Olketa Reference for Laef and Ministry Meeting Buk
© 2024 Watch Tower Bible and Tract Society of Pennsylvania
JULY 1-7
GUD SAMTING FROM BIBLE PSALM 57-59
Jehovah Spoelem Olketa wea Againstim Pipol blo Hem
“Long Evri Farawe Ples Long Earth”
14 Bifor olketa enemy killim dae Stephen, hem no fraet for preach long olketa. (Acts 6:5; 7:54-60) Bihaen Stephen dae, pipol “barava spoelem” olketa Christian. So evri disaepol go stap nao long olketa nara ples long Judea and Samaria and olketa aposol nomoa stap long Jerusalem. Bat datwan no stopem olketa for preach. Philip go preach long Samaria “abaotem Christ” and staka pipol biliv. (Acts 8:1-8, 14, 15, 25) Luke sei tu: “Olketa disaepol wea go stap long olketa farawe ples olsem Phoenicia, Cyprus, and Antioch bikos long hard taem wea kamap bihaen Stephen hem dae, olketa talemaot datfala message long olketa Jew nomoa. Bat samfala disaepol from Cyprus and Cyrene kam long Antioch and talemaot datfala gud nius abaotem Lord Jesus long pipol wea story long Greek languis.” (Acts 11:19, 20) Nomata pipol spoelem olketa Christian, datwan mekem staka pipol moa for herem message abaotem Kingdom.
15 Semkaen samting happen tu long Soviet Union. Long olketa year bihaen 1950, gavman forcem staka thousand Jehovah’s Witness for go stap long Siberia. From olketa Witness stap long olketa difren ples long Siberia, plande pipol herem gud nius. Hard for evri Witness hia garem selen for travel long ples olsem wea 10,000 kilometer from hom bilong olketa for talemaot gud nius! Bat gavman nao sendem olketa long there. “Wanfala brata sei: “Olketa bigman long gavman nao helpem staka thousand pipol long Siberia for savve long truth.”
Faendem Gudfala Point
“Iufala Mas Faithful and Gohed Strong”
16 Gohed garem heart wea faithful. King David talem strongfala love blo hem for Jehovah taem hem singsing olsem: “Mi garem heart wea faithful, O God.” (Ps. 57:7) Iumi tu savve garem heart olsem from iumi barava trustim Jehovah. (Readim Psalm 112:7.) Tingim hao diswan helpem Bob wea iumi storyim finis. Taem doctor talem hem olketa bae keepim samfala blood redi incase olketa needim, Bob talem stret if olketa bae givim hem blood, hem bae lusim hospital semtaem. Bihaen Bob sei: “Mi barava sure lo wat bae mi duim, and mi no wari.”
17 Bob gohed faithful bikos hem disaed longtaem finis for stand strong bifor hem go lo hospital. First samting, hem laekem tumas for mekem Jehovah hapi. Mek-tu, hem studyim gud wat Bible and olketa pablikeson blo iumi talem abaotem hao laef and blood hem holy. Mek-thri, hem barava sure hem bae kasem gud samting if hem followim direction blo Jehovah. Iumi tu savve garem heart wea faithful nomata wanem hard taem nao iumi kasem.
JULY 8-14
GUD SAMTING FROM BIBLE PSALM 60-62
Jehovah Mekem Iumi Feel Sef, Kasem Protection, and Stedy
it-2-E 1118 ¶7
Taoa
Lo Tokpiksa wei. Olketa wea garem faith and obeyim Jehovah bae kasem protection, David hem sing olsem: “Iu [Jehovah] nao sef ples blo mi, Wanfala strong taoa wea protectim mi from enemy.” (Ps 61:3) Olketa wea savve lo mining blo nem blo hem and trustim and faithful for stand for datfala nem, olketa no fraetem eni samting, bikos “Nem blo Jehovah hem wanfala strong taoa. Raeteous man hem ran go insaed and kasem protection.”—Pr 18:10; comparem 1Sa 17:45-47.
it-2-E 1084 ¶8
Tent
Bible iusim tu disfala toktok tent lo nara tokpiksa wei, lo olketa difren taem. Tent hem ples wea samwan savve rest and kasem protection. (Ge 18:1) Lo olketa kastom lo bifor saed lo wei for showimaot welkam, olketa visitor expectim taem olketa kasem tent blo eniwan, olketa bae kasem respect and olketa lo datfala tent bae lukaftarem olketa gud. And tu, taem Revelation 7:15 sei abaotem datfala big crowd dat God “bae kavarem olketa witim tent bilong hem,” datwan minim protection and wei for kea. (Ps 61:3, 4) Isaiah storyim tu wei wea waef blo God, Zion, bae redyim ples for olketa son wea hem bae garem. Olketa talem hem for “openem big olketa kaleko lo bigfala tabernacle.” (Isa 54:2) So hem faendem bigfala spes moa mekem hem savve protectim olketa pikinini blo hem.
