and then live followim fasin wea Bible storyim. Nogud fasin bilong olketa Jew hem affectim wei wea nara pipol ting long Jehovah: “Iu, wea tinghae long law, waswe, iu fail for honorim God from wei wea iu brekem Law? Bikos long ‘iufala, pipol spoelem nem bilong God midolwan olketa nation.’” (Romans 2:23, 24) Hem tru distaem tu hao, sapos iumi ting nating long Christian fasin, iumi no honorim Man wea Givim. Long narasaed, sapos iumi hol strong long olketa standard bilong God, hem mekem pipol tinghae long hem, honorim hem. (Isaiah 52:5; Ezekiel 36:20) For savve long diswan savve strongim iu sapos iu feisim olketa temptation or samting wea maet mekem iu tingse isi and best wei hem for leavim Christian fasin firstaem. Toktok bilong Paul teachim iumi nara samting tu. Witim wei for savve hao fasin bilong iuseleva savve affectim tingting bilong pipol abaotem God, taem iu teachim nara pipol, helpem olketa for savve hao wei wea olketa followim olketa standard saed long fasin wea olketa laenem savve affectim tingting bilong pipol abaotem Jehovah. Christian fasin hem no just mekem man hapi and protectim health bilong hem nomoa. Hem affectim tu tingting bilong pipol abaotem Datwan wea startim and encouragem pipol for garem fasin olsem.—Psalm 74:10; James 3:17.
13. (a) Hao nao Bible helpem iumi saed long fasin? (b) Talem main point bilong kaonsel wea stap long 1 Thessalonians 4:3-7.
13 Fasin affectim nara pipol tu. Iu savve lukim diswan long olketa example insaed Word bilong God wea showimaot hao hem gud for followim olketa standard bilong God saed long fasin and samting wea kamaot from wei for no followim. (Genesis 39:1-9, 21; Joshua 7:1-25) Iu savve faendem stretfala kaonsel saed long fasin olsem: “Diswan nao will bilong God, for iufala kamap holy, iufala mas stap klia from fornication; for evriwan long iufala mas savve hao for keepim body bilong hem holy and garem honor, no long wei for kavetem sex olsem olketa nation wea no savve long God duim; mekem no eniwan spoelem olketa raet bilong brata bilong hem long disfala samting, . . . from God kolem iumi, no witim wei for letem eni dirty samting, bat for followim fasin wea holy.”—1 Thessalonians 4:3-7.
14. Hem gud for askem iuseleva wanem samting abaotem kaonsel long 1 Thessalonians 4:3-7?
14 Eniwan fit for luksavve from olketa verse hia hao dirty fasin hem brekem law bilong Christian fasin. Bat, iu savve lukluk moa deep long diswan. Insaed samfala scripture hem samfala samting for barava studyim and ting raonem gud and long wei olsem kasem mining wea moa deep. Olsem example, maet iu ting raonem mining bilong Paul taem hem sei hao man wea duim fornication “spoelem olketa raet bilong brata bilong hem long disfala samting.” Wanem nao olketa raet hia, and hao nao wei for minim diswan gud savve muvim iu for keepim Christian fasin? Hao nao samting wea kamaot from research olsem savve helpem iu for teachim nara pipol and for helpem olketa honorim God?
Study Witim Goal for Teach
15. Wanem nao olketa tul wea iu savve iusim for teachim iuseleva taem iu duim study seleva?
15 Olketa Jehovah’s Witness garem olketa tul wea olketa iusim for duim research long olketa kwestin wea kamap taem olketa study for teachim olketa seleva or nara pipol. Wanfala tul wea stap long planti languis hem Watch Tower Publications Index. Sapos iu garem, iu savve iusim for faendem information insaed olketa Bible pablikeson bilong Olketa Jehovah’s Witness. Iu savve lukaotem samting followim subject or from list bilong olketa Bible verse. Nara tul wea Olketa Jehovah’s Witness garem long planti main languis hem Watchtower Library. Insaed disfala computer program long CD-ROM hem bigfala library bilong olketa pablikeson. Man savve iusim datfala program for duim research long olketa topic and olketa scripture. Sapos iu garem wanfala tul hia or tufala evriwan, iusim olketa evritaem iu studyim Word bilong God mekem iu savve teachim nara pipol.
16, 17. (a) Wea nao iu savve faendem samfala interesting koment abaotem olketa raet wea 1 Thessalonians 4:6 storyim? (b) Long olketa wanem wei nao fornication savve spoelem raet bilong nara pipol?
16 Iumi lukluk long example wea stap antap, 1 Thessalonians 4:3-7. Kwestin hem kamap abaotem olketa raet. Olketa raet bilong hu? And hao nao maet samwan spoelem olketa raet hia? Sapos iu iusim olketa tul wea iumi bin storyim, iu savve faendem samfala interesting koment long olketa verse hia, and abaotem olketa raet wea Paul storyim. Iu savve readim olketa koment olsem insaed Insight on the Scriptures, Volume 1, page 863-4; True Peace and Security—How Can You Find It?, page 145; The Watchtower, November 15, 1989, page 31.
