“Iu No Fraet”
1. Olketa wanem hard samting nao kasem iumi wea semsem olsem Jeremiah?
1 Jeremiah feel olsem hem no fit taem hem kasem waka olsem profet. Bat Jehovah comfortim hem, “iu no fraet,” and hem strongim hem for duim gud assignment bilong hem. (Jer. 1:6-10) Long distaem tu, wei for shame or tingse iumi no fit savve affectim wei wea iumi duim preaching waka. Wei for fraetem wanem pipol maet duim or tingting bilong olketa abaotem iumi, savve mekem iumi hol bak samfala taem for preach. Wanem nao iumi savve duim for winim wei for fraet olsem, and wanem gud samting nao iumi savve kasem?
2. Hao nao wei for prepare firstaem savve helpem iumi for no fraet tumas taem iumi duim preaching waka?
2 Prepare Firstaem: Wei for prepare gud savve helpem iumi for no fraet tumas. Example, sapos iumi ting raonem firstaem toktok for stopem story wea pipol savve talem, iumi bae redi for givim ansa. (Prov. 15:28) Long taem bilong Famili Worship, hem gud for practice firstaem long hao for deal witim eni hard samting wea maet kamap long skul and long preaching waka.—1 Pet. 3:15.
3. Hao nao wei for trustim Jehovah helpem iumi for winim wei for fraet?
3 Trustim Jehovah: Wei for barava trustim Jehovah bae helpem iumi for no fraet. Jehovah promis hem bae helpem iumi. (Isa. 41:10-13) Iumi savve barava trustim datwan! And tu Jesus encouragem iumi, taem samfala samting happen wea iumi no expectim, holy spirit bae helpem iumi for witness long gudfala wei. (Mark 13:11) Dastawe, prea strong long Jehovah evritaem for holy spirit bilong hem.—Luke 11:13.
4. Olketa wanem blessing nao kamaot from wei for no givap long preaching waka nomata iumi kasem hard taem?
4 Olketa Blessing: Taem iumi no givap for duim preaching waka nomata iumi kasem hard taem, iumi fit for winim olketa hard taem wea bae kamap. Iumi gohed strong and no fraet, wea diswan showimaot iumi garem holy spirit. (Acts 4:31) Nara samting tu, taem Jehovah helpem iumi for winim olketa hard taem wea iumi kasem, iumi strongim faith and trustim wei wea God savve sevem iumi. (Isa. 33:2) Iumi bae hapi and satisfae for savve, iumi mekem Dadi bilong iumi long heven for hapi long olketa samting wea iumi duim. (1 Pet. 4:13, 14) So iumi mas no fraet for talemaot Kingdom message, and evritaem trustim Jehovah for helpem iumi!