Hao for Gohed Keepim Strong
1 Strong wea Apollos garem for duim ministry bilong hem mekem iumi tingim olketa Christian distaem wea barava strong for duim preaching waka. (Acts 18:24-28) Nomata olsem, iumi evriwan kasem encouragement for ‘no lesy for duim waka bilong iumi. Shaen witim spirit.’ (Rom. 12:11) Wanem nao savve helpem iumi for kasem and gohed keepim strong bilong iumi for Christian ministry?
2 Savve Hem Strongim Iumi: Bihaen Jesus showim hemseleva long tufala disaepol bilong hem and “explainim long tufala olketa samting wea olketa Scripture talem abaotem hemseleva,” olketa sei olsem: “Samting wea hem storyim long iumi long road . . . hem barava muvim tumas heart bilong iumi, iaman?” (Luke 24:27, 32) Long sem wei tu, taem iumi lanem moa samting abaotem Word bilong God, datwan savve barava muvim heart bilong iumi! Tru nao, wei for garem savve hem strongim faith bilong iumi. Romans 10:17 hem sei olsem: “Faith kamap bihaen man herem samting.” Taem heart bilong iumi barava trustim olketa promis bilong Jehovah, iumi hard for stop for story abaotem olketa samting wea iumi lanem!—Ps. 145:7; Acts 4:20.
3 Iumi kanduit depend nomoa long savve wea iumi kasem finis for strongim love bilong iumi for God and for helpem iumi gohed strong long service bilong hem. Iumi mas gohed for kasem moa savve abaotem truth and mekem love bilong iumi for Jehovah kamap moa deep. Sapos nomoa, service bilong iumi savve isisi kamap olsem samting iumi duim evritaem bat no from heart bilong iumi. (Rev. 2:4) Word bilong God encouragem iumi for “gohed for kasem stretfala savve bilong God.”—Col. 1:9, 10.
4 Wei Bilong Iumi for Study: Iumi shud lukluk gud long wei bilong iumi for duim study. Olsem example, maet iumi savve markem olketa ansa insaed article for Wastaoa study and talem olketa koment wea stret. Bat waswe, iumi readim olketa scripture insaed article wea olketa no raetem toktok bilong olketa and ting raonem hao iumi savve iusim datfala information long laef bilong iumiseleva? Waswe long Bible reading bilong iumi evri week, iumi trae hard for duim samfala moa research sapos iumi savve duim datwan, and for ting raonem olketa point wea savve helpem iumi from datfala reading? (Ps. 77:11, 12; Prov. 2:1-5) Wei for ting raonem and tingting strong long Word bilong God savve barava helpem iumi! (1 Tim. 4:15, 16) Wei for duim gudfala study olsem bae muvim heart bilong iumi and givim iumi “strong for olketa gudfala waka.”—Titus 2:14.