Gohed Duim Samting wea Mekem Iu Kasem Love Bilong God!
“Iufala wea mi lovem, . . . gohed duim samting wea mekem iufala kasem love bilong God, . . . witim hope for laef olowe.”—JUDE 20, 21.
1, 2. Hao nao iu savve gohed duim samting wea mekem iu kasem love bilong God?
JEHOVAH lovem tumas olketa man dastawe hem givim only Son wea hemseleva wakem mekem eniwan wea showimaot faith long hem savve kasem laef olowe. (John 3:16) Hem nambawan samting for Jehovah lovem iumi olsem! Sapos iu wanfala servant bilong Jehovah, for sure iu bae laekem hem for lovem iu olsem for olowe.
2 Disaepol Jude hem showimaot wei wea iu savve gohed for kasem love bilong God. Hem sei: “Taem iufala buildimap iufala seleva long barava holy faith bilong iufala, and prea witim holy spirit, gohed for kasem love bilong God, taem iufala weitim mercy bilong Lord bilong iumi, Jesus Christ, witim hope for laef olowe.” (Jude 20, 21) Wei for studyim Bible and preachim gud nius bae helpem iu for buildimap iuseleva long “barava holy faith,” wea minim olketa Christian teaching. For gohed kasem love bilong God, iu mas prea “witim holy spirit,” wea minim holy spirit nao leadim iu. For kasem reward bilong laef olowe, iu mas showimaot faith long ransom sakrifaes bilong Jesus Christ tu.—1 John 4:10.
3. Why nao samfala no Witness bilong Jehovah distaem?
3 Samfala wea garem faith bifor no gohed for kasem love bilong God. From olketa chus for gohed duim sin, distaem olketa no Witness bilong Jehovah nao. Hao nao iu savve mek sure diswan no happen long iu? Wei for ting raonem samfala point hia savve helpem iu for no duim sin and gohed for kasem love bilong God.
Showimaot Iu Lovem God
4. Why nao hem important for obeyim God?
4 Showimaot iu lovem God long wei for obeyim hem. (Matthew 22:37) Aposol John hem sei: “From samting wea showimaot man lovem God nao hem wei wea hem obeyim olketa komandment bilong God; bat hem no wanfala hevi for obeyim olketa komandment bilong hem.” (1 John 5:3) Sapos hem wei bilong iu for obeyim God, datwan savve strongim iu for againstim temptation and mekem iu hapi. Man wea raetem psalm hem sei: “Hapi nao man wea no lisin long advaes bilong olketa wea wicked, . . . bat hem laekem tumas law bilong Jehovah.”—Psalm 1:1, 2.
5. Love wea iu garem for Jehovah bae muvim iu for duim wanem?
5 Love wea iu garem for Jehovah bae muvim iu for no duim eni bigfala sin wea bae mek-shame long nem bilong hem. Agur hem prea olsem: “No mekem mi poor or rich. Letem mi kaikaim nomoa kaikai wea olketa markem for mi, bikos sapos mi garem tumas kaikai mi bae fulap and tok nogud olsem abaotem iu: ‘Hu nao Jehovah?’ bat sapos mi poor bae mi steal and spoelem nem bilong God bilong mi.” (Proverbs 30:1, 8, 9) Disaed strong for no “spoelem nem bilong God” long wei for mek-shame long hem. Bat, evritaem traem best for duim stret samting wea mekem hem kasem glory.—Psalm 86:12.
6. Wanem nao savve happen sapos iu min for duim sin?
6 Prea evritaem long Dadi bilong iu long heven for helpem iu againstim temptation for duim sin. (Matthew 6:13; Romans 12:12) Sapos iu gohed for followim kaonsel bilong God, bae hem herem olketa prea bilong iu. (1 Peter 3:7) Sapos iu min for duim sin, bae iu kasem barava nogud samting bikos long tokpiksa wei hem olsem Jehovah iusim wanfala cloud for blokem olketa prea bilong olketa wea bighed mekem hem no herem olketa. (Lamentations 3:42-44) So showimaot hambol fasin and prea for Jehovah helpem iu for no duim eni samting wea savve mekem hem no herem olketa prea bilong iu.—2 Corinthians 13:7.
Showimaot Love for Son Bilong God
7, 8. Hao nao wei for obeyim kaonsel bilong Jesus savve helpem man for rejectim wei for duim sin?
7 Showimaot iu lovem Jesus Christ long wei for obeyim olketa komandment bilong hem, bikos diswan bae helpem iu for rejectim wei for duim sin. Jesus hem sei: “Sapos iufala obeyim olketa komandment bilong mi, iufala bae gohed for kasem love bilong mi, olsem mi tu obeyim olketa komandment bilong Father and gohed kasem love bilong hem.” (John 15:10) Hao nao wei for followim disfala toktok bilong Jesus savve helpem iu for gohed kasem love bilong God?
