Iumi Talemaot Kingdom Hope Bilong Iumi
1 Insaed long olketa last day distaem, plande pipol long world no garem hope. (Eph. 2:12) Olketa narawan wea no wise trustim olketa material samting, olketa ruler, science distaem, and narakaen samting olsem. Iumi barava hapi for garem trufala hope, hope wea hem “wanfala anka for soul, wea strong and wea man savve depend long hem”!—Heb. 6:19.
2 Anda long Kingdom rul bilong God, earth bae kamap wanfala paradaes. Olketa wea iumi lovem wea dae finis bae laef bak. (Acts 24:15) Wei for poor, wei for no followim justice, sik, wei for olo, and dae bae nomoa nao. (Ps. 9:18; Matt. 12:20, 21; Rev. 21:3, 4) Hem nao samfala promis bilong Jehovah wea klosap for happen. Wanem part bilong disfala hope nao iu barava luk forward long hem?
3 Talemaot Gud Nius: Iumi mas no keepim disfala Kingdom hope for iumiseleva. Love for God and neiba hem muvim iumi for followim Jesus and “for talemaot gud nius long poor pipol, . . . for preach long olketa prisoner abaotem wei for kamap free and for mekem olketa wea blind savve lukluk moa, for mekem olketa wea garem bigfala hevi kamap free.” (Luke 4:18) Aposol Paul preachim gud nius long market and long eni ples wea pipol stap. Hem mekem hemseleva for barava busy long ministry. (Acts 18:5) Wei for followim example bilong hem long wei for barava strong for share insaed ministry bae stopem “olketa wari bilong disfala world and paoa bilong olketa riches for giamanim man” for mekem Christian hope bilong iumi no showaot klia.—Mark 4:19.
4 Kingdom hope bilong iumi hem no katdaon taem iumi meetim pipol wea no interest, wea no mas interest long message abaotem Kingdom, or wea duim enikaen samting for againstim iumi. Iumi “gohed for hol strong long wei for talemaot long pablik hope bilong iumi and no garem daot.” (Heb. 10:23) Iumi no “shame long gud nius.” (Rom. 1:16) Maet gogo samfala lisin from iumi showimaot klia hope bilong iumi and wei for no givap.
5 Nomata iumi story abaotem olketa nogud samting wea happen long world distaem wea fulfillim profesi insaed Bible, iumi no preach abaotem olketa nogud samting. Kingdom hope bilong iumi nao hem goal bilong ministry bilong iumi—datfala gud nius abaotem Kingdom bilong God. Iumi laek for gohed preachim disfala gud nius witim wei for biliv strong ‘mekem iumi savve garem full trust long datfala hope go kasem end.’—Heb. 6:11.