Olketa Reference for Laef and Ministry Meeting Buk
© 2023 Watch Tower Bible and Tract Society of Pennsylvania
MAY 1-7
GUD SAMTING FROM BIBLE | 2 CHRONICLES 17-19
“Garem Tingting blo Jehovah Abaotem Olketa Narawan”
Waswe, Bae Iu Lane From Example Bilong Olketa Long Bifor?
7 Distaem bae iumi storyim example bilong Jehoshaphat, son bilong Asa. Hem garem staka gudfala wei wea mekem Jehovah hapi long hem. And taem hem depend long Jehovah hem duim staka gudfala samting. Bat hem mekem samfala nogud disison tu. Olsem example, hem stretem son bilong hem for maritim dota bilong disfala nogud king, Ahab. Bihaen, Jehoshaphat joinim Ahab for faet againstim olketa long Syria nomata profet Micaiah talem hem for no duim datwan. Long datfala faet, olketa bilong Syria klosap killim dae Jehoshaphat. (2 Chron. 18:1-32) Taem hem kasem bak Jerusalem, profet Jehu askem hem olsem: “Waswe, iu tingse hem stret for iu go helpem nogud pipol, and waswe, hem stret for iu lovem olketa wea heitim Jehovah?”—Readim 2 Chronicles 19:1-3.
Ting Raonem Bigfala Love Bilong Jehovah for Iumi
8 Jehovah laekem iumi for savve hem lovem iumi, and hem no lukluk nomoa long olketa wik point bilong iumi. Bat hem lukluk long olketa gudfala wei bilong iumi. (2 Chron. 16:9) Tingim example bilong King Jehoshaphat bilong Judah. Jehoshaphat mekem nogud disison for saedem King Ahab bilong Israel and go faetem olketa bilong Syria long Ramoth-gilead. Nomata 400 false profet talem wicked King Ahab hem bae winim datfala faet, trufala profet bilong Jehovah wea nem bilong hem Micaiah, talem Jehoshaphat and Ahab, tufala bae lus long datfala faet. And hem nao wanem hem happen. Ahab dae long datfala faet, and Jehoshaphat klosap lusim laef bilong hem tu. Bihaen long datfala faet, Jehovah iusim Jehu for givim kaonsel long Jehoshaphat from hem saedem Ahab. Nomata olsem, Jehu sei olsem long hem tu: “God lukim samfala gudfala wei bilong iu.”—2 Chron. 18:4, 5, 18-22, 33, 34; 19:1-3.
9 Long start bilong rul bilong Jehoshaphat, hem talem olketa prince, olketa Levite, and olketa priest for go long evri taon long Judah for teachim Law bilong Jehovah long pipol. From olketa barava duim gud disfala waka, datwan helpem pipol long olketa nara kantri tu for savve long Jehovah. (2 Chron. 17:3-10) So nomata Jehoshaphat mekem datfala nogud disison for saedem Ahab, Jehovah no forgetim olketa gudfala samting wea hem duim finis. Datfala example bilong Jehoshaphat barava encouragem iumi, bikos samfala taem iumi tu savve mekem samfala mistek. Bat sapos iumi duim best bilong iumi for Jehovah, hem bae gohed for lovem iumi and hem bae no forgetim olketa gudfala samting wea iumi duim.
Faendem Gudfala Point
Worshipim Jehovah Long Full Heart Bilong Iu!
10 Jehoshaphat hem faithful for duim wanem God laekem olsem dadi bilong hem, Asa. (2 Chron. 20:31, 32) Wanem nao hem duim? Hem encouragem pipol for gohed worshipim Jehovah, olsem dadi bilong hem duim. Hem sendem olketa man for go long olketa taon bilong Judah for teachim “Law bilong Jehovah” long pipol. (2 Chron. 17:7-10) Hem go tu long olketa territory bilong kingdom bilong Israel long north, long pipol wea stap long olketa maunten long Ephraim, for olketa kam bak long Jehovah. (2 Chron. 19:4) King Jehoshaphat hem “worshipim Jehovah long full heart bilong hem.”—2 Chron. 22:9.
11 Distaem, Jehovah laekem pipol evriwea long world for lane abaotem hem, and iumi savve share long disfala waka for teachim pipol. Waswe, iu markem goal for share insaed disfala waka evri month? Waswe, iu laek for teachim Bible long olketa narawan mekem olketa tu savve worshipim Jehovah? Waswe, iu prea long Jehovah abaotem datwan? Sapos iu waka hard, Jehovah bae helpem iu for garem wanfala Bible study. Waswe, iu willing for study witim samwan nomata long taem wea iu markem finis for duim samting for iuseleva? And olsem Jehoshaphat wea trae for helpem olketa narawan for worshipim Jehovah moa, iumi tu savve trae for helpem olketa wea inactive for kam bak long Jehovah. Olketa elder tu mekem arrangement for go visitim olketa wea disfellowship wea stap long territory bilong kongregeson wea maet lusim finis olketa nogud samting wea olketa bin duim bifor.