8 Wei for lisin long toktok bilong Jesus savve helpem iu for followim olketa principle saed long fasin. Law bilong God for Israel hem sei: “Iu mas no duim adultery.” (Exodus 20:14) Bat Jesus talem wanfala principle wea join witim datfala komand: “Eniwan wea gohed lukluk long wanfala woman for barava laekem hem, hem duim adultery finis witim hem insaed long heart bilong hem.” (Matthew 5:27, 28) Aposol Peter sei samfala insaed kongregeson long first century garem “eye wea evritaem lukaotem chance for duim adultery” and olketa “switim olketa soul wea no strong long biliv bilong olketa.” (2 Peter 2:14) Bat iu savve stap klia long olketa sin saed long sex sapos iu lovem and obeyim God and Christ, and disaed strong for keepim gud wei wea iu fren witim tufala.
Letem Spirit Bilong Jehovah Leadim Iu
9. Saed long holy spirit, wanem nao savve happen sapos man gohed for duim sin?
9 Prea for holy spirit bilong God and letem datwan leadim iu. (Luke 11:13; Galatians 5:19-25) Sapos iu gohed for duim sin, maet God aotem spirit bilong hem from iu. Bihaen David hem sin witim Bath-sheba hem barava askem God olsem: “No torowem mi go mekem iu no lukim mi nao; and no tekem holy spirit bilong iu awe from mi.” (Psalm 51:11) From King Saul hem duim sin and no repent, hem no kasem nao spirit bilong God. Saul hem sin taem hem offerim wanfala bone sakrifaes and taem hem no distroem evri sheep, goat, and buluka, and tu, hem no killim dae king bilong olketa Amalekite. From datwan, Jehovah aotem holy spirit bilong hem from Saul.—1 Samuel 13:1-14; 15:1-35; 16:14-23.
10. Why nao iu shud rejectim tingting for duim sin?
10 Nomata eni tingting for duim sin tu bat iumi mas rejectim datwan. Aposol Paul hem sei: “Sapos iumi min for gohed duim sin nomata iumi kasem finis stretfala savve abaotem truth, no eni sakrifaes for sin hem stap moa.” (Hebrews 10:26-31) Bae hem barava sorre samting sapos iu min for gohed duim sin!
Showimaot Trufala Love for Nara Pipol
11, 12. Hao nao wei for garem love and respect bae stopem man for duim dirty fasin?
11 Sapos iu garem love for nara pipol, datwan bae stopem iu for duim dirty fasin. (Matthew 22:39) Love olsem bae muvim iu for protectim heart bilong iu mekem heart no pullim iu for laek switim marit partner bilong narawan. Diswan savve lead go long wei for duim adultery, wea hem wanfala sin. (Proverbs 4:23; Jeremiah 4:14; 17:9, 10) Iu mas kamap olsem Job, wea no letem hemseleva for interest long eni nara woman bat waef bilong hem nomoa.—Job 31:1.
12 Respect for wei wea marit hem holy samting savve helpem iu for no duim bigfala sin. Long plan bilong God, arrangement for garem olketa pikinini hem only thru long marit and sex wea stret, and wea pipol fit for honorim. (Genesis 1:26-28) Remember, Jehovah creatim olketa private part for mekem laef, wea datwan hem holy. Eniwan wea duim fornication and adultery hem no obeyim God, hem mekem sex kamap samting wea dirty, hem no respectim wei wea marit hem holy samting, and hem sin againstim body bilong hemseleva. (1 Corinthians 6:18) Bat wei for lovem God and nara pipol witim wei for obeyim God bae mekem man no duim fasin wea lead go for hem disfellowship from Christian kongregeson.
13. Hao nao man wea duim dirty fasin hem “spoelem olketa samting wea barava important?”
13 Iumi mas daonem olketa tingting for duim sin mekem iumi no duim samting wea mekem olketa wea iumi lovem feel sorre. Proverbs 29:3 hem sei: “Man wea go witim olketa jury woman hem spoelem olketa samting wea barava important.” Man wea duim adultery and no repent hem spoelem wei wea hem fren witim God and famili bilong hem tu. Waef bilong hem garem stretfala reason for divorcem hem. (Matthew 19:9) Nomata hasband or waef nao durong, marit wea brekdaon hem mekem partner wea no rong, olketa pikinini, and nara pipol tu feel sorre tumas. Tru nao, wei for savve hao dirty fasin hem barava spoelem plande samting shud muvim iumi for againstim eni temptation for duim diswan!
