Loyal for Stap Anda Long Paoa Bilong God

“Jehovah hem Judge bilong iumi, Jehovah hem Man for Givim Law long iumi, Jehovah hem King bilong iumi.”—ISAIAH 33:22.

1. Olketa wanem samting nao mekem nation bilong Israel barava difren from olketa nara nation?

NATION bilong Israel hem start long 1513 B.C.E. Long datfala taem, hem no garem kapitol taon, no eni homland, and no eni king wea man savve lukim. Olketa citizen bilong hem olketa slave bifor. Bat, datfala niu nation hem barava difren long wanfala narafala wei tu. Jehovah God nao Judge, Man for Givim Law, and King bilong olketa wea olketa no savve lukim. (Exodus 19:5, 6; Isaiah 33:22) No eni nara nation garem diswan!

2. Wanem kwestin kamap saed long wei wea Israel hem organize, and why nao ansa bilong datwan hem important for iumi?

² From Jehovah hem God bilong order, and God bilong peace tu, iumi expectim nation wea hem rul ovarem for barava organize gud. (1 Corinthians 14:33) Diswan hem barava tru long Israel. Bat hao nao wanfala organization long earth wea man savve lukim kasem direction from wanfala God wea man no savve lukim? Hem gud for iumi tingim wei wea Jehovah rulim datfala nation bifor, especially hao wei wea hem deal witim Israel hem showimaot klia hao hem important for loyal for stap anda long paoa bilong God.

Wei wea Jehovah Rulim Israel Bifor

3. Olketa wanem gudfala arrangement nao Jehovah mekem for leadim pipol bilong hem?

³ Nomata Jehovah hem King bilong Israel wea man no savve lukim, hem appointim samfala faithful man for stand for hem long earth. Olketa garem olketa chief, hed bilong olketa famili, and olketa older man for servem pipol olsem olketa judge and man for givim kaonsel. (Exodus 18:25, 26; Deuteronomy 1:15) Bat, iumi mas no ting olketa man hia wea garem responsibility savve judgem samting witim perfect wei for luksavve and minim samting sapos God no leadim olketa. Olketa no perfect, and olketa no savve wanem nao insaed heart bilong olketa brata bilong olketa. Nomata olsem, olketa judge wea fraet long God fit for givim gudfala kaonsel long olketa brata bilong olketa bikos datwan garem faondeson long Law bilong Jehovah.—Deuteronomy 19:15; Psalm 119:97-100.

4. Wanem kaen samting nao olketa faithful judge bilong Israel laek for barava stap klia long hem, and why nao olsem?

⁴ Bat judge mas duim moa samting winim wei for savve long Law. From olketa no perfect, olketa older man mas careful for kontrolem eni nogud feeling bilong olketa seleva—olsem selfish fasin, fasin for saedem samwan, and greedy fasin—wea maet spoelem judgment bilong olketa. Moses talem olketa: “Iufala mas no saedem eniwan taem iu givim judgment. Iufala shud lisin long man nating and bigman. Iufala mas no fraetem man, bikos datfala judgment hem bilong God.” Tru nao, olketa judge bilong Israel judge for God. Hem wanfala barava spesol privilege wea garem honor!—Deuteronomy 1:16, 17.

5. Witim wei for markem samfala olsem olketa judge, Jehovah provaedem wanem samting moa for lukaftarem pipol bilong hem?

⁵ Jehovah mekem samfala nara arrangement for lukaftarem spiritual need bilong pipol bilong hem. Bifor olketa kasem Promis Land, hem komandim olketa for buildim tabernacle, ples bilong trufala worship. Hem redyim tu sekson bilong olketa priest for teachim Law, for offerim olketa animal sakrifaes, and for bonem incense long morning and evening. God markem Aaron, big brata bilong Moses, olsem firstfala hae priest bilong Israel, and hem appointim olketa son bilong Aaron for helpem dadi bilong olketa witim datfala waka.—Exodus 28:1; Numbers 3:10; 2 Chronicles 13:10, 11.

