Wastaoa ONLINE LIBRARY
Wastaoa
ONLINE LIBRARY
Solomon Islands Pidgin
  • BIBLE
  • OLKETA PABLIKESON
  • OLKETA MEETING
  • mwbr24 September pp. 1-12
  • Reference for “Laef and Ministry Meeting Buk”

Disfala sekson no garem eni video.

Sorre, disfala video no savve plei distaem.

  • Reference for “Laef and Ministry Meeting Buk”
  • Reference for Laef and Ministry Meeting Buk—2024
  • Subheding
  • SEPTEMBER 2-8
  • SEPTEMBER 9-15
  • SEPTEMBER 16-22
  • SEPTEMBER 23-29
  • SEPTEMBER 30–OCTOBER 6
  • OCTOBER 7-13
  • OCTOBER 14-20
  • OCTOBER 21-27
  • OCTOBER 28–NOVEMBER 3
Reference for Laef and Ministry Meeting Buk—2024
mwbr24 September pp. 1-12

Olketa Reference for Laef and Ministry Meeting Buk

© 2024 Watch Tower Bible and Tract Society of Pennsylvania

SEPTEMBER 2-8

GUD SAMTING FROM BIBLE PSALMS 79-81

Showimaot Love for Nambawan Nem blo Jehovah

w17.02 9 ¶5

Ransom Hem “Perfect Present” From Dadi Bilong Iumi

5 Wanem nao iumi savve duim for showimaot iumi tinghae long nem bilong Jehovah? Jehovah laekem iumi for holy long evri samting iumi duim. (Readim 1 Peter 1:15, 16.) Datwan minim for iumi worshipim hem nomoa and obeyim hem long evri samting. Nomata taem iumi kasem hard taem, iumi duim best bilong iumi for duim wanem hem laekem. Taem iumi followim olketa standard bilong hem long laef bilong iumi, iumi praisem nem bilong Jehovah. (Matt. 5:14-16) Iumi showimaot olketa law bilong Jehovah savve helpem iumi, and Satan hem man for laea. From iumi no perfect, bae iumi duim olketa samting wea no stret. Nomata olsem, iumi mas repent and stop for duim olketa samting wea bae spoelem nem bilong Jehovah.—Ps. 79:9.

ijwbv 3 ¶4-5

Rome 10:13—“Kol Go lo Nem blo Lord”

Lo Bible, datfala toktok “kol go lo nem blo Jehovah” hem no minim nomoa for savve lo nem blo God and for iusim taem iumi worshipim hem. (Psalm 116:12-14, NW) Hem minim tu for trustim God and depend lo hem for helpem iumi.—Psalm 20:7; 99:6.

Nem blo God hem barava important lo Jesus Christ. Firstfala toktok lo datfala Lord’s Prea hem olsem: “Dadi bilong mifala long heven, mifala laekem nem bilong iu for holy.” (Matthew 6:9) Jesus showimaot tu iumi mas savve gud lo Jehovah, obeyim hem, and lovem hem sapos iumi laek for kasem laef olowe.—John 17:3, 6, 26.

Faendem Gudfala Point

it-2-E 111

Joseph

Jehovah Mekhae lo Nem blo Joseph. From position blo Joseph midolwan olketa son blo Jacob hem spesol, dastawe hem fitim for Bible samfala taem iusim nem blo hem for representim evri tribe blo Israel (Ps 80:1) or olketa tribe blo northern kingdom blo Israel. (Ps 78:67; Am 5:6, 15; 6:6) Nem blo hem stap tu insaed olketa Bible profesi. Lo vision blo Ezekiel, inheritance wea Joseph kasem hem dabol (Eze 47:13), lo datfala taon wea garem nem “Jehovah Hem Stap lo There,” nem blo Joseph stap lo wanfala lo olketa gate blo hem (Eze 48:32, 35), and taem Ezekiel storyim wei wea pipol blo Jehovah bae kamap wan nation moa, hem sei Joseph hem chief blo wan haf blo datfala nation and Judah hem chief blo nara haf. (Eze 37:15-26) Profesi blo Obadiah showim hao “laen blo Joseph” bae help for distroem “laen blo Esau” (Ob 18), and profesi blo Zechariah storyim hao Jehovah bae sevem “laen blo Joseph.” (Zec 10:6) And lo olketa tribe blo datfala spiritual Israel, nem blo Joseph nao stap and no nem blo Ephraim.—Re 7:8.

From nem blo Joseph stap lo Revelation 7:8, datwan showimaot dat profesi wea Jacob talem taem hem redi for dae hem maet apply tu lo spiritual Israel. So hem gud for tingim, hao datfala Strongfala Man wea helpem Jacob, wea hem nao Jehovah God, hem givim kam Christ Jesus olsem Nambawan Shepherd wea givim laef blo hem for olketa “sheepsheep.” (Joh 10:11-16) Christ Jesus hem datfala faondeson ston lo kona wea God iusim for buildim datfala spiritual Israel antap. (Eph 2:20-22; 1Pe 2:4-6) And disfala Shepherd and Ston hem stap witim Olmaeti God.—Joh 1:1-3; Ac 7:56; Heb 10:12; comparem Ge 49:24, 25.

SEPTEMBER 9-15

GUD SAMTING FROM BIBLE PSALMS 82-84

Tinghae lo Olketa Privilege wea Iu Garem

wp16.6 8 ¶2-3

Wanem Nao Iumi Savve Lanem From Olketa Bird?

Pipol long Jerusalem savve gud long olketa swallow bikos olketa savve wakem nest bilong olketa long end long ruf bilong wanfala haos. Samfala swallow wakem nest long temple bilong Solomon. Luk olsem olketa swallow laek for wakem nest long there bikos hem ples wea sef for olketa leim egg bilong olketa.