14. Wanem leson saed long fasin for durong nao iumi savve lanem from Proverbs 6:30-35?
14 Samting wea shud muvim man for no duim adultery hem for tingim hao sapos hem duim datwan no eni wei for changem or stretem wei wea datfala barava selfish samting hem spoelem olketa narawan bihaen hem duim datwan. Proverbs 6:30-35 showim hao pipol savve feel sorre long man wea steal bikos hem hangre, bat pipol heitim man wea duim adultery bikos nogud samting nao muvim hem for duim datwan. Hem “spoelem soul [or, laef] bilong hemseleva.” Anda long Law bilong Moses, olketa mas killim hem dae. (Leviticus 20:10) Man wea duim adultery hem willing nomoa for spoelem hapi bilong olketa narawan mekem hem savve satisfaem samting wea body bilong hem laekem, and man olsem wea no repent hem no kasem love bilong God bat olketa aotem hem from klinfala Christian kongregeson.
Keepim Conscience wea Klin
15. Conscience wea hem olsem ‘wanfala haf iron wea hot tumas bonem,’ hem hao?
15 For gohed kasem love bilong God, iumi mas no letem conscience bilong iumi for ting smol long sin. Tru nao, iumi mas no acceptim olketa low standard bilong world saed long fasin, and iumi mas careful long hu iumi kaban witim, buk iumi readim, and hapitaem. Paul talem disfala warning: “Long olketa taem bihaen, samfala bae lusim biliv bilong olketa, lisin long toktok and teaching bilong olketa demon for trikim man, wea olketa herem from olketa man wea hypocrite and wea talem olketa laea samting, wea hem olsem wanfala haf iron wea hot tumas hem bonem finis conscience bilong olketa.” (1 Timothy 4:1, 2) Conscience wea hem olsem “wanfala haf iron wea hot tumas hem bonem,” kamap olsem skin bilong man wea bone gogo olketa niu skin hem grow, bat taem hem tasim datfala skin hem no feelim eni samting. Conscience olsem bae no savve warnim iumi for keakea long olketa apostate and eni samting wea savve mekem iumi lusim biliv bilong iumi.
16. Why nao hem important tumas for garem klin conscience?
16 Salvation bilong iumi hem depend long wei for garem conscience wea klin. (1 Peter 3:21) From iumi garem faith long sakrifaes bilong Jesus, conscience bilong iumi hem kamap klin from wei for duim olketa samting wea iusles, “mekem iumi savve givim holy service long datfala God wea laef.” (Hebrews 9:13, 14) Sapos iumi min for duim sin, conscience bilong iumi bae kamap dirty and bae iumi no pipol wea klin and wea fit for servem God. (Titus 1:15) Bat Jehovah savve helpem iumi for garem conscience wea klin.
Olketa Nara Wei for Stap Klia Long Wei for Duim Samting wea Rong
17. Wanem gud samting nao man savve kasem sapos hem ‘barava followim Jehovah’?
17 Iumi mas olsem man bilong Israel bifor, Caleb, wea ‘barava followim Jehovah.’ (Deuteronomy 1:34-36) Duim samting wea God askem, and no garem tingting for laek kaikai long “tebol bilong olketa demon.” (1 Corinthians 10:21) Rejectim wei for apostate. Sapos iu tinghae long spiritual kaikai from tebol bilong Jehovah, wea hem nao only ples for kasem datwan, and iu gohed kaikaim datwan, olketa teacher and wicked spirit bae no savve trikim iu. (Ephesians 6:12; Jude 3, 4) Tingting strong long olketa spiritual samting, olsem wei for studyim Bible, attendim olketa meeting, and field ministry. Sapos iu barava followim Jehovah and garem staka samting for duim long waka bilong Lord, bae iu hapi.—1 Corinthians 15:58.
18. Hao nao wei for fraet long Jehovah bae affectim samting wea iu duim?
18 Disaed strong for ‘givim holy service long God witim fasin for fraet long hem and respect.’ (Hebrews 12:28) Wei for fraet long Jehovah bae muvim iu for rejectim eni samting wea bae mekem iu duim rong samting. Diswan bae helpem iu for followim disfala kaonsel wea Peter talem long olketa wea anointed: “Sapos iufala worshipim Father wea no favorim man bat wea judge followim waka wea each wan hem duim, iufala mas duim samting witim wei for fraet taem iufala stap olsem stranger.”—1 Peter 1:17.
19. Why nao iu shud evritaem followim olketa samting wea iu lanem insaed Word bilong God?
19 Evritaem followim samting wea iu lanem from Word bilong God. Diswan bae helpem iu for no duim bigfala sin bikos iu bae stap witim “olketa wea luksavve long samting wea stret and samting wea no stret bikos olketa iusim fasin for luksavve evritaem.” (Hebrews 5:14) Winim wei for no tingting gud firstaem bifor iu talem and duim samting, iu mas “baem taem wea iu iusim for duim nara samting” mekem iu wakabaot olsem man wea wise long disfala taem wea wicked. “Gohed for luksavve long wanem nao will bilong Jehovah” and gohed for duim datwan.—Ephesians 5:15-17; 2 Peter 3:17.
