Olketa Reference for Laef and Ministry Meeting Buk
© 2024 Watch Tower Bible and Tract Society of Pennsylvania
MARCH 3-9
GUD SAMTING FROM BIBLE PROVERBS 3
Showimaot Iu Trustim Jehovah
ijwbv-E article 14 ¶4-5
Proverbs 3:5, 6—“No Lean lo Savve blo Iuseleva”
“Trustim Jehovah lo full heart blo iu.” Iumi showim iumi trustim God taem iumi duim olketa samting followim tingting blo hem. Iumi mas barava trustim God witim full heart blo iumi. Taem Bible storyim disfala toktok heart, staka taem hem minim wat nao insaed lo man, olsem feeling, wat nao muvim man for duim samting, tingting, and wei blo man. So, for trustim God witim full heart blo iumi hem no just wanfala feeling nomoa. Bat hem samting wea iumi chus for duim bikos iumi barava sure Creator blo iumi savve wanem nao best samting for iumi.—Rome 12:1.
“No depend lo savve blo iuseleva.” From iumi no perfect hem no fitim for iumi depend lo savve blo iumiseleva, dastawe iumi need for trustim God. Sapos iumi letem tingting or feeling blo iumiseleva nao for kontrolem wat iumi duim, maet iumi bae chusim samting wea lo firstaem hem gud bat nogud samting savve kamaot from datwan. (Proverbs 14:12; Jeremiah 17:9) Wisdom blo God hem barava big winim wisdom blo iumi. (Isaiah 55:8, 9) Taem iumi letem tingting blo hem for leadim iumi, iumi bae garem gudfala laef.—Psalm 1:1-3; Proverbs 2:6-9; 16:20.
ijwbv-E article 14 ¶6-7
Proverbs 3:5, 6—“No Lean lo Savve blo Iuseleva”
“Tingim hem lo evri samting wea iu duim.” Iumi shud savve lo tingting blo God lo evri samting iumi duim lo laef blo iumi and lo evri important disison wea iumi mekem. Iumi duim datwan taem iumi prea for direction and taem iumi followim wat hem talem lo Toktok blo hem, Bible.—Psalm 25:4; 2 Timothy 3:16, 17.
“Hem bae showim iu stretfala road.” God showim iumi stretfala road taem hem helpem iumi for followim olketa raeteous standard blo hem. (Proverbs 11:5) Datwan bae helpem iumi for no duim mistek wea iumi shud avoidim nomoa and iumi bae enjoyim wanfala laef wea iumi barava hapi.—Psalm 19:7, 8; Isaiah 48:17, 18.
Muv Ahed—Kamap Moabeta
From hem deal finis witim olketa difren samting wea savve kasem iumi long laef, wanfala man maet sei: ‘Mi feisim diskaen samting finis. Mi savve wanem for duim.’ Waswe, diswan hem wisefala wei for deal witim samting? Proverbs 3:7 givim disfala warning: “No kamap wise long eye bilong iuseleva.” From iumi experiencem finis staka samting, diswan shud helpem iumi for tingim moa samting taem iumi deal witim samting wea happen long laef. Bat sapos iumi muv ahed long spiritual wei, olketa experience bilong iumi shud mekem mind and heart bilong iumi luksavve hao iumi needim blessing bilong Jehovah sapos iumi laek for win. So, wei wea iumi muv ahed, hem showaot no long wei for trustim iumiseleva bat long wei wea iumi kwiktaem tan long Jehovah for hem directim iumi long living. Hem showaot long trust bilong iumi hao no eni samting savve happen sapos hem no letem and from iumi keepim gud wei wea iumi fren witim and trustim Dadi bilong iumi long heven.
Faendem Gudfala Point
Olketa Main Point From Buk Bilong Proverbs
3:3. Iumi shud barava tinghae long loving-kaeness and wei for tok tru, and mekem nara pipol lukim hao iumi garem olketa fasin hia olsem wei for showim wanfala nekles wea garem hae price. Iumi need tu for putim olketa fasin hia insaed heart bilong iumi, and mekem olketa kamap barava part long laef bilong iumi.
MARCH 10-16
GUD SAMTING FROM BIBLE PROVERBS 4
“Protectim Heart blo Iu”
Hao Nao Iu Savve Protectim Heart Bilong Iu?
4 Long Provebs 4:23, datfala toktok heart hem minim mind bilong man or really wei bilong hem. (Readim Sams 51:6.) So diswan minim tingting bilong man, feeling bilong hem, why hem duim samting, and wanem hem laekem. Hem minim really wei or tingting bilong iumiseleva, and hem no wei or lukluk bilong iumi wea pipol lukim.
Hao Nao Iu Savve Protectim Heart Bilong Iu?
10 Sapos iumi laek for protectim heart bilong iumi, iumi mas luksavve long olketa danger and duim samting kwiktaem for protectim iumiseleva. Diswan mekem iumi tingim waka bilong wanfala security gard. Long taem bilong King Solomon, olketa security gard savve standap antap wall bilong wanfala taon and talem warning sapos olketa lukim eni danger kakam klosap. Disfala example helpem iumi for luksavve samting wea iumi mas duim for no letem Satan spoelem tingting bilong iumi.
