Olketa Young Wan—Jehovah Bae No Forgetim Waka Bilong Iufala!

“God hem no wicked mekem hem forgetim waka bilong iufala and love wea iufala showimaot for nem bilong hem, long wei wea iufala servem olketa holy wan and go ahed for serve.”—HEBREWS 6:10.

1. Hao nao Bible buk bilong Hebrews and Malachi showimaot hao Jehovah hem tinghae long service bilong iu?

WASWE, enitaem iu duim gud samting long wanfala fren and hem no thankiu long iu? Man savve feel nogud tumas sapos fren olsem ting nating long gud samting hem duim, or moa worse, forgetim gud samting hem duim. Bat for servem Jehovah witim full heart hem barava difren! Bible hem sei: “God hem no wicked mekem hem forgetim waka bilong iufala and love wea iufala showimaot for nem bilong hem, long wei wea iufala servem olketa holy wan and go ahed for serve.” (Hebrews 6:10) Tingim mining bilong diswan. Jehovah bae ting long hemseleva olsem hem duim wicked samting—hem sin—sapos hem forgetim wanem iu duim and wanem iu go ahed for duim for servem hem. Hem wanfala God wea barava tinghae long iumi!—Malachi 3:10.

2. Wanem nao mekem wei for servem Jehovah hem barava spesol?

² Iu garem spesol chance for worshipim and servem disfala God wea tinghae. Taem iu markem six million brata and sista witim six billion pipol bilong full world, iu garem privilege wea staka no garem. And tu, wei wea iu lisin and duim samting saed long message bilong gud nius hem showaot Jehovah interest long iumi wanwan. Tru nao, Jesus hem sei: “No eni man savve kam long mi sapos Father, wea sendem mi, no pullim hem.” (John 6:44) Yes, Jehovah helpem pipol wanwan for kasem gud samting from sakrifaes bilong Christ.

Showaot Thankiu for Nambawan Privilege Bilong Iu

3. Hao nao olketa son bilong Korah showimaot thankiu for privilege for servem Jehovah?

³ Olsem iumi storyim long first article, iu garem spesol chance for mekem heart bilong Jehovah hapi. (Proverbs 27:11) Diswan hem samting wea iumi shud no enitaem ting nating long hem. Long wanfala singsing bilong olketa, olketa son bilong Korah talemaot thankiu bilong olketa for privilege for servem Jehovah. Olketa sei: “Wanfala day long courtyard bilong iu hem gud winim wan thousand long nara ples. Mi chus for standap long gate bilong haos bilong God bilong mi winim wei for stap long olketa tent bilong wicked fasin.”—Psalm 84:10.

4. (a) Wanem nao maet mekem samfala tingse wei for worshipim Jehovah hem strict tumas? (b) Long wanem wei nao Jehovah showimaot hem laek tumas for lukluk and givim reward long olketa servant bilong hem?

⁴ Waswe, iu feel olsem abaotem privilege for servem Dadi bilong iu long heven? Samfala taem wei for worshipim Jehovah maet luk olsem hem katem daon freedom bilong iu. Hem tru, wei for live followim olketa Bible principle needim fasin for sakrifaesim seleva. Bat samting wea important nao hem wei wea, evri samting Jehovah askem from iu, hem samting for helpem iu. (Psalm 1:1-3) And tu, Jehovah lukim wei wea iu trae hard and hem showimaot hem tinghae long faithful fasin bilong iu. Tru nao, Paul raet hao Jehovah hem “kamap man wea givim reward long olketa wea barava luk aotem hem.” (Hebrews 11:6) Jehovah hem luk aotem chance for duim diswan. Wanfala raeteous profet long Israel bifor hem sei: “Eye bilong Jehovah muv raonem full earth for showimaot strong bilong hem for olketa wea givim full heart long hem.”—2 Chronicles 16:9.

5. (a) Wanem nao wanfala best wei wea iu savve showimaot iu givim full heart long Jehovah? (b) Why nao maet luk olsem hem hard samting for storyim faith bilong iu long nara pipol?

⁵ Wanfala best wei for iu showim hao iu givim full heart long Jehovah hem for talem nara pipol abaotem hem. Waswe, iu enitaem garem chance for storyim faith bilong iu long samfala skulfren bilong iu? Firstaem, wei for duim diswan maet luk olsem hem hard, and taem iu tingim hem mekem iu fraet. Iu maet ting olsem, ‘Hao sapos olketa laf long mi? Hao sapos olketa tingse religion bilong mi hem krangge?’ Jesus talem finis hao no evriwan bae lisin long Kingdom message. (John 15:20) Bat, diswan no minim evriwan bae tok daonem iu and les long iu. Staka young Witness faendem hao taem olketa stand strong long wanem olketa bilivim, samfala lisin and olketa kasem bigfala respect from olketa nara pikinini.

