Iusim Gud Taem wea Iutufala Spendem Tugeta

Staka hasband and waef faendem dat nomata tufala spendem taem tugeta, tufala no savve communicate gud. Wat nao samfala reason wea kosim datwan?

• Tugeta bat no feel klos lo each other—why nao olsem?

• Wat iu savve duim

• Wat samfala couple talem

• Discussion guide

Tugeta bat no feel klos lo each other—why nao olsem?

• Taed Tumas

  “Taem mitufala garem taem for spendem tugeta, staka taem hasband blo mi hem taed tumas or mi nao taed tumas. Taem mi feel taed, mi savve kros lo olketa smol samting nomoa. So hem beta for mitufala watch TV nomoa.”—Anna.

• Online distraction

  “Social media and olketa online entertainment wea iumi watchim savve weistim taem blo iumi. Iumi savve spendem staka hour lo datwan and no even story lo spouse blo iumi. Hem olsem iumi no stap lo sem rum.”—Katherine.

• Garem difren interest

  “Afta hasband blo mi kam bak from waka, staka taem hem savve busy lo olketa hobby blo hem. Hem olraet for hem duim datwan bikos hem waka hard. Bat mi wish nomoa mitufala savve spendem moa taem tugeta.”—Jane.

• Waka

  “Technology savve mekem man gohed waka nomata hem stap lo haos. Staka taem, mi savve replyim olketa e-mail and text message from waka lo taem wea mi shud spendem witim waef blo mi.”—Mark.

Wat iu savve duim

• For spendem taem tugeta hem wanfala need, no samting for duim bae chance nomoa.

  Bible principle: “Luksavve long olketa samting wea barava important.”—Philippi 1:10.

  Tingim diswan: Hao, olketa akson blo iu showim dat iu ting lo marit olsem moa important winim waka or hobby blo iu? Hao, iu spendem taem witim spouse blo iu only taem iu garem spare taem?

  Tip: Markem taem for spendem witim spouse blo iu lo taem wea no eniting bae disturbim iutufala.

  “Mi laekem tumas taem hasband blo mi mekem plan for mitufala spendem taem tugeta. Datwan mekem mi feel spesol, and hem mekem feel savve dat hem laek for spendem taem witim mi. Datwan mekem mi lovem hem go moa.”—Anna.

• Lane for “putim away” olketa device blo iutufala.

  Bible principle: “Taem hem stap for evri samting.”—Ecclesiastes 3:1.

  Tingim diswan: Haomas taem nao iu letem text message or notification for stopem iu for givim full attention lo spouse blo iu?

  Tip: Traem best for at least kaikai tugeta wantaem each day and putim away phone blo iutufala. Taem for kaikai tugeta hem gud chance for storyim lo each other evriting wea happen lo datfala day.

• If possible, duim shopping and olketa waka lo haos tugeta.

  Bible principle: “Tufala hem beta winim wanfala bikos tufala savve kasem staka gud samting for hard waka blo tufala.”—Ecclesiastes 4:9, footnote.

  Tingim diswan: Haomas taem nao wanfala lo iutufala nomoa duim olketa waka lo haos?

  Tip: Waka tugeta and helpem each other nomata datfala waka no needim tufala person for duim.

  “Shopping, wasim olketa pleit, foldim olketa kaleko, waka raonem haos—ting lo evri waka hia olsem chance for spendem taem tugeta and hem no haos waka nomoa.”—Nina.

• Balance lo wat iu expectim from each other

  Bible principle: “Showimaot . . . iufala no ova tumas.”—Philippi 4:5.

  Tingim diswan: Hao nao iu savve showim dat iu balance lo wat iu expectim from spouse blo iu?

  Tip: Story tugeta for understandim need blo each other. Mekem disison wea iutufala agree lo hem and sapotim datwan.

  “Hasband blo mi hem active person, bat mi garem health problem wea mekem mi no savve duim staka samting. Staka taem mi encouragem hem for go duim tings wea hem enjoyim, and bae mi lukim hem taem hem kam bak. Mi stay lo haos for rest and hem go aot for exercise. Mitufala evriwan feel hapi bikos mitufala duim wat mitufala need for duim.”—Daniela.

Discussion guide

First samting, each wan lo iutufala savve ting raonem olketa kwestin lo daon seleva. Then, discussim ansa blo iutufala witim each other.

• Lo tingting blo iu, hao, distaem iu and spouse blo iu spendem inaf taem tugeta?

• Wat nao effort wea spouse blo iu duim for iutufala spendem taem tugeta wea iu appreciatim?

• Wat nao iu laekem spouse blo iu for impruv lo hem?

• Haomas taem nao iu letem technology for distractim iu for givim full attention lo spouse blo iu taem hem story?

• Hao nao iu and spouse blo iu savve balance lo wat iutufala expectim from each other?

• Wat nao iutufala evriwan need for changem dis week mekem iutufala savve spendem moa taem tugeta?