Olketa Law Bilong God Stap for Helpem Iumi
14 Law bilong God kanduit change. Insaed hardfala taem wea iumi stap distaem, Jehovah hem stedy olsem wanfala strongfala ston, wea stap for olowe. (Psalm 90:2) Hem sei olsem abaotem hemseleva: “Mi nao Jehovah; mi nating change.” (Malachi 3:6) Man fit for trustim evribit olketa mark bilong God, wea stap insaed long Bible—wea difren evribit from olketa idea bilong man wea change evritaem. (James 1:17) Olsem example, for planti year olketa doctor bilong mind apim wei for isisi long pikinini, bat bihaen samfala changem tingting bilong olketa and sei advaes bilong olketa hem rong. Olketa standard bilong world long diswan hem change evritaem olsem wind wea go and kam. Nomata olsem, Word bilong Jehovah hem nating change. For planti handred year, Bible givim kaonsel long hao for disciplinem pikinini witim love. Aposol Paul raet olsem: “Iufala dadi, no mekem olketa pikinini bilong iufala kros, bat go ahed for trainim olketa long discipline and wei for stretem tingting wea kam from Jehovah.” (Ephesians 6:4) Iumi kasem comfort for savve iumi fit for depend long olketa standard bilong Jehovah; olketa bae no change!
Faendem Gudfala Point
Olketa Main Point From Buk Tu Bilong Psalms
62:11. God no need for depend long eniwan or eni samting for givim paoa long hem. Hem nao garem evri paoa. ‘Strong hem bilong Jehovah.’
JULY 15-21
GUD SAMTING FROM BIBLE PSALM 63-65
“Loyal Love blo Iu Hem Gud Go Moa Winim Laef”
Hu Nao Bae Separatem Iumi From Love Bilong God?
17 Hao important nao love bilong God long iu? Waswe, iu feel olsem David, wea raet olsem: “Bikos loving-kaeness bilong iu hem moabeta winim laef, mouth bilong miseleva bae praisem iu. Dastawe mi bae blessim iu long full laef bilong mi; long nem bilong iu mi bae apim hand bilong mi”? (Psalm 63:3, 4) Waswe, eni samting disfala world savve givim hem moabeta winim wei for kasem love bilong God and loyal wei for fren witim hem? Olsem example, waswe, wei for aftarem big waka for selen hem moabeta winim wei for garem peace long mind and hapi wea kamaot from wei for fren klos witim God? (Luke 12:15) Samfala Christian feisim wei for chus for rejectim Jehovah or dae. Datwan nao happen long planti Jehovah’s Witness long concentration camp bilong olketa Nazi long World War II. Klosap evri Christian brata bilong iumi chus for stap insaed love bilong God, and willing for feisim dae sapos no wei nao. Olketa wea loyal for stap insaed love bilong hem savve sure olketa bae kasem future for olowe from God, wanfala samting wea world no savve givim iumi. (Mark 8:34-36) Bat moa samting hem insaed diswan winim laef olowe.
18 Nomata iumi kanduit laef olowe sapos Jehovah no givim, trae for tingim wei for garem longfala laef and Creator no insaed diswan. Laef bae emti, and no garem trufala purpose. Jehovah givim pipol bilong hem waka for duim wea mekem olketa satisfae long olketa last day distaem. So iumi savve trustim hao taem Jehovah, Nambawan Man Bilong Purpose hem givim laef olowe, living bae fulap witim olketa interesting, gudfala samting for iumi lanem and duim. (Ecclesiastes 3:11) Nomata haomas samting iumi lanem long planti thousand year long future, iumi bae no minim evribit “hao deep nao riches and wisdom and savve bilong God.”—Romans 11:33.
‘Talem Thankiu for Evri Samting’
Hem barava fitim for iumi thankiu lo God. Staka taem maet iu tingim olketa spiritual and physical present wea hem givim iu and wea hem gohed for provaedem. (Diutronomi 8:17, 18; Acts 14:17) Winim wei for just tingim olketa gudfala wei blo Jehovah nomoa, hem gud for tekem taem for ting raonem staka blessing wea God givim lo iu and olketa wea iu lovem. Wei for ting raonem kaenfala fasin blo Creator blo iu, bae mekem iu tinghae go moa lo hem and bae helpem iu luksavve hao Jehovah lovem and tinghae lo iu.—1 John 4:9.
Evritaem Ting Raonem Olketa Spiritual Samting
7 Iumi mas waka hard for ting raonem and tingting strong long wanem iumi studyim. Dastawe hem gud for iumi ting raonem olketa spiritual samting taem iumi no taed tumas and long ples wea no eni samting savve disturbim iumi. David savve ting raonem olketa spiritual samting taem hem leidaon long bed long naet taem hem no savve sleep. (Ps. 63:6) Nomata Jesus hem perfect, hem go long ples wea kwaet for prea and ting raonem samting.—Luke 6:12.
Followim Jesus for Showimaot Love Taem Iumi Teach
6 Hem wei bilong iumi for story abaotem olketa samting wea iumi laekem tumas, and taem iumi duim olsem, pipol savve lukim hao iumi hapi tumas. Plande taem iumi duim olsem taem iumi story abaotem samwan wea iumi lovem. Iumi laek tumas for storyim wei bilong datfala man long olketa narawan. Iumi tok hae abaotem hem, respectim hem, and sapos pipol tok spoelem hem, iumi talem gud samting abaotem hem. Iumi duim olsem bikos iumi laekem narawan tu for laekem datfala man and olketa wei bilong hem.
