Waswe, Iu Savve Helpem Hasband or Waef wea No Witness?
1. Why nao olketa long kongregeson tu laek helpem marit partner wea no Witness for savve long truth?
1 Waswe, samfala pablisa long kongregeson bilong iu garem marit partner wea no Witness? Sapos olsem, masbi olketa pablisa hia laekem tumas partner bilong olketa for joinim olketa long tru worship. Bat hem no olketa seleva nomoa laekem partner bilong olketa for acceptim truth. Full kongregeson nao garem sem tingting olsem God for “evri difren kaen man mas sev and for garem stretfala savve abaotem olketa tru teaching.” (1 Tim. 2:4) Wanem nao iumi savve duim for helpem marit partner bilong wanfala pablisa wea hem no Witness?
2. Hao nao wei for luksavve bae mekem iumi fit for helpem hasband or waef wea no Witness?
2 First samting iumi need for duim, hem for savve long tingting bilong datfala hasband or waef wea no Witness. Staka hasband or waef wea no Witness, lovem famili bilong olketa and trae for kamap gudfala marit partner and parent. Maet biliv wea olketa hol strong long hem, hem difren from iumi. Maet olketa no savve gud long Olketa Jehovah’s Witness, bat olketa savve nomoa long olketa laea story wea olketa fren talem abaotem iumi. From datfala brata or sista bifor hem stap evritaem witim famili bat distaem hem worshipim Jehovah, marit partner bilong hem savve feel nogud abaotem taem wea hem iusim for worshipim Jehovah. Wei for luksavve bae helpem iumi for kaen and showimaot respect long olketa wea no Witness and for olketa no fraet long iumi taem iumi story witim olketa.—Prov. 16:20-23.
3. Wanem nao best samting wea iumi savve duim for helpem hasband or waef wea no Witness?
3 Interest Long Narawan: Maet firstaem best samting for helpem hasband or waef wea no Witness for kam long truth, hem for no storyim Bible witim hem bat for duim olketa kaenfala samting long hem. (1 Pet. 3:1, 2) Important samting nao hem for showimaot iumi interest long hem. Olketa sista long kongregeson savve showimaot olketa interest long waef wea no Witness, and olketa brata savve showimaot olketa interest long hasband wea no Witness. Long wanem wei nao iumi savve showimaot iumi interest?
4. Hao nao iumi savve showimaot interest long narawan?
4 Sapos iu no meetim yet datfala hasband or waef, maet iu savve story witim hasband or waef bilong hem wea Witness. No feel nogud sapos firstaem datfala hasband or waef no tinghae long interest wea iumi showimaot. Wei wea iumi kaen and interest long hem maet mekem hem start for garem gudfala tingting abaotem Olketa Jehovah’s Witness. (Rom. 12:20) Samfala mature Christian askem hasband or waef wea no Witness and famili bilong hem for kam kaikai witim olketa long haos. Olketa Christian hia duim olsem mekem olketa savve gud long olketa and mekem olketa tu savve gud long iumi. Olketa storyim samting wea hasband or waef wea no Witness interest long hem, winim wei for storyim nomoa olketa spiritual samting. Then taem datfala hasband or waef wea no Witness feel free for story gud, maet iumi savve storyim nao Bible long hem. Or maet from hem savve finis samfala long kongregeson, hem savve agree for kam long wanfala meeting for savve wanem waef bilong hem lanem long there. Nomata sapos hem no interest yet for lane abaotem truth, iumi savve praisem hem bikos hem sapotim waef bilong hem wea Witness.
5. Wanem nao olketa elder savve duim for helpem hasband or waef wea no Witness?
5 Olketa elder nao shud duim samting for helpem olketa hasband or waef wea no Witness and redi for storyim truth long olketa. Hasband or waef wea no Witness wea no agree for iumi storyim Bible long hem maet lisin long samfala encouragement from Bible taem hem stap long hospital or long taem wea hem kasem samfala big problem saed long health. Sapos famili wea hasband or waef wea no Witness kasem hard taem, olsem sapos samwan long famili hem dae, maet olketa elder savve askem hem for joinim olketa taem olketa elder hia comfortim famili.
6. Why nao iumi shud helpem olketa hasband or waef wea no Witness?
6 Tingim hapi wea wanfala Christian long kongregeson bilong iumi bae kasem, sapos marit partner bilong hem start for interest long truth and hem kam insaed long Christian kongregeson! Jehovah, olketa angel and evriwan long kongregeson bae hapi tu long datwan. (Luke 15:7, 10) Nomata sapos hasband or waef wea no Witness no interest long truth firstaem, iumi savve gohed for hapi bikos Jehovah hem hapi long hard waka bilong iumi, from hem “no laekem eniwan for dae bat hem laekem evriwan for repent.”—2 Pet. 3:9.
[Blurb long page 6]
Maet firstaem best samting for helpem hasband or waef wea no Witness for kam long truth, hem for no storyim Bible witim hem bat for duim olketa kaenfala samting long hem