• Wei wea Jehovah Bae Ansarem Wanfala Prea
    Wastaoa—2008 | October 15

    • 17. Wanem chance nao klosap finis? Wanem toktok nao bae iumi tingim moa?

      17 Iumi savve pipol bae gohed for spoelem iumi. Bat iumi bae gohed for preachim gud nius, nomata long olketa wea againstim iumi tu. (Matt. 24:14, 21) From world hem klosap finis, chance for olketa wea againstim iumi for repent and kasem laef hem klosap finis tu. Samting wea important winim laef bilong iumi nao hem for nem bilong Jehovah stap holy. (Readim Ezekiel 38:23.) Taem evri kantri long earth join tugeta from olketa laek finisim pipol bilong God, iumi bae tingim moa disfala prea bilong man wea raetem psalm: “Hem gud tumas sapos iu mekem olketa shame and feel nogud for olowe, and hem gud tumas sapos nem bilong olketa nogud evribit taem olketa dae.”​—Ps. 83:17.

      18, 19. (a) Wanem nao bae kasem bighed pipol wea againstim rul bilong Jehovah? (b) From klosap nao evriwan bae luksavve Jehovah nomoa fit for rul, datwan mekem iumi laek duim wanem?

      18 Klosap nao bighed pipol wea againstim rul bilong Jehovah bae shame. Bible talem finis pipol wea “no obeyim gud nius” bae dae long Armageddon. Olketa bae “dae for olowe” nao. (2 Thess. 1:​7-9) Taem Jehovah finisim olketa hia and sevem pipol wea worshipim hem, datwan bae showimaot klia Jehovah nomoa hem trufala God. Long niu world, no eniwan bae forgetim bigfala faet wea Jehovah hem winim. Taem “pipol wea gud and pipol wea nogud laef bak moa,” olketa bae herem tu disfala nambawan samting wea Jehovah duim finis. (Acts 24:15) Long niu world, olketa bae luksavve hao living bae gud tumas taem Jehovah nomoa rulim iumi. And pipol wea hambol bae kwiktaem luksavve Jehovah nomoa hem trufala God.

  • “Hem Nao Nambawan and Holy Nem Bilong God”
    Wastaoa—2008 | October 15

    • “Hem Nao Nambawan and Holy Nem Bilong God”

      Nicholas from Cusa nao talem datwan long wanfala tok bilong hem long year 1430.a Hem man wea laek for lanem staka samting. Hem studyim Greek languis, Hebrew languis, idea bilong olketa man, religion, maths, and olketa star. Taem hem 22 year nomoa, hem savve tumas long olketa law bilong Roman Catholic church. Long 1448 hem kamap wanfala bigman long church.

      Long samting olsem 550 year go finis, Nicholas from Cusa hem startim wanfala nursing hom (haos wea olketa olo stap wea olketa nurse lukaftarem olketa) long Kues. Datfala building hem stap yet, bat hem wanfala library distaem wea garem winim 300 buk bilong Cusa. Wanfala nao hem Codex Cusanus 220. Insaed long hem, hem garem tok wea Cusa givim long year 1430. Long datfala tok, In principio erat verbum (Long Start, Datfala Man for Toktok Hem Stap), Nicholas from Cusa hem raetem nem bilong Jehovah long Latin languis, wea hem nao Iehoua.b Long page 56 long datfala buk, hem sei olsem abaotem nem bilong God: “Hem nem wea God givim long hemseleva. Hem datfala Tetragrammaton, wea hem nao nem wea garem fofala leta . . . Hem nao nambawan and holy nem bilong God.” Samting wea Nicholas from Cusa talem hem sem samting wea Bible talem finis. Nem bilong God hem stap long firstfala raeting bilong Hebrew Scripture.​—Ex. 6:3.

      Disfala Codex Cusanus 220 hem wanfala barava old buk wea olketa transleitim datfala Tetragammaton olsem “Iehoua.” Diswan pruvim hao for staka handred year finis, pipol iusim olketa difren wei for transleitim nem bilong God wea semsem olsem “Jehovah.”