Faendem Gudfala Point
w07-E 11/15 15 ¶6
Hao, Iu Strongim Olketa Narawan?
Hem isi tumas for distroem wanfala building winim for buildim wanfala niu wan. Datfala sem principle for distroem and buildim ap hem apply tu for olketa toktok wea iumi talem. From iumi evriwan no perfect, iumi savve mekem olketa mistek. King Solomon sei: “No eni raeteous man hem stap lo earth wea evritaem duim gud samting and no duim sin enitaem.” (Ecclesiastes 7:20) Hem isi tumas for lukim wik point blo narawan and talem nogud toktok wea savve spoelem hem. (Psalm 64:2-4) Bat for iumi talem olketa positive toktok evritaem, iumi need for garem skill for duim datwan.
JULY 22-28
GUD SAMTING FROM BIBLE PSALM 66-68
Jehovah Karem Load blo Iumi Evriday
Hao Jehovah Ansarem Olketa Prea blo Iumi
15 Staka taem Jehovah no ansarem olketa prea blo iumi lo spesol wei. Bat olketa ansa wea iumi kasem hem barava wat iumi needim for gohed faithful lo Jehovah. So trae for luksavve lo hao Jehovah ansarem olketa prea blo iu. Wanfala sista wea nem blo hem Yoko tingse Jehovah no ansarem olketa prea blo hem, bat then hem keepim record lo olketa samting wea hem askem lo Jehovah. Then gogo, hem luk bak moa lo notebuk blo hem and hem luksavve hao Jehovah ansarem staka prea blo hem, nomata samfala prea wea hem forgetim tu. So hem gud for samfala taem iumi need for stop and ting raonem hao Jehovah ansarem olketa prea blo iumi.—Ps. 66:19, 20.
w10-E 12/1 23 ¶6
Showimaot Iu Tingim Olketa Singol Parents
Jehovah iusim olketa man for raetem olketa song, or psalm, wea olketa Israelite bae singim lo taem blo worship. Imaginim encouragement wea olketa Israelite widow and olketa boy wea no garem dadi kasem taem olketa singim olketa toktok hia wea remindim olketa hao Jehovah hem “wanfala dadi” and “wanfala judge” for olketa and hem bae givim help wea olketa needim. (Psalm 68:5; 146:9) Iumi tu savve givim encouragement wea olketa singol parents bae no savve forgetim. Nomata bihaen 20 years, Ruth, wanfala singol parents still rememberim wantaem wea wanfala dadi wea garem experience sei lo hem: “Iu barava lukaftarem gud tufala son blo iu. Gohed duim diswan.” Ruth sei: “Olketa toktok hia barava helpem mi.” Tru tumas, “kaenfala toktok hem gud medicine” and savve encouragem wanfala singol parents winim wat iumi maet tingim. (Proverbs 15:4, Contemporary English Version) Hao, iu savve tingim eni naesfala toktok wea iu savve talem for praisem wanfala singol parents?
w09-E 4/1 31 ¶1
Dadi blo Olketa Pikinini wea No Garem Dadi
“Hem dadi blo olketa pikinini wea no garem dadi . . . hem God wea stap lo holy ples blo hem.” (Psalm 68:5) Olketa hia showim wanfala encouraging leson abaotem Jehovah God. Hem evritaem luksavve lo need blo olketa wea no garem eniwan for lukaftarem olketa. Hem tingim tumas olketa pikinini wea parents blo olketa dae and datwan showaot klia lo Law wea hem givim for olketa Israelite. Firstaem wea Bible storyim “pikinini wea no garem dadi” hem lo Exodus 22:22-24.
Jehovah Gohed for Helpem and Blessim Iumi
17 Readim Psalm 40:5. Goal blo samwan wea savve klaemapem olketa maunten hem for kasem top lo maunten. Bat hem savve stop lo samfala ples followim datfala maunten for enjoyim olketa samting wea hem lukim. Olsem tu, hem gud for stop samfala taem and ting raonem wanem Jehovah gohed duim for helpem iumi taem iumi feisim hard taem. Lo end blo each day, hem gud for tingim: ‘Hao nao Jehovah blessim mi tuday? Hao nao Jehovah gohed for helpem mi nomata hard taem hia hem no finis?’ Trae for luksavve nomata lo wanfala samting wea Jehovah duim for helpem iu.
Faendem Gudfala Point
Olketa Main Point From Buk Tu Bilong Psalms
68:18—Hu nao “olketa man wea olsem present”? Olketa hia samfala long olketa wea kamap prisoner taem pipol bilong God tekovarem Promis Land. Bihaen, olketa man hia kasem assignment for helpem olketa Levite long waka bilong olketa.—Ezra 8:20.