Man wea raetem Psalm 84, wea hem wanfala long olketa son bilong Korah, savve lukim nest bilong olketa swallow wea stap long there bikos hem savve waka long temple for wanfala week insaed evri six month. Hem laek for stap olowe long haos bilong Jehovah olsem olketa swallow, so hem sei: “Jehovah wea iu komanda bilong olketa angel long heven, mi laekem tumas haos bilong iu wea hem naes tumas. Mi laekem tumas for stap long haos bilong Jehovah. Jehovah wea iu komanda bilong olketa angel long heven, wea iu King and God bilong mi, olketa bird tu wakem nest bilong olketa long haos bilong iu. And swallow wakem nest bilong hem klosap long altar and lukaftarem olketa baby bilong hem.” (Psalm 84:1-3) Waswe, iu and olketa pikinini bilong iu garem sem feeling olsem datfala man wea raetem psalm and tinghae long wei for evritaem hipap witim pipol bilong God for worship?—Psalm 26:8, 12.

w08 7/15 30 ¶3-4

Duim Samting wea Iu Fit for Duim and Hapi

Sapos man hem gogo for olo or garem sik, maet hem no savve duim samting wea hem laek for duim long waka bilong hem for Jehovah. Sapos iu wanfala mami or dadi, maet iu tingse iu no kasem staka gud samting bikos olketa pikinini bilong iu savve mek noise tumas taem iu study seleva or long taem bilong olketa Christian meeting. Bat waswe, iu forgetim olketa samting wea iu fit for duim bikos iu tingim olowe olketa samting wea iu no fit for duim?

Staka thousand year go finis, wanfala Levite storyim samting wea hem laekem tumas bat wea hem no fit for kasem. Hem garem privilege for waka long temple tufala week long evri year. Nomata olsem, hem talem hao hem laek for stap olowe long there. (Ps. 84:1-3) Wanem nao helpem disfala man wea faithful for hapi? Hem luksavve nomata sapos hem waka long wanfala day nomoa long temple, datwan hem barava spesol privilege. (Ps. 84:4, 5, 10) Winim wei for tingim tumas olketa samting wea iumi no fit for duim, iumi mas trae for luksavve and tinghae long olketa samting wea iumi fit for duim.

w20.01 17 ¶12

Iumi Spesol lo Jehovah!

12 Taem iu sik, iu savve sure dat Jehovah savve lo wanem hem kasem iu. Iu savve barava askem hem for helpem iu garem stretfala tingting abaotem situation blo iu. Then lukluk lo Bible for faendem olketa gudfala toktok wea Jehovah givim iumi. Ting raonem olketa verse wea showimaot hao Jehovah barava tinghae lo olketa wea worshipim hem. Taem iu duim olsem, iu bae lukim hao Jehovah hem kaen tumas lo olketa wea faithful for servem hem.—Ps. 84:11.

Faendem Gudfala Point

it-1-E 816

Pikinini wea No Garem Dadi

Hem isi nomoa for pipol forgetim olketa wea lusim samwan lo dae and olketa wea hard for protectim olketa seleva, so Jehovah iusim disfala toktok “pikinini wea no garem dadi” for describem taem wea Israel duim samting wea raeteous or taem wea olketa lusim raeteous wei. Taem datfala nation gohed gud lo spiritual wei, olketa pikinini wea no garem dadi stap gud. Taem pipol no followim justice, olketa pikinini wea no garem dadi olketa safa, and datwan showimaot hao spiritual saed blo datfala nation hem kamap nogud. (Ps 82:3; 94:6; Isa 1:17, 23; Jer 7:5-7; 22:3; Eze 22:7; Zec 7:9-11; Mal 3:5) Jehovah sei olketa wea treatim nogud lo olketa pikinini wea no garem dadi, bae kasem trabol. (De 27:19; Isa 10:1, 2) Jehovah describem hemseleva olsem Defender (Pr 23:10, 11), Helper (Ps 10:14), and Dadi (Ps 68:5) blo olketa. Hem nao Man wea bae showim justice on behalf lo olketa (De 10:17, 18), showim mercy lo olketa (Ho 14:3), provaed for olketa (Ps 146:9), and protectim laef blo olketa.—Jer 49:11.

Wanfala main samting wea showimaot hu nao olketa tru Christian, hem nao wei for kea for olketa wea lusim hasband or parents lo dae. Disaepol James sei olsem lo olketa Christian: “Wanfala wei for worship hem stap wea hem klin and stret long tingting bilong God wea hem Dadi bilong iumi. Datwan nao hem for lukaftarem olketa pikinini wea no garem dadi and mami and olketa widow woman wea kasem hard taem, and for stap klia long olketa rabis wei bilong disfala world.”—Jas 1:27.

SEPTEMBER 16-22

GUD SAMTING FROM BIBLE PSALMS 85-87

Prea Helpem Iumi for No Givap

w12 5/15 25 ¶10

Waswe, Iu Showimaot Glory Bilong Jehovah?