MAY 8-14
GUD SAMTING FROM BIBLE | 2 CHRONICLES 20-21
“Putim Faith lo Jehovah, God blo Iufala”
Sapotim Each Other Taem World Hem Gogo for FInis
8 Long taem bilong King Jehoshaphat, wanfala big army wea strong fogud go for attakim pipol bilong God. (2 Chron. 20:1, 2) Wanem nao olketa Israelite duim taem datfala big army stap raonem olketa? Olketa depend long Jehovah and prea for hem helpem olketa. (Readim 2 Chronicles 20:3, 4.) Taem olketa prea long Jehovah, olketa no stap seleva bat evriwan hipap tugeta for duim datwan. Bible sei: “Long datfala taem evriwan bilong Judah standap front long Jehovah, witim waef bilong olketa, olketa young wan, and olketa pikinini tu.” (2 Chron. 20:13) Evriwan long datfala nation, nomata olketa wea young or olo, trustim Jehovah and duim wanem hem talem olketa for duim. Olketa garem wan mind and Jehovah protectim olketa from datfala enemy. (2 Chron. 20:20-27) Datwan hem gudfala example wea showimaot pipol bilong God shud sapotim each other taem olketa feisim hard taem?
Tufala wea Just Marit Savve Duim Staka Samting for Jehovah
7 Jehovah sendem Jahaziel, wanfala Levite, for story witim Jehoshaphat. Jehovah sei: “Yufala mas redi an weit nomoa. Bae yufala save lukim dat mi [Jehovah] mi winim olketa.” (Mektu Kronikols 20:13-17) Maet Jehoshaphat tingse for standap nomoa lo taem blo faet hem no mek sense! Bat datfala instruction hem kam from Jehovah, no olketa man. So Jehoshaphat barava trustim God and followim instruction hia. Taem hem and army blo hem go for feisim olketa enemy, hem sei olketa soldia mas standap bihaen lo olketa man for singsing wea no holem eni weapon. Jehovah keepim promis blo hem for winim olketa enemy blo Jehoshaphat.—Mektu Kronikols 20:18-23.
Faendem Gudfala Point
it-1-E 1271 ¶1-2
Jehoram
Jehoram no followim olketa raeteous wei blo dadi blo hem, Jehoshaphat. Maet bikos hem followim waef blo hem Athaliah wea garem olketa nogud wei. (2Ki 8:18) Jehoram killim dae sixfala brata blo hem witim samfala prince blo Judah. And tu, hem mekem olketa wea hem rulim for lusim Jehovah and worshipim olketa laea god. (2Ch 21:1-6, 11-14) Lo full taem wea hem rul, trabol hem gohed. Lo firstaem, Edom hem againstim hem; then Libnah bighed againstim Judah. (2Ki 8:20-22) Elijah raetem wanfala leta go lo Jehoram, and hem sei : “So Jehovah bae mekem big trabol for kasem pipol blo iu, olketa son blo iu, olketa waef blo iu, and lo evri samting wea iu onam. And bae iu kasem staka sik wea hem mekem iu safa, and tu, sik lo olketa intestine blo iu, and evriday sik hia bae kamap worse gogo olketa intestine blo iu kamaot.”—2Ch 21:12-15.
And hem nao wanem hem happen. Jehovah letem olketa Arab and Philistine for tekova and for tekem olketa waef and son blo Jehoram for kamap prisoner. God letem nomoa Jehoahaz (nara nem blo hem, Ahaziah), wea hem lastborn blo Jehoram, for ranawe. Hem letem datwan bikos lo datfala Kingdom agreement wea hem mekem witim David. “Bihaen lo evri samting hia, Jehovah mekem [Jehoram] for kasem wanfala sik lo olketa intestine blo hem wea no savve kamap gud.” Tufala year bihaen “olketa intestine blo hem kamaot” gogo hem dae nao. So disfala nogud man hem dae and “no eniwan sorre lo hem.” Olketa berem hem lo Taon blo David, bat “no lo olketa burial ples blo olketa king.” Then son blo hem Ahaziah nao kamap king.—2Ch 21:7, 16-20; 22:1; 1Ch 3:10, 11.
MAY 15-21
GUD SAMTING FROM BIBLE | 2 CHRONICLES 22-24
“Jehovah Blessim Olketa wea No Fraet for Duim Samting”
Olketa Nogud Fren Mekem Jehoash for Lusim Jehovah
HEM wanfala barava nogud taem long Jerusalem, datfala ples wea temple bilong God hem stap. Olketa just killim dae King Ahaziah. And then Athaliah, mami bilong Ahaziah, duim wanfala barava nogud samting. Hem talem olketa for killim dae olketa boy bilong Ahaziah, olketa granson bilong hem! Iu savve why nao hem duim datwan?— Mekem hem nao rulim pipol and no eniwan long olketa.