JULY 29–AUGUST 4
GUD SAMTING FROM BIBLE PSALM 69
Hao Psalm 69 Profesi Abaotem Olketa Samting wea Happen lo Jesus
Pipol Weitim Messiah for Kam
17 Pipol bae heitim Messiah nating nomoa. (Ps. 69:4) Jesus sei: “Mi duim olketa mirakol wea no eni nara man duim. Sapos olketa no lukim olketa mirakol hia, bae olketa no guilty long sin wea olketa duim. Bat olketa lukim samting wea mi duim and olketa heitim mi and Dadi bilong mi. Bat diswan hem happen mekem samting wea Law bilong olketa talem hem kamap tru, wea sei, ‘Olketa heitim mi nating nomoa.’” (John 15:24, 25) “Law” hia hem minim evri Scripture wea stap long datfala taem. (John 10:34; 12:34) Samting wea olketa Gospel storyim showimaot staka pipol heitim Jesus, wea main wan nao olketa bigman bilong Jew religion. Jesus sei: “Pipol long world no heitim iufala, bat olketa heitim mi bikos mi talemaot hao samting wea olketa duim hem nogud tumas.”—John 7:7.
Strong for Sapotim Tru Worship
7 Long taem bilong Pasova long 30 C.E., no longtaem bihaen Jesus startim ministry, hem duim samting wea showimaot hem strong for sapotim tru worship. Jesus and olketa disaepol kam long Jerusalem and olketa lukim pipol long temple “salem olketa buluka, sheepsheep, and kurukuru, and olketa man wea changem olketa difren selen tu sidaon long there.” Wanem nao Jesus duim? Datwan mekem olketa disaepol for tingim wanem?—Readim John 2:13-17.
8 Wanem Jesus duim and talem long datfala taem mekem olketa disaepol for tingim disfala profesi wea David raetem: “Mi lovem tumas haos bilong iu and mi tingim evritaem.” (Ps. 69:9) Why nao olketa tingim diswan? Hem bikos Jesus showimaot hem strong for duim samting, nomata laef bilong hem stap long danger. Olketa priest, olketa man wea teachim law, and olketa narawan nao letem pipol for duim bisnis long temple and for ravem pipol. From Jesus raosem olketa wea market insaed temple, datwan mekem hem kamap enemy bilong olketa bigman hia. Olketa disaepol luksavve Jesus ‘lovem tumas haos bilong God,’ wea minim hem strong for sapotim tru worship.
g95-E 10/22 31 ¶4
Hao, Iu Savve Dae If Heart blo Iu Brek?
Samfala sei wanfala samting wea kosim dae blo Jesus hem wei wea heart blo hem brek, olsem disfala profesi talem: “Olketa nogud toktok brekem heart blo mi, and garekil hia no savve heal nao.” (Psalm 69:20) Hao, olketa minim literal lo datfala toktok? Maet olsem, bikos lo olketa hour bifor Jesus hem dae, hem barava feelim bigfala pain, no just lo body bat lo feeling tu. (Matthew 27:46; Luke 22:44; Hebrew 5:7) And tu, heart blo hem brek dastawe “blood and wata” kamaot from ples wea olketa spiarim saed bele blo hem just bihaen hem dae. Taem heart or wanfala main blood vessel hem bosta, blood savve go insaed lo chest cavity or insaed lo pericardium, wea hem fluid wea stap raonem heart for protectim. Dastawe “blood and wata” kamaot from ples wea olketa spiarim.—John 19:34.
it-2-E 650
Poison Plant
Profesi abaotem Messiah storyim hao olketa givim hem wanfala “poison plant” for kaikaim. (Ps 69:21) Diswan happen bifor Jesus hem dae, olketa givim hem wine wea mix witim gall, bat taem hem teistim hem les for drinkim datwan bikos olketa laek mekem hem for safa go moa. Lo record wea showim taem disfala profesi hem fulfill, Matthew (27:34) iusim Greek word kho·leʹ (gall), wea hem sem toktok lo Greek Septuagint lo Psalm 69:21. Bat, Gospel blo Mark storyim myrrh (Mr 15:23), and diswan mekem pipol for tingse datfala “poison plant” or “gall” hem “myrrh.” Samfala moa tingse olketa mixim tugeta datfala drug lo gall and myrrh.
Faendem Gudfala Point
w99 1/15 17-18 ¶11
Liftimap Olketa Loyal Hand Long Prea
11 Planti pipol prea for askim samting nomoa, but love bilong iumi for Jehovah God mas muvim iumi for talem thankiu and praise long hem taem iumi prea seleva and front long pipol tu. Paul hem raet olsem: “No worry long eni samting, but long evri samting thru long prea and way for barava askim withim way for say thankiu, talem evri samting long God; and peace bilong God wea winim evri tingting bilong man bae guardim heart and tingting bilong iufala thru long Kraest Jesus.” (Philippians 4:6, 7) Tru nao, for join withim way for barava askim samting, iumi mas talemaot thankiu long Jehovah for olketa spiritual and material blessing. (Proverbs 10:22) Man wea raetem psalm sing olsem: “Offerim way for say thankiu olsem sakrifaes bilong iu long God, and peim long Most Hae olketa promis bilong iu.” (Psalm 50:14) And wanfala singsing prea bilong David talem naesfala toktok hia: “Mi bae praisim nem bilong God withim singsing, and mi bae mekhae long hem withim way for say thankiu.” (Psalm 69:30) Waswe, fitim iumi tu for duim olsem taem iumi prea front long pipol or seleva?
