Strongim Trust Bilong Iu Long Jehovah

Wanfala plan for killim man dae hem kamap. Evri bigman bilong kantri story tugeta finis and disaedem wanfala niu law. Olketa laek for givim panis bilong dae long eniwan wea duim worship wea gavman no appruvim.

WASWE, iu bin herem eniting olsem bifor? History hem fulap witim olketa example long pipol wea iusim law long rong wei for mek trabol. Story antap hem kamap long Rul Bilong Persia long taem bilong profet Daniel. Datfala law, wea King Darius nao startim, hem sei: “Eniwan wea prea long eni god or man for thirti day bat no long [datfala] king, olketa mas torowem hem long hol bilong olketa lion.”—Daniel 6:7-9.

Wanem nao bae Daniel duim long disfala wei wea laef bilong hem stap long danger? Bae hem go ahed for trust long God, Jehovah, or bae hem brekem faith bilong hem and followim komand bilong king? Bible talem iumi: “Daniel, taem hem savve king saenem finis datfala toktok, hem go insaed long haos bilong hem, and, from olketa window bilong rum long ruf open feisim Jerusalem, thrifala taem insaed long day hem nildaon and prea and givim praise front long God bilong hem, olsem hem savve duim evritaem.” (Daniel 6:10) Staka savve gud long disfala story. Olketa torowem Daniel go insaed hol bilong lion from faith bilong hem, bat Jehovah “satem mouth bilong olketa lion” and sevem loyal servant bilong hem.—Hebrews 11:33; Daniel 6:16-22.

Taem for Lukluk Long Seleva

Distaem, olketa servant bilong Jehovah stap insaed wanfala raf world and feisim staka danger long physical and spiritual wei. Olsem example, taem seknomoa olketa ethnic raoa kamap long samfala kantri, staka Witness dae. Long olketa nara ples, olketa servant bilong Jehovah short long kaikai, kasem hard taem saed long selen, natural disaster, big sik, and nara samting wea putim laef long danger. Witim diswan, olketa mas deal witim persecution, hevi long waka ples, and olketa difren temptation for duim rong, evriting hia wea savve putim spiritual living long danger. Tru nao, main Enemy, Satan, barava garem goal for distroem olketa servant bilong Jehovah thru long eni wei wea hem lukim, hem savve winim man long hem.—1 Peter 5:8.

Wanem nao iumi savve duim long olketa taem olsem? Nomata hem wei bilong man for fraet taem laef bilong hem insaed danger, iumi savve tingim evritaem toktok bilong aposol Paul wea comfortim man: “[Jehovah] talem finis: ‘Mi bae nating lusim iu and bae nating forgetim iu.’ Mekem iumi kamap strong and sei: ‘Jehovah hem helpem mi; Bae mi no fraet. Wanem nao man savve duim long mi?’ ” (Hebrews 13:5, 6) Iumi savve sure Jehovah feel olsem tu for olketa servant bilong hem distaem. Bat, for savve long olketa promis bilong Jehovah hem difren from wei for biliv strong hem bae helpem iumi. Dastawe hem important tumas for iumi lukluk gud long faondeson wea trust long Jehovah hem kamap from hem and duim evriting wea iumi fit for duim for strongim and keepim datfala trust. Sapos iumi duim diswan, “peace bilong God wea winim evri tingting bilong man bae protectim heart and tingting bilong [iumi] thru long Christ Jesus.” (Philippians 4:7) Then taem iumi feisim test, iumi bae garem kliafala tingting and fit for deal witim olketa long wisefala wei.

Faondeson for Trust Long Jehovah

Iumi barava garem staka reason for trust long Creator bilong iumi, Jehovah. First wan long olketa hem wei wea Jehovah hem wanfala loving God wea really kea for olketa servant bilong hem. Staka example stap long Bible abaotem loving kea bilong Jehovah for olketa servant bilong hem. For storyim wei wea Jehovah deal witim pipol wea hem chusim, Israel, Moses raet olsem: “Hem faendem hem long wilderness ples, and long wanfala emti desert wea wind blow strong. Hem start for flae raonem hem, for lukaftarem hem, for protectim hem olsem eye bilong hem.” (Deuteronomy 32:10) Long distaem, Jehovah go ahed for lukaftarem gud olketa servant bilong hem, olsem wanfala grup and man wanwan tu. Olsem example, taem samfala Witness short long kaikai long taem bilong war long Bosnia, Jehovah mek sure olketa kasem samting olketa barava needim thru long hard waka bilong olketa brata bilong olketa from Croatia and Austria, wea putim laef bilong olketa long danger for travel thru long olketa barava danger area for tekem kam need bilong olketa brata.a

From Jehovah God hem Olmaeti, hem barava fit for protectim olketa servant bilong hem nomata wanem kasem olketa. (Isaiah 33:22; Revelation 4:8) Bat nomata taem Jehovah letem samfala long olketa servant bilong hem for pruvim faithful fasin go kasem dae, hem still saportim olketa and helpem olketa for keepim faithful fasin, mekem olketa fit for stand strong, hapi, and garem peace go kasem end. So iumi savve garem sem trust olsem man wea raetem psalm: “For iumi God hem wanfala ples for haed and wanfala strong, wanfala help wea isi for faendem long taem bilong trabol. Dastawe iumi bae no fraet, nomata earth hem change and nomata olketa maunten gogo foldaon go insaed bigfala sea.”—Psalm 46:1, 2.