10 Nara samting wea iumi mas duim sapos iumi laek for showimaot glory bilong God hem for “gohed for prea and no givap.” (Rom. 12:12) Iumi shud prea for Jehovah helpem iumi worshipim hem long wei wea stret. Iumi savve askem hem for givim holy spirit long iumi, for strongim go moa faith bilong iumi, and for helpem iumi no foldaon long eni samting wea switim iumi for duim wanem hem no stret. Iumi savve askem hem tu for helpem iumi kamap gud long wei for teachim pipol abaotem Bible. (2 Tim. 2:15; Matt. 6:13; Luke 11:13; 17:5) Olsem wanfala pikinini hem trustim dadi bilong hem, iumi mas trustim Dadi bilong iumi long heven tu. Sapos iumi askem Jehovah for helpem iumi kamap gud long wei wea iumi servem hem, iumi sure hem bae helpem iumi. Iumi mas no tingse Jehovah hem taed for herem prea bilong iumi. So taem iumi prea iumi shud praisem hem, talem thankiu long hem, and askem hem for leadim iumi, especially long olketa hard taem. Iumi savve askem Jehovah tu for helpem iumi duim samting wea givim glory long nem bilong hem.—Ps. 86:12; Jas. 1:5-7.

w23.05 13 ¶17-18

Hao Jehovah Ansarem Olketa Prea blo Iumi

17 Readim Sams 86:6, 7 (SIPB). David sure hao Jehovah herem and ansarem olketa prea blo hem. Iumi tu savve sure hao Jehovah bae duim sem samting for iumi. Olketa example wea iumi storyim lo disfala article mekem iumi sure hao Jehovah savve givim wisdom and paoa wea iumi needim for deal witim olketa hard taem wea iumi feisim. Hem maet iusim olketa brata and sista, or even iusim olketa wea no worshipim hem for helpem iumi lo samfala wei.

18 Nomata maet Jehovah no evritaem ansarem olketa prea blo iumi lo wei wea iumi expectim, iumi savve hem bae ansarem olketa prea blo iumi. Hem bae provaedem wanem iumi needim and lo taem wea iumi barava needim. So gohed prea lo Jehovah and garem faith hao hem bae lukaftarem iumi distaem, and lo niu world, hem bae “givim lo evri samting wea laef, evri samting wea olketa laekem.”—Ps. 145:16.

Faendem Gudfala Point

it-1-E 1058 ¶5

Heart

Servem Jehovah Witim “Full Heart.” Real heart blo iumi mas complete mekem hem savve waka gud, bat tokpiksa heart blo iumi savve divaed. David prea olsem: “Iu mekem heart blo mi wan nomoa for fraet lo nem blo iu,” datwan showim hao heart blo man savve divaed saed lo wei wea hem lovem samting and fraetem samting. (Ps 86:11) Heart blo man savve divaed and worship blo hem kamap hafhaf, lo wei wea hem no hot or cold. (Ps 119:113; Re 3:16) Man savve garem tu “dabol heart” (original toktok sei wanfala heart and wanfala heart), wea minim man trae for servem tufala masta, or man talem samting bat really tingting blo hem difren. (1Ch 12:33; Ps 12:2, ftn) Jesus tok strong againstim wei for hypocrite olsem.—Mt 15:7, 8.

SEPTEMBER 23-29

GUD SAMTING FROM BIBLE PSALMS 88-89

Rulership blo Jehovah Hem Best

w17.06 28 ¶5

Sapotim Rul Bilong Jehovah!

5 Tingim nara samting wea showimaot Jehovah hem garem raet for rul. Hem iusim wei wea hem garem paoa for rul long barava stretfala wei. Hem sei: “Mi nao Jehovah, mi showimaot love, mi raeteous, and mi duim olketa samting wea stret long earth, and mi hapi tumas long olketa samting hia.” (Jer. 9:24) Jehovah no needim law wea olketa man markem for helpem hem disaedem stret samting. Bat hem nao markem standard for wanem hem stret. Olketa law wea hem givim for olketa man for followim hem barava stret. Man wea raetem psalm hem sei: “Justice and raeteous wei hem faondeson long throne bilong iu.” So evri law, principle, and olketa instruction wea kam from Jehovah hem barava stret. (Ps. 89:14; 119:128) Satan sei Jehovah hem nogud Ruler. Bat Satan no savve stretem olketa problem long disfala world.

w17.06 29 ¶10-11

Sapotim Rul Bilong Jehovah!

10 Jehovah hem no wanfala raf ruler. Olketa wea obeyim hem olketa hapi and olketa free. (2 Cor. 3:17) David sei olsem abaotem Jehovah: “Evriwan savve lukim glory bilong hem, olketa nambawan samting abaotem hem, strong and wei for hapi hem long ples wea hem stap.” (1 Chron. 16:7, 27) Ethan wea raetem disfala psalm hem sei: “Jehovah, olketa pipol wea praisem iu olketa hapi. Olketa wakabaot followim laet wea kam from iu. Long full day olketa hapi long nem bilong iu, and raeteous wei bilong iu hem mekhae long olketa.”—Ps. 89:15, 16.

11 Wei for evritaem ting raonem olketa gud samting wea Jehovah duim for iumi, savve mekem iumi sure wei wea hem rul hem barava gud. Iumi bae garem tingting olsem man wea raetem psalm wea sei: “For stap wanfala day long courtyard bilong iu hem gud winim for stap wan thousand day long nara ples!” (Ps. 84:10) Jehovah nao wakem iumi so hem savve long samting wea bae mekem iumi hapi. Hem kaen tumas and hem givim iumi staka gud samting. Eni samting wea Jehovah laekem iumi for duim hem for helpem iumi. Nomata sapos iumi mas mekem samfala sakrifaes, bae iumi evritaem hapi sapos iumi obeyim Jehovah.—Readim Isaiah 48:17.

w14 10/15 10 ¶14

Garem Strongfala Faith Long Kingdom

14 Jehovah talem wanfala promis long King David. Datfala promis hem agreement wea God mekem witim David. (Readim 2 Samuel 7:12, 16.) Jehovah promisim David bae Messiah kam from laen bilong hem. (Luke 1:30-33) Taem Jehovah duim datwan, hem helpem pipol for luksavve Messiah bae kam from laen bilong David. Jehovah sei datwan wea kam from laen bilong David bae “garem raet” for kamap King long datfala Messiah Kingdom. (Ezek. 21:25-27) Rul bilong David bae “gohed for olowe” bikos Jesus, wea kam from laen bilong David, bae “laef for olowe. Rul bilong hem bae stap for olowe, olsem sun hem stap for olowe.” (Ps. 89:34-37) Iumi sure olketa gud samting wea datfala Kingdom bae duim bae no savve finis, and no enitaem rul bilong Jesus bae duim nogud samting!