AUGUST 5-11
GUD SAMTING FROM BIBLE PSALM 70-72
‘Story Abaotem Paoa blo God lo Next Genereson’
w99 9/1 18 ¶17
Young Pipol—Trainim Paoa for Luksavvy!
17 Iu need for evritaem lukaot—and samfala taem no fraet—sapos iu laek for stap klia long trap bilong Satan. Hem tru, samfala taem iu bae different, no long olketa fren nomoa, but long full world. David wea raetem psalm, hem prea: “Iu nao hope bilong mi, O Sovereign Lord Jehovah, trust bilong mi from taem mi young. O God, iu teachim mi from taem mi young yet, and kam kasem distaem mi go ahed for talemaot olketa nambawan work bilong iu.” (Psalm 71:5, 17) Pipol savvy long way wea David no fraet. But, what taem nao hem mekem grow datfala way? Taem hem young! Taem hem no meetim Goliath yet, David bin showimaot barava way for no fraet taem hem lukaftarem olketa sheepsheep bilong dadi bilong hem—hem killim dae lion and bear. (1 Samuel 17:34-37) But, David givim full praise long Jehovah long evri strong samting wea hem duim, hem kolem Jehovah “trust bilong mi from taem mi young.” Way bilong David for depend long Jehovah mekem hem fitim eni test wea hem face-im. Iu tu bae faendem hao sapos iu depend long Jehovah, hem bae givim iu way for no fraet and paoa for “winim disfala world.”—1 John 5:4.
g04-E 10/8 23 ¶3
Hao Nao Iumi Shud Treatim Olketa Olo?
Man wea raetem Psalm hem prea olsem: “No rejectim mi taem mi olo. No lusim mi taem strong blo mi hem gogo daon.” (Psalm 71:9) God no “rejectim” olketa faithful servant blo hem nomata taem olketa seleva feel olsem olketa no fit nao for duim staka samting. Datfala man wea raetem psalm no feel olsem Jehovah lusim hem, bat hem luksavve hem need for depend lo Man wea Wakem hem especially taem hem olo. Jehovah bae sapotim olketa man olsem wea gohed for loyal lo full laef blo olketa. (Psalm 18:25) Staka taem kaen sapot olsem hem kam from olketa nara Christian brata and sista.
Duim Waka Bilong Jehovah Bifor Taem Bilong Trabol Hem Kam
4 Sapos iu gogo for olo bat iu strong yet, hem gud for ting raonem wanem moa iu savve duim long waka bilong Jehovah. From iu wanfala mature Christian, iu garem chance for duim olketa samting wea olketa narawan no savve duim. Olsem example, iu savve teachim olketa young wan samting wea Jehovah teachim long iu. Iu savve storyim olketa naesfala experience wea iu kasem taem iu duim waka bilong God. King David askem Jehovah for helpem hem duim datwan. Hem sei: “God bilong mi, iu nao teachim mi from taem mi young yet, . . . nomata taem mi olo and hair bilong mi hem white, plis God iu no lusim mi, mekem mi savve story abaotem paoa and strong bilong iu long olketa wea bae born bihaen long mi.”—Ps. 71:17, 18
5 From iu savve long plande samting, hao nao iu savve iusim datwan for helpem olketa narawan? Waswe, iu savve invaetem olketa young wan for kam long haos for story and encouragem olketa? Waswe, iu savve waka witim olketa long ministry mekem olketa lukim iu hapi taem iu duim waka bilong Jehovah? Elihu sei: “Olketa olo nao shud story, and olketa nao shud teachim olketa wise samting long olketa narawan.” (Job 32:7) Aposol Paul talem olketa mature Christian woman for encouragem olketa narawan long samting wea olketa talem, and long example bilong olketa. Hem sei: “Olketa woman wea olo . . . mas teachim gud samting.”—Titus 2:3.
Faendem Gudfala Point
it-1-E 768
Euphrates
Baondri blo Territory wea olketa givim lo olketa Israelite. Lo agreement wea God mekem witim Abraham, hem promis for givim lo olketa pikinini blo hem land “start lo river lo Egypt go kasem datfala big river, wea hem nao Euphrates River.” (Ge 15:18) God talem moa disfala promis lo nation blo Israel. (Ex 23:31; De 1:7, 8; 11:24; Jos 1:4) Wan Chronicles 5:9 storyim hao lo taem bifor David hem rul, samfala lo laen blo Reuben olketa stap “go kasem ples wea hem start blo wilderness, lo Euphrates River.” Bat, from Euphrates hem samting olsem 800 km (500 mi) farawe, taem man travel for “east lo Gilead” (1Ch 5:10), diswan minim olketa Reubenite extendim territory blo olketa from East blo Gilead go kasem end blo Syrian Desert, wea desert hia hem go kasem Euphrates. (RS read olsem, “go kasem entrance blo datfala desert dis saed blo Euphrates”; JB, “start blo datfala desert wea end lo river Euphrates.”) So luk olsem promis blo Jehovah hem barava klia taem David and Solomon rul, taem Israel muvim baondri blo olketa and includim kingdom blo Aram lo Zobah and kasem saed river blo Euphrates, luk olsem hem followim datfala sekson go kasem north blo Syria. (2Sa 8:3; 1Ki 4:21; 1Ch 18:3-8; 2Ch 9:26) Staka taem olketa savve iusim toktok “datfala river” taem olketa storyim Euphrates, bikos lo wei wea staka pipol savve from river hia hem big tumas.—Jos 24:2, 15; Ps 72:8.