“Jehovah Bae Helpem Iu”

6, 7. (a) Hao nao wanfala girl wea 17 year fit for givim witness long olketa skulfren bilong hem? (b) Wanem nao iu lanem from experience bilong Jennifer?

⁶ Bat hao nao iu savve kasem strong for tok aot abaotem faith bilong iu? Hem bae gud for iu disaed strong for honest and tok stret taem pipol askem iu abaotem religion bilong iu. Tingim experience bilong Jennifer wea 17 year. Hem sei: “Long lunch taem long skul olketa girl wea mifala sidaon tugeta story abaotem religion. Wanfala long olketa askem mi wanem nao religion bilong mi.” Waswe, Jennifer fraet for ansa? “Yes,” hem sei, “bikos mi no sure sapos olketa bae acceptim.” So wanem nao Jennifer duim? Hem sei: “Mi talem olketa girl hia hao mi wanfala Jehovah’s Witness. Firstaem olketa luk sapraes. Luk olsem olketa garem tingting hao Olketa Jehovah’s Witness no normal pipol. Diswan muvim olketa for askem mi olketa kwestin, and mi fit for stretem samfala rong tingting wea olketa garem. Nomata bihaen datfala day, samfala long olketa kam long mi for askem kwestin.”

⁷ Waswe, Jennifer hem sorre for iusim chance for tok aot abaotem olketa biliv bilong hem? Nomoa! Hem sei: “Mi feel gud bihaen lunch taem. Distaem olketa girl hia garem stretfala tingting abaotem Olketa Jehovah’s Witness.” Advaes bilong Jennifer distaem hem simpol: “Sapos iu faendem hard for witness long olketa skulfren or long teacher, talem shortfala prea. Jehovah bae helpem iu. Iu bae hapi iu mekius long datfala chance for givim witness.”—1 Peter 3:15.

8. (a) Hao nao prea helpem Nehemiah taem samting wea hem no expectim hem kamap? (b) Wanem nao samfala samting wea kamap long skul wea maet needim iu for kwiktaem prea insaed heart long Jehovah?

⁸ Lukim hao Jennifer encouragem wei for “talem shortfala prea” long Jehovah taem iu kasem chance for witness abaotem faith bilong iu. Diswan nao wanem Nehemiah, man wea servem wine bilong King Artaxerxes bilong Persia hem duim taem wanfala chance wea hem no expectim kamap. Nehemiah hem luk wari bikos hem kasem nius abaotem nogud living bilong olketa Jew and hao wall and olketa gate bilong Jerusalem hem pisis evribit. King lukim wari long feis bilong Nehemiah, so hem askem Nehemiah wanem nao rong. Bifor hem ansa, Nehemiah hem prea for direction. Then witim wei for no fraet hem askem King for letem hem go long Jerusalem and help for buildim bak moa datfala taon wea pisis. Artaxerxes letem Nehemiah for go. (Nehemiah 2:1-8) Wanem nao iu savve lanem from diswan? Sapos iu feel fraet taem chance kamap for iu witness abaotem faith bilong iu, iusim chance for prea insaed heart. Peter hem raet: “Torowem evri wari bilong iufala long [Jehovah], bikos hem kea for iufala.”—1 Peter 5:7; Psalm 55:22.

“Redy for Givim Ansa”

9. Hao nao Leah wea 13 year fit for givimaot 23 copy bilong Young People Ask buk?

⁹ Tingim nara experience. Leah, wea hem 13 year, readim buk Questions Young People Ask—Answers That Worka long lunch taem bilong hem long skul. “Olketa narawan lukluk long mi,” hem sei, “and gogo wanfala sekson standap bihaenem mi and luk kam long wanem mi readim. Olketa start for askem wanem nao buk hia story abaotem.” Long datfala day, fofala girl askem Leah for wanfala copy bilong Young People Ask buk. Gogo olketa girl hia sharem buk bilong olketa witim olketa narawan, and olketa hia tu laekem wanfala. Insaed next tu-thri week, Leah givimaot 23 copy bilong Young People Ask buk long olketa skulfren and fren bilong olketa. Waswe, hem isi for Leah tok aot taem olketa firstaem askem hem abaotem buk wea hem readim? Nomoa! Hem sei: “Firstaem, mi fraet. Bat, mi prea, and mi savve Jehovah stap witim mi.”

10, 11. Hao nao wanfala young Israelite girl fit for helpem wanfala bigman bilong army bilong Syria for savve abaotem Jehovah, and diswan muvim bigman hia for mekem olketa wanem change?

