Waswe, Iu “Baem  Taem wea Fitim”?

APOSOL Paul kaonselem olketa Christian long Ephesus long first century: “Go ahed for lukaot gud mekem wei wea iufala wakabaot hem no olsem man wea no wise bat olsem man wea wise, baem taem wea fitim for iufala, bikos olketa day hem wicked.” (Ephesians 5:15, 16) Why nao olketa needim disfala kaonsel? Ansa for datfala kwestin needim savve abaotem olketa samting wea olketa wea stap long datfala taon bilong bifor feisim.

Pipol savve long Ephesus from bigfala riches bilong hem, barava nogud fasin, raf fasin, and olketa difren kaen spiritism. For join witim datwan, olketa Christian mas deal witim olketa idea bilong pipol abaotem taem. Greek pipol wea no Christian no bilivim hao taem muv followim stret laen nomoa. Olketa Greek idea teachim olketa hao taem laef hem finis, hem start moa and hem olowe go raon olsem. Man wea westem taem bilong hem long wanfala laef savve kasem diswan bak long next laef. Maet kaen tingting olsem mekem olketa Christian long Ephesus for ting smol long taem wea Jehovah markem for olketa samting wea bae happen, wea insaed diswan hem taem bilong hem for judge. So, kaonsel bilong Paul for “baem taem wea fitim” hem kamap long barava taem.

Paul no minim taem nomoa. Greek word wea hem iusim showimaot wanfala sekson bilong taem wea man markem, taem wea hem markem for duim samting. Paul kaonselem olketa first-century Christian for iusim gud taem wea stap, wea olketa enjoyim, bifor hem kasem end and chance wea God givim for kasem mercy and salvation hem finis.—Romans 13:11-13; 1 Thessalonians 5:6-11.

Iumi stap long wanfala taem olsem wea fitim. Winim wei for westem disfala taem wea fitim wea bae nating kamap moa long wei for aftarem hapi wea world hem offerim wea for short taem nomoa, olketa Christian bae wise sapos olketa iusim taem wea olketa garem for duim “waka wea showimaot fasin for lovem God” and long datfala wei strongim wei wea olketa fren witim Creator, Jehovah God.—2 Peter 3:11; Psalm 73:28; Philippians 1:10.