AUGUST 12-18
GUD SAMTING FROM BIBLE PSALM 73-74
Hao If Iumi Jealous lo Laef blo Olketa wea No Servem God?
Jehovah Gohed for Sevem Olketa wea Discourage
14 Man wea raetem Sams 73 hem wanfala Levite. So hem garem spesol privilege for waka lo haos blo Jehovah. Nomata olsem, lo wanfala taem hem feel discourage. Why nao olsem? Hem start for jealous lo laef blo olketa nogud pipol, no bikos lo nogud samting wea olketa duim, bat bikos lo gudfala laef wea olketa garem. (Sams 73:2-9, 11-14) Olketa luk olsem olketa rich, garem gud laef, and olketa no garem eni samting for wari abaotem. Olketa samting hia hem mekem man wea raetem Sams for discourage. Hem sei: “Hemi yusles nomoa fo mi kipim tingting blong mi klin, an fo no mekem sin.” Tru nao, datwan mekem hem for klosap stop for servem Jehovah.
Jehovah Gohed for Sevem Olketa wea Discourage
15 Readim Psalm 73:16-19, 22-25. Datfala Levite go lo temple blo Jehovah. Lo there, luk olsem hem stap witim olketa narawan wea worshipim Jehovah, datwan mekem hem savve garem mind wea kwaet, garem klia tingting, and hem savve prea abaotem situation blo hem. From datwan, hem start for luksavve hao tingting blo hem no stret and hem luksavve hem start for followim wanfala gogo wea bae mekem hem lusim Jehovah. And tu, hem luksavve hao laef blo olketa nogud pipol hem olsem olketa standap lo ples wea ‘slippery’ and gogo olketa bae kasem nogud samting. For hem winim feeling for jealous and discourage, datfala Levite wea raetem disfala psalm hem need for garem tingting blo Jehovah abaotem olketa samting. Taem hem duim datwan, hem garem peace moa and hem hapi. Hem sei: “An bikos yu nao God blong mi [Jehovah], mi no laekem enisamting moa long disfala wol.”
16 Olketa Leson for iumi. Iumi shud no jealous taem iumi lukim olketa gud pipol wea luk olsem olketa garem gudfala laef. Wei wea olketa hapi hem for lelebet taem nomoa and hem bae no stap for olowe. (Eklesiastes 8:12, 13) For jealous lo olketa hem olsem iumi invaetem wei for discourage for spoelem wei wea iumi fren witim Jehovah. So sapos iumi luksavve iumi start for jealous lo olketa nogud pipol wea luk olsem olketa garem gud laef, iumi shud duim wanem datfala Levite hem duim. Followim olketa advaes wea kam from God, and associate witim olketa narawan wea duim wanem God laekem. Taem iumi lovem Jehovah winim eni nara samting moa, iumi bae barava hapi and iumi bae stap lo datfala road wea leadim iumi for laef wea hem barava “tru laef.”—1 Tim. 6:19.
Garem Strong Faith Olsem Moses
5 Wanem nao bae helpem iumi for no foldaon long “sin wea savve mekem man hapi for lelebet taem nomoa”? No forget, hapi wea man kasem from hem duim sin, hem for lelebet taem nomoa. Faith bae helpem iumi for luksavve “world bae finis and evri samting wea pipol long world laekem bae finis tu.” (1 John 2:15-17) Tingim nogud samting wea bae kasem olketa wea duim sin and no repent. Olketa stap long “graon wea slippery . . . gogo bae olketa finis taem barava nogud samting kasem olketa!” (Ps. 73:18, 19) Taem iumi kasem test for duim sin, hem gud for tingim disfala kwestin: ‘Future bilong mi bae hao?’
No Letem Eni Samting Stopem Iu for Kasem Glory
3 Man wea raetem psalm barava sure Jehovah bae givim glory long hem. (Readim Psalm 73:23, 24.) Hao nao Jehovah givim glory long olketa man wea obey? Hem givim glory long olketa taem hem showimaot hem hapi long olketa and blessim olketa long plande difren wei. Olsem example, Jehovah helpem olketa for savve long wanem hem bae duim, and letem olketa for fren gud witim hem.—Jas. 4:8.
4 Narafala wei wea Jehovah givim glory long iumi hem wei wea hem letem iumi for preachim gud nius. (2 Cor. 4:1, 7) Taem iumi duim preaching waka iumi praisem Jehovah, wea datwan mekem iumi kasem glory from hem, and mekem olketa narawan for kasem gud samting. Long 1 Samuel 2:30, Jehovah promis for givim glory long olketa wea givim glory long hem. Jehovah givim glory long olketa wea duim preaching waka, and olketa kasem praise from olketa narawan long kongregeson tu.—Prov. 11:16; 22:1.