Bible showimaot tu Jehovah hem God bilong truth. Diswan minim hem evritaem fulfillim olketa promis bilong hem. Really, Bible storyim hem olsem God “wea kanduit laea.” (Titus 1:2) From Jehovah talem evritaem wei wea hem willing for protectim and sevem olketa servant bilong hem, iumi savve barava sure hem no just savve bat hem redy tu for fulfillim olketa promis bilong hem.—Job 42:2.

Olketa Wei for Strongim Trust Bilong Iumi

Nomata iumi garem evri reason for putim trust bilong iumi long Jehovah, iumi mas no ting nating long diswan. Diswan bikos world no garem faith long God, and kaen tingting olsem savve isi tumas for mekem trust bilong iumi long Jehovah for wikdaon. So, iumi mas barava waka hard for strongim and keepim datfala trust. Jehovah hem luksavve long diswan, and hem provaedem wei wea iumi savve duim diswan.

Firstaem, hem provaedem Word bilong hem, Bible, wea recordim staka maeti samting wea hem duim for olketa servant bilong hem. Tingim, haomas trust nao iu savve garem for samwan wea nem bilong hem nomoa iu savve long hem? Luk olsem barava nomoa nao. For trustim hem, iu need for savve long olketa wei bilong hem and fasin bilong hem, hem tru? Taem iumi readim and ting raonem kaen story olsem insaed Bible, savve bilong iumi abaotem Jehovah and olketa nambawan wei bilong hem bae kamap moa deep, and iumi bae luksavve moa long wei wea iumi fit for trustim hem. So trust bilong iumi long hem bae kamap moa strong. Man for raetem psalm showim gud example taem hem prea strong olsem long God: “Mi bae rememberim olketa samting wea Jah duim; from mi bae rememberim nambawan samting wea iu duim longtaem bifor. And mi bae ting raonem evri waka bilong iu, and evri samting wea iu duim mi bae interest long hem.”—Psalm 77:11, 12.

Witim Bible, iumi kasem staka spiritual kaikai from olketa Bible pablikeson wea organization bilong Jehovah wakem. Insaed olketa pablikeson hia tu hem olketa laef story wea muvim feeling abaotem olketa servant bilong God distaem, wea showimaot hao Jehovah provaedem help and comfort taem olketa kasem barava trabol. Olsem example, Martin Poetzinger, wea bihaen kamap member bilong Governing Body bilong Olketa Jehovah’s Witness, kamap barava sik taem hem serve olsem pioneer long samfala area long Europe wea no homples bilong hem. Hem no garem selen, and no eni doctor willing for helpem hem. Bat Jehovah nating lusim hem. Gogo, hem meetim main doctor bilong lokol hospital. From hem biliv strong long Bible, disfala kaenfala man hem lukaftarem Brata Poetzinger olsem own son bilong hem, and kostim free. For readim kaen story olsem savve barava strongim trust bilong iumi long Father bilong iumi long heven.

Nara samting wea barava savve help wea Jehovah provaedem for strongim trust bilong iumi long hem, hem datfala nambawan privilege bilong prea. Aposol Paul talem iumi long loving wei: “No wari long eni samting, bat long evri samting thru long prea and wei for barava askem witim wei for sei thankiu, talem evri samting long God.” (Philippians 4:6) “Evri samting” savve minim tu olketa feeling, need, fraet, and wari bilong iumi. Sapos iumi prea evritaem and hem kam from heart bilong iumi, bae trust bilong iumi long Jehovah kamap moa strong.

Taem Jesus Christ stap long earth, samfala taem hem go seleva long wanfala ples for prea wea no eniwan disturb. (Matthew 14:23; Mark 1:35) Bifor hem disaedem olketa important samting, hem iusim full naet for prea long Dadi bilong hem. (Luke 6:12, 13) Iumi no sapraes hao trust bilong Jesus long Jehovah hem strong tumas gogo hem fit for stand strong long worse test wea eniwan savve kasem. Lastfala toktok bilong hem long torture-stake hem: “Father, mi putim spirit bilong mi long hand bilong iu.” Disfala toktok wea showimaot trust pruvim hao, go kasem end, trust bilong hem long Dadi bilong hem nating lus, nomata Jehovah no duim eniting for sevem hem.—Luke 23:46.