6, 7. (a) Wanem kaen wei for waka tugeta nao olketa priest and olketa Levite wea no priest garem? (b) Wei wea olketa Levite duim planti difren waka hem teachim iumi wanem samting? (Colossians 3:23)

⁶ For lukaftarem spiritual need bilong planti million pipol hem bigfala waka, and olketa priest no staka tumas. So arrangement hem kamap for olketa nara member bilong tribe bilong Levi for helpem olketa. Jehovah talem Moses: “Iu mas givim olketa Levite long Aaron and olketa son bilong hem. Olketa nao olketa wea God givim, wea hem givim from olketa son bilong Israel.”—Numbers 3:9, 39.

⁷ Olketa Levite barava organize gud. Olketa divaed followim thrifala famili—olketa bilong Gershon, Kohath, and Merari—and each wan garem assignment for waka. (Numbers 3:14-17, 23-37) Samfala assignment maet luk olsem moa important winim narawan, bat evriwan barava important. Waka wea olketa Kohathite Levite duim minim olketa mas kam klosap long datfala holy ark bilong covenant and evri samting wea stap insaed long tabernacle. Bat, evri Levite, nomata hem wanfala Kohathite or nomoa, garem olketa nambawan privilege. (Numbers 1:51, 53) Sorre tumas, samfala no tinghae long privilege bilong olketa. Olketa no loyal for stap anda long paoa bilong God, olketa no satisfae and gogo kamap praod, aftarem hae position and garem jealous fasin. Wanfala Levite wea nem bilong hem Korah, hem wanfala long olketa hia.

“Waswe, Iufala Mas Trae for Kasem Tu Waka for Priest?”

8. (a) Hu nao Korah? (b) Wanem samting nao maet mekem Korah start for garem tingting bilong man taem hem lukluk long olketa priest?

⁸ Korah hem no hed bilong famili bilong Levi, and hem no hed bilong olketa famili bilong olketa Kohathite. (Numbers 3:30, 32) Nomata olsem, hem wanfala chief long Israel wea kasem respect. Waka bilong Korah maet minim hem waka witim Aaron and olketa son bilong hem. (Numbers 4:18, 19) From hem lukim hao olketa man hia no perfect, maet Korah garem tingting olsem: ‘Olketa priest hia barava no perfect, hem hard tumas for stap anda long olketa! No longtaem go finis Aaron wakem wanfala gold buluka. Wei for worshipim datfala buluka mekem pipol bilong mifala foldaon long sin for worshipim idol. Distaem Aaron, brata bilong Moses, hem serve olsem hae priest! Diswan hem barava fasin for favorim man! And waswe long Nadab and Abihu, olketa son bilong Aaron? Tufala barava no respectim assignment bilong olketa and so Jehovah nao killim dae tufala!’a (Exodus 32:1-5; Leviticus 10:1, 2) Nomata wanem nao really tingting bilong Korah long datfala taem, hem klia hao hem start for garem tingting bilong man abaotem olketa priest. Diswan lead go long wei wea hem go againstim Moses and Aaron and, really, againstim Jehovah tu.—1 Samuel 15:23; James 1:14, 15.

9, 10. Korah and olketa wea join witim hem accusim Moses long wanem samting, and why nao olketa shud savve finis diswan hem no stret?

⁹ From hem man wea garem paoa, hem isi nomoa for Korah kasem saport bilong olketa narawan wea garem semkaen tingting olsem hem. Hem, witim Dathan and Abiram, faendem 250 man wea saedem olketa—evriwan olketa chief. Olketa go long Moses and Aaron and sei: “Evriwan wea hipap hia olketa holy and Jehovah stap midolwan olketa. So, why nao iufala shud apim iufala seleva ovarem kongregeson bilong Jehovah?”—Numbers 16:1-3.