5 Olketa wea obeyim Jehovah bae garem wanem kaen future? Bible talem disfala promis: “Bae hem [Jehovah] mekhae long iu long wei for givim earth long iu olsem present. Taem wicked pipol finis, bae iu lukim.” (Ps. 37:34) Olketa wea worshipim God garem nambawan hope for kasem laef olowe.—Ps. 37:29.
Faendem Gudfala Point
it-2-E 240
Leviathan
Psalm 74 story abaotem olketa wei wea God sevem pipol blo hem, and lo verse 13 and 14 hem tokpiksa abaotem wei wea hem mekem olketa Israelite for free from Egypt. Datfala toktok “olketa big animal lo sea [Heb., than·ni·nimʹ, plural blo tan·ninʹ]” olketa iusim for minim tu “Leviathan,” and wei wea hem brekem hed blo Leviathan savve minim wei wea hem winim Pharaoh and army blo hem taem olketa Israelite lusim Egypt. Olketa Aramaic Targum iusim toktok “olketa strong wan blo Pharaoh” for changem toktok “hed blo Leviathan.” (Comparem Eze 29:3-5, wea Pharaoh hem olsem “big animal lo sea” midolwan olketa canal lo Nile; lukim tu Eze 32:2.) Isaiah 27:1 storyim Leviathan (LXX, “datfala dragon”) hem representim wanfala empire, wanfala organization wea set ap evriwea lo world and datwan wea olketa kolem hem lo “snek” or dragon nao rulim. (Re 12:9) Datfala profesi hem abaotem wei wea olketa Israelite bae go bak, so wei wea Jehovah “tane go lo Leviathan” mas includim tu Babylon. Nomata olsem, verse 12 and 13 minim tu Assyria and Egypt. So, Leviathan hem minim wanfala organization evriwea lo world or empire wea againstim Jehovah and olketa wea worshipim hem.
AUGUST 19-25
GUD SAMTING FROM BIBLE PSALM 75-77
Why Iumi Shud No Tokplas
Lukim Hao Pipol wea Obey Difren From Olketa wea No Obey
4 Bihaen Paul sei staka tingim olketa seleva nomoa and laekem tumas selen, hem sei tu pipol bae tok praod, mekhae long olketa seleva, and praod tumas. Staka taem pipol wea garem olketa fasin hia tingse olketa gud winim narawan bikos long lukluk, savve, material samting, or hae position wea olketa garem. Pipol olsem laekem tumas for narawan tinghae long olketa. Wanfala savveman raet abaotem kaen man olsem, and sei: “Insaed long heart bilong hem wanfala smol altar stap wea hem savve baodaon long hemseleva.” Samfala sei wei for praod hem nogud tumas, dastawe pipol wea praod tu no laek for lukim taem narawan praod.
5 Jehovah heitim “wei for praod.” (Provebs 6:16, 17) Man wea praod no savve fren witim God. (Sams 10:4) Wei for praod hem fasin bilong Satan. (1 Tim. 3:6) Sorre samting nao, wei for praod affectim tu samfala faithful wakaman bilong Jehovah. Olsem example, King Uzziah bilong Judah faithful for staka year. Bat Bible sei: “Taem [King Uzziah] hemi kamap strong fogud, hemi praod tumas go-go hemi bagarap. Hemi mekem sin agensim [Jehovah] hu hemi God blong hem.” Uzziah go long temple and bonem incense, wea datwan no waka bilong hem. Bihaen, faithful King Hezekiah tu kamap praod for lelebet taem.—Mektu Kronikols 26:16; 32:25, 26.
Olketa Main Point From Buk Thri and Foa Bilong Psalms
75:4, 5, 10—Wanem nao “horn” hem piksarem? Olketa horn bilong animal hem wanfala strong samting for faet. Dastawe “horn” hem piksarem strong. Jehovah hem apim olketa horn bilong pipol bilong hem, and mekem olketa kamap hae, bat hem ‘katem aot olketa horn bilong olketa wicked wan.’ Iumi kasem warning for no ‘apim horn bilong iumi’ long wei for iumi kamap praod. From Jehovah nao apim man, iumi luksavve hao eni assignment wea iumi kasem long kongregeson hem kam from Jehovah.—Psalm 75:7.
Faendem Gudfala Point
Olketa Main Point From Buk Thri and Foa Bilong Psalms
76:10—Hao nao “kros bilong man” savve givim praise long Jehovah? Taem God letem olketa man for showimaot kros bilong olketa againstim iumi from iumi olketa servant bilong hem, gud samting savve kamaot from datwan. Eni nogud samting wea maet iumi kasem hem savve trainim iumi tu. Jehovah letem wei for safa gohed only long taem wea datwan hem givim kaen training olsem. (1 Peter 5:10) ‘God hem putim long hemseleva, kros bilong olketa man wea stap yet.’ Waswe sapos iumi safa and gogo iumi dae? Diswan tu savve givim praise long Jehovah bikos olketa wea lukim wei wea iumi faithful and stand strong maet start for givim glory long God tu.