Narafala wei moa for buildimap trust bilong iumi long Jehovah hem wei for kaban evritaem witim pipol wea trustim hem witim full heart. Jehovah komandim pipol bilong hem for hipap evritaem for lanem moa samting abaotem hem and for encouragem each other. (Deuteronomy 31:12; Hebrews 10:24, 25) Kaen wei for kaban olsem strongim trust bilong olketa long Jehovah, wea mekem olketa fit for stand strong anda long olketa important test bilong faith. Long wanfala kantri long Africa wea olketa tambuim preaching waka, olketa no letem Olketa Jehovah’s Witness kasem police protection, pepa for olketa go long difren kantri, marit certificate, hospital treatment, and waka. Taem war kamap long wanfala area, 39 member, insaed diswan hem olketa pikinini, bilong wanfala kongregeson stap andanit wanfala low bridge long desert for klosap fofala month, from olketa bomim taon bilong olketa. Long barava hard taem olsem, wei wea olketa storyim Bible text evriday and olketa nara meeting givim olketa bigfala strong. Dastawe olketa fit for winim datfala hard taem witim spiritual living wea strong. Disfala experience showimaot klia gud samting wea kamaot from wei for hipap evritaem witim pipol bilong Jehovah.

Last samting, for strongim trust bilong iumi long Jehovah, iumi mas go ahed busy long Kingdom-preaching waka, evritaem redy for sharem gud nius witim narafala pipol. Diswan showaot long experience wea muvim feeling abaotem wanfala young pablisa long Canada wea kasem sik leukemia. Nomata long bigfala sik bilong hem hia, hem want for kamap regular pioneer, hem nao, wanfala full-taem minister. Long taem wea sik bilong hem lelebet katdaon, hem feel fit for spendem wan month long ministry olsem wanfala auxiliary pioneer. Then health bilong hem kamap worse, and hem dae tu-thri month bihaen. Nomata olsem, hem stap strong long spiritual wei go kasem end, trust bilong hem long Jehovah nating katdaon lelebet. Mami bilong hem ting bak olsem: “Go kasem end, hem moa wari long nara pipol winim hemseleva. Hem encouragem olketa for studyim Bible, hem savve sei, ‘Iumi bae stap tugeta long Paradaes.’ ”

Pruvim Trust Bilong Iumi Long Jehovah

“Olsem body wea no garem spirit hem dae finis, faith wea no garem waka hem dae finis tu.” (James 2:26) Samting James talem abaotem faith long God hem fitim tu wei wea iumi trust long Hem. Nomata haomas iumi sei iumi trustim God, hem no garem mining sapos iumi no showimaot disfala trust long wanem iumi duim. Abraham trust evribit long Jehovah and pruvim datfala trust thru long wei wea hem obeyim olketa komand bilong Hem and nating daot, nomata taem hem mas sakrifaesim son bilong hem, Isaac. Bikos long diskaen spesol trust and fasin for obey, olketa savve long hem olsem fren bilong Jehovah.—Hebrews 11:8-10, 17-19; James 2:23.

Iumi no need for weitim samfala nogud test for showimaot trust bilong iumi long Jehovah. Jesus talem olketa disaepol bilong hem: “Man wea faithful long smol samting hem faithful long big samting tu, and man wea no raeteous long smol samting hem no raeteous long big samting tu.” (Luke 16:10) Iumi shud lane for trust long Jehovah long evri samting iumi duim evriday, for obeyim hem nomata long olketa samting wea maet luk smol. Taem iumi lukim olketa gud samting wea kamaot from wei for obey olsem, trust bilong iumi long Father bilong iumi long heven bae kamap moa strong, mekem iumi fit for feisim olketa test wea moa big and hard.

Taem world gogo for kasem nogud end bilong hem, pipol bilong Jehovah sure for kasem moa test and danger. (Acts 14:22; 2 Timothy 3:12) Thru long wei for buildim full and strong trust long Jehovah distaem, iumi savve luk forward for laef long promis niu world bilong hem—taem iumi sev thru long datfala big trabol or kasem resurrection. (2 Peter 3:13) Iumi no laek for letem eni wei for no garem trust for spoelem nambawan wei wea iumi fren witim Jehovah. Then, samting olketa talem abaotem Daniel bihaen hem sev from hol bilong lion savve tru for iumi tu: “Olketa no faendem eni garekil long hem, bikos hem trust long God bilong hem.”—Daniel 6:23.

[Footnote]

[Piksa long page 9]

Wei for readim story bilong olketa faithful servant bilong Jehovah, olsem Martin Poetzinger, hem strongim faith