Bat olketa sevem Jehoash wea baby nomoa, wanfala granson bilong Athaliah. Grani bilong hem nating savve abaotem diswan. Iu laek for savve hao nao olketa duim datwan?— Jehosheba, aunty bilong Jehoash haedem hem long temple bilong God. Hem savve duim datwan bikos hasband bilong hem Jehoiada, hem wanfala Hae Priest. So tufala evriwan nao keepim Jehoash for stap sef.
Olketa Nogud Fren Mekem Jehoash for Lusim Jehovah
Olketa haedem Jehoash long temple for sixfala year. And olketa lanem hem abaotem Jehovah God and olketa law bilong hem. Gogo, taem Jehoash hem seven year, Jehoiada tekem Jehoash for kamap king. Waswe, iu laek for savve hao nao Jehoiada duim diswan and wanem nao happen long rabis grani bilong Jehoash, Queen Athaliah?—
Jehoiada hipimap evri spesol gard wea olketa king long Jerusalem garem long datfala taem. Hem talem olketa hao hem and waef bilong hem sevem nao baby boy bilong King Ahaziah. Then Jehoiada showim Jehoash long olketa gard and olketa luksavve hao hem nao fit for rulim pipol. Olketa redyim wanfala plan.
Jehoiada tekem kam Jehoash and putim crown bilong king long hem. And olketa pipol “klapem hand bilong olketa and sei: ‘Iu nao king for olowe!’” Olketa gard stap raonem Jehoash for protectim hem. Taem Athaliah herem olketa singaot, hem ran kamaot and trae for stopem. Bat Jehoiada talem olketa gard for killim dae Athaliah.—2 Kings 11:1-16.
it-1-E 379 ¶5
Berem man, Burial Ples
Hae Priest Jehoiada hem raeteous and hem kasem honor for olketa berem hem “lo Taon blo David witim olketa king.” No eni nara man, wea no from laen blo olketa king hem kasem datwan.—2Ch 24:15, 16.
Faendem Gudfala Point
it-2-E 1223 ¶13
Zechariah
12. Son blo Hae Priest Jehoiada. Bihaen Jehoiada dae, King Jehoash lusim tru worship bikos hem followim kaonsel wea no stret winim for followim samting wea olketa profet blo Jehovah talem. Kasin blo Jehoash, Zechariah (2Ch 22:11), barava warnim olketa pipol abaotem diswan, bat olketa no repent and olketa sutim Zechariah lo olketa ston gogo hem dae lo courtyard blo temple. Bifor hem dae, hem sei: “Jehovah nao bae panisim iu for samting wea iu duim.” Samting hem talem hem wanfala profesi wea kamap tru taem Syria barava spoelem Judah and tufala servant blo Jehoash killim hem dae “bikos hem killim dae olketa son blo Jehoiada, datfala priest.” Datfala Greek Septuagint Bible and datfala Latin Vulgate Bible sei olketa killim dae Jehoash for changem bak blood blo “son” blo Jehoiada. Bat datfala Masoretic text and Syriac Peshitta, sei “olketa son.” Maet hem sei “olketa” for strongim hao Zechariah, datfala son blo Jehoiada, wea hem wanfala profet and priest, hem wanfala nambawan man.—2Ch 24:17-22, 25.
MAY 22-28
GUD SAMTING FROM BIBLE | 2 CHRONICLES 25-27
“Jehovah Garem Wei for Givim Staka Samting Moa lo Iu Winim Datwan”
it-1-E 1266 ¶6
Jehoash
Jehoash letem king blo Judah (Amaziah) haerem wan handred thousand soldia blo hem tu for hem faetem olketa Edomite. Bat wanfala “man blo tru God” talem Amaziah for no iusim olketa soldia blo Jehoash lo datfala faet, so Amaziah sendem olketa go bak nomata hem peim Jehoash wan handred silver talent finis ($660,600). Diswan mekem olketa soldia hia kros, maet bikos olketa no savve tekem staka samting blo enemy bihaen olketa win lo faet. So bihaen olketa soldia hia go bak lo north olketa attakim olketa taon lo datfala kingdom lo south mekem olketa savve tekem staka samting. Olketa attakim olketa taon start lo Samaria (wea maet hem nao base blo olketa) go kasem Beth-horon.—2Ch 25:6-10, 13.
Lukim Hao Jehovah Hem Barava Gud Tumas
16 No hol bak for duim moa samting for Jehovah. Nomata iumi busy lo ministry, iumi savve enjoyim laef. (Eklesiastes 5:19, 20) Maet iumi hol bak for duim moa samting for Jehovah from iumi tingim nogud iumi mas lusim olketa material samting. Bat iumi no laek for duim sem mistek olsem man lo tokpiksa blo Jesus wea hipimap staka material samting, bat hem no tingim God. (Readim Luke 12:16-21.) Christian, wanfala brata wea stap lo France sei, “Mi busy tumas so mi no garem staka taem for waef blo mi or for Jehovah.” Gogo, hem and waef disaed for pioneer, bat for kasem datfala goal tufala mas lusim waka blo tufala. Tufala startim smol bisnis for duim klining waka and lane for satisfae witim wanem tufala garem. Waswe, tufala enjoyim niu laef blo tufala? Christian sei, “Mifala barava enjoyim preaching waka and hapi for teachim olketa return visit and Bible study abaotem Jehovah.”