20. Why nao iumi shud no kavet?
20 Stap klia evribit long fasin for kavetem olketa samting bilong nara pipol. Wanfala long olketa Tenfala Komandment hem sei: “Iu mas no kavetem haos bilong neiba bilong iu. Iu mas no kavetem waef bilong neiba bilong iu, or slave man or slave gele or buluka or donkey or eni samting bilong neiba bilong iu.” (Exodus 20:17) Disfala law hem protectim haos, waef, olketa servant, animal, and kaen samting olsem bilong wanfala man. Bat samting wea barava important nao hem wei wea Jesus sei fasin for kavet hem mekem man kamap dirty.—Mark 7:20-23.
21, 22. Wanem nao Christian mas duim mekem hem stap klia long wei for duim sin?
21 Duim olketa samting for mek sure olketa feeling bilong body for laekem samting hem no leadim iu for duim sin. Disaepol James hem sei: “Each wan hem kasem test taem samting wea hem barava wantem pullim and switim hem. Then taem disfala feeling for barava wantem samting hem start for grow, hem mekem man duim sin, and dae hem kamaot from sin.” (James 1:14, 15) Olsem example, sapos samwan garem problem saed long wei for drinkim tumas alcohol bifor, maet hem disaed for no keepim eni alcohol long haos bilong hem. For Christian wea kasem test saed long narawan wea laek switim hem, maet hem need for askem boss for givim waka wea mekem hem no stap klosap long man or woman hia, or maet hem mas faendem nara waka nao.—Proverbs 6:23-28.
22 No duim eni samting wea savve startim wei wea bae leadim iu go for duim sin. Wei for switim feeling bilong narawan and for garem tingting for durong witim narawan savve lead go long fornication or adultery. Wei for talem olketa smol laea savve mekem man no fraet for talem olketa big laea and diswan savve lead go long wei for garem fasin for laea, wea hem wanfala sin. Wei for tekem samting bilong narawan nomata maet iumi tingse datwan hem smol nomoa and man wea ownim no fit for kros from datwan, savve mekem conscience hem acceptim nomoa wei for steal long bigfala wei. Wei for no rejectim evribit apostate tingting savve lead go long wei for hem kamap barava apostate.—Proverbs 11:9; Revelation 21:8.
Waswe Sapos Iu Duim Bigfala Sin Finis?
23, 24. Wanem comfort nao iumi savve kasem from 2 Chronicles 6:29, 30 and Proverbs 28:13?
23 Evri man no perfect. (Ecclesiastes 7:20) Bat sapos iu duim bigfala sin finis, iu savve kasem comfort from prea wea King Solomon talem long dedication bilong temple bilong Jehovah. Solomon hem prea olsem long God: “Nomata wanem prea, nomata wanem help eni man or evri pipol bilong iu long Israel maet askem, from each wan savve long trabol and pain bilong hemseleva; taem hem openem hand bilong hem go for disfala haos, then iuseleva plis herem long heven, datfala ples wea iu stap, and iu mas forgive and givim each wan samting wea fitim olketa wei bilong hem, bikos iu savve long heart bilong hem (from iuseleva nomoa savve gud long heart bilong olketa man).”—2 Chronicles 6:29, 30.
24 Tru nao, God hem savve long samting wea stap insaed heart bilong man and hem garem fasin for forgive. Proverbs 28:13 hem sei: “Man wea haedem olketa sin bilong hem bae no savve win, bat man wea talemaot sin bilong hem and no duim datwan moa bae kasem mercy.” Taem iumi talemaot sin bilong iumi, repent, and no duim datwan moa, God savve showimaot mercy long iumi. Nomata olsem, sapos iu wikdaon long spiritual saed, wanem nao nara samting wea savve helpem iu for gohed kasem love bilong God?
Hao Nao Bae Iu Ansa?
• Hao nao iumi savve gohed for kasem love bilong God?
• Hao nao wei for lovem God and Christ helpem iumi for rejectim wei for duim sin?
• Why nao trufala love for narawan savve stopem iumi for duim dirty fasin?
• Wanem nao samfala wei for stap klia long wei for duim samting wea rong?
[Piksa long page 3]
Jude hem showim iumi hao for gohed kasem love bilong God
[Piksa long page 5]
Marit wea brekdaon hem mekem partner wea no rong and olketa pikinini feel sorre tumas
[Piksa long page 6]
Olsem Caleb, waswe, iu disaed strong for ‘barava followim Jehovah’?
[Piksa long page 7]
Evritaem prea for God helpem iu againstim temptation