Faendem Gudfala Point

cl 281 ¶4-5

“Iu Nomoa Iu Loyal”

4 “Loyal fasin” wea Hebrew Scripture storyim hem kaenfala fasin wea showaot long loving wei, go kasem taem hem fulfillim purpose bilong hem for datfala samting. Moa samting hem insaed long diswan winim faithful fasin. Diswan mas tru bikos man maet faithful long samting from hem tingim diswan olsem responsibility bilong hem nomoa. Long narasaed, loyal fasin kamaot from love. And tu, datfala word “faithful” hem fitim olketa samting wea no garem laef. Olsem example, man wea raetem psalm kolem moon “wanfala faithful witness long skae.” (Psalm 89:37) Bat iumi kanduit sei moon hem loyal. Why? Bikos loyal fasin hem wei for showimaot love—wea olketa samting wea no garem laef kanduit for showimaot.

5 Long Bible, loyal fasin hem minim for showim feeling. Fasin hia savve showaot nomoa sapos man wea showimaot loyal fasin hem fren witim datwan wea hem showimaot loyal fasin long hem. Kaen loyal fasin olsem hem no olabaot. Hem no olsem olketa wave bilong sea wea wind blowim go and kam. Bat long wei wea difren, loyal fasin, or loyal love, hem stedy and strong for winim nomata barava hard samting.

SEPTEMBER 30–OCTOBER 6

GUD SAMTING FROM BIBLE PSALMS 90-91

For Laef Longtaem, Trustim Jehovah

wp19.3 5 ¶3-5

Lukaotem Eni Wei for Laef Longtaem

Staka scientist talem hao nomata enikaen treatment stap for mekem man no kamap olo, olketa treatment hia no savve mekem man for laef longtaem go moa. Hem tru, start lo mek-19 century kasem distaem, pipol gohed for laef longtaem. Diswan from pipol stap healthy, staka medicine stap for helpem pipol no sik, and olketa nara medicine stap for finisim samfala sik. Samfala scientist luksavve pipol distaem bae no savve laef winim 70 or 80 years.

Samting olsem 3,500 year go finis, Moses, wanfala man wea raetem wanfala buk lo Bible hem sei: “Laef blong mifala save kasem seventi yia nomoa, o sapos bodi blong mifala hemi strong bae mifala save kasem eiti yia. Nomata olsem, plande trabol an sore nomoa save kasem mifala. Ya, no long taem nomoa mifala dae nao.” (Sams 90:10) Nomata olketa man trae for duim enikaen samting for mekem iumi gohed laef longtaem, samting wea Moses talem hem tru.

Bat samfala animal lo sea olsem red sea urchin and wanfala type quahog clam savve laef for winim 200 year and olketa tree olsem giant sequoia savve laef for tu-thri thousand year. Taem iumi markem laef blo iumi witim olketa samting hia, diswan mekem iumi askem disfala kwestin, ‘Waswe, laef hem for 70 or 80 year nomoa?

wp19.1 5, box

Hu Nao Nem Bilong God?

Staka pipol nao garem datfala kwestin. Maet iu tu wanfala. Maet pipol askem kwestin hia bikos olketa garem tingting olsem: Sapos samwan wakem universe and evri samting insaed, hu nao wakem God?

Olketa scientist sei evri samting long universe hem garem start. Diswan hem fitim wanem firstfala verse long Bible talem wea sei: “Long firstaem, God wakem skae and earth.”—Genesis 1:1, NW.

Hem no mek sense for sei universe hem wakem hemseleva. For wanfala samting hem stap, samwan nao mas wakem. Sapos nomoa, disfala full universe, and iumi olketa man tu, bae no stap distaem. Sapos samwan no wakem wanfala samting, then datfala samting bae no stap tu. So wanfala creator mas stap! Hem wanfala spirit wea garem bigfala paoa and nem bilong hem Jehovah.—John 4:24.

Bible sei olsem abaotem God: “God, bifoa long taem wea yu wakem disfala wol an yu no mekem olketa maonten yet, yu bin stap olowe finis. Yu nao yu God, an bae yu gohed fo stap olowe nao.” (Sams 90:2) So, God no garem start. Gogo, hem start for wakem disfala universe.—Revelation 4:11.

w22.06 18 ¶16-17

Love blo Jehovah Savve Helpem Iumi for No Fraet

16 Satan savve iumi no laek for dae. And hem sei iumi bae willing for duim eni samting for sevem laef blo iumi, nomata for duim samting wea bae mekem iumi no faithful lo Jehovah tu. (Job 2:4, 5) Bat hem no tru! Nomata olsem, from Satan garem paoa for “mekem pipol for dae,” hem iusim datfala feeling for no laek dae for trae mekem iumi no obeyim Jehovah. (Heb. 2:14, 15) Satan savve iusim pipol for mekem iumi fraetem dae. For example, olketa wea againstim iumi savve sei olketa bae killim iumi dae sapos iumi no stop for worshipim Jehovah. Or maet iumi kasem big sik, and olketa doctor or olketa famili member wea no Witness laek forcem iumi for tekem blood transfusion, wea datwan hem brekem law blo God. Or samwan maet encouragem iumi for acceptim wanfala treatment wea bae mekem iumi no followim olketa Bible principle.