Faendem Gudfala Point
w07-E 12/15 10 ¶1-2
Waswe, Iu Garem Mature Fren Wea Iu Savve Lane From Hem?
TAEM hem 16 year nomoa, Uzziah hem kamap king blo Judah lo south. Hem rul olsem king for winim 50 year, from end blo mek-9 century go kasem start blo mek-8 century B.C.E. Start kam lo taem hem young, Uzziah “gohed for duim samting wea stret lo eye blo Jehovah.” Wanem nao helpem hem for duim datwan? Bible hem sei: “[Uzziah] gohed for lukaotem God lo taem wea Zechariah, man wea teachim hem for fraet lo tru God hem laef. Lo olketa taem wea hem lukaotem Jehovah, tru God mekem hem garem staka samting.”—2 Chronicles 26:1, 4, 5.
Bible no talem staka samting abaotem Zechariah, wea hem man wea givim advaes lo king. Bat from hem sei Zechariah hem “man wea teachim [man] for fraet lo tru God,” hem barava encouragem datfala young king for duim samting wea hem stret. The Expositor’s Bible sei hem klia hao Zechariah hem “savve gud lo olketa holy raeting, hem wise, and hem savve teach gud.” Wanfala Bible savveman hem sei olsem abaotem Zechariah: “Hem savve gud lo olketa profesi and . . . hem man wea savve tumas, hem lovem God, garem gudfala wei; and, luk olsem Uzziah herem and followim advaes blo hem.”
MAY 29–JUNE 4
GUD SAMTING FROM BIBLE | 2 CHRONICLES 28-29
“Iu Savve Servem Jehovah Nomata Parents Blo Iu No Duim Datwan”
Followim Example Bilong Olketa wea Fren Gud Witim Jehovah
8 Laef bilong Hezekiah taem hem growap hem barava difren from laef bilong Ruth. Hezekiah born long wanfala nation wea olketa dedicate finis long Jehovah. Bat samfala Israelite no faithful long God. Dadi bilong Hezekiah, King Ahaz, hem wanfala nogud king. Hem nating respectim temple bilong God, and hem switim olketa narawan for worshipim olketa idol. Ahaz sakrifaesim samfala brata bilong Hezekiah long wanfala laea god tu. Ahaz bonem olketa taem olketa laef yet. Hezekiah lukim staka nogud samting taem hem smol!—2 Ki. 16:2-4, 10-17; 2 Chron. 28:1-3.
Followim Example Bilong Olketa wea Fren Gud Witim Jehovah
9 From Ahaz duim staka nogud samting, maet datwan savve mekem son bilong hem Hezekiah for kros long Jehovah or followim nogud wei bilong dadi bilong hem. Distaem, samfala tingse olketa garem gudfala reason for “kros long Jehovah” or organization bilong hem bikos long hard samting wea kasem olketa, nomata hem no olsem samting wea kasem Hezekiah. (Prov. 19:3) Olketa narawan tingse from olketa growap long famili wea samfala duim nogud samting, maet datwan spoelem laef bilong olketa and mekem olketa tu duim nogud samting. (Ezek. 18:2, 3) Bat waswe, kaen tingting olsem hem stret?
10 Example bilong Hezekiah showimaot kaen tingting olsem hem no stret! Iumi no garem eni reason for againstim Jehovah or kros long hem. Jehovah no kosim nogud samting for kasem pipol. (Job 34:10) Hem tru, olketa pikinini savve lanem gud samting or nogud samting from famili wea olketa growap long hem. (Prov. 22:6; Col. 3:21) Nomata olsem, Jehovah wakem iumi long wei wea iumi savve chus for duim gud samting or nogud samting. So nomata famili duim nogud samting, iumi savve chus for duim stret samting. (Deut. 30:19) Wanem nao Hezekiah chus for duim?
11 Nomata dadi bilong Hezekiah hem wanfala barava nogud king long Judah, Hezekiah hem wanfala gud king. (Readim 2 Kings 18:5, 6.) Hem chus for no followim nogud example bilong dadi bilong hem. Hem chus for lisin and ting raonem samting wea olketa profet bilong Jehovah talem, olsem Isaiah, Micah, and Hosea, and hem followim wanem olketa talem. Hezekiah stretem olketa nogud samting wea dadi bilong hem duim, taem hem klinim temple, hem askem God for forgivim sin bilong olketa Israelite, and distroem olketa idol long evri ples. (2 Chron. 29:1-11, 18-24; 31:1) Taem King Sennacherib bilong Assyria kam for attakim Jerusalem, Hezekiah showimaot hem no fraet and hem garem strongfala faith. Hem trustim Jehovah for protectim olketa, and hem strongim olketa Israelite. (2 Chron. 32:7, 8) Wantaem Hezekiah kamap praod, bat taem Jehovah stretem hem, hem hambol and hem repent. (2 Chron. 32:24-26) Tru nao, Hezekiah showimaot nambawan example for iumi followim. Hem no letem samting wea famili bilong hem duim for spoelem laef bilong hem. Hezekiah fren gud witim Jehovah.