¹⁰ Olketa hia shud savve finis hem no stret for challengem paoa bilong Moses. No longtaem go finis, Aaron and Miriam duim sem samting. Olketa story long sem wei olsem Korah! Olsem Numbers 12:1, 2 talem, olketa ask olsem: “Waswe, Jehovah hem toktok thru long Moses nomoa? Waswe, hem no toktok thru long iumi tu?” Jehovah hem herem olketa. Hem komandim Moses, Aaron, and Miriam for standap long door bilong tent bilong meeting, mekem Hem showim hu nao hem chusim olsem leader. Then, Jehovah talemaot klia: “Sapos Jehovah markem wanfala long iufala olsem profet, insaed wanfala vision bae mi mekem hem savve long mi. Bae mi story long hem insaed wanfala dream. Servant bilong mi Moses no olsem! Mi putim hem for lukaftarem full haos bilong mi.” Bihaen datwan, Jehovah mekem Miriam garem sik leprosy for lelebet taem.—Numbers 12:4-7, 10.

11. Hao nao Moses deal witim samting wea Korah duim?

¹¹ Korah and olketa wea saedem hem mas savve finis long datfala samting wea happen. Olketa no garem eni excuse for bighed fasin bilong olketa. Nomata olsem, long patient wei Moses trae for story witim olketa. Hem encouragem olketa for tinghae long privilege wea olketa garem taem hem sei: “Hao, hem smol tumas long iufala man hao God bilong Israel separatem iufala from evri narawan bilong Israel for givim iufala long hemseleva?” Nomoa, hem no “smol” samting! Olketa Levite garem staka samting. Why nao olketa laekem moa samting? Nextfala toktok bilong Moses showimaot wanem nao stap long heart bilong olketa: “Waswe, iufala mas trae for kasem tu waka for priest?”b (Numbers 12:3; 16:9, 10) Bat, wanem nao Jehovah duim abaotem disfala wei for againstim paoa bilong God?

Judge Bilong Israel Hem Tek Akson

12. For go ahed for stap gud witim God, Israel mas duim wanem?

¹² Taem Jehovah givim Law long Israel, hem talem olketa hao sapos olketa obey, olketa bae kamap “wanfala holy nation” and hao nation bae go ahed holy sapos olketa acceptim arrangement bilong Jehovah. (Exodus 19:5, 6) Distaem, from barava nogud wei for againstim datfala arrangement hem kamap, hem taem for Judge and Man wea Givim Law long Israel for tek akson! Moses talem Korah: “Iu and evri sekson bilong iu, kam front long Jehovah, iu and olketa and Aaron, tumoro. And each wan tekem fire holder, and iufala man mas putim incense long olketa and each wan showim fire holder bilong hem front long Jehovah, tu handred and fifti fire holder, and fire holder bilong iu and Aaron.”—Numbers 16:16, 17.

13. (a) Why nao hem bighed fasin for sekson bilong Korah offerim incense front long Jehovah? (b) Hao nao Jehovah deal witim olketa?

¹³ Law bilong God sei olketa priest nomoa savve offerim incense. Sapos olketa ting raonem hao hem no stret for wanfala Levite wea no priest for offerim incense front long Jehovah, hem shud mekem olketa kasem bak gudfala tingting. (Exodus 30:7; Numbers 4:16) Bat Korah and olketa wea saportim hem no garem gudfala tingting! Nextfala day hem “hipimap full sekson bilong hem againstim [Moses and Aaron] front long tent bilong meeting.” Bible hem sei: “Then Jehovah hem story long Moses and Aaron and hem sei: ‘Separatem iufala seleva from disfala sekson, mekem mi finisim olketa long semtaem.’” Bat Moses and Aaron barava askem Jehovah for no killim dae evri pipol and Jehovah herem olketa. Bat long Korah and sekson bilong hem, “fire kamaot from Jehovah and start for bonem tu handred and fifti man hia wea offerim incense.”—Numbers 16:19-22, 35.c

14. Why nao Jehovah barava tek akson againstim olketa Israelite?

¹⁴ Iumi sapraes hao, nomata olketa Israelite lukim wei wea Jehovah deal witim olketa wea bighed, olketa no lanem eni samting from diswan. “Nextfala day evri son bilong Israel start for tok againstim Moses and Aaron, taem olketa sei olsem: ‘Iutufala killim dae pipol bilong Jehovah.’” Olketa Israelite saed witim olketa nogud man! Gogo, patient fasin bilong Jehovah kasem end nao. Distaem, no eniwan—nomata Moses or Aaron—savve helpem olketa. Jehovah mekem olketa wea no obey kasem wanfala trabol, “and datfala trabol killim dae fotin thousand seven handred, and olketa wea dae witim Korah olketa no insaed disfala namba.”—Numbers 16:41-49.