17 Nomata iumi maet dae, iumi savve Jehovah bae gohed for lovem iumi. (Readim Rome 8:37-39.) Taem samwan wea Jehovah lovem hem dae, hem bae gohed tingim datfala man olsem hem laef nomoa. (Luke 20:37, 38) Jehovah laekem tumas for mekem olketa for laef bak. (Job 14:15) Hem sendem kam spesol Son blo hem for dae for iumi mekem iumi savve “kasem laef olowe.” (John 3:16) Iumi sure Jehovah barava lovem iumi. So iumi no laek for lusim hem taem iumi sik or pipol sei olketa bae killim iumi dae. Bat iumi depend lo Jehovah for comfortim iumi, and givim iumi wisdom and strong for deal witim datwan. Hem nao wanem Valérie and hasband blo hem duim.—Ps. 41:3.

Faendem Gudfala Point

wp17.5 5

Waswe, Each Wan Garem Guardian Angel?

Bible no teachim each wan hem garem guardian angel [angel wea protectim man]. Wantaem Jesus sei: “Iufala mas no les long eni disaepol bilong mi bikos, iu savve, olketa angel bilong olketa long heven evritaem lukim feis bilong Dadi bilong mi wea stap long heven.” (Matthew 18:10) Long hia Jesus no minim each wan garem guardian angel, bat hem storyim wei wea olketa angel barava laek for helpem each disaepol. So olketa wea worshipim God bae no duim eni samting wea bae putim laef bilong olketa long danger bikos olketa sei angel bilong God bae protectim olketa.

Waswe, datwan minim olketa angel no savve helpem olketa man? Nomoa. (Psalm 91:11) Samfala pipol barava bilivim God iusim olketa angel for protectim and leadim olketa. Kenneth, wea iumi storyim long firstfala article, hem tu bilivim datwan. Maet wanem hem bilivim hem stret bat iumi no sure. Taem Olketa Jehovah’s Witness duim waka bilong olketa for preach, staka taem olketa luksavve olketa angel nao helpem olketa. Bat from iumi no lukim olketa angel, iumi no savve hao and long wanem taem nao olketa helpem pipol. Nomata olsem, hem gud for iumi thankiu long God taem hem helpem iumi.—Colossae 3:15; James 1:17, 18

OCTOBER 7-13

GUD SAMTING FROM BIBLE PSALMS 92-95

For Servem Jehovah Hem Best Disison lo Laef!

w18.04 26 ¶5

Olketa Young Wan, Waswe, Iu Markem Olketa Spiritual Goal?

5 First reason why iumi shud markem olketa spiritual goal, hem bikos datwan showimaot iumi tinghae long wanem Jehovah duim for iumi and love bilong hem. Man wea raetem Psalm hem sei: “Hemi gud tumas fo mi talem tengkiu long yu . . . Lod [Jehovah], mi hapi tumas from olketa bikfala waka blong yu. Ya, mi singsing fo preisim yu fo olketa samting wea yu bin duim fo mi.” (Sams 92:1, 4) Olketa young wan, tingim evri samting wea Jehovah givim long iu. Hem helpem iu for savve long hem, and hem givim iu laef, Bible, kongregeson, and nambawan hope for future. Taem iu markem olketa spiritual goal, iu showimaot long Jehovah iu tinghae long evri samting hia and datwan mekem iu fren gud witim hem.

w18.11 20 ¶8

Tingting Bilong Hu Nao Iu Followim?

8 Jehovah hem olsem gudfala dadi wea laekem olketa pikinini bilong hem for garem barava gudfala laef. (Aesaea 48:17, 18) So hem teachim iumi olketa principle saed long wei bilong iumi and hao iumi shud treatim olketa narawan. Hem laekem iumi for lane for ting long wanfala samting long sem wei wea hem ting long datwan and for followim olketa standard bilong hem. Hem no stopem iumi for duim samting, bat hem helpem iumi for ting raonem and minim gud olketa samting. (Sams 92:5; Provebs 2:1-5; Aesaea 55:9) Taem olsem, iumi savve mekem olketa wise disison and long semtaem iumi free for chusim samting wea iumiseleva laekem. Datwan bae mekem iumi barava hapi. (Sams 1:2, 3) Taem iumi garem tingting bilong Jehovah, iumi savve kasem staka gud samting!

w20.01 19 ¶18

Iumi Spesol lo Jehovah!

18 Taem iumi gogo for olo, iumi savve sure dat Jehovah still garem waka for iumi duim. (Sams 92:1, 4) Jesus teachim hao nomata maet iumi no fit for duim staka samting or iumi tingse wanem iumi duim hem smol tumas, Jehovah barava tinghae lo wanem iumi fit for duim lo waka blo hem. (Luke 21:2-4) So ting abaotem wanem iu fit for duim. Olsem example, gohed story abaotem Jehovah, prea for olketa brata and sista, and encouragem olketa narawan for gohed faithful. Jehovah laekem iumi for waka witim hem bikos iumi willing for obeyim hem, and no bikos iumi fit for duim staka samting.—1 Cor. 3:5-9.

Faendem Gudfala Point

cl 176 ¶18

“O . . .Wisdom . . . Bilong God Hem Deep Tumas!”

