Helpem Bible Study for Tinghae Long Jehovah
1 Long preaching waka, iumi no lanem pipol abaotem Bible nomoa. Iumi helpem pipol for savve gud abaotem Jehovah and for tinghae long olketa nambawan wei bilong hem. Taem pipol wea garem gudfala heart lanem trufala samting abaotem God, datwan savve helpem olketa for changem wei bilong olketa ‘for mekem Jehovah barava hapi long wei bilong olketa.’—Col. 1:9, 10; 3:9, 10.
2 Niufala Study Buk: Start long firstfala chapter long Wanem Bible Teachim buk hem mekhae long olketa wei bilong Jehovah. Long datfala chapter hem ansarem olketa kwestin olsem: Waswe, God barava lovem iu?, Wanem nao olketa wei bilong God?, and Waswe, man savve fren gud witim God? Chapter hia hem mekhae tu hao Jehovah hem holy (par. 10), hem duim stretfala samting evritaem and sorre long pipol (par. 11), garem love (par. 13), paoa (par. 16), and mercy, showimaot kaenfala wei, savve forgive, patient, and hem faithful (par. 19). Paragraf 20 hem talem diswan: “Taem iu gohed for lanem moa samting abaotem Jehovah, bae iu barava savve gud long hem, and garem plande reason for lovem and fren gud witim hem.”
3 Hao nao iumi savve iusim Wanem Bible Teachim buk for helpem olketa Bible study for fren gud witim Jehovah? Bihaen iumi studyim paragraf wea mekhae long wanfala wei bilong God, iumi savve askem Bible study, “Wanem nao iu lanem abaotem Jehovah long diswan?” or “Hao nao diswan showimaot hao God laek for helpem iu?” Taem iumi iusim olketa kwestin olsem long study, iumi lanem olketa Bible study bilong iumi for ting raonem samting wea olketa lanem and helpem olketa for tinghae go moa long olketa nambawan wei bilong Jehovah.
4 Iusim Review Box: Long end long evri chapter, askem Bible study for ansarem olketa point long box “Samting wea Bible Teachim,” long toktok bilong hemseleva. Story raonem olketa scripture. For helpem Bible study for talemaot tingting bilong hemseleva, iu savve ask olsem, “Wanem nao tingting bilong iu abaotem samting wea Bible talem long hia?” Taem iu duim datwan, iu mekhae long olketa main point long datfala chapter and hem helpem iu for luksavve long tingting bilong hem. Diswan bae helpem Bible study for start fren gud witim Jehovah.