Faendem Gudfala Point
Nathan Faithful for Sapotim Tru Worship
From Nathan worshipim Jehovah, hem sapotim plan bilong David for wakem firstfala temple for Jehovah. Bat Nathan talem wanem hemseleva tingim and no tingting bilong Jehovah. Long datfala naet, God talem Nathan for go and talem David hao bae hem no wakem temple bilong Jehovah bat son bilong hem nao bae duim datwan. Nomata olsem, Nathan talem David hao God mekem wanfala agreement witim David for laen bilong hem bae gohed king “for olowe.”—2 Sam. 7:4-16.
Nomata tingting bilong Jehovah abaotem hu nao for wakem temple hem no semsem witim wanem Nathan tingim, Nathan no komplen. Hem hambol for followim and sapotim plan bilong Jehovah. Iumi shud hambol olsem Nathan sapos enitaem God stretem tingting bilong iumi! Olketa samting wea Nathan duim bihaen showimaot God no kros long hem. Jehovah givim holy spirit for helpem Nathan and profet Gad for talem David for organizem 4,000 man for pleim music long temple.—1 Chron. 23:1-5; 2 Chron. 29:25.
JUNE 5-11
GUD SAMTING FROM BIBLE | 2 CHRONICLES 30-31
“Wei for Hipap Tugeta Hem Gud Samting for Iumi”
it-1-E 1103 ¶2
Hezekiah
Strong wea Hem Garem for Trufala Worship. Stretawe bihaen Hezekiah kamap king taem hem 25 years old, hem showimaot hem strong for worshipim Jehovah. First samting hem duim nao hem openem moa temple and repairim datwan. Then hem kolem kam olketa priest and Levite, and sei: “Mi laekem tumas for mekem covenant witim Jehovah, God blo Israel.” Datfala Law covenant hem still gohed, bat olketa no followim gud. So diswan hem wanfala covenant for faithful, wea hem olsem hem startim bak datfala Law covenant moa lo Judah. Hem barava busy for organizem olketa Levite for waka blo olketa, and arrangem bak tu olketa music instrument and olketa man for singim praise. Hem month blo Nisan, wea hem nao month for celebratem Pasova, bat temple witim olketa priest and Levite no klin. Bat kasem mek-16 day blo Nisan, temple hem klin and olketa redyim finis olketa samting blo temple. Then olketa mas offerim olketa spesol sakrifaes for evriwan lo Israel. Firstaem, olketa prince tekem kam olketa sakrifaes, olketa sin offering for kingdom, temple, and olketa pipol, and then olketa pipol offerim staka bone sakrifaes tu.—2Ch 29:1-36.
it-1-E 1103 ¶3
Hezekiah
From olketa pipol no klin yet, olketa no fit for celebratem Pasova lo taem wea Law hem markem. So Hezekiah followim datfala law wea sei man wea no klin savve celebratem Pasova wanfala month bihaen. Hem iusim olketa leta and man wea go talem message for kolem kam evriwan lo Judah and Israel, start lo Beer-sheba go kasem Dan. Staka againstim olketa wea tekem kam datfala message, bat samfala man, especially lo Asher, Manasseh, and Zebulun, hambol for acceptim datwan and go. Samfala from Ephraim and Issachar attend, witim staka wea no Israelite tu. Luk olsem hem bae no isi for olketa lo northern kingdom wea sapotim tru worship for attend. Pipol lo there bae againstim olketa olsem hao pipol againstim olketa wea talem kam datfala message blo king. Diswan hem bikos datfala ten tribe kingdom fulap lo staka nogud samting and olketa worshipim olketa laea god. Olketa blo Assyria barava mek trabol for olketa tu.—2Ch 30:1-20; Nu 9:10-13.
it-1-E 1103 ¶4-5
Hezekiah
Bihaen lo Pasova, celebration for kaikaim bred wea no garem yeast wea gohed for sevenfala day hem mekem olketa wea attend barava hapi tumas, evriwan disaed for gohed duim datwan for sevenfala day moa. Nomata staka danger hem stap lo datfala taem, datwan no stopem blessing blo Jehovah, and “bigfala hapi nao gohed lo Jerusalem, bikos start kam lo taem blo Solomon, wea hem nao son blo David wea hem king blo Israel, no enitaem bifor kaen samting olsem happen lo Jerusalem.”—2Ch 30:21-27.
