Tingting Bilong Pipol Abaotem Iumi Waswe, Hem Important?
KLOSAP evriwan laek for kasem praise. For kasem praise hem mekem iumi hapi, and mekem iumi feel iumi win long samting wea iumi duim. Wei wea pipol praisem iumi savve mekem iumi laek for kamap moabeta long samting iumi duim. Bat iumi no laek for kamap moabeta taem iumi luksavve samfala pipol no appruvim iumi. Taem man no talem eni samting, or hem talem nogud toktok long iumi, datwan savve spoelem feeling bilong iumi. Tingting bilong pipol abaotem iumi savve barava affectim hao iumi ting abaotem iumiseleva.
Hem no stret sapos iumi no lisin long tingting bilong pipol abaotem iumi. Iumi savve kasem gud samting from wei wea pipol lukluk gud long fasin bilong iumi. Taem tingting bilong olketa followim principle bilong Bible, hem gud samting for iumi, wea savve muvim iumi for duim stretfala samting. (1 Corinthians 10:31-33) Bat nomata taem staka pipol garem sem tingting, datwan no minim hem stret. Tingim olketa chief priest and nara pipol wea garem tingting wea no stret abaotem Jesus Christ, taem “olketa start for singaot, and sei: ‘Nilam hem long post! Nilam hem long post!’” (Luke 23:13, 21-25) Sapos tingting bilong pipol hem kam from toktok wea no tru, or jealous fasin, or from wei wea pipol no acceptim iumi, maet iumi no need for wari long datwan. So, iumi need for garem gudfala tingting and no ova tumas for duim samting followim tingting bilong pipol.
Tingting Bilong Hu Nao Important?
Iumi laekem olketa wea iumi worship tugeta for acceptim iumi. Olketa hia nao olketa famili member bilong iumi wea stap long truth and olketa Christian brata and sista bilong iumi. (Romans 15:2; Colossians 3:18-21) Wei wea olketa wea iumi worship tugeta garem love and respect, and “wei wea each wan encouragem narawan,” hem barava important samting long iumi. (Romans 1:11, 12) ‘Witim hambol tingting, iumi ting long narafala pipol olsem olketa hae winim iumi.’ (Philippians 2:2-4) And tu, iumi laekem “olketa wea lead” midolwan long iumi, wea hem nao olketa elder long kongregeson, for appruvim iumi and iumi tinghae long datwan.—Hebrews 13:17.
Iumi laekem ‘pipol long aotsaed for story gud abaotem iumi’ tu. (1 Timothy 3:7) Hem barava gud taem olketa relative wea no insaed truth, olketa wakfren, and neiba respectim iumi! And iumi trae for mekem pipol wea iumi preach long olketa ting gud abaotem iumi, mekem olketa acceptim message bilong Kingdom! Wei wea iumi honest and pipol long community savve iumi garem klin fasin, hem givim glory long God. (1 Peter 2:12) Bat, iumi nating savve brekem Bible principle for mekem pipol acceptim iumi; or act olsem wanfala hypocrite for mekem pipol tinghae long iumi. Iumi mas luksavve hem hard for mekem evriwan hapi. Jesus hem sei: “Sapos iufala part bilong world, world savve laekem samting bilong hemseleva. Bat from iufala no part bilong world, bat mi chusim iufala aot from world, from diswan nao world hem heitim iufala.” (John 15:19) Waswe, iumi savve duim eni samting for mekem olketa wea againstim iumi for respectim iumi?
Kasem Respect From Olketa wea Againstim Iumi
Jesus givim warning olsem: “Evri pipol bae heitim iufala bikos long nem bilong mi; bat man wea gohed strong go kasem end nao bae sev.” (Matthew 10:22) Samfala taem wei for heit hem mekem pipol talem barava nogud toktok abaotem iumi. Olketa bigman long gavman wea no laekem iumi savve sei iumi “pipol for againstim” or “daonem gavman.” Samfala maet sei iumi wanfala sect for mek trabol wea olketa mas stopem. (Acts 28:22) Samfala taem, iumi savve duim samting for stretem kaen toktok olsem. Long wanem wei? Long wei for followim disfala kaonsel bilong aposol Peter: “[Mas] redi for givim ansa long eniwan wea askem reason for hope wea iufala garem, bat duim datwan witim kwaet fasin and bigfala respect.” (1 Peter 3:15) And tu, iumi shud “talem gudfala toktok wea pipol kanduit for tok daonem; mekem man wea againstim iumi savve shame, from hem no garem eni nogud samting for talem abaotem iumi.”—Titus 2:8.
Nomata iumi trae for kliarem nem bilong iumi from nogud laea wea pipol talem abaotem iumi, iumi no letem diswan mekem iumi wikdaon. Pipol accusim Jesus, perfect Son bilong God, taem olketa sei hem no respectim God, againstim gavman, and hem duim spiritism. (Matthew 9:3; Mark 3:22; John 19:12) Pipol tok spoelem aposol Paul. (1 Corinthians 4:13) Jesus and Paul nating lisin long olketa kaen toktok olsem and gohed busy long waka bilong tufala. (Matthew 15:14) Tufala evriwan savve olketa enemy hard for hapi long olketa, from “full world hem stap anda long paoa bilong wicked wan.” (1 John 5:19) Distaem, iumi feisim sem samting. Iumi no need for feel nogud taem olketa wea heitim iumi talem laea samting abaotem iumi.—Matthew 5:11.
Tingting wea Barava Important
Pipol garem enikaen difren tingting abaotem iumi wea depend long samting olketa herem abaotem iumi and samting wea muvim olketa. Samfala praisem and respectim iumi, samfala tok spoelem and heitim iumi. Nomata olsem, taem iumi followim olketa Bible principle, iumi hapi and garem peace.
Aposol Paul hem raet olsem: “Full Bible hem kam from God and hem gud for teachim man, for givim kaonsel, for stretem evri samting, for givim discipline long raeteous fasin, mekem man bilong God hem fit evribit, barava redi for duim evri gudfala waka.” (2 Timothy 3:16, 17) Jehovah God and Son bilong hem, Jesus Christ, appruvim iumi taem iumi hapi for acceptim Bible for leadim iumi long evri samting long laef. Diswan hem bikos, tingting bilong Jehovah and Son bilong hem nao important. Tingting bilong tufala abaotem iumi nao important bikos laef bilong iumi hem depend long datwan.—John 5:27; James 1:12.
[Blurb long page 30]
“Praise hem mekem mi shame, from really mi laekem datwan.”—RABINDRANATH TAGORE, MAN FROM INDIA FOR RAETEM POEM
[Piksa long page 31]
Tingting bilong olketa wea iumi worship tugeta hem important
[Piksa Credit Line long page 30]
Culver Pictures