“Mi Kasem Staka Nogud Samting From Mi Criminal and Laekem Tumas Selen”

LAEF BLO MI BIFOR

Mi born lo Tiranë, main city blo Albania. Famili blo mi poor. Dadi blo mi hem honest man wea waka for staka hour lo day for kasem selen for lukaftarem mifala. Bat mifala famili stragol for kasem selen wea mifala needim. Taem mi young, mi savve feel sorre tumas bikos mifala poor. Go kasem taem mi big, plande taem mi no garem eni shoe for werem and no garem inaf kaikai.

Taem mi young boy, mi start for steal. Mi tingse datwan helpem famili blo mi for kasem wanem mifala needim. Gogo police arrestim mi. So lo 1988, taem mi 14 years old, dadi blo mi sendem mi lo wanfala skul for stretem mi. Mi stap lo there for tufala year and mi lane for kamap welder. Taem mi lusim skul hia, mi laek waka hard for kasem selen and for honest, bat mi no faendem eni waka. Staka pipol no garem waka bikos plande problem saed lo politik gohed lo Albania. Mi feel nogud lo datwan, so mi start for spendem taem witim olketa fren blo mi bifor and start for steal moa. Gogo police arrestim mi and olketa fren blo mi and putim mifala lo prison for thrifala year.

Bihaen mi aot from prison, mi gohed brekem law. Economy lo Albania barava nogud and evri samting lo kantri hem olobaot. Lo datfala taem, mi kasem staka selen from mi duim olketa samting wea brekem law. Wantaem, mi witim tufala nara man pointim gun lo man taem mifala steal and police arrestim tufala, bat mi ranawe from kantri mekem mi no go lo prison for staka year. Lo datfala taem, mi marit finis, and mi witim waef blo mi, Julinda, garem baby boy.

Mifala go kasem England. Mi plan for startim niu laef lo there witim waef and son blo mi, bat hem hard tumas for mi changem wei blo mi. No longtaem bihaen, mi brekem law moa, bat distaem mi salem olketa drug and kasem big selen from datwan.

Hao nao tingting blo Julinda abaotem wei for mi salem olketa drug? Julinda sei: “Taem mi growap lo Albania, mi wish nomoa for mi no poor. Mi willing for traem eniting mekem mi garem gud laef. Mi tingse selen nao bae mekem laef blo mifala gud, so mi barava sapotim Artan taem hem laea, steal, and salem olketa drug. Mi sapotim eni samting hem duim for kasem selen.”

Then lo 2002, laef blo mifala change and hope blo mifala for garem gudfala future hem end. Police arrestim mi taem mi holem staka drug and olketa putim mi lo prison moa.

BIBLE CHANGEM LAEF BLO MI

Samting wea Bible storyim start for affectim laef blo mi nomata mi no luksavve lo datwan. Lo year 2000, Julinda meetim Olketa Jehovah’s Witness and start for studyim Bible witim olketa. Mi no interest for story abaotem Bible bikos mi tingse hem boring nomoa. Bat Julinda laekem tumas Bible. Julinda sei: “Famili blo mi savve lotu, and mi laekem tumas and respectim wanem Bible talem. Mi laek tumas for savve wanem Bible hem teachim and mi hapi tumas for studyim Bible witim olketa Witness. Staka samting wea Bible teachim mek sense lo mi. Wanem mi lanem helpem mi for changem samfala samting lo laef blo mi, bat mi still tingse selen nao bae mekem mifala hapi. Bat then tingting blo mi barava change taem police arrestim Artan. Seknomoa mi luksavve wanem Bible talem abaotem selen hem tru. Mifala barava trae for kamap rich, bat datwan nating mekem mifala hapi. Mi luksavve mi need for barava followim olketa standard blo God.”

Lo 2004, mi aot from prison, and no longtaem bihaen mi trae for go bak moa for salem olketa drug. Bat tingting blo Julinda hem change and samting wea hem talem stretem tingting blo mi. Julinda sei: “Mi no laek tekem selen blo iu moa. Mi laekem hasband blo mi and dadi blo olketa pikinini blo mi for kam bak and stap witim mifala.” Mi seke lo tru samting wea hem talem. Mi no stap witim famili blo mi for staka year. Mi tingting tu abaotem plande nogud samting wea mi kasem from mi no honest lo wei for kasem selen. So mi disaed for changem olketa wei blo mi and stop for associate witim olketa old fren blo mi.

Samting wea barava affectim mi nao hem taem mi go witim waef and tufala son blo mi lo wanfala meeting blo Olketa Jehovah’s Witness. Mi laekem pipol wea mi meetim lo there, olketa honest and kaen. Gogo mi start for studyim Bible.

Mi lanem lo Bible hao “enikaen nogud samting hem kamaot from wei for laekem tumas selen, and samfala wea garem kaen wei olsem . . . mekem olketa seleva for kasem staka problem wea barava spoelem olketa.” (1 Timothy 6:9, 10) Experience blo mi showimaot datfala scripture hem barava tru! Mi sorre tumas lo olketa nogud samting wea mi duim bifor bikos hem spoelem mi witim famili blo mi. (Galatia 6:7) Taem mi lane abaotem love wea Jehovah and Son blo hem, Jesus Christ, garem for mifala, mi start for changem wei blo mi. Mi start for no tingting tumas abaotem miseleva bat tingting abaotem olketa narawan, and diswan minim tu for spendem moa taem witim famili blo mi.

GUD SAMTING WEA MI KASEM

Mi kasem gud samting from wei for followim disfala advaes lo Bible: “Iufala mas no laekem tumas selen, bat iufala mas hapi nomoa long samting wea iufala garem.” (Hebrew 13:5) Distaem mi garem peace lo mind and gudfala konsens. And diswan mekem mi hapi winim enitaem bifor. Marit blo mitufala gohed strong, and famili blo mi fren gud tugeta.

Bifor mi tingse wei for garem staka selen bae mekem mifala hapi. Distaem mi barava lukim hao wei for brekem law and laekem tumas selen mekem mi kasem staka problem. Mifala no rich, bat lo tingting blo mi, mifala faendem samting wea barava important, hem nao for fren witim Jehovah God. Wei for mifala famili worshipim hem mekem mifala hapi tumas.