Next samting wea happen pruvim hao olketa hia no just hapi nating nomoa, bat olketa barava strong for startim bak tru worship nao. Bifor olketa go bak lo hom, evriwan hia brekem olketa post for worship, and daonem olketa hae ples and olketa altar lo evri ples lo Judah and Benjamin, and lo Ephraim and Manasseh tu. (2Ch 31:1) Hezekiah showimaot gudfala example taem hem pisisim datfala copper snek wea Moses wakem bifor, bikos olketa pipol mekem datwan for kamap wanfala idol and olketa offerim smoke blo sakrifaes lo datwan. (2Ki 18:4) Bihaen lo bigfala celebration hia Hezekiah laek for mek sure tru worship hem gohed, so hem organizem olketa priest and arrangem for olketa man sapotim waka wea gohed lo temple. Hem encouragem evriwan for obeyim samting wea Law talem saed lo olketa tithe and contribution for olketa Levite and priest, and evriwan barava willing for duim datwan.—2Ch 31:2-12.
Faendem Gudfala Point
“From Iufala Savve Long Olketa Samting Hia, Bae Iufala Hapi Sapos Iufala Duim”
14 Nara wei wea iumi showimaot iumi hambol, hem nao sapos iumi willing for lisin taem narawan story. James 1:19 sei iumi shud “willing for lisin.” Jehovah seleva showimaot nambawan example long datwan. (Jenesis 18:32; Josua 10:14) Tingim wanem iumi savve lanem from story wea stap long Eksodas 32:11-14. (Readim.) Nomata Jehovah no needim idea bilong Moses, hem givim chance long Moses for talemaot feeling bilong hem. Waswe, iumi savve olsem Jehovah wea patient for lisin long Moses nomata samfala taem tingting bilong Moses no stret, and wei wea Jehovah willing for followim idea bilong hem? Tingim, Jehovah patient for lisin long eniwan wea showimaot faith long hem taem olketa prea.
15 Tingim olketa kwestin hia: ‘Sapos Jehovah hambol and willing for lisin long pipol, olsem wei wea hem lisin long Abraham, Rachel, Moses, Joshua, Manoah, Elijah, and Hezekiah, waswe, mi shud trae for duim datwan tu? Waswe, mi showimaot mi tinghae and respectim evri brata and sista taem mi lisin and followim gudfala idea bilong olketa? Waswe, samwan long kongregeson or long famili bilong mi needim mi for kaen and lisin long olketa? Wanem nao bae mi duim?’—Jenesis 30:6; Jajis 13:9; Fas Kings 17:22; Mektu Kronikols 30:20.
JUNE 12-18
GUD SAMTING FROM BIBLE | 2 CHRONICLES 32-33
“Strongim Olketa Narawan Taem Olketa Kasem Hard Taem”
it-1-E 204 ¶5
Assyria
Sennacherib. Sennacherib, wea hem son blo Sargon II, hem attakim kingdom blo Judah lo mek-14 year lo rul blo Hezekiah (732 B.C.E.). (2Ki 18:13; Isa 36:1) Hezekiah hem no willing for obeyim rul blo Assyria nomata olketa stap anda lo datwan bikos lo dadi blo hem Ahaz. (2Ki 18:7) So Sennacherib hem attakim and tekovarem 46 taon (comparem Isa 36:1, 2), and then, taem hem camp lo Lachish, hem demandim Hezekiah for peim fine wea hem 30 gold talent (c. $11,560,000) and 300 silver talent (c. $1,982,000). (2Ki 18:14-16; 2Ch 32:1; compare Isa 8:5-8.) Nomata Hezekiah peim diswan, Sennacherib sendem bigman blo hem for demandim olketa lo Jerusalem mas sarenda. (2Ki 18:17–19:34; 2Ch 32:2-20) Bat angel blo Jehovah killim dae 185,000 soldia blo Assyria insaed wanfala naet nomoa, wea mekem Sennacherib givap and go bak lo Nineveh. (2Ki 19:35, 36) Bihaen, tufala son blo Sennacherib killim hem dae, and nara son blo hem, Esar-haddon, kamap king for changem hem. (2Ki 19:37; 2Ch 32:21, 22; Isa 37:36-38) Samfala part lo disfala story abaotem Sennacherib and Esar-haddon, olketa raetem lo olketa ston tu.—PICTURE, Vol. 1, p. 957.
Hu Nao Sevenfala Man for Lukaftarem Sheepsheep and Eitfala Man wea Lead Distaem?
12 Jehovah hem evritaem willing for helpem iumi taem iumi kasem problem wea iumi tingse hem big tumas. Bat hem expectim iumi for duim wanem iumi fit for duim. Hezekiah tu duim wanem hem fit for duim. Bible sei hem askem advaes from “olketa prince and olketa strongfala man bilong hem,” and hem disaed for “blokem wata and olketa springwata wea stap aotsaed long datfala taon.” Hezekiah “no fraet and hem buildim bak wall wea brekdaon and buildim olketa taoa long hem, and hem buildim narafala wall tu long aotsaed.” And tu, hem “wakem staka samting for faet and olketa shield.” (2 Chron. 32:3-5) Long datfala taem, Jehovah iusim Hezekiah, olketa prince bilong hem, and olketa faithful profet for protectim and lukaftarem pipol bilong Hem.
