Olketa Samting wea Pipol Faendem Pruvim King David Stap Bifor
Olsem Bible storyim, King David blo Israel stap laef lo mek-11 century B.C.E. and olketa wea born kam from laen blo hem rul for staka handred year bihaen hem dae. Bat samfala pipol sei David hem no wanfala really man wea stap bifor, bat hem wanfala kastom story nomoa. Waswe, King David hem man wea stap bifor?
Lo 1993, savveman Avraham Biran and olketa wea waka witim hem digdig lo graon lo Tel Dan, lo north Israel and olketa faendem wanfala pis ston wea garem raeting lo hem wea storyim “Famili blo David.” Raeting hia iusim olketa oldfala Semitic leta wea pipol savve iusim lo mek-9 century B.C.E. Luk olsem disfala pis ston hem part lo wanfala samting wea olketa Aramaean wakem for mekhae lo wei wea olketa winim olketa Israelite.
Wanfala article lo Bible History Daily explainim hao samfala pipol no bilivim disfala raeting pruvim King David stap bifor. Bat staka Bible savveman and olketa man wea digdig lo graon for faendem olketa old samting sei disfala pis ston wea olketa faendem lo Tel Dan hem pruvim King David wea Bible storyim hem really stap bifor. Diswan hem wanfala barava important samting wea BAR [science magasin Biblical Archaeology Review] hem raet abaotem.