“Olketa Nating Lisin”
FOR ting smol long olketa warning bae mekem man kasem nogud samting.
Long Darwin, wanfala taon long Australia, pipol gohed for redi for celebratem Christmas long 1974, seknomoa olketa herem warning hao wanfala cyclone hem bae kasem olketa. Bat, from no eni cyclone spoelem Darwin for samting olsem 30 year nao, pipol tingse datfala cyclone bae no spoelem olketa. Firstaem, olketa tingse no eni big danger stap, bat taem olketa strongfala wind start for aotem olketa ruf and wall bilong olketa haos wea pipol hipap tugeta insaed, olketa start for barava wari nao. Long next morning, evriting pisis and distroe nao.
Long Colombia long November 1985, wanfala volcano bosta. Snow and ice wea melt hem mekem mud ran go daon and berem winim 20,000 pipol long taon bilong Armero. Waswe, eni warning go aot firstaem bifor hem happen? Datfala maunten seksek for staka month. Bat, from pipol long Armero getius for stap long saed bilong volcano, olketa no wari nomoa. Olketa bigman kasem warning hao volcano bae bosta, bat olketa no strong for warnim pipol. Olketa talem announcement long radio for mekem pipol no wari tumas. Olketa iusim olketa laod speaker long church for encouragem pipol for no seksek. Long datfala evening, hem bosta big tufala taem. Sapos iu long there, waswe, bae iu lusim evriting iu garem and ranawe? Samfala pipol nomoa duim olsem bat hem tu leit nao.
Staka taem pipol wea studyim earthquake savve talem firstaem long wanem ples nao earthquake bae happen. Bat olketa no savve talem wanem taem nao hem bae happen. Long 1999, olketa earthquake wea happen raonem world killim dae samting olsem 20,000 pipol. Staka wea dae ting diswan bae no happen long olketa.
Wanem Nao Iu Duim Taem Iu Herem Olketa Warning wea Kam From God?
Bible storyim klia finis olketa samting wea markem olketa last day. Saed long diswan, hem encouragem iumi for tingim “taem bilong Noah.” “Bifor long flood,” pipol busy witim evriday living, nomata iumi sure olketa masbi warim wei wea raf fasin kamap big tumas. Bat saed long datfala warning wea God talem thru long servant bilong hem Noah, “olketa nating lisin gogo flood hem kam and swipim olketa go.” (Matthew 24:37-39) Sapos iu long there, bae iu lisin long datfala warning? Waswe, iu duim datwan distaem?
Waswe sapos iu stap long Sodom, klosap long Dead Sea, long taem bilong Lot, pikinini bilong brata bilong Abraham? Datfala ples hem olsem paradaes. Datfala taon hem rich. Pipol no warim eniting. Long taem bilong Lot, “olketa kaikai, olketa drink, olketa baem samting, olketa sellim samting, olketa plantim samting, olketa build.” Long datfala ples dirty fasin hem barava narawe. Sapos iu long there, bae iu really bilivim warning wea Lot talemaot againstim nogud fasin? Waswe, bae iu lisin taem hem talem iu hao God disaed finis for distroem taon bilong Sodom? Or waswe, bae iu tingim hem samting for fani nomoa, olsem tufala man wea bae maritim tufala dota bilong Lot? Waswe, maet iu start for ran nao bat iu luk go bak olsem waef bilong Lot? Nomata nara pipol no bilivim datfala warning, long day wea Lot go aot from Sodom, “fire and sulphur kam daon from heven and finisim evriwan long olketa.”—Luke 17:28, 29.
Klosap evriwan distaem tu no lisin. Bat olketa example hia stap insaed Word bilong God olsem warning for iumi, for encouragem iumi for GOHED FOR LUK AOT!
[Box/Piksa long page 22]
Waswe, Wanfala Flood Really Happen Bifor?
Staka pipol wea againstim diswan sei Nomoa. Bat Bible sei Ia.
Jesus Christ seleva story abaotem, and hem laef taem datwan happen, hem lukluk kam from heven.
[Box/Piksa long page 23]
Waswe, Sodom and Gomorrah Really Distroe?
Wei for studyim olketa oldfala samting pruvim diswan.
History bilong world storyim diswan.
Jesus Christ story abaotem diswan, and 14-fala buk bilong Bible storyim datwan.