¹⁰ Experience bilong Leah maet remindim iumi long wanfala sem samting wea happen long wanfala young Israelite girl wea prisoner long Syria. Naaman, wanfala bigman long army bilong Syria, garem leprosy. Maet waef bilong hem startim story wea muvim disfala young girl for story abaotem faith bilong hem. Hem sei: “Hem bae gud tumas sapos lord bilong mi hem go long profet long Samaria! Sapos olsem, hem bae healim hem from leprosy bilong hem.”—2 Kings 5:1-3.

¹¹ Wei wea disfala girl no fraet lead go for Naaman luksavve hao “no eni God stap long full earth bat only long Israel.” Hem disaed strong tu for “no offerim moa bone offering or sakrifaes long eni nara god bat only long Jehovah.” (2 Kings 5:15, 17) Jehovah barava blessim wei wea datfala smol girl no fraet. Hem savve duim and bae duim sem samting for olketa young wan distaem. Leah kasem diswan. Gogo, samfala skulfren kam long hem and sei hao datfala Young People Ask buk hem helpem fasin bilong olketa. “Mi hapi,” Leah hem sei, “bikos mi savve mi helpem olketa narawan for savve moa abaotem Jehovah and for changem laef bilong olketa.”

12. Hao nao iu savve kasem strong for givim ansa for faith bilong iu?

¹² Iu tu savve kasem semkaen experience wea Jennifer and Leah kasem. Followim kaonsel bilong Peter, wea raet hao olsem wanfala Christian iu shud evritaem stap “redy for givim ansa long eniwan wea askem reason for hope wea iufala garem, bat duim datwan witim kwaet fasin and bigfala respect.” (1 Peter 3:15) Hao nao iu savve duim diswan? Followim example bilong olketa Christian long first century wea prea long Jehovah for hem helpem olketa for preach “and no fraet.” (Acts 4:29) Then no fraet for storyim biliv bilong iu long nara pipol. Maet iu sapraes long wanem bae kamaot from diswan. And tu, iu bae mekem heart bilong Jehovah hapi.

Olketa Video and Spesol Project

13. Wanem nao olketa chance wea samfala young wan mekius long hem for givim witness? (Lukim box long page 20 and 21.)

¹³ Staka young wan explainim faith bilong olketa long olketa nara skulfren or teacher long wei for iusim olketa video. Samfala taem, olketa skul project openem wei for praisem Jehovah. Olsem example, tufala boy wea 15 year, wea tufala evriwan Jehovah’s Witness, kasem assignment long world history class for raetem report abaotem wanfala religion. Tufala hia join tugeta for raetem report abaotem Olketa Jehovah’s Witness, and kasem evri information from buk Jehovah’s Witnesses—Proclaimers of God’s Kingdom.b Tufala mas givim tu wanfala faev minute tok abaotem diswan. Bihaen, from teacher and olketa student garem staka kwestin, tufala standap front long class for nara 20 minute. Insaed olketa week bihaen, olketa skulfren go ahed for askem kwestin abaotem Olketa Jehovah’s Witness!

14, 15. (a) Why nao wei for fraetem man hem wanfala trap? (b) Why nao iu shud no fraet for storyim biliv bilong iu witim nara pipol?

¹⁴ Olsem olketa experience wea iumi just storyim finis showimaot, iu savve kasem olketa nambawan blessing thru long wei for talem nara pipol abaotem biliv bilong iu olsem wanfala Jehovah’s Witness. No letem wei for fraetem man aotem privilege and hapi wea iu savve kasem from wei for helpem nara pipol for savve long Jehovah. Bible hem sei: “Wei for fraet long man hem wanfala trap, bat man wea trustim Jehovah bae kasem protection.”—Proverbs 29:25.

¹⁵ No forget, olsem wanfala young Christian iu garem samting wea olketa wea sem age witim iu barava needim—best wei bilong laef distaem and promis bilong laef olowe long future. (1 Timothy 4:8) Interesting samting hem, long United States—wea maet iumi tingse pipol no interest or no garem spiritual tingting—wanfala study showaot hao haf long young pipol sei religion hem barava important long olketa, and staka sei faith bilong olketa hem “barava important samting wea affectim” laef bilong olketa. Luk olsem hem semsem long olketa nara part bilong world tu. So, maet olketa skulfren bilong iu hapi for herem story bilong iu abaotem Bible.

Olsem Wanfala Young Wan, Kam Klos Long Jehovah

16. Witim wei for story abaotem Jehovah long pipol, wanem nao narafala wei moa for mekem hem hapi?

¹⁶ Hem tru, for mekem heart bilong Jehovah hapi hem minim moa samting winim wei for story abaotem hem. Iu need tu for changem fasin bilong iu for kasem olketa mark bilong hem. Aposol John hem raet: “Diswan nao mining bilong love bilong God, for iumi obeyim evri komandment bilong hem; and olketa komandment bilong hem no hevi.” (1 John 5:3) Iu bae lukim hao diswan hem tru taem iu kam klos long Jehovah. Hao nao iu savve duim datwan?