18 Lukim hao aposol Paul storyim disfala wei wea wisdom bilong Jehovah hem barava spesol: “O riches and wisdom and savve bilong God hem deep tumas! Man kanduit minim olketa judgment and wei bilong hem!” (Romans 11:33) Taem hem startim disfala verse witim toktok “O,” Paul showimaot strongfala feeling, wea long disfala verse hem bigfala respect. Datfala Greek word wea hem chusim for “deep” hem klosap semsem witim word for “hol wea no garem botom.” So, olketa word hia mekem iumi garem barava kliafala piksa long mind. Taem iumi tingim wisdom bilong Jehovah, hem olsem iumi luk go insaed wanfala big hol wea no garem botom, wea iumi no savve lukim evribit deep bilong wisdom bilong hem, and tu hem hard for iumi mekem wanfala list long evri part bilong hem. (Psalm 92:5) Datwan mekem iumi barava feel hambol.

OCTOBER 14-20

GUD SAMTING FROM BIBLE PSALMS 96-99

“Talemaot Gud Nius”!

w11 4/1 6 ¶1-2

Wanem Nao Datfala Gud Nius?

OLKETA Christian mas preachim “gud nius abaotem kingdom” taem olketa storyim long olketa narawan, and storyim datfala Kingdom hem gavman wea bae rulim earth long stretfala wei. Bat Bible iusim toktok “gud nius” abaotem olketa nara samting tu. Example hem olsem, “gud nius abaotem wei for sev” (Psalm 96:2); “gud nius bilong God” (Romans 15:16); and “gud nius abaotem Jesus Christ.”—Mark 1:1.

Diswan minim, datfala gud nius hem evri tru samting wea Jesus storyim and wea olketa disaepol raet abaotem. Bifor Jesus go ap long heven, hem talem olketa follower bilong hem: “So iufala go and teachim pipol long evri kantri for kamap disaepol bilong mi. Baptaesim olketa hia long nem bilong Dadi and bilong Son and bilong holy spirit. Teachim olketa for followim evri samting wea mi laekem iufala for duim.” (Matthew 28:19, 20) So waka bilong olketa tru Christian hem no just for talem olketa narawan abaotem Kingdom, olketa mas trae tu for helpem pipol kamap disaepol.

w12 10/1 16 ¶1

Wanem nao Judgment Day?

Olsem datfala piksa long raet saed showim, plande pipol tingse long Judgment Day staka billion wea dae finis, soul bilong olketa bae kam front long throne bilong God and hem bae judgem olketa followim wanem olketa duim. Samfala hia bae kasem reward long heven and olketa narawan bae safa long hell. Bat Bible sei disfala Judgment Day hem for stretem evri nogud samting wea pipol kasem. (Psalm 96:13) God markem Jesus nao for Judge and for stretem evri samting.—Readim Isaiah 11:1-5; Acts 17:31.

w12 9/15 12 ¶18-19

Peace for Wan Thousand Year, and for Olowe!

18 Taem Satan switim olketa man for againstim Jehovah, datwan spoelem wei wea evriwan long universe olketa wan mind. Bat start kam long 1914, Kingdom wea Christ rulim hem duim samting for mekem evriwan long universe garem peace and wan mind moa. (Eph. 1:9, 10) Staka nambawan samting wea “iumi no savve lukim” bikos olketa no happen yet, bae olketa happen long datfala wan thousand year rul bilong Christ. Then “long end,” wea datwan minim end bilong datfala wan thousand year rul bilong Christ, wanem nao bae happen? Jesus no laek for tekovarem rul bilong Jehovah nomata hem kasem “paoa . . . ovarem evri samting long heven and earth.” From hem hambol hem bae “givim datfala kingdom go long God, wea hem nao God bilong hem and Dadi bilong hem.” Jesus bae iusim spesol position and paoa wea hem garem for “mekhae long God, wea hem Dadi bilong iumi long heven.”—Matt. 28:18; Phil. 2:9-11.

19 Long datfala taem, evriwan long earth wea stap anda long rul bilong datfala Kingdom bae olketa perfect. From olketa hambol olsem Jesus, bae olketa hapi for stap anda long rul bilong Jehovah. Taem olketa kasem datfala last test, datwan hem chance for olketa showimaot olketa laekem Jehovah for rulim olketa. (Rev. 20:7-10) Bihaen datwan, Jehovah bae distroem evriwan wea no laek for stap anda long rul bilong hem, nomata hem angel or man, and bae olketa hia no laef bak moa. Long datfala taem evriwan long famili bilong Jehovah long heven and earth bae praisem Hem, and Jehovah bae hem “rul ovarem evriwan.” Datwan bae hem wanfala nambawan taem!—Readim Psalm 99:1-3.

Faendem Gudfala Point

it-2-E 994

Song

Disfala toktok “wanfala niu song” hem no just stap lo olketa Psalm bat hem stap tu lo buk blo Isaiah and aposol John. (Ps 33:3; 40:3; 96:1; 98:1; 144:9; 149:1; Isa 42:10; Re 5:9; 14:3) Taem iumi luk lo olketa context blo datfala toktok “niu song,” hem helpem iumi for lukim dat olketa savve singim niu song olsem taem wanfala niu situation kamap saed lo sovereign rul blo Jehovah ovarem universe. Olsem Psalm 96:10 sei: “Jehovah hem kamap King.” Olketa niu situation wea kamap saed lo wei wea Jehovah rul, and hao datwan affectim heven and earth, hem olketa topic wea olketa sing abaotem insaed datfala “niu song.”—Ps 96:11-13; 98:9; Isa 42:10, 13.

