Kwestin From Reader

Wanem nao Paul minim taem hem sei widow woman mas “waef bilong wanfala hasband” bifor hem fit for kasem help from Christian kongregeson?​—1 Timothy 5:9.

From aposol Paul story abaotem wanfala widow woman taem hem iusim datfala toktok “waef bilong wanfala hasband,” hem storyim nao taem wea datfala woman marit yet bifor hasband bilong hem dae. Waswe, diswan savve minim datfala widow woman marit wanfala taem nomoa? Or waswe, maet toktok bilong Paul minim difren samting?a

Samfala pipol tingse Paul story abaotem olketa widow woman wea marit wanfala taem nomoa. Long plande kantri and community, pipol tinghae long widow woman wea no ting for marit moa. Bat datkaen tingting hem no followim samting wea Paul raet abaotem long olketa nara leta bilong hem. Olsem example, nomata hem talemaot klia long olketa Christian long Corinth hao long tingting bilong hem, wanfala widow woman bae moa hapi sapos hem no marit, widow woman “hem free for maritim eniwan wea hem laekem, bat hem mas man wea followim Lord.” (1 Corinthians 7:​39, 40; Romans 7:​2, 3) And tu, long leta wea Paul raetem long Timothy, hem sei: “Mi laekem olketa young widow woman for marit.” (1 Timothy 5:​14) So no eniwan shud ting daonem wanfala widow woman wea disaed for marit moa.

Sapos olsem, wanem nao Paul minim taem hem talem datfala toktok long Timothy? Datfala toktok “waef bilong wanfala hasband” hem stap long 1 Timothy 5:9 nomoa. Long Greek languis toktok hia hem minim “woman bilong wanfala man.” Samting wea interesting nao, datfala toktok hem klosap semsem witim toktok wea Paul iusim tu-thri taem long olketa nara leta wea hem raetem, olsem datfala toktok “hasband bilong wanfala waef,” wea long Greek languis hem minim “man bilong wanfala woman.” (1 Timothy 3:​2, 12; Titus 1:6) Paul iusim datfala toktok “hasband bilong wanfala waef” taem hem listim olketa mark wea olketa brata mas kasem bifor olketa fit for kamap olketa Christian overseer and olketa ministerial servant. Taem Paul iusim datfala toktok, hem really minim hao for man kamap fit for kasem responsibility insaed long Christian kongregeson, datfala man sapos hem marit hem mas faithful long waef bilong hem and garem olketa gudfala fasin.b From datwan, toktok long 1 Timothy 5:9 bae minim sem samting: For wanfala widow woman kamap fit for kasem help from kongregeson, hem mas wanfala loyal and faithful waef long hasband bilong hem taem hasband bilong hem laef yet, and woman hia mas garem olketa gudfala fasin. Paul listim tu olketa nara samting wea wanfala widow woman mas duim bifor hem fit for kasem help from kongregeson.​—1 Timothy 5:10.

[Olketa Footnote]