Hao Olketa Famili Member Waka Tugeta for Share Evribit Long Bible Study
1 Truth savve mekem evriwan insaed famili hapi and stap gud tugeta, bat hem samting wea each famili member mas waka hard for duim part bilong hem. Hem tek taem and man mas duim best bilong hem for buildim famili. Bigfala need stap for olketa famili member for waka tugeta long diswan.
2 Readim Bible Evriday: Proverbs 24:5 talem hao “man wea garem savve hem mekem paoa bilong hem kamap strong.” Savve wea man kasem taem hem readim Word bilong God evritaem hem strongim hem for againstim wei wea Satan trae for spoelem spiritual saed bilong hem. (Ps. 1:1, 2) Waswe, famili bilong iu readim Bible tugeta evriday? Theocratic Ministry Skul Schedule garem wanfala Bible reading schedule for each week insaed year. For famili followim datwan, hem needim samting olsem ten minute evriday. Markem taem wea fitim evriwan for readim Bible and storyim text bilong day from Lukluk Long Olketa Scripture, olsem long taem bilong kaikai long morning, bihaen kaikai long evening, or bifor evriwan go sleep. Mekem diswan kamap part long schedule bilong famili evriday.
3 Study Tugeta Evri Week: Main samting bilong famili insaed week nao hem famili Bible study. Each wan insaed famili shud sapotim diswan thru long wei for barava willing for tekpart long study. Hed bilong famili mas tingim need bilong famili taem hem disaedem wanem pablikeson for studyim, wanem day and taem, and hao long nao study shud gohed. Long schedule bilong famili long week, mekem famili study nao hem main important samting. No letem olketa nara samting wea no important stopem famili study for gohed.—Phil. 1:10, 11.
4 Wanfala dadi wea savve kasem olketa bisnis telephone kol long haos aotem telephone long taem bilong famili study. Sapos eni kastoma kam long haos, hem invaetem olketa for joinim study or for weit kasem taem study hem finis. Dadi hia disaed strong for no letem eni samting for stopem famili study. Diswan barava helpem olketa pikinini bilong hem, and bisnis bilong hem tu gohed gud.
5 Hem barava hapi samting taem evriwan insaed famili waka tugeta long olketa spiritual samting! Taem iumi faithful for share evribit long famili Bible study, iumi bae kasem blessing bilong Jehovah.—Ps. 1:3.