Hu Nao Sevenfala Man for Lukaftarem Sheepsheep and Eitfala Man wea Lead Distaem?
13 Hezekiah duim nara samting wea important winim wei for blokem olketa spring wata or for buildim bak wall bilong datfala taon. From Hezekiah hem man wea lukaftarem gud pipol bilong Jehovah, hem hipimap olketa and talem disfala toktok for encouragem olketa: “Iufala mas no wikdaon or fraet long king bilong Assyria and bigfala sekson bilong hem, bikos iumi staka winim olketa. Hem garem army bat olketa man nomoa, bat iumi garem God bilong iumi Jehovah, wea bae helpem iumi and faet for iumi.” Hezekiah remindim olketa bae Jehovah hem faet for olketa. Diswan helpem olketa for trustim God and no fraet. Hezekiah, olketa prince and olketa strongfala man bilong hem, witim profet Micah and Isaiah, showimaot olketa lukaftarem gud pipol bilong Jehovah. Diswan nao promis bilong Jehovah wea Micah talemaot.—2 Chron. 32:7, 8; readim Micah 5:5, 6.
Faendem Gudfala Point
Wanem Nao Showimaot Sapos Samwan Hem Repent?
11 Gogo Jehovah ansarem olketa prea blo Manasseh. Jehovah savve Manasseh hem changem wei blo hem from wanem hem talem lo prea blo hem. So Jehovah forgivim Manasseh, and mekem Manasseh kamap king moa. Manasseh duim staka samting wea showimaot hem repent. Hem no olsem Ahab. Hem changem wei blo hem, hem distroem olketa altar, and hem encouragem pipol for worshipim Jehovah. (Readim Mektu Kronikols 33:15, 16.) Datwan showimaot Manasseh no fraet and garem faith bikos for staka year hem nogud example for famili blo hem, olketa bigman blo hem, and olketa pipol. Nomata hem olo, hem trae for stretem olketa nogud samting wea hem duim. And luk olsem hem encouragem granson blo hem Josiah for worshipim Jehovah, bikos gogo Josiah kamap wanfala gud king.—Mektu Kings 22:1, 2.
12 Wanem nao iumi savve lanem from example blo Manasseh? Hem sorre lo wanem hem duim, bat hem duim olketa nara samting tu. Hem prea lo Jehovah for showim mercy lo hem, and hem changem nogud wei blo hem. Hem stretem olketa problem wea hem kosim, hem worshipim Jehovah moa, and hem encouragem olketa narawan for duim sem samting tu. Example blo Manasseh showimaot hope hem stap for olketa wea duim bigfala sin, bikos Jehovah God hem ‘gud tumas an hem gohed fo fogivim olketa sin.’ (Sams 86:5) So iumi lanem olketa wea repent savve kasem forgiveness.
JUNE 19-25
GUD SAMTING FROM BIBLE | 2 CHRONICLES 34-36
“Waswe, Iu Barava Kasem Gud Samting From Toktok blo God?”
it-1-E 1157 ¶4
Huldah
Taem Josiah herem Shaphan read from datfala “buk blo law” wea hae priest Hilkiah faendem taem olketa repairim temple, hem sendem samfala man for olketa go faendemaot tingting blo Jehovah. Olketa go lo Huldah, wea talemaot olketa toktok blo Jehovah hao evri trabol wea buk hia markem for olketa wea no obey, bae kasem apostate nation hia. Huldah hem sei tu, Josiah bae no lukim datfala trabol bat olketa bae berem hem witim olketa grani blo hem and hem bae dae lo peace bikos hem showimaot lo Jehovah hem hambol.—2Ki 22:8-20; 2Ch 34:14-28.
Lovem Tumas Haos Bilong Jehovah and Tingim Evritaem!
20 Taem olketa wakem bak temple long taem bilong King Josiah, Hae Priest Hilkiah “faendem buk bilong law bilong Jehovah wea Moses raetem.” Hem givim buk long Shaphan, wakaman bilong king, and Shaphan start for readim kam long Josiah. (Readim 2 Chronicles 34:14-18.) Wanem nao king duim? Semtaem nomoa hem brekem kaleko bilong hem for showimaot hem sorre tumas and talem faevfala man for go lukim woman profet Huldah for savve long tingting bilong Jehovah. God givim message long woman hia hao Hem nating hapi long pipol bilong hem long Judah wea worshipim olketa giaman god. Nomata Jehovah talem datwan, hem lukim hard waka wea Josiah duim for aotem olketa samting wea pipol iusim for worshipim idol. Jehovah hapi long hem and Josiah no kasem olketa nogud samting wea Jehovah talem bae happen long pipol bilong hem. (2 Chron. 34:19-28) Wanem nao iumi lanem from diswan? Iumi tu laek for olsem Josiah. Iumi mas kwiktaem followim wanem Jehovah talem and tingting strong long wanem nao savve happen sapos iumi kamap apostate and no faithful long God. And iumi savve Jehovah bae hapi long iumi taem iumi tingim evritaem tru worship olsem Josiah.