15. (a) Why nao olketa Israelite shud no hol bak for acceptim wei wea Moses and Aaron leadim olketa? (b) Wanem nao disfala story teachim iu abaotem Jehovah?

¹⁵ Olketa hia nating need for dae sapos olketa tingting gud firstaem. Olketa fit for ting raonem olketa kwestin olsem: ‘Hu nao go front long Pharaoh, nomata for duim olsem putim laef bilong olketa long danger? Hu nao barava talem hao olketa Israelite mas go free? Bihaen Israel kamap free, hu nomoa kasem invitation for go ap long Maunt Horeb for story witim angel bilong God?’ For sure, olketa spesol samting wea Moses and Aaron duim pruvim hao olketa loyal long Jehovah and lovem olketa pipol. (Exodus 10:28; 19:24; 24:12-15) Jehovah no hapi for killim dae olketa wea bighed. Bat, taem hem showaot klia hao olketa bae go ahed long bighed wei, hem tek akson. (Ezekiel 33:11) Evri samting hia garem bigfala mining for iumi distaem. Why nao olsem?

Luksavve Long Sekson wea God Iusim Distaem

16. (a) Wanem pruv nao shud mekem olketa Jew long first century barava sure Jesus hem stand for Jehovah? (b) Jehovah changem datfala sekson bilong priest long tribe bilong Levi witim wanem, and why nao olsem?

¹⁶ Distaem wanfala niu “nation” garem Jehovah olsem Judge, Man for Givim Law, and King wea man no savve lukim. (Matthew 21:43) Datfala “nation” hem kamap long first century C.E. Kasem datfala taem, olketa Levite go ahed waka long barava naesfala temple long Jerusalem wea changem tabernacle from taem bilong Moses. (Luke 1:5, 8, 9) Bat, long year 29 C.E., narafala temple, wanfala spiritual wan hem kamap, wea garem Jesus Christ olsem Hae Priest. (Hebrews 9:9, 11) Kwestin abaotem paoa bilong God hem kamap moa. Hu nao bae Jehovah iusim for leadim disfala niu “nation”? Jesus pruvim hao hem loyal evribit long God. Hem lovem pipol. And tu, hem duim planti nambawan mirakol. Nomata olsem, olsem olketa laen dadi bilong olketa wea bighed, klosap evri Levite nating willing for acceptim Jesus. (Matthew 26:63-68; Acts 4:5, 6, 18; 5:17) Gogo, Jehovah changem datfala sekson bilong olketa priest long tribe bilong Levi witim barava difren wan—wanfala sekson bilong olketa priest for rul. Datfala sekson hem go ahed kam kasem distaem.

17. (a) Hu nao disfala sekson bilong olketa priest for rul distaem? (b) Hao nao Jehovah iusim olketa?

¹⁷ Hu nao insaed disfala sekson bilong olketa priest for rul distaem? Aposol Peter hem ansarem datfala kwestin long firstfala leta bilong hem. Hem raet olsem long olketa anointed member bilong body bilong Christ: “Iufala nao ‘pipol wea God chusim, wanfala sekson bilong olketa priest for rul, wanfala holy nation, wanfala pipol for spesol waka, for iufala mas talemaot evriwea olketa nambawan fasin’ bilong datwan wea kolem iufala kamaot from dark go long nambawan laet bilong hem.” (1 Peter 2:9) Disfala toktok showimaot klia hao, olsem wanfala grup, olketa anointed wan wea followim Jesus, olketa nao disfala “sekson bilong olketa priest for rul,” wea Peter kolem tu “wanfala holy nation.” Olketa nao datfala sekson wea Jehovah iusim for givim instruction and spiritual direction long pipol bilong hem.—Matthew 24:45-47.

