Chapter 2 (Part 1)
Organized to Do Jehovah’s Will, pages 10-13
Luksavve and Acceptim Waka Bilong Christ Insaed Arrangement Bilong God
“LONG firstaem, God creatim skae and earth,” and evri samting wea hem wakem hem “barava gud tumas.” (Gen. 1:1, 31) Jehovah creatim olketa man and olketa garem nambawan future. Bat, bighed fasin wea kamap long Eden spoelem datwan. Nomata olsem, plan bilong Jehovah for earth and olketa man hem no change. Taem God talem judgment for olketa wea againstim sovereign rul bilong hem, hem storyim tu salvation for olketa pikinini bilong Adam wea obey. Tru worship bae kamap moa, and God bae finisim Satan and evri wicked samting wea hem duim. (Gen. 3:15) Evri samting bae kamap “barava gud tumas” moa. Jehovah bae duim diswan thru long Son bilong hem, Jesus Christ. (1 John 3:8) Dastawe, hem barava important for iumi luksavve and acceptim waka bilong Christ insaed arrangement bilong God.—Acts 4:12; Phil. 2:9, 11.
WAKA BILONG CHRIST
Taem iumi tingim waka bilong Christ insaed arrangement bilong God, iumi mas luksavve hao staka samting hem insaed long diswan. Jesus hem Man for baem bak olketa man, Hae Priest, Hed bilong Christian kongregeson, and distaem hem King bilong Kingdom bilong God. Taem iumi ting raonem evri waka hia, iumi tinghae go moa long arrangement bilong God and diswan mekem love bilong iumi for Christ Jesus hem kamap moa big. Bible storyim olketa difren waka bilong hem.
Taem Christ duim ministry bilong hem long earth, hem showaot klia hao Jesus nao datwan wea bae mekem wei for olketa man fren bak moa witim God. (John 14:6) From hem nao Man for baem bak olketa man, Jesus givim hemseleva olsem ransom for baem bak plande pipol. (Matt. 20:28) So Jesus duim moa samting winim wei for showimaot gudfala example saed long fasin wea God appruvim. Hem duim barava important samting for mekem plan bilong God hem fulfill. Hem nomoa savve mekem wei for God appruvim iumi. (Acts 5:31; 2 Cor. 5:18, 19) Wei wea Jesus dae olsem wanfala sakrifaes and then hem resurrect, hem mekem wei for olketa man wea obeyim God for kasem olketa blessing for olowe anda long rul bilong Kingdom bilong God long heven.
Jesus Christ serve olsem Hae Priest long heven tu. From hem Hae Priest hem savve “minim olketa wik point bilong iumi” and savve kavarem olketa sin bilong olketa follower bilong hem long earth wea dedicate finis long Jehovah. Aposol Paul explainim diswan olsem: “Iumi garem olsem hae priest, no man wea no minim olketa wik point bilong iumi, bat man wea kasem test long evri samting olsem iumi, bat wea no garem sin.” Then Paul hem encouragem olketa wea showimaot faith long Jesus Christ for barava mekius long disfala arrangement for fren bak witim God, taem hem sei olsem: “Dastawe, iumi savve kam front long throne bilong kaeness wea man no fit for kasem . . . for kasem help long barava taem.”—Heb. 4:14-16; 1 John 2:2.
Long loving wei, Jesus duim waka tu olsem Hed bilong Christian kongregeson. Olsem olketa tru follower bilong hem long first century, iumi tu no needim eni man long earth for leadim iumi. Jesus leadim iumi thru long holy spirit, Holy Bible, and olketa shepherd wea kasem mark wea serve anda long Christ and wea mas givim ansa long hem and Dadi bilong hem long heven for wei wea olketa lukaftarem olketa sheep bilong God. (Heb. 13:17; 1 Pet. 5:2, 3) Jehovah talem disfala profesi abaotem Jesus: “Mi givim hem olsem wanfala witness for olketa nation, olsem wanfala leader and komanda long olketa nation.” (Isa. 55:4) Jesus talemaot hao hemseleva nao fulfillim disfala profesi taem hem sei long olketa disaepol bilong hem: “No letem eniwan kolem iufala ‘olketa leader,’ from iufala garem wanfala Leader nomoa, and hem nao Christ.”—Matt. 23:10.
For showimaot tingting bilong hem and wei wea hem willing for helpem iumi, Jesus talem disfala invitation: “Kam long mi, iufala evriwan wea stragol and karem bigfala hevi, and mi bae strongim iufala. Karem yoke bilong mi and lane from mi, from mi garem kwaet fasin and mi hambol long heart, and iufala bae faendem samting for strongim soul bilong iufala. From yoke bilong mi hem kaenfala and lod bilong mi hem no hevi.” (Matt. 11:28-30) From Jesus Christ hem leadim Christian kongregeson witim kwaet fasin and long wei wea strongim soul bilong iumi, hem klia hao hem nao “datfala gudfala shepherd” wea followim fasin bilong Dadi bilong hem long heven, Jehovah God.—John 10:11; Isa. 40:11.
Long firstfala leta bilong hem for olketa long Corinth, Paul explainim nara samting abaotem waka bilong Jesus Christ taem hem sei: “Hem mas rul olsem king go kasem taem wea God putim olketa enemy anda long leg bilong hem. Bat taem evri samting stap anda long hem finis, then Son bae putim hemseleva anda long Datwan wea putim evri samting anda long hem, for mekem God mas kamap evri amting long evriwan.” (1 Cor. 15:25, 28) Jesus hem firstfala samting wea God creatim, and bifor hem kam long earth, hem servem God long heven olsem “nambawan wakman” bilong hem. (Prov. 8:22-31) Taem God sendem Jesus kam long earth, hem evritaem duim will bilong God. Hem stand strong long barava bigfala test and hem faithful long Dadi bilong hem go kasem taem hem dae. (John 4:34; 15:10) God givim reward long Jesus for wei wea hem loyal go kasem taem hem dae. God resurrectim hem and hem go bak long heven and hem kasem right for kamap King long Kingdom bilong heven. (Acts 2:32-36) Christ Jesus wea kamap King bilong Kingdom hem kasem nambawan assignment from God for leadim plande thousand angel wea garem bigfala paoa for finisim rul bilong olketa man long disfala earth and wicked fasin. (Prov. 2:21, 22; 2 Thess. 1:6-9; Rev. 19:11-21; 20:1-3) Then Christ wea King bilong datfala Kingdom bilong God long heven bae rulim full earth and bae no eni nara rul stap.—Rev. 11:15.