11 Long bifor, olketa security gard waka tugeta witim olketa man wea lukaftarem gate. (Mektu Samuel 18:24-26) Olketa hia waka tugeta for protectim datfala taon and mek sure olketa gate klos taem enemy kam klosap. (Nehemaea 7:1-3) Konsens bilong iumi wea Bible trainim savve act olsem security gard and warnim iumi taem Satan trae for spoelem heart bilong iumi, wea minim tingting, feeling, why iumi duim samting, or wanem iumi laek for duim. Taem konsens bilong iumi warnim iumi abaotem wanfala danger, iumi need for lisin and satem gate long heart bilong iumi.
Hao Nao Iu Savve Protectim Heart Bilong Iu?
14 For protectim heart bilong iumi, iumi mas satem mekem olketa nogud samting no go insaed bat openem for olketa gud samting. Tingim moa example abaotem wanfala taon wea wall stap raonem. Wanfala security wea lukaftarem gate mas klosim gate for stopem enemy kam insaed, bat long olketa nara taem hem mas openem gate for letem olketa tekem kam kaikai and olketa nara samting. Sapos olketa no openem gate, bae evriwan long datfala taon hangre. Long sem wei, iumi need for openem heart bilong iumi evritaem for letem tingting bilong God affectim iumi.
w12-E 5/1 32 ¶2
“Protectim Heart blo Iu!”
Why nao iumi shud protectim tokpiksa heart blo iumi? God muvim King Solomon for raet olsem: “Winim evri samting wea iu protectim, iu mas protectim heart blo iu.” (Proverbs 4:23) Gudfala laef wea iumi savve garem distaem and laef wea iumi bae garem lo future hem depend lo hao nao tokpiksa heart blo iumi. Why? Bikos God lukim wat hem insaed heart blo iumi. (1 Samuel 16:7) Hao God ting lo iumi hem depend lo wanem kaen man nao iumi, wea hem nao “samting wea insaed lo heart” blo iumi.—1 Peter 3:4.
Faendem Gudfala Point
Waswe, Iu Willing for Weit lo Jehovah?
4 Proverbs 4:18, NW sei: “Road wea raeteous man followim hem olsem laet lo early morning wea kakamap braet go kasem bigfala daylaet.” Toktok hia showimaot Jehovah isisi helpem pipol blo hem for luksavve lo plan blo Hem. Scripture hia hem wanfala principle wea showimaot hao hem bae tek taem for wanfala Christian kamap mature. Sapos iumi studyim gud Bible and followim kaonsel from Bible and organization blo Jehovah, baebae iumi kamap mature Christian wea garem olketa nambawan wei blo Christ. And baebae iumi lanem staka nara samting abaotem God tu. Jesus storyim wanfala tokpiksa abaotem datwan.
MARCH 17-23
GUD SAMTING FROM BIBLE PROVERBS 5
Stap Klia From Wei for Durong
Iu Savve Stap Klin Insaed World Bilong Dirty Fasin
Disfala proverb hem sei disfala nogud woman hem wanfala “difren woman,”—wanfala jury. Olketa toktok wea hem iusim for switim man wea hem aftarem hem swit olsem honeycomb and smooth winim olive oil. Waswe, planti dirty fasin no start olsem? Olsem example, tingim samting wea kasem Amy, wanfala naesbola secretary wea 27 year. Hem sei: “Disfala man long waka hem evritaem lukluk and tokhae long mi. Hem feel gud taem pipol luksavve long iu. Bat mi barava luksavve hao hem interest long mi for sex nomoa. Olketa wei bilong hem bae no trikim mi.” Planti taem ososo toktok bilong dirty man or woman hem here naes tumas sapos iumi no luksavve wanem nao tru reason bilong hem. For diswan iumi need for iusim wei for tingting.
Iu Savve Stap Klin Insaed World Bilong Dirty Fasin
Samting wea kamaot from dirty fasin hem saoa olsem wormwood and sharp olsem tu-saed sword—soa tumas and kosim dae. Wanfala conscience wea feel nogud, babule nating, or wanfala sik bilong sex savve kamap from kaen fasin olsem. And tingim bigfala pain bilong sorre wea kasem marit partner bilong datwan wea no faithful. Wanfala rong nomoa bilong wei for no faithful savve kosim pain wea savve stap for full laef. Tru nao, dirty fasin givim pain.
Iu Savve Stap Klin Insaed World Bilong Dirty Fasin
Iumi need for stap barava farawe from paoa bilong dirty pipol. Why nao iumi shud followim wei bilong olketa for lisin long nogud music, for lukim nogud hapitaem, and for lukim dirty magasin? (Proverbs 6:27; 1 Corinthians 15:33; Ephesians 5:3-5) And hem krangge samting for pullim interest bilong olketa taem iumi switim olketa or long wei wea iumi werem nogud kaleko olsem olketa!—1 Timothy 4:8; 1 Peter 3:3, 4.
