Waswe, Pikinini Bilong Iu Savve Mekem Important Disison?
1. Wanem nao olketa young Witness disaedem saed long wei for iusim blood? Storyim wanfala example.
1 Important disison abaotem wanem samting? Blood transfusion. Wanfala article long The Watchtower, June 15, 1991, wea garem title “Walk as Instructed by Jehovah,” showim hao plande taem olketa pikinini bilong Olketa Jehovah’s Witness barava disaed strong for no iusim blood and no willing for change mind for pruvim hao wei for obeyim law bilong God saed long blood hem barava important long olketa, olsem wei wea hem barava important long parents bilong olketa. Waswe, maet pikinini bilong iu wea no 18 year yet need for duim datwan tu?
2. Wanem standard saed long law nao wanfala kot followim for wanfala young wan wea no 18 year yet wea no acceptim blood transfusion, and wanem nao Christian parents and olketa young wan bilong olketa wea no 18 year yet savve lanem from diswan?
2 Wanem Nao Law Talem? Long United States, Illinois Supreme Court, wea hem barava haefala kot, hem mekem disison saed long right bilong wanfala young wan wea garem mature tingting for no acceptim blood transfusion. Taem datfala kot lukluk long case bilong wanfala Witness wea 17 year, kot hem disaed olsem: “Sapos hem barava klia and no eni daot stap hao disfala young wan wea no 18 year yet hem garem mature tingting and savve minim olketa samting wea bae kamaot from wanem hem disaedem [and] fit for ting raonem samting and mekem disison olsem wanfala bigman, then, datfala principle bilong law letem hem for garem datfala common law right for acceptim medical treatment or nomoa.” So for disaedem sapos pikinini hem fit for mekem disison seleva, olketa doctor or olketa narawan maet interviewim hem for herem pikinini hia talem seleva why hem bae no tekem blood. Datfala young wan bae need for minim hao sik bilong hem barava serious and olketa samting wea savve kamaot from kaen treatment hem chusim, and long klia and strongfala wei talem biliv bilong hemseleva abaotem law bilong God saed long blood.
3. Olketa wanem kwestin nao parents shud ting raonem gud, and why nao olsem?
3 Wanem Nao Pikinini Bilong Iu Bae Talem? Waswe, olketa pikinini bilong iu fit for talemaot tingting bilong olketa abaotem law bilong God saed long blood? Waswe, olketa bilivim long full heart bilong olketa hao komand for ‘stap klia from blood’ hem kam from God? (Acts 15:29; 21:25) Waswe, olketa savve iusim Bible for explainim biliv bilong olketa? Waswe, olketa bae no fraet for defendim wei wea olketa disaed strong finis for no acceptim blood sapos olketa doctor lukim hao laef bilong olketa stap long danger, nomata sapos parents bilong olketa no stap long datfala taem? From “samting wea iumi no expectim hem kasem evriwan long [iumi],” hao nao iu savve redim olketa pikinini bilong iu for eni samting wea bae testim faithful fasin bilong olketa?—Eccl. 9:11; Eph. 6:4.
4, 5. (a) Wanem responsibility nao parents garem, and hao nao olketa savve duim datwan? (b) Olketa wanem tul stap wea savve helpem parents?
4 Parents, Wanem Nao Iu Savve Duim? Iu garem responsibility for teachim olketa pikinini bilong iu tingting bilong God saed long blood. (2 Tim. 3:14, 15) Hao for explainim diswan long kliafala wei hem stap long Reasoning buk, page 70-4. Studyim gud witim famili bilong iu. Iusim part wea sei “If Someone Says—” long page 74-6 for practice witim olketa pikinini bilong iu for helpem olketa garem savve long hao for explainim wanem olketa bilivim and why nao olsem. (1 Pet. 3:15) Samfala nara tul for teachim iumi abaotem blood hem datfala brochure How Can Blood Save Your Life? and June 15, 2004, Wastaoa, page 14-24. And tu, datfala video program Transfusion-Alternative Health Care—Meeting Patient Needs and Rights and No Blood—Medicine Meets the Challenge, wea stap long DVD wea garem title Transfusion Alternatives—Documentary Series, garem information wea mekem man sure hao kaen medicine and wei for duim operation wea no iusim blood hem barava savve helpem man and hem fitim. Sapos iu garem datfala DVD, waswe, famili bilong iu lukim and story abaotem datwan?
5 Helpem olketa pikinini bilong iu ‘pruvim long olketa seleva wanem hem gud, fitim, and perfect will bilong God’ saed long blood. Then olketa savve mekem important disison wea Jehovah bae blessim.—Rom. 12:2.