18. Hao nao olketa elder join witim sekson bilong olketa priest for rul?

¹⁸ Olketa wea stand for datfala sekson bilong olketa priest for rul, hem olketa elder, wea garem olketa responsibility long olketa kongregeson bilong pipol bilong Jehovah raonem earth. Olketa man hia fit for kasem respect and full saport bilong iumi, nomata olketa anointed wan or nomoa. Why nao olsem? Bikos thru long holy spirit bilong hem, Jehovah nao appointim olketa. (Hebrews 13:7, 17) Hao nao hem duim olsem?

19. Hao nao holy spirit appointim olketa elder?

¹⁹ Olketa elder hia kasem olketa mark wea stap insaed Word bilong God, wea kam from spirit bilong God. (1 Timothy 3:1-7; Titus 1:5-9) Dastawe, hem stret for sei olketa kasem appointment thru long holy spirit. (Acts 20:28) Olketa elder mas barava savve long Word bilong God. Olsem datfala Most Hae Judge wea appointim olketa, olketa elder mas heitim enikaen wei for teksaed long judgment.—Deuteronomy 10:17, 18.

20. Wanem nao olketa elder wea savve waka hard duim wea iu tinghae long hem?

²⁰ Iumi no challengem paoa bilong olketa elder, bat iumi barava tinghae long wei wea olketa savve waka hard! Wei wea planti serve long faithful wei for staka year finis, muvim iumi for trustim olketa. Olketa faithful for prepare for and conductim olketa meeting, waka witim iumi for preachim “gud nius bilong Kingdom,” and givim advaes from Bible taem iumi needim. (Matthew 24:14; Hebrews 10:23, 25; 1 Peter 5:2) Olketa visitim iumi taem iumi sik and comfortim iumi taem iumi feel sorre. Olketa loyal and willing for saportim Kingdom waka. Olketa garem spirit bilong Jehovah; hem appruvim olketa.—Galatians 5:22, 23.

21. Olketa elder mas luksavve long wanem samting, and why nao olsem?

²¹ Hem tru, olketa elder no perfect. From olketa luksavve hao olketa no fit long samfala wei, olketa no trae for kamap bigman ovarem olketa sheep “bilong God.” Bat olketa ting long olketa seleva olsem olketa ‘wea waka witim olketa brata for mekem olketa hapi.’ (1 Peter 5:3; 2 Corinthians 1:24) Olketa elder wea hambol and waka hard lovem Jehovah, and olketa savve hao sapos olketa followim hem long wei wea moa klos, olketa bae fit for duim moa gud samting insaed long kongregeson. From olketa tingim diswan, olketa trae hard evritaem for mekem grow fasin wea followim God olsem love, fasin for kea, and patient fasin.

22. Hao nao wei for reviewim story abaotem Korah hem strongim faith bilong iu long organization bilong Jehovah long earth?

²² Iumi barava hapi for garem Jehovah olsem Ruler wea man no savve lukim, Jesus Christ olsem Hae Priest, olketa member bilong datfala anointed sekson bilong olketa priest for rul for teachim iumi, and olketa faithful Christian elder for givim kaonsel long iumi! Nomata no eni organization wea olketa man directim savve perfect, iumi hapi tumas for servem God witim olketa faithful brata bilong iumi, wea hapi for stap anda long paoa bilong God!

[Olketa Footnote]

Wanem Nao Iu Lanem?

• Wanem nao olketa loving samting wea Jehovah provaedem for lukaftarem olketa Israelite?

• Why nao Korah no garem eni excuse for wei wea hem bighed againstim Moses and Aaron?

• Wanem nao iumi savve lanem from wei wea Jehovah deal witim olketa wea bighed?

• Hao nao iumi savve showimaot iumi tinghae long olketa arrangement bilong Jehovah distaem?

[Piksa long page 9]

Waswe, iu ting long evri assignment long service bilong Jehovah olsem wanfala privilege?

[Piksa long page 10]

“So, why nao iufala shud apim iufala seleva ovarem kongregeson bilong Jehovah?”

[Piksa long page 13]

Olketa elder stand for datfala sekson bilong olketa priest for rul