Faendem Gudfala Point
Iu Savve Stap Klin Insaed World Bilong Dirty Fasin
So, Solomon hem strongim haefala kost bilong wei for foldaon long dirty fasin. Adultery and wei for lusim honor, or respect bilong seleva, tufala stap tugeta. Waswe, hem no samting for shame taem man stap nomoa for satisfaem dirty feeling bilong seleva or bilong narawan? Waswe, diswan no showimaot hao iumi no garem respect for seleva taem iumi barava stap klos saed long sex witim wan wea no marit partner bilong iumi?
MARCH 24-30
GUD SAMTING FROM BIBLE PROVERBS 6
Wat Nao Iumi Savve Lanem From Olketa Ants?
it-1 115 ¶1-2
Ants
‘Wisdom blo Olketa.’ ‘Wisdom’ blo olketa ants hem no kam from wei wea olketa ting raonem samting bat hem samting wea happen natural wea Creator blo olketa nao putim lo olketa. Bible storyim hao olketa ants savve “redyim kaikai blo olketa lo summer season, and olketa hipimap kaikai blo olketa lo taem blo harvest.” (Pr 6:8) Wanfala type ants wea stap lo Palestine, wea hem datfala harvester, or agricultural, ants (Messor semirufus), savve stoarem big amount blo olketa grain lo taem blo spring and summer season and mekius lo datwan lo olketa nara season, olsem lo taem blo winter, wea hem taem wea no isi for kasem kaikai. Staka taem diskaen ants savve stap lo olketa ples for aotem grain from skin blo hem, wea staka seed and grain stap lo hem. If rain tuwetem seed wea olketa stoarem, olketa harvester ants hia savve karem go aot olketa grain hia lo sun for hem drae. Olketa savve baetem aot tu part wea savve grow lo seed mekem olketa no savve grow taem olketa stoarem. Hem isi for luksavve lo ples wea grup blo olketa harvester ants stap bikos lo road wea olketa followim olowe and lo olketa skin blo seed wea stap front lo ples wea olketa stap.
Gud Example blo Olketa. Wanfala smol study abaotem olketa ants encouragem iumi for duim diswan: “Go lukluk lo olketa ants, iu man wea lesy. Lukluk followim wat olketa duim and kamap wise.” (Pr 6:6) Wei blo olketa ants for redi firstaem hem spesol bat no datwan nomoa, olketa savve waka hard, garem strong tingting for duim samting, karem or pullim eni samting wea hevi winim weight blo olketa, duim best for finisim waka wea olketa duim and olketa no lusim wat olketa duim nomata olketa bae foldaon, slaed or rola go daon lo steep ples. From wei wea olketa waka tugeta, olketa barava keepim klin nest blo olketa and tingim olketa waka fren blo olketa, samfala taem, olketa savve helpem olketa nara ants wea garekil or karem olketa go bak lo nest taem olketa taed tumas.
Protectim Nem Bilong Iu
Waswe, iumi tu shud waka hard olsem ants? Wei for waka hard and trae hard for kamap moabeta long waka bilong iumi hem gud for iumi nomata pipol lukluk long iumi or nomoa. Tru nao, iumi shud duim best bilong iumi long skul, long ples bilong waka, and taem iumi share long olketa spiritual waka. Olsem ants hem kasem gud samting from hard waka bilong hem, God wantem iumi tu for ‘lukim gudfala samting for evri hard waka bilong iumi.’ (Ecclesiastes 3:13, 22; 5:18) Klinfala conscience and wei for satisfae hem reward bilong hard waka.—Ecclesiastes 5:12.
Solomon iusim tufala kwestin for ting raonem, taem hem trae for wekapem lesy man: “Hao long nao, iu lesy man, bae go ahed for leidaon? What taem nao bae iu getap from sleep bilong iu?” Taem hem tokfani abaotem kaen man olsem, datfala king sei moa: “Lelebet moa sleep, lelebet moa sleep, lelebet moa foldim hand for leidaon, and wei wea iu poor bae kam olsem wanfala man for gogo raon, and fasin for wantem samting olsem man wea redy for faet.” (Proverbs 6:9-11) Taem lesy man hem relax, olsem speed bilong wanfala thief poor living hem tekovarem hem, and wei for no garem eni samting attakim hem olsem man wea redy for faet. Garden bilong wanfala lesy man hem kwiktaem fulap witim olketa rabis grass and nila grass. (Proverbs 24:30, 31) Bisnis bilong hem lus insaed short taem nomoa. For hao long nao wanfala boss bae patient witim lesy man olsem? And, waswe, wanfala student wea lesy tumas savve kamap gud long skul?
Faendem Gudfala Point
Protectim Nem Bilong Iu
Sevenfala difren kaen wei hia wea proverb storyim hem olketa main samting and kavarem evri difren kaen rong. “Praod eye” and “heart wea tingim olketa plan for spoelem man” hem olketa sin wea man tingim and duim. “Tongue wea tok laea” and “giaman witness wea talemaot olketa laea” hem olketa toktok wea sin. “Hand wea killim dae man wea no guilty” and “leg wea hariap for ran for nogud samting” hem wei for duim olketa nogud samting. And main samting wea Jehovah heitim hem kaen man wea savve startim raoa midolwan pipol wea stap tugeta long peace. Wei wea namba hem go ap from six kasem seven showimaot hao datfala list hem no finis long there, from olketa nogud samting wea olketa man duim hem go ahed for kamap.
