Leta From Governing Body
Dear Olketa Witness Bilong Jehovah:
Iumi stap long olketa barava interesting taem! And iumi hapi tu! Mifala barava hapi for “waka tugeta” witim iufala olketa brata and sista, for iumi givim bigfala witness winim eni nara taem long history, abaotem Dadi bilong iumi long heven, Jehovah.—Zeph. 3:9; John 14:12.
Nomata iumi hapi taem iumi worshipim Jehovah, iumi kasem tu olketa hard taem. Long last service year, samfala long iufala kasem hard taem from olketa earthquake, flood, cyclone, and olketa nara natural disaster wea big tumas. (Matt. 24:7) Staka stragol evriday from olketa samting wea savve kamaot from sik and wei for olo. Iumi evriwan mas deal witim wei wea “hard taem wea mekem pipol wari tumas” kamap moa worse. (Matt. 24:8) Long samfala kantri, olsem Armenia, Eritrea, and South Korea, staka brata and sista bilong iumi long prison bikos long biliv bilong olketa.—Matt. 24:9.
Wanem nao helpem iumi for tingting stret, nomata iumi kasem olketa hard taem hia? Yeartext for 2010 mekem iumi tingim wanfala important samting: ‘Love hem no givap. Love no savve finis.’ (1 Cor. 13:7, 8) Tru nao, wei wea iumi lovem each other, and wei wea iumi lovem Jehovah, strongim iumi for gohed strong go kasem end.
Staka pipol wea sei olketa Christian sapraes long wei iumi duim preaching waka evritaem and long staka ples long world. Nomata olketa no agree long biliv and wanem iumi teachim, samfala sei nao, “Iufala duim nao waka wea mifala shud duim ia!” Wanem nao wanfala samting wea mekem Olketa Jehovah’s Witness for gohed duim preaching waka? Love nao mekem olketa for gohed preach. Olsem Dadi bilong iumi long heven, iumi no laekem eniwan for distroe. (2 Pet. 3:9) Wei wea iumi laekem evriwan for repent showaot long 7,508,050 pablisa wea iumi kasem long last service year. No eni nara church garem staka pipol olsem wea volunteer for go aot and preach!
Hem encouragem iumi for lukim wei wea profesi wea Isaiah raetem, gohed for kamap tru distaem, wea sei olsem: “And hem mas happen long olketa last day hao maunten bilong haos bilong Jehovah bae barava hae winim olketa maunten and no eni samting bae sekem datfala maunten, and bae hem mas hae winim olketa hill; and evri nation mas go long hem.” (Isa. 2:2-4) Samfala long olketa hia wea go ap long haos bilong Jehovah hem 294,368 wea baptaes long last service year. Iumi welkamim olketa hia long organization bilong iumi. Iumi gohed for showimaot Christian love long wei for helpem olketa faet againstim enemy bilong iumi Satan.—1 Pet. 5:8, 9.
Long Tuesday, March 30, 2010, olketa wea kam long Memorial long full world hem 18,706,895. Datwan showimaot iumi garem staka million moa wea savve joinim iumi for worshipim Jehovah. Iumi hapi hao Jehovah no finisim yet disfala rabis world! Go kasem datfala taem, love wea iumi garem helpem iumi for no givap.—2 Thess. 3:5.
“Gohed Fren Gud Witim Jehovah!” Distrik Convention wea start long 2010 and klosap for finis long samfala nara kantri, strongim wei wea iumi fren witim Dadi bilong iumi long heven, Jehovah. Toktok bilong man wea raetem psalm hem barava tru: “Pipol wea God bilong olketa hem Jehovah, olketa hapi!” (Ps. 144:15) Nomata wanem bae happen long future, iumi savve sapos iumi trustim Jehovah, iumi bae no fraet long eni samting. (Ps. 23:4) Klosap nao, Jehovah bae iusim Son bilong hem for “finisim evri samting wea Devil hem duim.” (1 John 3:8) Tru tumas, iumi barava laekem datfala day for kam! Bat go kasem datfala taem, iumi garem staka waka for busy long hem.—1 Cor. 15:58.
Iufala savve sure mifala “evritaem” story abaotem iufala long prea bilong mifala. (Rom. 1:9) Hem gud for iufala “gohed kasem gud samting from love bilong God, and garem hope for laef olowe taem iufala weitim mercy bilong Lord bilong iumi Jesus Christ.”—Jude 21.
Mifala lovem iufala evriwan!
Olketa brata bilong iufala,
Governing Body Bilong Olketa Jehovah’s Witness