AUGUST 26–SEPTEMBER 1
GUD SAMTING FROM BIBLE PSALM 78
Wei wea Olketa Israelite No Faithful Hem Wanfala Warning Example
w96 12/1 29-30
“REMEMBERIM OLKETA DAY WEA GO PAST FINIS” WHY?
Sorry tumas, planti taem olketa Israelite fall daon long sin bilong way for forget. Wanem nao kamaot from diswan? “Planti taem olketa testim God, and olketa givim pain long Holy Wan bilong Israel. Olketa no rememberim hand bilong hem, datfala day wea hem mekem olketa kamap free from enemy.” (Psalm 78:41, 42) Go-go, way wea olketa forgetim olketa komand bilong Jehovah mekem hem rejectim olketa.—Matthew 21:42, 43.
Man wea raetem psalm hem showim aot gudfala example taem hem raet olsem: “Mi bae rememberim olketa samting wea Jah duim; From mi bae rememberim olketa nambawan samting wea iu duim longfala taem go finis. And mi bae tingting raonem evri work bilong iu, and evri samting wea iu duim mi bae interest long hem.” (Psalm 77:11, 12) Way for ting raonem loyal service wea pipol duim bifor and olketa loving samting wea Jehovah duim bae muvim, encouragim, and mekem iumi for tinghae. And tu, for “rememberim olketa day bilong taem bifor” savvy finisim way for feel tired and savvy muvim iumi for duim evri samting wea iumi fit for duim for keepim faithful way for stand strong.
“No Garem Fasin for Komplen”
16 Wei for komplen mekem iumi tingim iumiseleva nomoa and olketa problem bilong iumi and no tingim nao olketa blessing iumi kasem from iumi wanfala Witness bilong Jehovah. Sapos hem wei bilong iumi for komplen and iumi barava laek for lusim datkaen wei, iumi need for tingim evritaem olketa blessing hia. Olsem example, each wan long iumi garem nambawan privilege for garem nem bilong Jehovah. (Isaiah 43:10) Iumi savve mekem grow klos wei for fren witim hem, and iumi savve story long “Datwan wea herem prea” long enitaem. (Psalm 65:2; James 4:8) Laef bilong iumi barava garem mining bikos iumi minim disfala kwestin abaotem hu nao fit for sovereign ruler bilong universe, and iumi tingim evritaem hao hem privilege for gohed faithful long God. (Proverbs 27:11) Iumi savve share evritaem long waka for preachim gud nius bilong Kingdom. (Matthew 24:14) Wei for garem faith long ransom sakrifaes bilong Jesus Christ hem givim iumi klin conscience. (John 3:16) Nomata wanem hard taem iumi kasem, olketa hia nao olketa blessing wea iumi enjoyim.
w11-E 7/1 10 ¶3-4
Waswe, Jehovah Garem Feeling Tu?
Man wea raetem psalm sei: “Staka taem olketa bighed againstim hem lo wilderness!” (Verse 40) Next verse sei: “Staka taem nao olketa savve testim God.” (Verse 41) Lukim hao man wea raet hem storyim wei wea pipol hia gohed for bighed. Disfala nogud wei hem start kam yet lo wilderness no longtaem bihaen olketa free from Egypt. Pipol start for komplen againstim God, olketa kwestinim sapos hem fit and willing for lukaftarem olketa. (Numbers 14:1-4) Wanfala reference wea olketa wea transleitim Bible iusim sei, datfala toktok “olketa bighed againstim hem” maet “minim tu ‘olketa letem heart blo olketa kamap hard’ or ‘olketa sei olketa no laek for herem God.’” From Jehovah showimaot mercy, hem bae forgivim pipol blo hem taem olketa repent. Bat then olketa go bak lo old wei blo olketa and bighed againstim hem, and evritaem olketa gohed for duim datwan.—Psalm 78:10-19, 38.
Hao nao Jehovah feel each taem hem lukim pipol blo hem bighed? Verse 40 sei olketa “mekem hem feel nogud”. Nara transleison sei olketa “mekem hem sorre tumas.” Wanfala reference wea olketa wea transleitim Bible iusim sei: “Mining hia hem barava fitim wat olketa Israelite duim wea barava kosim pain, olsem wei blo wanfala pikinini wea disobey and bighed.” Olsem wanfala bighed pikinini wea kosim pain lo heart blo parents blo hem, olketa bighed Israelite hia “mekem Holy Wan blo Israel for barava sorre.”—Verse 41.
Faendem Gudfala Point
Olketa Main Point From Buk Thri and Foa Bilong Psalms
78:24, 25; footnote—Why nao man wea raetem psalm kolem manna “grain bilong heven” and “bred bilong olketa angel”? Tufala toktok hia no minim manna hem kaikai bilong olketa angel. Hem “grain bilong heven” bikos hem kam from heven. (Psalm 105:40) From olketa angel, wea hem “olketa maeti wan,” stap long heven, datfala toktok “bred bilong olketa angel” maet minim wei wea hem kam from God wea stap long heven. (Psalm 11:4) Maet Jehovah iusim tu olketa angel for provaedem manna for olketa Israelite.