Faendem Gudfala Point
Waswe, Bae Iu Lane From Example Bilong Olketa Long Bifor?
15 Lastfala example hem Josiah. Wanem nao iumi savve lanem from example bilong hem? Nomata Josiah hem gudfala king, hem duim wanfala mistek wea kosim dae bilong hem. (Readim 2 Chronicles 35:20-22.) Wanem nao happen? Josiah go faet againstim Necho, king bilong Egypt, nomata hem no garem eni reason for duim datwan. Necho talem Josiah hem tu no laek for faet againstim hem. Bible sei toktok wea Necho talem hem “kam from God.” Bat Josiah go for faet againstim hem, and olketa killim hem dae. So why nao Josiah go faetem Necho? Bible no talem.
16 Josiah shud faendaot sapos wanem Necho talem hem barava kam from Jehovah. Wanem nao hem shud duim? Hem shud askem Jeremiah, wea hem wanfala long olketa faithful profet bilong Jehovah. (2 Chron. 35:23, 25) And tu, Josiah shud faendaot moa samting abaotem diswan. Necho hem no kam for faet againstim Jerusalem, bat hem go for faet againstim nara nation long Carchemish. And Necho no tok spoelem Jehovah and pipol bilong hem tu. Josiah hem no tingting gud firstaem abaotem olketa samting hia bifor hem disaed for duim samting. Wanem nao iumi lanem from diswan? Taem iumi garem problem and iumi mas mekem disison, iumi shud tingim firstaem wanem Jehovah laekem iumi for duim.
17 Taem iumi mas mekem wanfala disison, first samting iumi mas tingim nao hem olketa Bible principle wea savve helpem iumi, and hao for followim olketa principle hia. Samfala taem maet iumi need for duim research long olketa pablikeson bilong iumi abaotem diswan, or askem advaes from wanfala elder. Hem savve helpem iumi for ting raonem olketa nara Bible principle tu. Tingim disfala example abaotem wanfala sista wea hasband bilong hem no Witness. Sista hia plan for go aot long ministry long wanfala day. (Acts 4:20) Bat long datfala day, hasband bilong hem no laekem hem for go long preaching. Hem sei bikos tufala bin busy, hem laek for spendem taem witim waef bilong hem. So datfala sista hem ting raonem olketa scripture wea savve helpem hem for mekem gudfala disison. Hem savve hem mas obeyim God and komand bilong Jesus for teachim pipol for kamap disaepol. (Matt. 28:19, 20; Acts 5:29) Bat hem tingim tu waef mas stap anda long hasband bilong hem, and olketa wea worshipim Jehovah mas no ova tumas. (Eph. 5:22-24; Phil. 4:5) Waswe, hasband bilong hem talem diswan for stopem hem for no duim preaching waka nao, or hem just laek for spendem lelebet taem witim hem long datfala day? Iumi wea worshipim Jehovah laek for mekem olketa gudfala disison wea bae mekem hem hapi.
JUNE 26–JULY 2
GUD SAMTING FROM BIBLE | EZRA 1-3
“Letem Jehovah for Iusim Iu”
Wanem Nao Iumi Lanem From Vision blo Zechariah?
JEHOVAH hem “waka insaet long tingting blong” King Cyrus blo Persia and datwan mekem Cyrus for disaed for letem olketa Israelite kamap free. Olketa Jew barava hapi lo datwan bikos olketa stap lo Babylon olsem prisoner for staka year. King sei olketa Jew savve go bak lo Jerusalem for ‘bildimbaek moa temple blong Jehovah, God blong Israel.’ (Esra 1:1, 3) Olketa Jew luk forward for worshipim datfala tru God moa lo Israel lo datfala land wea hem givim lo olketa.
Olketa Chariot and Kraon wea Protectim Iu
2 Zechariah savve olketa Jew wea kam bak long Jerusalem, olketa faithful pipol wea worshipim Jehovah. “Trufala God mekem olketa for garem tingting for laek” lusim haos and bisnis wea olketa garem long Babylon. (Ezra 1:2, 3, 5) Olketa lusim ples wea olketa savve gud long hem and muv go long ples wea staka long olketa nating lukim enitaem bifor. Olketa Jew hia willing for go bak bikos hem important tumas long olketa for buildim bak temple bilong Jehovah, nomata olketa mas wakabaot for 1,600 kilometer long olketa ples wea danger.
Faendem Gudfala Point
Olketa Main Point From Buk Bilong Ezra
1:3-6. Olsem samfala Israelite wea no lusim Babylon for go bak long Jerusalem, plande long Olketa Jehovah’s Witness no fit for duim full-taem ministry or serve long ples wea garem need wea moa big. Nomata olsem, olketa sapotim and encouragem olketa wea savve duim datwan and olketa givim tu donation for mekem waka for preach abaotem Kingdom and for mek disaepol kamap moa big.