Tingim Olketa wea No Hipap Witim Iumi Distaem
1. Why nao iumi mas helpem olketa wea no hipap witim iumi distaem?
1 Waswe, iu savve long eniwan wea wikdaon, gogo olketa no hipap witim iumi distaem? Maet hem stop for kakam long olketa meeting and bakslaed nao. Maet iu meetim man olsem long preaching. Iumi mas tingim hao hem brata bilong iumi yet. Iumi laek for showimaot love and helpem hem for kam bak long kongregeson and long‘man wea lukaftarem sheepsheep and overseer bilong iumi.’—1 Pet. 2:25.
2. Hao nao iumi savve strongim samwan wea no hipap witim iumi distaem?
2 Showimaot Iu Kea: Maet wei for ringim or visitim man wea no hipap witim iumi distaem bae showimaot iumi tingim hem. Wei for duim diskaen samting savve showim long man olsem hao iumi kea. Storyim olketa naesfala samting wea savve strongim hem. (Phil. 4:8) Iumi savve storyim wanfala point wea iumi laekem from wanfala meeting. Iumi savve askem hem for kam long wanfala meeting or assembly wea bae kamap and askem hem sapos hem laek for kam witim iumi and sidaon witim iumi.
3. Wanem nao helpem wanfala sista for hipap moa witim kongregeson?
3 Taem wanfala sista preach, hem meetim wanfala sista wea no hipap witim kongregeson for winim 20 year finis. Nomata hem no laekem eniwan for studyim Bible witim hem, datfala sista wea faendem hem gohed for tekem go olketa niu magasin. Bihaen long distrik convention, sista hia storyim samfala naes point from convention witim datfala sista wea no hipap witim kongregeson and gogo, hem start moa for hipap witim kongregeson.
4. Hao nao iumi savve strongim samwan wea start for hipap moa witim kongregeson?
4 Taem Samwan Kam Bak: Wanem nao iumi mas duim taem samwan wea no hipap witim iumi hem start for hipap moa? Wanem nao Jesus duim bihaen olketa disaepol lusim hem for lelebet taem? Hem iusim toktok, “olketa brata,” and hem showimaot hem trustim olketa. Hem givim olketa big waka for duim tu. (Matt. 28:10, 18, 19) No longtaem bihaen, olketa busy for preach and ‘nating givap.’—Acts 5:42.
5. Olketa wanem taem nao iumi mas storyim samwan wea no hipap witim iumi long olketa elder?
5 Bifor iumi studyim Bible witim samwan wea no hipap witim iumi for staka year finis or bifor iumi askem brata or sista olsem for duim preaching witim iumi, iumi mas askem olketa elder firstaem. Sapos long preaching iumi meetim wanfala pablisa wea no hipap witim iumi, iumi mas talem olketa elder mekem olketa savve helpem hem.
6. Wanem hapi nao maet iumi kasem for helpem olketa wea no hipap witim iumi distaem?
6 Olsem Bible talem, olketa wea faithful go kasem end nomoa bae sev. (Matt. 24:13) So iumi mas trae for tingim olketa wea maet stambol or bakslaed. Sapos iumi showimaot love bilong Jehovah, kaen and kea long olketa, then maet iumi hapi for lukim olketa hipap moa for worshipim Jehovah witim iumi.—Luke 15:4-10.