MARCH 31–APRIL 6
GUD SAMTING FROM BIBLE PROVERBS 7
Avoidim Olketa Situation wea Kosim Temptation
“Keepim Olketa Komandment Bilong Mi and Go Ahed for Stap”
Datfala window wea Solomon luk go aot hem garem lattice—luk olsem hem wanfala frame witim karving raonem. Taem daylaet gogo for finis, datfala street kamap moa dark. Hem lukim young man wea barava isi for kasem problem. From young man hia short long fasin for luksavve or minim samting, hem short long heart. Luk olsem, hem savve wanem kaen ples nao hem go long hem and wanem savve kasem hem long there. Datfala young man kam klosap long “corner bilong hem [woman],” wea hem road for go long haos bilong hem. Hu nao woman? Wanem nao hem duim?
“Keepim Olketa Komandment Bilong Mi and Go Ahed for Stap”
Mouth bilong woman hia hem smooth. From hem mekem feis bilong hem no luk fraet, hem feel sure for talemaot toktok bilong hem. Hem tok long careful wei for switim young man hia. Taem hem sei hem mekem finis communion sakrifaes long datfala day and peim finis olketa promis bilong hem, hem want for showimaot hem raeteous, mekem man hia tingse hem no short long spiritual samting. Insaed communion sakrifaes long temple long Jerusalem hem meat, flour, oil, and wine. (Leviticus 19:5, 6; 22:21; Numbers 15:8-10) From man wea offerim savve tekem part long datfala communion sakrifaes for hemseleva and famili, woman hia showimaot hem garem planti kaikai and drink long haos. Samting wea diswan minim hem klia: Datfala young man bae garem hapitaem long there. Woman hia kamaot from haos for lukaotem hem. Story bilong woman savve muvim man—sapos hem bilivim kaen story olsem. “Hem tru hem go aot for lukaotem samwan,” wanfala savveman long Bible hem sei, “bat, waswe, hem really kam for lukaotem disfala man nomoa? Krangge man nomoa—maet diswan—bae bilivim hem.”
Bihaen hem mekem hemseleva for pullim interest, long hao hem werem kaleko, saond bilong ososo toktok, wei wea hem holem man, and long teist bilong mouth bilong hem, disfala woman iusim help bilong wei for smelem samting. Hem sei: “Witim kaleko for kavarem bed mi kavarem bed bilong mi, witim olketa samting wea garem staka colour, spesol kaleko bilong Egypt. Mi putim myrrh, aloe, and cinnamon long bed bilong mi.” (Proverbs 7:16, 17) Hem mekem bed bilong hem luk naes witim spesol kaleko from Egypt wea garem naes color and mekem hem smel naes witim myrrh, aloe, and cinnamon.
“Kam, letem iumi drinkim love go kasem morning,” hem sei, “letem iumi enjoyim each other witim olketa toktok bilong love.” Disfala invitation hem no for tufala enjoyim naes kaikai nomoa. Promis bilong woman hia hem for enjoy saed long sex. Long young man hia, diswan barava spesol samting wea hem laekem tumas! For switim hem moa, hem sei: “From hasband hem no stap long haos bilong hem; hem gogo farawe. Hem tekem wanfala bag wea fulap long selen long hand bilong hem. Long day bilong full moon hem bae kam long haos bilong hem.” (Proverbs 7:18-20) Woman hia promisim hao tufala bae stap sef, from hasband bilong hem go long wanfala bisnis gogo and bae no kam bak kwiktaem. Hem savve tumas hao for switim wanfala young man! “Hem giamanim hem witim olketa swit toktok. Hem switim hem witim smooth bilong mouth bilong hem.” (Proverbs 7:21) Man wea hol strong long stretfala fasin olsem Joseph nomoa bae fit for againstim disfala test for switim man. (Genesis 39:9, 12) Waswe, young man hia kasem mark olsem?
“Keepim Olketa Komandment Bilong Mi and Go Ahed for Stap”
Young man hia hard for againstim invitation. From hem no laekem gud tingting, hem go bihaenem hem ‘olsem wanfala buluka for busarem.’ Olsem man wea olketa chainim hem hard for ranawe from panis, diswan pullim go young man hia for sin. Hem nating luksavve long danger go kasem taem “wanfala arrow katem open liver bilong hem,” wea minim, gogo hem kasem garekil wea savve kosim dae bilong hem. Maet dae hia long physical wei from hem putim hemseleva long danger from olketa sik bilong dirty fasin. Datfala garekil savve kosim hem for dae long spiritual wei tu; “diswan minim barava soul bilong hem.” Diswan barava affectim evri part bilong hem and laef bilong hem, and hem duim bigfala sin againstim God. Long datfala wei hem kwiktaem gogo for dae kasholem hem olsem bird wea flae go insaed trap!