17 Taem iu studyim diswan, bae iu lukim hao olketa pablikeson hia showimaot hao toktok bilong Paul hem barava tru. Man wea duim fornication hem sin againstim God and putim hemseleva long danger for kasem olketa sik. (1 Corinthians 6:18, 19; Hebrews 13:4) Man wea duim fornication hem spoelem samfala difren raet bilong woman wea hem duim sin witim. Hem spoelem klinfala nem and gudfala conscience bilong hem. Sapos hem singol woman, datfala man spoelem raet bilong hem for garem klin start long marit and raet bilong hasband bilong hem for expectim hem for olsem. Hem spoelem parents bilong woman and hasband bilong hem sapos hem marit. Datfala man spoelem raet bilong famili bilong hemseleva for garem klinfala nem saed long fasin. Sapos hem wanfala Christian, hem mekem pipol tokdaonem and spoelem nem bilong kongregeson.—1 Corinthians 5:1.
18. Wanem gud samting nao iu savve kasem from wei for studyim Christian fasin insaed Bible?
18 Waswe, olketa koment olsem abaotem olketa raet helpem iu minim moa datfala verse? Kaen wei for study olsem hem gud tumas. Taem iu duim datwan, iu teachim iuseleva. Savve bilong iu hao message bilong God hem strong and tru bae grow. Iu strongim disison bilong iu for keepim Christian fasin nomata wanem temptation savve kamap. And tingim hao iu bae kamap wanfala teacher wea moabeta! Olsem example, taem iu teachim Bible truth long nara pipol, iu savve explainim deep mining bilong 1 Thessalonians 4:3-7, for helpem olketa grow long wei for minim and tinghae long Christian fasin. Long wei olsem, study bilong iu savve helpem iu and planti narawan for honorim God. And mifala storyim wanfala example nomoa long hia, wea kam from leta bilong Paul for olketa long Thessalonica. Planti moa samting hem insaed long Christian fasin, and planti moa example and kaonsel long Bible wea join witim diswan wea iu savve studyim, iusim, and teachim.
19. Why nao iu mas keepim Christian fasin?
19 Hem wise samting for keepim Christian fasin. James 3:17 talem hao “wisdom from antap,” from Jehovah God seleva, hem “firstaem klin.” Hem klia hao diswan minim for followim olketa standard bilong God saed long fasin. Tru nao, Jehovah talem hao olketa wea teachim Bible mas gudfala example “long wei for klin.” (1 Timothy 4:12) Living bilong olketa first disaepol olsem Paul and Timothy showimaot hao olketa klin; olketa no duim dirty fasin and Paul hem raet: “Nomata for storyim fornication and evri difren kaen fasin wea no klin or greedy, iufala mas no duim, olsem hem fitim holy pipol; and tu fasin wea bringim shame or krangge toktok or fasin for mekfani long dirty samting.”—Ephesians 5:3, 4.
20, 21. Why nao iu agree witim samting wea aposol John raetem long 1 John 5:3?
20 Nomata Word bilong God talem klia and stret olketa standard saed long fasin, olketa no olsem wanfala hevi. John, wea stap laef bihaen olketa nara aposol dae, hem luksavve long diswan. From samting wea hem lukim long full laef bilong hem, hem savve hao Christian fasin no spoelem man. Bat hem gud samting, hem helpem man, and hem wanfala blessing. John strongim diswan taem hem raet: “Diswan nao love for God: iumi mas keepim olketa komandment bilong hem. And olketa komandment bilong hem no putim hevi long iumi.”—1 John 5:3, New English Translation.
21 Lukim hao John no sei wei for obeyim God saed long Christian fasin hem best wei bikos hem protectim iumi from olketa problem and nogud samting wea bae kamaot from wei olsem. Hem talem stretfala wei for ting long diswan taem hem sei wei for obeyim God saed long Christian fasin hem showimaot love bilong iumi for Jehovah God, wanfala spesol wei for showimaot disfala love. Tru nao, for teachim iumiseleva or nara pipol for lovem God minim iumi mas acceptim and live followim olketa hae standard bilong hem. Yes, hem minim iumi mas teachim Christian fasin long iumiseleva and nara pipol.
[Olketa Footnote]
a Nomata Josephus storyim olketa Jew olsem olketa wea respectim olketa holy samting, hem talem moa law bilong God long disfala wei: “No eni man mas tokspoelem olketa god wea olketa nara taon worshipim, and mas no steal long olketa heathen temple, or tekem treasure wea olketa dedicatem long nem bilong eni god.” (Italic raeting hem bilong mifala.)—Jewish Antiquities, Buk 4, chapter 8, paragraf 10.
b Jewish Antiquities, Buk 18, chapter 3, paragraf 5.
Waswe, Iu Remember?
• Why nao iumi mas study for teachim iumiseleva bifor iumi teachim nara pipol?
• Hao nao fasin bilong iumi savve affectim tingting bilong pipol abaotem Jehovah?
• Man wea duim fornication savve spoelem olketa raet bilong hu?
• Wanem nao iu disaed strong for duim saed long Christian fasin?
[Piksa long page 22]
“Olketa komandment bilong hem no putim hevi long iumi”