OCTOBER 21-27

GUD SAMTING FROM BIBLE PSALMS 100-102

Showimaot Iumi Tinghae lo Loyal Love blo Jehovah

w23.03 12 ¶18-19

Hao for Iu Redi for Baptaes

18 Love blo iu for Jehovah, hem nao best wei wea iu garem. (Readim Proverbs 3:3; Provebs 3:4-6, SIPB.) If iu barava lovem Jehovah bae iu savve deal witim olketa challenge wea iu feisim. Staka taem Bible storyim loyal love blo Jehovah for olketa pipol blo hem. From hem garem loyal love for olketa, bae hem no lusim olketa or stop for lovem olketa. (Sams 100:5, SIPB) Jehovah creatim iumi for followim olketa wei blo hem. (Gen. 1:26) So hao nao iu savve showimaot diskaen love?

19 First samting hem for thankiu lo Jehovah. (1 Thess. 5:18) Each day trae for tingim, ‘Hao nao Jehovah showimaot hem lovem mi?’ Then mek sure taem iu prea, talem thankiu lo Jehovah for olketa samting wea hem duim for iu. Olsem aposol Paul, iu need for luksavve lo olketa gud samting wea Jehovah duim wea showimaot hem lovem iu. (Readim Galatia 2:20.) Hem gud for iu tingim, ‘Waswe, mi laek showimaot mi lovem hem tu?’ Taem iu lovem Jehovah iu bae no foldaon lo eni temptation and bae iu savve deal witim eni challenge wea iu feisim. Love blo iu for Jehovah bae helpem iu for gohed followim spiritual schedule blo iu, and for showimaot iu lovem hem evriday.

w23.02 17 ¶10

“Gohed for Garem Gudfala Tingting and Gohed for Lukaot”

10 Samfala samting wea iumi mas avoidim nao hem for switim samwan wea no marit partner blo iumi, ova tumas for drinkim alcohol, ova tumas lo kaikai, and for tok spoelem narawan. Iumi mas no watchim tu olketa raf entertainment, pornography, and samfala samting olsem. (Sams 101:3, SIPB) Devil, wea hem enemy blo iumi, hem gohed lukaotem eni chance for spoelem frenship blo iumi witim Jehovah. (1 Pet. 5:8) If iumi no careful, Satan savve duim samting for mekem iumi for garem mind and heart wea jealous, no honest, greedy, heit, praod, and for keepim kros. (Gal. 5:19-21) Firstaem, maet iumi tingse olketa feeling hia bae no spoelem iumi. Bat if iumi no duim samting kwiktaem for stopem olketa feeling hia, bae gogo olketa spoelem iumi.—Jas. 1:14, 15.

w11 7/15 16 ¶7-8

Waswe, Bae Iu Obeyim Olketa Warning Bilong Jehovah?

7 Wanem nao iumi mas duim for stap klia long olketa laea teacher? Iumi mas no story witim olketa or letem olketa kam long haos bilong iumi. Iumi mas no readim olketa buk bilong olketa, lukluk long olketa long TV, readim wanem olketa putim long Internet, or raetem long Internet eni samting abaotem wanem olketa talem. Why nao iumi disaed strong for stap klia long olketa? Hem bikos iumi lovem “God wea evritaem talem tru samting.” Iumi no laek for lisin long olketa laea teaching wea againstim tru samting long Bible. (Ps. 31:5; John 17:17) Iumi tinghae tu long organization bilong Jehovah wea teachim iumi olketa tru samting. Organization teachim iumi abaotem nem bilong God, Jehovah, mining bilong datfala nem, plan bilong hem for earth, wanem bae happen long iumi taem iumi dae, and wei wea olketa wea dae bae laef bak. Waswe, iu tingim hapi wea iu kasem taem iu lanem datwan and olketa nara tru samting long Bible? No letem olketa laea teacher mekem iu for againstim organization bilong Jehovah wea teachim iu tru samting long Bible—John 6:66-69.

8 Nomata wanem olketa laea teacher talem, iumi bae no followim olketa! Iumi no garem eni reason for lisin long pipol wea olsem well wea no garem eni wata. Sapos iumi lisin long olketa, bae iumi sorre bihaen. Dastawe iumi disaed strong for faithful long Jehovah and organization bilong hem. No enitaem organization bilong Jehovah duim nogud samting long iumi. Hem evritaem givim wata wea klin, wea hem nao tru samting long Bible.—Isa. 55:1-3; Matt. 24:45-47.

Faendem Gudfala Point

it-2-E 596

Pelican

Taem pelican kaikai gogo hem fulap, staka taem hem savve flae go lo ples wea hem stap seleva, standap and luk sorre lo there, and daonem hed blo hem lo shoulder blo hemseleva. Hem savve stay kwaet fogud, and if man stap farawe and luk kam, hem bae tingse hem wanfala white ston nomoa. Staka taem bird hia savve stay olsem for staka hour, dastawe datfala man wea raet psalm hem iusim example blo disfala bird for showimaot feeling for sorre wea hem garem, hem sei: “Mi olsem pelican bird lo wilderness.” (Ps 102:6) Lo disfala verse, toktok “wilderness” hem no minim wanfala desert, bat hem minim ples wea no eniwan stap, maet lo wanfala swamp. Nomata distaem during samfala season, olketa swamp lo northern Jordan Valley still garem olketa pelican. Thrifala type pelican nao stap lo Israel. Main wan hem datfala eastern white pelican (Pelecanus onocrotalus); narawan hem Dalmatian pelican (Pelecanus crispus) and hem garem tu datfala pink-backed pelican (Pelecanus rufescens) bat hem no staka.