Faendem Gudfala Point
“Keepim Olketa Komandment Bilong Mi and Go Ahed for Stap”
“Taemapem olketa [komandment bilong mi] long olketa finger bilong iu,” Solomon go ahed for sei, “and raetem olketa long heart bilong iu.” (Proverbs 7:3) Olsem olketa finger stap evritaem front long eye bilong iumi and olketa barava important for duim olketa plan bilong iumi, olsem tu olketa leson wea iumi lanem from Bible teaching or wei for kasem savve long Bible shud remindim iumi evritaem and gaedem iumi long evri samting iumi duim. Iumi mas raetem olketa long heart bilong iumi, and mekem kamap part long iumi.
APRIL 7-13
GUD SAMTING FROM BIBLE PROVERBS 8
Lisin lo Datfala Wisdom
cf-E 131 ¶7
“Mi Lovem Dadi”
7 Lo verse 22, wisdom sei: “Mi nao first wan wea Jehovah creatim, first wan lo olketa samting wea hem wakem from bifor kam yet.” Disfala verse no storyim wisdom nomoa, bikos datfala wei no eniwan hem “creatim.” Hem no samting wea kamap bikos Jehovah hem bin stap from bifor kam and hem evritaem wise. (Psalm 90:2) Bat Son blo God nao “hem firstborn long evri samting wea God wakem.” Jehovah nao wakem, or creatim hem; hem nao first wan lo evri samting wea Jehovah. (Colossae 1:15) Jehovah creatim datfala Son bifor hem wakem heven and earth, olsem Proverbs storyim. And from hem nao datfala word, wea hem own Spokesman blo God, hem nao perfect example blo wisdom blo God.—John 1:1.
cf-E 131-132 ¶8-9
“Mi Lovem Dadi”
8 Bifor datfala Son kam lo earth, wat nao hem busy lo hem insaed staka million year wea hem lo heven? Verse 30 sei hem stap saed lo God olsem “wakaman wea garem skill.” Wat nao datwan minim? Colossae 1:16 explainim olsem: “God iusim hem for wakem evri nara samting long heven and long earth . . . God iusim hem for wakem evri samting hia.” So Jehovah, datfala Creator, iusim Son blo hem, wea hem nao datfala Wakaman wea Garem Skill, for wakem evri nara samting—olsem olketa angel lo heven, go kasem olketa samting lo universe, earth witim staka spesol plant and animal wea laef, and man, wea hem nao olketa barava important lo Jehovah. Iumi savve comparem wei wea Dadi and Son waka tugeta olsem hao wanfala architect waka tugeta witim wanfala builder or contractor, wea barava duim gud waka blo hem for mekem plan blo datfala architect kamap tru. Taem iumi tinghae lo eni samting lo creation, really iumi givim praise lo datfala Nambawan Architect. (Psalm 19:1) And, iumi savve tingim tu wei wea datfala Creator and ‘wakaman blo hem wea garem skill’ tufala hapi for waka gud tugeta for longtaem.
9 Taem tufala wea no perfect waka klos tugeta, samfala taem hem no isi for tufala deal witim each other. Jehovah and Son blo hem no olsem! Datfala Son waka witim Dadi for longtaem and hem sei: “Mi hapi front lo hem evritaem.” (Proverbs 8:30) Yes, hem hapi for waka witim Dadi blo hem, and dadi blo hem tu hapi for waka witim hem. Isisi, datfala Son hem kamap barava olsem Dadi blo hem, and lane for followim olketa nambawan wei blo God. Dastawe, iumi no sapraes lo hao frenship blo Dadi and Son hem barava strong! Iumi fit for sei love wea tufala garem for each other hem nao oldest and strongest love lo full universe.
Luksavve Long Jesus wea David and Solomon Piksarem
14 Wanfala man nomoa garem bigfala savve winim Solomon. Hem nao Jesus Christ wea sei olsem abaotem hemseleva: “Samwan wea important winim Solomon nao hem stap.” (Matt. 12:42) Jesus nomoa savve talem ‘toktok wea savve mekem man laef olowe.’ (John 6:68) Tingim diswan. Sermon Long Maunten storyim samfala samting moa abaotem olketa proverb bilong Solomon. Solomon storyim samfala samting wea savve mekem man wea worshipim Jehovah for hapi. (Prov. 3:13; 8:32, 33; 14:21; 16:20) Jesus strongim hao man savve hapi sapos hem duim olketa samting wea join witim worship bilong Jehovah and taem hem lukim olketa promis bilong God kamap tru. Jesus hem sei: “Olketa wea luksavve olketa needim God bae hapi, bikos kingdom bilong God hem bilong olketa.” (Matt. 5:3) Taem pipol followim wanem Jesus teachim, diswan mekem olketa fren gud witim “man wea givim laef,” Jehovah. (Ps. 36:9; Prov. 22:11; Matt. 5:8) Christ nao showimaot “bigfala savve bilong God.” (1 Cor. 1:24, 30) From Jesus Christ nao Messiah King, hem garem “datfala spirit bilong bigfala savve.”—Isa. 11:2.
Faendem Gudfala Point
g 5/14-E 16
“Wisdom Nao Singaot Kam” —Hao, Iu Herem?
▪ The World Book Encyclopedia sei Bible nao hem “buk wea staka pipol garem start from bifor kam kasem distaem.” Hem sei moa hao “olketa transleitim staka taem and lo staka languis moa, winim eni nara buk.” Full Bible or samfala part blo hem, stap lo klosap 2,600 languis, wea datwan mekem winim 90 percent blo pipol lo earth nao olketa garem.