17. Hao nao iu savve kam klos long Jehovah?

¹⁷ Iusim taem for readim Bible and olketa Bible pablikeson. Taem iu savve moa abaotem Jehovah, hem bae moa isi for iu obeyim hem and for story long nara pipol abaotem hem. “Gudfala man givim kam gudfala samting from gudfala rich samting long heart bilong hem,” Jesus hem sei, “from samting wea fulap long heart nao mouth bilong hem talem.” (Luke 6:45) So fulimap heart bilong iu witim olketa gud samting. Putim olketa goal for kasem diswan. Maet iu savve kamap moabeta long wei for redy for olketa kongregeson meeting next week. Next goal moa hem for talem shortfala ansa wea kam from heart. Tru, hem important tu for iu followim olketa samting iu lanem.—Philippians 4:9.

18. Nomata sapos iu kasem persecution, wanem samting nao iu savve sure long hem?

¹⁸ Olketa blessing wea kamaot from wei for servem Jehovah bae stap for longtaem—yes, for olowe. Hem tru, samfala taem maet iu kasem persecution or wei wea narawan tok daonem iu from iu wanfala Jehovah’s Witness. Bat tingim Moses. Bible sei “hem lukluk strong long reward wea hem bae kasem.” (Hebrews 11:24-26) Iu tu savve feel sure hao Jehovah bae rewardim iu for wei wea iu trae hard for lane abaotem hem and for story abaotem hem. Tru nao, hem bae nating ‘forgetim waka bilong iu and love wea iu showimaot for nem bilong hem.’—Hebrews 6:10.

[Olketa Footnote]

Waswe, Iu Remember?

• Why nao iu savve sure Jehovah tinghae long service bilong iu?

• Olketa wanem wei for witness long skul nao samfala faendem hem gud?

• Hao nao iu savve kasem strong for witness long olketa skulfren?

• Hao nao iu savve kam klos long Jehovah?

[Box/Olketa Piksa long page 20]

Olketa Barava Young Wan Tu Praisem Jehovah!

Nomata olketa barava young wan tu givim gudfala witness long skul. Tingim olketa experience hia.

Wanday, class bilong Amber wea hem ten year readim tugeta wanfala buk abaotem nogud persecution wea olketa Nazi duim long olketa Jew long World War II. Amber disaed for tekem kam Purple Triangles video for teacher bilong hem. Teacher hem sapraes for savve hao Olketa Jehovah’s Witness tu kasem persecution long Nazi rul. Teacher showim datfala video long full class.

Taem hem eit year, Alexa raetem leta long class bilong hem for explainim why hem bae no tekpart taem olketa celebratem Christmas. Teacher bilong hem barava tinghae long diswan so hem readim big datfala leta long class bilong Alexa and long nara tufala class tu! Long end bilong leta hem raet: “Mi lane for respectim olketa narawan wea garem biliv wea difren from mi, and mi thankiu for wei wea iu respectim disison bilong mi for no celebratem Christmas.”

Bihaen hem just startim class wan, Eric tekem Bible Story Buk bilong Mi go long skul and ask sapos hem savve showim long olketa insaed sem class bilong hem. “Mi garem idea wea moabeta,” teacher sei. “Hao sapos iu readim wanfala story for full class?” Eric duim olsem. Bihaen, hem askem eniwan wea laekem copy bilong buk for apim hand. Eitin pipol nao apim hand⁠—⁠teacher tu insaed diswan! Distaem Eric feel hem garem spesol witnessing territory long skul.

Whitney wea naen year hapi tumas for kasem brochure Olketa Jehovah’s Witness and Education.c “Mami bilong mi savve givim brochure hia long olketa teacher bilong mi evri year,” hem sei, “bat dis year miseleva nao duim. Witim help bilong datfala brochure, teacher bilong mi chusim mi olsem ‘student bilong week.’”

[Footnote]

[Box/Olketa Piksa long page 21]

Olketa Wei wea Samfala Iusim for Storyim Faith Bilong Olketa

Taem olketa kasem assignment for duim wanfala skul report or project, samfala chusim subject wea givim chance for witness

Samfala young wan givim teacher bilong olketa wanfala video or pablikeson wea join witim subject wea class story abaotem

Taem samfala young wan readim Bible or Bible pablikeson long lunch taem, olketa nara young wan laek savve abaotem

[Piksa long page 18]

Olketa mature wan savve help for trainim olketa young wan for servem Jehovah