Pelican savve laek for stap lo olketa bush, wea no eni pipol stap for disturbim olketa. Bae hem mekem olketa nest blo hem lo there for olketa pikinini blo hem and for hem rest lo there bihaen hem fishing. Bikos hem laek for stap seleva lo olketa ples wea no eni pipol, Bible iusim disfala bird olsem example blo wei for sorre and wei for distroe evribit. Lo story blo Isaiah abaotem hao Edom bae distroe, Isaiah hem sei olketa pelican bae tek ovarem datfala land. (Isa 34:11) Zephaniah hem talem profesi abaotem hao olketa pelican bae stap lo olketa hed blo post lo Nineveh, wea datwan piksarem hao ples hia bae distroe and no eni pipol bae stap lo there.—Zep 2:13, 14.

OCTOBER 28–NOVEMBER 3

GUD SAMTING FROM BIBLE PSALMS 103-104

“Hem Tingim Dat Iumi Dust Nomoa”

w23.07 21 ¶5

Followim Example blo Jehovah for Flexible

5 From Jehovah hambol and tingim narawan, hem flexible. For example, taem Jehovah redi for distroem nogud pipol lo Sodom, hem duim samting wea showim hem hambol. Jehovah sendem tufala angel for talem Lot for ranawe lo maunten. Bat Lot fraet for go lo there. So hem begim Jehovah for allowim hem and famili for ranawe go lo Zoar, wanfala smol taon wea Jehovah redi for distroem. Hem fitim for Jehovah insist for Lot mas followim instruction blo Hem. Bat, Jehovah letem Lot for ranawe go lo Zoar and no distroem datfala taon. (Gen. 19:18-22) Staka handred year bihaen, Jehovah tingim tu pipol lo Nineveh. Hem sendem profet Jonah for talemaot hao datfala city and nogud pipol lo there bae distroe. Bat taem pipol lo Nineveh repent, Jehovah sorre lo olketa and no distroem datfala city.—Jonah 3:1, 10; 4:10, 11.

w23.09 6-7 ¶16-18

Trustim Jehovah Olsem Samson

16 Nomata Samson kasem olketa barava nogud samting from mistek blo hem, datwan no stopem hem for duim will blo Jehovah. Nomata if iumi mekem mistek and kasem kaonsel or lusim wanfala privilege, iumi mas no givap. Tingim hao Jehovah redi for forgivim iumi. (Ps. 103:8-10) Nomata iumi mekem mistek, Jehovah savve givim strong lo iumi for duim will blo hem, olsem hem duim for Samson.

17 Tingim example blo Michael, wanfala young brata. Hem busy lo service blo Jehovah, hem ministerial servant, and regular pioneer. Bat hem duim wanfala mistek wea mekem hem for lusim olketa privilege blo hem lo kongregeson. Hem sei: “Mi barava busy lo service blo mi for Jehovah. Then seknomoa, mi feel olsem mi no savve duim eniting for Jehovah nao. Mi no tingim dat Jehovah bae lusim mi, bat mi no sure if gogo bae mi fren gud moa witim Jehovah olsem bifor or kasem moa olketa privilege lo kongregeson.”

18 Gud samting nao, Michael no givap. Hem sei: “Mi focus lo frenship mi witim Jehovah taem mi prea evritaem, study, and ting raonem wat mi studyim.” Gogo, Michael kasem bak olketa privilege lo kongregeson. Distaem hem wanfala elder and regular pioneer. Hem sei: “Sapot and encouragement wea mi kasem, especially from olketa elder, helpem mi for luksavve Jehovah still lovem mi. Distaem mi savve duim moa waka insaed kongregeson witim klin konsens. Wanem mi experiencem helpem mi for luksavve Jehovah bae forgivim eniwan wea barava repent.” Iumi savve sure Jehovah bae iusim iumi and blessim iumi tu nomata iumi mekem mistek, bat iumi waka hard for stretem and gohed for trustim hem.—Ps. 86:5; Prov. 28:13.

w23.05 26 ¶2

Iu Savve Kasem Olketa Spiritual Goal blo Iu

2 If iu garem goal wea iu no kasem yet, no feel discourage. For kasem wanfala goal hem needim taem and hard waka. Wei wea iu laek kasem goal blo iu showimaot iu tinghae lo frenship blo iu witim Jehovah and laek for givim hem best blo iu. Jehovah tinghae lo wei wea iu traem best. Hem no expectim iu for duim moa samting winim wanem iu fit for duim. (Ps. 103:14; Mic. 6:8) So goal blo iu shud fitim situation blo iu. If olsem, hao nao for iu kasem goal blo iu? Bae iumi storyim samfala idea.

Faendem Gudfala Point

cl 55 ¶18

Paoa for Create—“Datwan wea Wakem Heven and Earth”

18 Wanem nao iumi lanem from wei wea Jehovah iusim paoa bilong hem for create? Iumi garem respect and givim praise for planti difren kaen samting wea hem creatim. Wanfala man wea raetem psalm sei: “Olketa waka bilong iu planti tumas, O Jehovah! . . . Earth hem fulap witim olketa samting wea iu wakem.” (Psalm 104:24) Datwan tru tumas! Olketa scientist sei winim wan million samting wea laef nao stap long earth; nomata olsem, samfala sei luk olsem staka million moa stap. Man wea savve drawim piksa maet samfala taem no savve nao wanem for drawim. Bat, wei for Jehovah create—paoa wea hem garem for wakem and creatim planti niu and difren samting—hem no savve finis.

    Solomon Islands Pidgin Pablikeson (1988-2024)
    Log Aot
    Log In
    • Solomon Islands Pidgin
    • Sharem
    • Settings
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Setting
    • JW.ORG
    • Log In
    Sharem