▪ Wisdom hem “gohed for singaot big” tu lo really wei. Matthew 24:14 sei: “Olketa disaepol bilong mi bae talemaot disfala gud nius abaotem Kingdom long evri ples long world mekem pipol long evri kantri mas herem. Bihaen datwan nao, [world wea iumi stap lo hem distaem] bae finis.”
APRIL 14-20
GUD SAMTING FROM BIBLE PROVERBS 9
Kamap Samwan wea Wise, No Samwan for Tok Spoelem Narawan
‘Lisin lo Toktok blo Olketa wea Wise’
4 Maet iumi faendem hard for acceptim kaonsel wea samwan givim lo iumi, and maet iumi feel nogud tu. Why nao olsem? Iumi savve iumi no perfect, bat taem samwan talem stret mistek blo iumi maet hem no isi for acceptim datwan. (Readim Eklesiastes 7:9.) Maet iumi mekem excuse and sei man wea kaonselem iumi no garem stretfala reason for givim iumi datfala kaonsel, or maet iumi sei hem no story kaen lo iumi. Or maet iumi sei: ‘Man hia no garem raet for kaonselem mi from hem tu garem olketa wik point!’ Sapos iumi tingse datfala kaonsel no fitim iumi, maet iumi no followim datwan, or maet iumi go story lo samwan wea bae talem samting wea iumi laek herem.
‘Lisin lo Toktok blo Olketa wea Wise’
12 Wanem nao savve helpem iumi for acceptim kaonsel? Iumi need for hambol and tingim hao iumi no perfect and samfala taem iumi no tingting gud bifor iumi duim samting. Olsem iumi storyim finis, firstaem Job garem tingting wea no stret abaotem samting. Bat gogo hem acceptim kaonsel, and Jehovah blessim hem bikos hem hambol. Job acceptim kaonsel wea hem kasem from Elihu nomata Elihu young winim hem. (Job 32:6, 7) Sapos iumi hambol iumi bae acceptim kaonsel, nomata iumi tingse iumi shud no kasem datwan, or samwan wea kaonselem iumi hem young winim iumi. Wanfala elder lo Canada sei, “Olketa narawan savve lukim olketa wik point blo iumi winim iumiseleva, so taem narawan kaonselem iumi datwan hem for helpem iumi gohed gud lo spiritual wei.” Iumi evriwan need for gohed waka hard for showimaot olketa gudfala wei and for duim gud ministry blo iumi.—Readim Sams 141:5.
13 Luksavve kaonsel hem wanfala wei wea Jehovah showimaot hem lovem iumi. Jehovah laekem iumi for garem gudfala laef. (Provebs 4:20-22) Hem showimaot hem lovem iumi taem iumi kasem kaonsel from nara Christian, or iumi readim samting lo Bible or olketa pablikeson blo iumi wea helpem iumi. Hebrew 12:9, 10 sei: “God stretem iumi for helpem iumi.”
14 Tingim hao kaonsel savve helpem iumi. Tingim hao kaonsel savve helpem iumi. Taem iumi kasem kaonsel, maet iumi tingse man wea kaonselem iumi no tingim feeling blo iumi. Hem tru, man wea givim kaonsel shud traem best for kaen taem hem duim datwan. (Galatia 6:1) Bat nomata iumi tingse man wea kaonselem iumi hem tok stret tumas lo iumi, hem gud for tingim hao datfala kaonsel savve helpem iumi. Bae hem gud for tingim: ‘Nomata mi no laekem hao datfala man story lo mi, maet samting hem talem lo mi hem tru. Nomata mi savve hem garem olketa wik point, waswe, kaonsel blo hem savve helpem mi?’ Bae hem wise for lisin and followim kaonsel wea iumi kasem.—Provebs 15:31.
‘Long Wisdom Olketa Day Bilong Iumi Bae Kamap Planti’
Tingting bilong wanfala wise man abaotem repruv hem opposite long tingting bilong man for tokspoelem. Solomon hem sei: “Givim repruv long wanfala wise man and hem bae lovem iu. Givim samting long wisefala man and hem bae kamap moa wise.” (Proverbs 9:8b, 9a) Wanfala wise man savve hao “no eni discipline hem hapi samting taem man kasem, bat hem mekem man sorre; nomata olsem, bihaen for olketa wea kasem training from diswan hem bae garem frut bilong peace, hem nao, raeteous fasin.” (Hebrews 12:11) Nomata kaonsel maet luk olsem hem mekem iumi pain tumas, why nao bae iumi faetem or againstim sapos wei for acceptim bae mekem iumi moa wise?
Datfala wise king hem go ahed moa: “Givim savve long samwan wea raeteous and hem bae lanem moa samting.” (Proverbs 9:9b) No eniwan hem wise tumas or olo tumas mekem hem no need for go ahed for lane. Iumi barava hapi tumas for lukim olketa olo acceptim truth and mekem wanfala dedication long Jehovah! Letem iumi tu trae for garem disfala fasin for lane and mekem mind stap wekap.
