Kwestin From Reader
Why nao 1 Corinthians 10:8 sei 23,000 Israelite nomoa dae insaed wan day from olketa duim fornication, bat long Numbers 25:9 hem sei hem 24,000?
Samfala difren samting nao maet mekem namba bilong tufala verse hia hem difren. Maet datfala really namba hem midolwan 23,000 and 24,000, dastawe olketa savve chusim namba wea hae winim or low winim datwan.
Tingim nara samting. Aposol Paul iusim example bilong samting wea happen long olketa Israelite long Shittim olsem wanfala warning for olketa Christian long Corinth bifor, wea staka pipol savve hem taon wea fulap witim dirty fasin. Hem raet olsem: “Iumi mas no duim fornication, olsem samfala long olketa duim fornication, wea from datwan twenti-thri thousand dae insaed wanfala day.” Taem Paul talem datfala namba 23,000, hem storyim nomoa olketa wea Jehovah killim dae from olketa duim fornication.—1 Corinthians 10:8.
Bat, Numbers chapter 25, hem sei hao “Israel worshipim Baal Bilong Peor; and kros bilong Jehovah hem start for hot againstim Israel.” Then, Jehovah komandim Moses for killim dae “olketa chief and bigman bilong olketa pipol.” Then Moses, komandim olketa judge for go duim datwan. Gogo, taem Phinehas kwiktaem for killim dae wanfala Israelite wea tekem go wanfala Midianite woman long camp, “datfala panis hem stop.” Datfala story end witim disfala toktok: “Namba bilong olketa wea dae from datfala panis hem kasem twenti-foa thousand.”—Numbers 25:1-9.
Luk olsem “olketa chief and bigman bilong olketa pipol” wea olketa judge killim dae and olketa wea Jehovah seleva killim dae olketa insaed datfala namba wea stap long Numbers. Maet samting olsem wan thousand chief and bigman nao olketa judge killim dae, wea mekem total namba for kasem 24,000. Maet olketa chief and bigman hia wea leadim pipol go rong, no duim fornication, no join insaed olketa party, or no agree for olketa narawan duim, bat olketa hia barava guilty for “join witim Baal Bilong Peor.”
Wanfala research buk saed long Bible hem storyim hao datfala word “join,” hem savve minim tu wei for “join witim narafala person.” Olketa Israelite dedicate long Jehovah, bat taem olketa “join witim Baal Bilong Peor,” olketa endim wei wea olketa dedicate long God. Samting olsem 700 year bihaen, Jehovah tok thru long profet Hosea and sei olsem abaotem olketa Israelite: “Olketa seleva nao go long Baal Bilong Peor, and go ahed for dedicatem olketa seleva long datfala nogud samting, and olketa kamap olsem datfala rabis samting wea olketa lovem.” (Hosea 9:10) Evriwan wea duim datwan fit for kasem barava strong judgment from God. So, Moses remindim olketa son bilong Israel: “Iufala lukim witim eye bilong iufala seleva wanem Jehovah duim bikos long Baal Bilong Peor, hao evri man wea followim Baal Bilong Peor, God bilong iufala Jehovah hem killim olketa dae midolwan iufala.”—Deuteronomy 4:3.