Wastaoa ONLINE LIBRARY
Wastaoa
ONLINE LIBRARY
Solomon Islands Pidgin
  • BIBLE
  • OLKETA PABLIKESON
  • OLKETA MEETING
  • km 6/05 p. 6
  • Leta From Governing Body

Disfala sekson no garem eni video.

Sorre, disfala video no savve plei distaem.

  • Leta From Governing Body
  • Kingdom Ministry Bilong Iumi—2005
Kingdom Ministry Bilong Iumi—2005
km 6/05 p. 6

Leta From Governing Body

FROM iumi barava klosap long niu world, hem important tumas for iumi evritaem tingim and hope long Jehovah. (Zeph. 3:8) Profet Daniel talem hao “God . . . hem nao Datwan for showimaot olketa secret, and hem showim . . . wanem nao bae happen long lastfala part bilong olketa day.” (Dan. 2:28) Iumi garem nambawan privilege for stap long end bilong taem wea profesi storyim and for minim olketa secret wea Jehovah showimaot klia!

Thru long “faithful and wise slave,” Jehovah gohed for isisi showimaot plan bilong hem for hipimap wanfala “bigfala sekson” bilong olketa worshiper evriwea long world long olketa “last day” hia wea barava hard. (Matt. 24:45; Rev. 7:9; 2 Tim. 3:1) Isaiah 2:2, 3 storyim hao diswan hem happen “long end bilong olketa day.” Each year, wei for hipimap disfala sekson hem gohed long disfala world wea barava konfius and wea fulap long raf fasin.

Long full year bilong 2004, iumi barava luksavve go moa hao iumi need for obeyim disfala toktok bilong Jesus: “Gohed for luk aot . . . Pruvim hao iufala redi.” (Matt. 24:42, 44) Tru tumas, olketa samting wea happen long world garem bigfala mining for olketa Christian, wea luksavve long “olketa saen bilong taem” and duim samting fitim datwan. (Matt. 16:1-3) For fitim wanem Word bilong hem talem, Jehovah bae gohed for stap witim pipol bilong hem wea hem organizem olketa for duim waka bilong hem, nomata wanem persecution olketa maet feisim.

Olketa brata bilong iumi gohed for talemaot trufala samting and hipap tugeta, nomata samfala pipol trae for stopem disfala waka for talemaot nius abaotem Kingdom. (Acts 5:19, 20; Heb. 10:24, 25) Long Moscow, Russia, long June 2004, wanfala kot for appeal hem sapotim disison for tambuim waka bilong Olketa Jehovah’s Witness and for finisim evribit legal corporation bilong olketa long datfala taon. Nomata olsem, datwan no stopem olketa brata; olketa savve wanem God laekem olketa for duim, and olketa obeyim hem olsem Ruler winim man. (Acts 5:29) Iumi trustim hao Jehovah bae directim olketa servant bilong hem nomata law bilong kantri tambuim waka bilong olketa.

Long Republic of Georgia, long tu-thri year wea go pas, olketa brata lusim property bilong olketa, and olketa raf sekson spoelem olketa, and bonem olketa buk bilong olketa. Bat no eni samting wea olketa iusim for faet againstim olketa hem winim olketa. (Isa. 54:17) Long 2004 service year, law hem protectim Olketa Jehovah’s Witness moa long Georgia. No eniwan trae for stopem olketa convention program, and no eni tambu for olketa literature for kam long kantri. Namba bilong olketa pablisa and Memorial attendance go ap winim bifor.

Long Armenia, Eritrea, Republic of Korea, Rwanda, and Turkmenistan, olketa brata stap long prison bikos long faith bilong olketa. Nomata olketa deal witim olketa long nogud wei, olketa savve from Bible reason for olketa hard taem hia, and datwan helpem olketa for keepim faithful fasin bilong olketa taem olketa depend long Jehovah for sevem olketa.—1 Pet. 1:6; 2 Pet. 2:9.

Taem iu readim ‘Highlights of the Past Year’ long Yearbook and lukluk long report bilong full world long 2004, iu bae hapi long gudfala fasin bilong Jehovah. (Ps. 31:19; 65:11) Mifala hope disfala Yearbook bae encouragem iufala for gohed duim samting wea mekem God hapi.—1 Thess. 4:1.

Bigfala waka hem gohed for teachim truth long evri difren kaen pipol. Olsem example, olketa wakem olketa video, DVD, and olketa nara samting long saen languis and olketa pablikeson wea stap long Braille for helpem long spiritual wei olketa wea earpas and blind. Plande Kingdom pablisa lanem languis bilong olketa man from difren ples wea stap long territory bilong kongregeson bilong olketa.

And tu, olketa startim staka handred grup long olketa territory wea farawe and hard for kasem. Wanfala branch garem winim 7,000 pablisa wea insaed winim 300 grup olsem. Diswan showimaot bigfala chance stap for olketa niu kongregeson kamap! Winim datwan, 16,760,607 kam long Memorial long disfala service year, bat winim 10 million nao no Witness. Diswan showimaot hao wanfala harvest hem redi and stap yet for harvestim.

Iumi thankiu long Jehovah for wei wea hem blessim and lukaftarem iumi evriday long loving wei. (Prov. 10:22; Mal. 3:10; 1 Pet. 5:7) Iumi trustim Jehovah taem iumi muv ahed tugeta long olketa “last part bilong olketa day” distaem. Nomata maet iumi feisim eni problem, iumi mas tingting strong long disfala year text bilong iumi for 2005: “Jehovah nao man wea helpem mi.” (Ps. 121:2) Mifala lovem and gohed prea for iufala.

Olketa brata bilong iufala,

Governing Body bilong Olketa Jehovah’s Witness

    Solomon Islands Pidgin Pablikeson (1988-2024)
    Log Aot
    Log In
    • Solomon Islands Pidgin
    • Sharem
    • Settings
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Setting
    • JW.ORG
    • Log In
    Sharem