‘Long Wisdom Olketa Day Bilong Iumi Bae Kamap Planti’
Wei for waka hard for kasem wisdom hem responsibility bilong iumi wanwan. For mekhae long diswan Solomon hem sei: “Sapos iu kamap wise, iu kamap wise for iuseleva; and sapos iu nao tokspoelem, iu nao bae karem, iuseleva nomoa.” (Proverbs 9:12) Wise man hem wise, for gud samting bilong hemseleva, and man wea tokspoelem bae hemseleva kasem blame for wei wea hemseleva safa. Tru nao, iumi harvestim samting wea iumi plantim. So, letem iumi “lisin gud long wisdom.”—Proverbs 2:2.
Faendem Gudfala Point
Olketa Main Point From Buk Bilong Proverbs
9:17—Wanem nao “wata wea olketa stealim,” and why nao hem “swit”? From Bible markem wei for enjoyim sex insaed marit olsem wei for drinkim klinfala wata from wanfala well, wata wea olketa stealim hem piksarem wei wea man duim sex long wei wea haed witim samwan wea hem no maritim. (Proverbs 5:15-17) Wei wea olketa tingse no eniwan bae faendaot long samting wea olketa duim, mekem datfala wata hem olsem samting wea swit long olketa.
APRIL 21-27
GUD SAMTING FROM BIBLE PROVERBS 10
Wat Nao Hem Minim for Garem Laef wea Rich?
‘Olketa Blessing Hem for Man wea Raeteous’
Man wea raeteous kasem nara gudfala samting. “Man wea waka witim lesy hand bae kasem lelebet samting nomoa, bat hand bilong man wea waka hard bae mekem hem rich. Son wea duim samting followim fasin for luksavve hem hipimap samting long hot season; son wea duim nogud samting hem sleep long taem bilong harvest.”—Proverbs 10:4, 5.
Samting wea king talem long olketa wakman long taem bilong harvest hem barava important. Harvest season hem no taem for sleep. Hem taem for waka hard for planti hour. Tru nao, hem taem for hariap.
Taem hem tingim harvest, no bilong grain, bat bilong pipol, Jesus talem olketa disaepol bilong hem: “Harvest hem big, bat olketa wakman no staka. Dastawe, askem Masta bilong harvest [Jehovah God] for sendem aot olketa wakman long harvest bilong hem.” (Matthew 9:35-38) Long year 2000, winim14 million pipol attendim Memorial bilong dae bilong Jesus—diswan hem tufala taem moa big winim namba bilong Olketa Jehovah’s Witness. So, hu nao savve denyim hao ‘olketa field redy finis for harvest’? (John 4:35) Olketa trufala worshiper askem Masta for moa wakman, and long semtaem olketa barava trae hard long waka for mek-disaepol for followim samting olketa prea abaotem. (Matthew 28:19, 20) And Jehovah barava blessim waka bilong olketa! Long 2000 service year, winim 280,000 niu wan baptaes. Olketa hia trae for kamap olketa teacher bilong Word bilong God tu. Iumi bae kasem hapi and feeling for satisfae long disfala harvest season taem iumi share evribit long disfala waka for mek-disaepol.
Wakabaot Long ‘Road Bilong Stretfala Fasin’
Solomon point go long wei wea raeteous fasin hem important. Hem sei: “Strong taon bilong rich man hem olketa samting wea hem garem wea garem hae price. Samting wea spoelem poor pipol hem wei wea olketa poor. Samting wea raeteous wan duim lead go long laef; samting wea wicked wan duim lead go long sin.”—Proverbs 10:15, 16.
Riches savve protectim man from olketa samting long laef wea hem no plan for hem, long sem wei wea strongfala wall bilong wanfala taon hem mekem olketa insaed feel sef. And wei for poor savve spoelem man taem samting hem no expectim hem happen. (Ecclesiastes 7:12) Bat, maet datfala wise king min tu for showimaot wanfala danger wea stap for man wea rich and man wea poor tu. Hem isi for wanfala rich man putim evri trust bilong hem long olketa riches bilong hem, wea hem tingim olsem “wall wea protectim hem.” (Proverbs 18:11) And wanfala poor man savve mistek for tingse poor living bilong hem mekem future no garem hope. So, tufala evriwan fail for mekem gudfala nem witim God.
it-1-E 340
Blessing
Jehovah Blessim Olketa Man. “Blessing blo Jehovah nao mekem man for rich, and olketa blessing blo Hem no kosim eni pain.” (Pr 10:22) Jehovah blessim olketa wea hem appruvim taem hem protectim, provaed for olketa, leadim olketa, mekem olketa garem gud laef, and givim wanem olketa needim, wea datwan mekem olketa for kasem gud samting.
