World Garem Staka Problem

“Distaem pipol garem staka selen and iumi kasem gud samting from technology and science . . . Nomata olsem, hem firstaem long history wea evri samting long world [saed long gavman, economy, and environment] gogo for nogud.”—The Global Risks Report 2018, World Economic Forum.

WHY NAO STAKA PIPOL WARIM FUTURE BILONG IUMI AND DISFALA EARTH? TINGIM SAMFALA PROBLEM WEA IUMI FEISIM.

• 

  ANGER LONG INTERNET (CYBERCRIME): Datfala niuspapa The Australian sei: “Distaem iumi mas barava keakea taem iumi iusim internet. Pipol iusim internet for duim olketa nogud samting olsem for spoelem pikinini, bullyim pipol, mek trabol, and stealim information, . . . Wei for stealim information bilong narawan hem wanfala crime wea big tumas distaem.”

• 

  STAKA PIPOL POOR, AND TU-THRI NOMOA RICH: Wanfala report from Oxfam International sei selen wea eitfala rich pipol long world garem hem semsem witim selen wea 3.6 billion poor pipol garem. Report hia sei: “Olketa wea rich kamap rich moa, and olketa wea poor olketa poor go moa. Staka wea poor hem olketa woman.” Samfala pipol wari maet olketa problem hia bae mekem pipol for againstim gavman.

• 

  WAR AND PERSECUTION: Long 2018, wanfala report from United Nations Refugee Agency sei: “Staka pipol displace and kamap refugee distaem winim enitaem bifor. . . . Long evri 2 second, 1 man mas ranawe from ples bilong hem.” Winim 68 million pipol mas ranawe from ples bilong olketa bikos long war or persecution.

• 

  ENVIRONMENT GOGO FOR NOGUD: The Global Risks Report 2018 hem sei: “Staka difren kaen plant and animal nomoa nao, . . . and pollution long air and sea hem kamap worse and hem start for spoelem health bilong pipol.” And tu, long samfala kantri namba bilong olketa insect hem barava gogo daon. From olketa insect karem go pollen long olketa plant, olketa scientist sei iumi gogo for distroem environment. And olketa scientist sei tu, samting olsem haf long olketa coral reef long world dae insaed 30 year wea go pas.

Waswe, olketa man savve stretem olketa problem hia? Samfala tingse wei for teachim pipol for duim stret samting bae help for finisim olketa problem? Bat wanem nao pipol need for lanem? Disfala magasin bae storyim ansa.