Faendem Gudfala Point
Hapi wea Iumi Kasem Taem Iumi Wakabaot Followim Faithful Fasin
18 “Blessing bilong Jehovah,” hem nao mekem pipol bilong hem rich long spiritual wei. And hem promis hao hem bae “no addim eni pain witim datwan.” (Proverbs 10:22) Sapos olsem, why nao God letem plande long olketa loyal pipol bilong hem for kasem olketa test and hard taem wea savve mekem olketa safa and kasem pain? Olketa hard taem and problem kasem iumi bikos long thrifala main reason. (1) Iumi man wea sin. (Genesis 6:5; 8:21; James 1:14, 15) (2) Satan and olketa demon bilong hem. (Ephesians 6:11, 12) (3) World hem nogud tumas. (John 15:19) Jehovah hem no mekem olketa nogud samting kamap, bat hem letem olketa for happen. For tok stret, “evri gudfala present and evri perfect present hem from antap, from hem kam from Dadi bilong olketa laet long heven.” (James 1:17) Tru nao, olketa blessing bilong Jehovah no savve mekem man kasem pain.
APRIL 28–MAY 4
GUD SAMTING FROM BIBLE PROVERBS 11
No Talem Datwan!
Faithful Fasin Leadim Olketa wea Honest
Faithful fasin bilong man wea honest and wicked fasin bilong badfala man hem savve affectim pipol. King bilong Israel sei olsem: “From mouth bilong hem man wea apostate hem spoelem narafala man, bat savve hem sevem olketa wea raeteous.” (Proverbs 11:9) Tru nao, wei for tok laea againstim samwan, gossip wea spoelem man, dirty toktok, and iusles story hem savve spoelem olketa narawan. Bat long narasaed, toktok bilong raeteous wan hem klin, hem ting raonem firstaem, and hem kaenfala. Savve hem sevem hem bikos faithful fasin bilong hem nao pruv wea showimaot hao olketa wea accusim hem olketa laea.
Faithful Fasin Leadim Olketa wea Honest
Pipol long taon wea followim honest wei apim peace and gud living and buildimap olketa narawan insaed community. Datwan mekem wanfala taon hem kasem glory—hem go ahed gud. Olketa wea talem toktok wea laea againstim man, spoelem man, and wea rong mekem wei for no stap gud, for no hapi, no garem wan mind, and mekem trabol kamap. Diswan savve barava olsem sapos olketa wea garem hae position nao duim diswan. Taon wea olsem bae olabaot, no stret, and bae hem brekdaon saed long fasin and maet saed long selen tu.
Principle wea stap long Proverbs 11:11 fitim tu pipol bilong Jehovah taem olketa kaban witim each other long olketa kongregeson wea olsem olketa taon. Wanfala kongregeson wea spiritual pipol—honest pipol wea faithful fasin bilong olketa leadim olketa—stap hem wanfala sekson wea hapi, active, and savve helpem pipol, wea bringim honor long God. Jehovah blessim datfala kongregeson, and hem bae grow long spiritual saed. Samtaem, samfala wea no hapi and no satisfae, wea laek for faendem wik point and wea tok againstim wei for duim samting, olketa olsem wanfala “poison rut” wea savve grow and gogo poisonim olketa wea firstaem olketa stap gud nomoa. (Hebrews 12:15) Olketa wea duim olsem planti taem want for kasem paoa and hae position. Olketa mekem olketa story gogo raon wea sei kongregeson or maet olketa elder, no followim justice, savve daonem sekson bilong nara kala skin or kaen samting olsem. Tru nao, mouth bilong olketa savve mekem wei for divaed kamap insaed kongregeson. Iumi shud no lisin long kaen toktok olsem and iumi shud trae hard for kamap spiritual pipol wea mekem peace and wan mind for kamap insaed kongregeson.
Faithful Fasin Leadim Olketa wea Honest
Barava nogud samting nao savve kamap from man wea no garem fasin for luksavve, or wea “short long heart”! Hem no hol bak for story gogo diswan lead go long wei for tok laea againstim or tokspoelem samwan. Olketa elder wea kasem appointment mas kwiktaem stopem diskaen nogud wei. No olsem “man wea short long heart,” man wea garem fasin for luksavve hem savve wanem taem nao for stap kwaet. Winim wei for talemaot secret toktok, hem savve kavarem samting. From, hem savve hao tongue wea man no careful witim savve spoelem pipol, man wea garem fasin for luksavve hem “faithful long spirit.” Hem loyal long olketa narawan wea biliv and hem no talemaot olketa secret samting wea maet putim olketa long danger. Hem nambawan blessing for kongregeson taem hem garem olketa wea keepim faithful fasin!
Faendem Gudfala Point
g20.1 11, box
Wanem Iu Savve Duim Taem Iu Stress
“FOR KAEN SAVVE HELP FOR DAONEM STRESS”
“Man wea kaen lo narawan bae kasem gud samting, bat man wea raf bae kasem nogud samting.”—PROVERBS 11:17, NW.
Buk Overcoming Stress storyim wei for kaen savve help for daonem stress. Doctor Tim Cantopher wea raetem buk hia sei for kaen lo olketa narawan savve mekem man healthy and hapi. Bat man wea no kaen hem no hapi bikos hem no savve klos lo olketa narawan.
Iumi savve daonem stress tu sapos iumi no ting daonem iumiseleva. Example, iumi shud duim nomoa wanem iumi fit for duim. Jesus Christ sei: “Iu mas lovem narawan long sem wei wea iu lovem iuseleva.”—Mark 12:31.